Adũndó mbi na 22/12/1929, ka Noville yakere kɔdɔrɔ mɛ na afɛrmɛ gumbaya mɛndó so dã na Bastogne kaya kã ti Belgique. Mbi ndo da bɛ mbi na aye zu mɛndó aɔ ka fɛrmɛ na ngoi mɛndó mbi dɛ nyingambi ndoni kɔi na awa dũngɔ mbi. Mbi ná nyita mbi Raymond e ndo hɛ̃ndó tɛ hɛ̃ abagala bi zu, wa e ndo za ngandó ti nɛngɔ ya, e si na ale tɛ. Kaya yakere kɔdɔrɔ nikondó tɛ e ko, azi ndo lendó kwa ndoni kɔi, wa ala ndo zangbi ngandó ka popo tɛrɛ ala.

Emile ná Alice mɛ awa dũngɔ mbi ndo sambelandó ka Katolikɛ. Ala ndo gwendó sambela na layenga zu. Kanda na bulu ti 1939 ko, wa sungɔ lége kɔi ti ngoi zu londó Angleterre wa lo ga kaya kɔdɔrɔ tɛ e, lo hɛ̃ndó to mbi mbeti kɔi mɛ bɛli ni tɛnɛ ya Wambangɔ bɛ (mɛ ndɛ ndo ili ni ya Lamuka!). Mbala kɔi to mbi gbɔ̃ nda mbilimbili ti aye mɛndó lo ndo di kaya mbeti niko wa lo banda dingɔ Ngbangɔ. Ngoi mɛ lo zia gwengɔ sambela ka katolikɛ ko, avuazɛ̃ tɛ e mɛndó e ná ala na mangbi abanda temelangɔ lo. Ala kpãndó mbamba ndali to mbi ya, lo ngbã bo ka katolikɛ, wa ni sindó na tɛnɛ ka popo tɛrɛ la.

Mbi mandó sɔngɔ bɛ gba na ngoi mɛndó ndo li ye ti ngaso tɛrɛ to mbi. Ni tondó mbi ya, mbi gi lisalisi tɛ Nzapa kaya sambela mɛ atɛnɛ tɛnɛ ni na ebandeli ti mbeti mɛ. Mbi mandó dengɔ bɛ na ngoi mɛndó avuazɛ̃ zia giangɔ to mbi. Wa mbi yendó na bɛ mbi kɔi ya, Yehova du “wa mangɔ sambela.”

Azi ti Nazi mɛ ka Allemagne abindó to tɛrɛ azi ti Belgique na 10/05/1940, ni lindó ya, azi gba kpɛlɛ kɔdɔrɔ ni. Ndasewa tɛ e kpɛndó gwe ka sudi ti France. So lége e lindó ya to mɛ asoda ti Allemagne ná asoda ti France ndo tiri.

 Ngoi mɛndó e diri ka fɛrmɛ ko, e hũndó ya, anzĩ aye tɛ e. Bo mbo tɛ e Bobbie ndó la aga yamba e. Ngoi mɛndó mbi hũ akpale niko ko, mbi hũndandó tɛrɛ mbi ya, ‘nda mɛ to ndo si na apɛnɔ ngaso nɛ’?

Na ya ngoi niko ko, nyita kɔli Emile Schrantz, a mɛ wa sungɔ lége ti ngoi zu, lo nga biazo agandó ti bangɔ e, wa lo sangandó ngunu bɛ e. Lo kambisandó hɛ̃ e yangondo na lége ti Ngbangɔ nda mɛ e ndo hũ pɛnɔ, wa lo hɛ̃ ngandó mbi gbinya na ndo ambanga ahũnda tɛ mbi mɛ aba dungɔ lɛ ngɛ̃́. Mbi lindó ya mangbi tɛ mbi ná Yehova ti kpengbani wa mbi ye ngandó na bɛ mbi kɔi ya, lo du Nzapa ti songo.

Abɛse na ya ngoi nikondó ti to ko, ndasewa tɛ e ngbã bondó lá kwɛ sololangɔ na yɔngɔrɔni na Atɛmwɛ tɛ Yehova. Na nzɛ ti 08/1943, nyita José-Nicolas gandó ti bangɔ fɛrmɛ tɛ e wa lo lindó diskur kɔi. Kaya diskur ni ko lo hũndandó ya, “Zo mɛ ye mungɔ batisimɔ na?” To mbi yandó ti lo wa mbi ya ngandó ti mbi. E gwendó ti mungɔ batisimɔ kaya ngu kɔi mɛ yakere mɛndó so dã na fɛrmɛ tɛ e.

Na 12/1944 asoda ti Allemagne abindó to ti ndani ka occidental mɛ ndo ili ni ya, to ti Ardennes. E ndo dundó so dã na ndo mɛ to ndo tiri na ni wa e ngbã bondó kaya da tɛ e, ta e ndo sindó gigi ma na pɛ nzɛ kɔi. Bi kɔi mɛndó mbi si ti hɛ̃ngɔ asa tɛ ti tɛngɔ ko, bɔ̃mbe tindó wa akala ngandó ada. Soda ti Amerique kɔi mɛndó so gunda mbi adɛndó kɔngɔ ya, “se sese!” mbi kpɛndó wa mbi se so gunda lo, lo vĩndó li mbi na kaskɛ tɛ lo ti nɛngɔ ya, abata mbi.

Na pɛ to, e luandó lége ti tɛnɛngɔ tɛnɛ ngoi zu na ayata ti ya bombi ti Liège mɛ na kilomɛtrɛ 90 ka Nɔrdi ti ndo mɛ e da. Na ya ngoi niko ko, esindó na grupɛ ti bombi kɔi mɛ yakere ka Bastogne. Mbi bandandó lengɔ kwa ti fangɔ taxɛ, wa mbi lua ngandó lége ti mandangɔ droit. Na pɛni mbi bandandó lengɔ kwa kaya guvɛrnɛma tɛ e. Na 1951 e lɛkɛndó ya, kota bombi ti kɛlɛ kɛlɛ li tɛrɛ lo ka Bastogne. Azi ɔngɔ 100 agandó kota bombi ni, wa nyita wali Elly Reuter mɛ wa sungɔ lége ti ngoi zu mɛ na ge ge ge aga ngandó kota bombi ni. Lo kpɛndó na velo na ya kilomɛtrɛ 50 ti nɛngɔ ya lo si ka ndo ni. Mbi ná lo e yengbindó wa e tindó afiancé. Elly luandó  invitasiɔ̃ ti gwengɔ kalasi ti Gileade ka États-Unis. Lo sundó mbeti lo to hɛ̃ la ti kambisangɔ nda mɛ lo kɛ̃ invitasiɔ̃ ni. Nyita kɔli Knorr, mɛndó wa tambwisangɔ linɔ tɛ azi tɛ Yehova atɛnɛndó na songo zu ya, ngoi mɛndɛ̃ mɔ ná kɔ mɔ na gwengɔ kalasi ti Gileade. E lindó libala tɛ e na 02/1953.

Bo na ya bulu niko ko, mbi ná Elly e gwendó kota bombi ti ndo lɛ gigi zu mɛndó ali tɛrɛ lo ka Yankee mɛ ka New York. Kai mbi tengbindó na nyita kɔli kɔi, wa lo hɛ̃ndó mbi kwa kɔi mɛ nzɔ̃ni lo ili nga mbi ya, mbi ga mbi du ka Etats Unis. Na pɛ lingɔ sambela hɛ̃ Yehova mbi ná Elly e mundó ekateli ti kɛ̃ngɔ kwa niko, wa e dirindó ka Belgique ti nɛngɔ ya, e hɛ̃ ti e kaya grupɛ kɔi mɛ yakere mɛndó na awa fangɔ tɛnɛ ka da 10 ka Bastogne. Bulu kɔi so pɛni, e luandó nzɔ̃ tangɔ li gɛrɛ ti dũngɔ nyingambi ti kɔli kɔi mɛ ili lo la, Serge. Na vundu zu nzɛ mbalambala so pɛkoni Serge gãndó ngã kpengbani wa lo kpi ngandó. E kambisandó sɔngɔ bɛ tɛ e hɛ̃ Yehova na ya sambela, wa ni li ngandó ya, loyengɔ tɛ e na ndo nzɔ̃ dangɔ bɛ ti songɔ kwá ati kpengbani.

Na 10/1961 mbi luandó kwa kɔi mɛ ta ndo mu ngoi tɛ mbi zu ma, ni hɛ̃ndó mbi lége ya, mbi le kwa tɛ wa sungɔ lége ti ngoi zu. Bo na bi nikondó ko, ailindó mbi na telefɔnɛ ka Betele ti Belgique. Ala hũndandó mbi ya, bere mbi lengbi ti dungɔ dã ti bandangɔ lengɔ kwa ti kɛlɛ kɛlɛ (mɛ ndɛ ndo ili ni ya, wa bangɔ ndo kɛlɛ kɛlɛ). Mbi hũndandó ala ya, “elengbi ti bandangɔ na kwa tɛ awa sungɔ lége ti ngoi zu uzu ti nɛngɔ ya e li kwa ti kɛlɛ kɛlɛ?” Ala yendó ya, ĩ lengbi ti lingɔ ngaso. Na pɛ lengɔ kwa tɛ awa sungɔ lége ti ngoi zu nzɛ mwambe ko, e bandandó lengɔ kwa tɛ awa bangɔ ndo kɛlɛ kɛlɛ na 09/1962.

Na pɛ lengɔ kwa tɛ awa bangɔ ndo kɛlɛ kɛlɛ bulu sɛ ko, ailindó e ya, e ga e le kwa ka Betele ti Bruxelles. E bandandó lengɔ kwa kai na 10/1964. Kwa tɛ e ti fãnani hɛ̃ndó e anzɔ̃ sulu gba. Na pɛni nyita Knorr gandó ti bangɔ Betele tɛ e na 1965, na kamwangɔ zu, mbi luandó nzɔ̃ tangɔ li gɛrɛ ti tingɔ kɔi tɛ ayata mɛ ndo ba ndo filial. Na gesi, ailindó mbi ná Elly ya, e ga kalasi ti Gileade ti 41. Tɛnɛ mɛndó nyita Knorr tɛnɛ mɛ ali ndɛ abulu 13 ati na seni! Na pɛ mungɔ diplɔmɛ tɛ e ko, e dirindó ka Betele ti Belgique.

Na pɛ abulu gba, mbi luandó nzɔ̃ tangɔ li gɛrɛ ti salelangɔ kɔdɛ ti droit mɛndó mbi manda ti sambangɔ na tɛnɛ na lo tɛ awakwa tɛ Yehova ti mbilimbili mɛ ka Europe ná akɔdɔrɔ mɛndɛ̃. (Fil. 1:7) Ni lindó ya, mbi ti na mangbi na agbia ti kɔdɔrɔ 55 mɛ agbanzi kwa tɛ e kaya kɔdɔrɔ tɛ ala. Na se lɛ kpãngɔ kɔdɛ ti fangɔ ngbanga mɛ mbi manda na ndo ti uzu ko, mbi fandó tɛrɛ mbi mabere “wakwa tɛ Nzapa.” Bi zu mbi ndo gindó litambwisi tɛ Yehova na ya sambela, mbi hĩngandó ya, “bɛ gbia bere bɛ wa fangɔ ngbanga adu mabere kurã ti ngu ka bɛ ti Yehova. Lo ndo tambwisa ni na ndo zu mɛ bɛ lo ye.”—Mas. 21:1.

 Ye kɔi mɛndó mbi sepala na ni kpengbani adu tɛnɛ mɛndó mbi ná zo kɔi ti Parlɛma ti Europe e tɛnɛ. Mbi ndo hũndandó lo na ya angoi gba ya, e na lo e tengbi e solola wa lo ye ngandó ni. Lo tɛnɛndó ya, “mbi hɛ̃ mɔ bo miniti kũ, wa ta mɔ kpã miniti kɔi ndoni ma.” Mbi zundó na li mbi sese wa mbi bandandó lingɔ sambela. Zo ti Parlɛma mandó ngɔnzɔ wa lo tɛnɛ ya, nɛ la mɔ ndo li la nɛ? Mbi ya li mbi wa mbi hɛ̃ lo gbinya ya, “mbi hɛ̃ sia kɔli hɛ̃ Nzapa na lo mɛ ya, mɔ du kɔi tɛ aministre.” Lo tɛnɛ ya, “alengbi na nɛ?” Mbi fa lo na mbeti ti Roma 13:4. Na lo mɛ ya, lo ndo sambelandó ka Gongo (Protestant) ko, lo ndo yendó atɛnɛ ti ya Ngbangɔ. Kpale mɛndó ali tɛrɛ lo so pɛni nɛ? Lo di hɛ̃ndó mbi miniti 30, wa tɛnɛ mɛndó e ná lo e tɛnɛ adũndó ale ti nzɔ̃ni. Lo di tɛnɛ nga ya, lo ndo tɔndɔ kwa tɛ Atɛmwɛ tɛ Yehova.

Na ya abulu gba, Atɛmwɛ tɛ Yehova samba angbanga gba ka gbɛlɛ agbia ti Europe mɛ aba kɛ̃ngɔ yɔrɔngɔ tɛrɛ na ya kpale ti politikɛ, batangɔ ayangambi, futangɔ pako, nga na akpale mɛndɛ̃. Ni dundó nzɔ̃ tangɔ li gɛrɛ na lo tɛ mbi dungɔ ka popo tɛrɛ azi gba nga na hũngɔ se mɛ Yehova za na e ya, e nwɔ angbanga ni. Atɛmwɛ tɛ Yehova nwɔ angbanga ɔngɔ 140 ka gbɛlɛ agbia ti Europe!

Na ya bulu ti 1990, mbi lendó kwa ndoni kɔi na nyita kɔli Philip Brumley, ka biro ti kotani tɛ Atɛmwɛ tɛ Yehova, mbi le ngandó kwa ndoni kɔi na nyita kɔli Valter Farneti, ka Italie ti nɛngɔ ya, e samba ngbanga na ndombali ayata ti Cuba mɛndó agbanzi kwa tɛ e ka tɛ ala. Mbi sundó mbeti mbi to hɛ̃ Ambassade ti Cuba mɛ ka Belgique, wa na gesi mbi tengbindó na gbia mɛ wa fangɔ ngbanga tɛ e. Fãni ti uzu mɛndó e ga ti lingɔ bombi ko, ta e longandó lingɔ ni ma, na lo ti zangangɔ mangbi mɛndó ali ya, agbanzi kwa tɛ e .

Na pɛ gingɔ litambwisi tɛ Yehova na ya sambela ko, e hũndandó wa e luangandó lége ti tongɔ Ngbangɔ 5 000 ka Cuba. Ngbangɔ ni sindó wa akangbindó na ayata, na ngoi niko e yendó na bɛ e kɔi ya, Yehova sulu ge ge ge tɛ e. Na gesi e di e hũnda ngandó lége ti tongɔ Ngbangɔ 27 500, wa azi ti Guvɛrnɛma yendó. Zangɔ ayata kɔli ná ayata wali ti Cuba ti nɛngɔ ya, zo na zo lua Ngbangɔ tɛ lo nvɛ̃ni ahɛ̃ndó mbi dengɔ bɛ gba nvɛ̃ni.

Mbi gwendó ka Cuba fãni gba ti zangɔ na lo ti akpale mɛ ba sambangɔ ngbanga na lo ti kwa tɛ e. Na lo ni la, mbi tindó na nzɔ̃ mangbi na akota gbia ti Guvɛrnɛma gba.

Na bulu ti 1994 azi ɔngɔ 1 000 000 akpilindó na lo ti to mɛndó atiri na azi ti Tutsi ka Rwanda. Na vundu zu, ambanga ayata e mɛndɛ̃ akpili ngandó. Ni la, ayɔndó kati grupɛ kɔi tɛ ayata kɔli iɔ ya, ala lɛkɛ se mɛ elengbi ti zangɔ na ayata ti Rwanda, wa mbi ngandó ka popo tɛ ala.

Ngoi mɛndó grupɛ niko si ka Kigali mɛ capitale ti Rwanda ko, e hũndó anwa ti to ka ndo da ti biro mɛ ndo gbinyangbi na ambeti. E ma ngandó apandɛ ti siɔni na ndo ayata kɔli ná ayata wali mɛndó akpɔ la na kpangbala. Kanda akambisa ngandó hɛ̃ e se mɛndó ayata e awakristo ndo fangbi na songo ka popo tɛrɛ la. Na ndakisa, e tengbindó na nyita kɔi mɛ Tuti mɛndó akpɛ gwe bata tɛrɛ lo ka ndasewa tɛ nyita kɔi mɛ Hutu na pɛ bi 28. Na ngoi ti bombi ka Kigali ko, e lindó kwa kpengbani ti wambangɔ nga na sangɔ ngunu bɛ ayata kɔli ná ayata wali na ya nyingɔ ɔngɔ 900.

E fandó frɔ̃tiɛrɛ ti Zaïre mɛ ndɛ ndo ili ni ya, (République Démocratique du Congo) na lo ti gingɔ Atɛmwɛ ti Rwanda mɛndó akpɛ to agwe bata tɛrɛ la kaya camp mɛ dã na kɔdɔrɔ ti Goma. Na lo mɛ ya, ta e ndo lua ala ma ko, e lindó sambela hɛ̃ Yehova ya lo za e ti nɛngɔ ya, e lua la. E hũndó zo kɔi ndo nɔnɔ ndo ga ge na e wa e hũndandó lo ya, bere lo hĩnga Atɛmwɛ tɛ Yehova. “Lo yendó ya, ĩĩ mbi du Tɛmwɛ,” lo di tɛnɛ ya, “mbi sepala gwengɔ fangɔ ĩ na ndo mɛ kɔmite ti sekur da.” Na pɛ lingɔ bombi ti mangbi ndoni kɔi na kɔmite ti sekur ko, e tengbindó na azi mɛ kpɛ to 1 600 e wambandó bɛ la wa e sangandó ngunu bɛ la na ya nyingɔ. E di ngandó hɛ̃ la mbeti mɛ alo ka Bombi tɛ Adonzi. Tɛnɛ ti mbeti niko agbɔ̃ndó bɛ ayata kɔli ná ayata wali: “E ndo kpã ĩ ngoi zu na ya sambela tɛ e. E hĩnga ya, ta bɛ Yehova na lingɔ na ĩ ma.” Tɛnɛ mɛndó alo ka bombi tɛ Adonzi atindó mbilimbili. Ndɛ lo mɛ ko, Atɛmwɛ tɛ Yehova ɔngɔ 30 000 ndo li kwa hɛ̃ Yehova ka Rwanda na dengɔ bɛ zu!

Na pɛ lingɔ bulu 58 na ya libala tɛ e ko, ya mbi Elly kpindó na bulu ti 2011. Yehova wambandó bɛ mbi na ngoi mɛndó mbi ndo kambisa sɔngɔ bɛ tɛ mbi hɛ̃ lo na ya sambela. Mbi lua ngandó ngunu na ngoi mɛndó mbi ndo kambisa nzɔ̃ pa ti Lo-lengɔ Gbia mbi hɛ̃ avuazɛ̃.

Abɛse mbi ti na bulu ɔngɔ 90 ko, mbi ngbã bo lá kwɛ pangɔ nzɔ̃ pa pɔsɔ zu. Mbi nga na dengɔ bɛ ti lengɔ kwa mɛ aba sambangɔ ngbanga ka Betele ti Belgique, kambisangɔ aye mɛ mbi hĩnga hɛ̃ azi mɛndɛ̃, nga na zangɔ apalanga mɛ ndo li kwa ka Betele.

Aɔ ndɛ abulu 84 mɛndó mbi li sambela tɛ mbi ti uzu mbi hɛ̃ Yehova. Sambela niko adundó fãni ti uzu na ya dungɔ lɛ ngɛ̃́ tɛ mbi ti nɛngɔ ya, mbi dɔ dã na Yehova. Mbi ndo hɛ̃ lo sia kɔli na lo mɛ ya, lo ndo mandó asambela mɛ mbi ndo li hɛ̃ lo na ya dungɔ lɛ ngɛ̃́ tɛ mbi zu.​—Nz. 66:19. b