ANDO du kpengbani ya, mɔ bata prɔgramɛ tɛ mɔ ti mandangɔ Ngbangɔ ngoi zu na dengɔ bɛ? Ngoi mɛndɛ̃ azi zu ndo ma nga tɛrɛ la ngaso. Kanda binga li mɔ na ndo ye mɛ e ndo li ngoi zu, na ndakisa: gbɔ̃ngɔ ngu. Gbɔ̃ngɔ ngu ndo yɔ ngoi nga na ge ge ge, kanda e ndo ma tɛrɛ e nzɔ̃ni na pɛni! Ngama se ko la zo ndo gbɔ̃ ngu na pɛni lo ma tɛrɛ lo nzɔ̃ni ko, “zo ndo ma nga tɛrɛ lo nzɔ̃ni na pɛ dingɔ Ngbangɔ.” (Ef. 5:26) E ba ambanga kpale mɛ alengbi ti zangɔ e.

• Pɔna ngoi ti nzɔ̃ni. Mandangɔ Ngbangɔ tɛ zo nvɛ̃ni adu kɔi ka popo ti “aye mɛ ngbondoni” mɛ ayɔ ya wakristo li. (Fil. 1:10) Ti nɛngɔ ya, ta bɛ mɔ li na bi ná ngoi mɛ mɔ kpã ti mandangɔ na Ngbangɔ ma ko, na dungɔ nzɔ̃ni ya mɔ kpã prɔgramɛ tɛ mɔ ka ndo mɛ na dungɔ woni ya mɔ hũ ni. Bere mɔ lengbi nga ti lɛkɛngɔ ngoi tɛ mɔ ka lɛ telefɔnɛ bere ka lɛ mɔtrɛ ti nɛngɔ ya, akpale uzu ti mɔ mandangɔ Ngbangɔ.

• Pɔna ngoi mɛ alengbi ti dungɔ nzɔ̃ni na lo tɛ mɔ. Ni ndo du woni ka tɛ mɔ ti nɛngɔ ya, mɔ manda Ngbangɔ na pɛ ngoi gba bere na pɛ ngoi yakere? Mɔ la mɔ hĩnga kpale ti ya dungɔ lɛ ngɛ̃́ tɛ mɔ nzɔ̃ni. Lɛkɛ prɔgramɛ ti mandangɔ Ngbangɔ tɛ mɔ nzɔ̃ni wa kpã nga ni kaya bingangɔ li tɛ mɔ. Se mɔ hũ ya ta ngoi mɛ mɔ kpã ti mandangɔ Ngbangɔ tɛ mɔ nvɛ̃ni adu nzɔ̃ni ma ko, nda mɛ ta mɔ lengbi ti mungɔ ekateli ti mandangɔ na pɛ miniti 10 ma nɛ? Abɛse mɔ manda na ya miniti 10 gɛgɛrɛ ko, mɔ lengbi ti mandangɔ aye gba. Ngoi mɛndɛ̃ na ya miniti sui kɔi niko ko, mɔ na sepalangɔ ti nɛngɔ ya, mɔ di bakisa ngoi mɛndɛ̃ ti mandangɔ Ngbangɔ.​—Fil. 2:13.

• Pɔna uzu mbeti mɛ mɔ lengbi ti mandangɔ. Se du ya mɔ kũ tee ngoi ti mandangɔ Ngbangɔ tɛ mɔ lengbi wa di la mɔ pɔna ye mɛ mɔ na mandangɔ ko, ngoi mɛndɛ̃ ta mɔ na “salelangɔ ngoi tɛ mɔ nzɔ̃ni ma.” (Ef. 5:16) Nda mɛ ta mɔ lengbi ti lingɔ listɛ ti ambeti mɛ mɔ lengbi ti mandangɔ bere atɛnɛ mɛ mɔ ye mandangɔ ma nɛ? Na ndakisa se mɔ ndo hũnda tɛrɛ mɔ na ndo, na ndo ye kɔi mɛ ta mɔ gbɔ̃ ndani nzɔ̃ni ma ko, su ni kaya listɛ ti aye mɛ mɔ na mandangɔ ni na gesi. Ngoi zu ko la mɔ na kɔngɔ nda mandangɔ Ngbangɔ tɛ mɔ ko, mɔ lengbi ti bakisangɔ aye mɛndɛ̃ kaya listɛ ti aye mɛ mɔ na mandangɔ na gesi.

• Gbinyangbi kpale na ngoi mɛ mɔ hũ nzɔ̃ni. Li kpengbani mɔ du dã ti gbinyangbingɔ ngoi mɛ mɔ kpã, na ndakisa ngoi mɛ mɔ na mungɔ ti mandangɔ na Ngbangɔ bere aye mɛ mɔ ndo pɔna ti mandangɔ. Ta ye mɛ ngbondoni du ngoi mɛ e ndo lekisa bere aye mɛ e ndo manda ma, kanda adu mandangɔ ni ngoi zu.

Se du ya e ndo manda Ngbangɔ pɔsɔ zu ko, e na luangɔ nzɔ̃ kpale. E na dɔngɔ dã na Yehova, e na mandangɔ se ti mungɔ ekateli na ndara wa ni nga na sangɔ ngunu bɛ e.​—Yos. 1:8.