1-2. Nda mɛ adu ngbondoni ya, e manda pandɛ ti dungɔ lɛ ngɛ̃́ tɛ Samson nɛ?

 YE MƐ ndo ga ka li mɔ na ngoi mɛ mɔ ndo ma ila ti Samson nɛ? Ta kitɛ da ma ya, mɔ ndo da bɛ mɔ na zo kɔi mɛndó Ngbangɔ tɛnɛ ya, lo na ngunu gba. Adu biani. Kanda Samson mundó ekateli ti siɔni, wa ni hɛ̃ndó lo apɛnɔ gba. Abɛse ngaso ko, Yehova kpãndó lɛ lo gba na ndo mbilimbili tɛ Samson, wa lo sundó pandɛ ti dungɔ lɛ ngɛ̃́ tɛ lo kaya Ngbangɔ ti nɛngɔ ya aza e.

² Yehova salelandó Samson ti nɛngɔ ya, lo li aye ti kpɛ̃nɛ na lo tɛ azi tɛ lo, aya Izraɛlɛ. Asiɛklɛ gba na pɛ kwá tɛ Samson, na lége ti Nyingɔ vurú tɛ Yehova ko, Toma Polo sundó ili Samson ka popo tɛ azi ti loyengɔ. (Aeb. 11:32-34) Se lɛlo tɛ Samson alengbi ti zangɔ e. Lo kpãndó bɛ lo na ndo Yehova abɛse na ya kpengba kpale. Na ya tɛnɛ mɛ, e na tɛnɛngɔ tɛnɛ na ndo aye mɛ elengbi ti mandangɔ na ndo Samson, nga na se mɛ se lɛlo tɛ lo alengbi ti sangɔ ngunu bɛ e.

3. Kumba mɛndó Samson lua nɛ?

³ Na ngoi mɛndó adũ Samson ko, azi ti Filistia ndo lendó gbia na ndo aya Izraɛlɛ, wa ala ndo hɛ̃ ngandó ala pɛnɔ. (Bas. 13:1) Aya Izraɛlɛ ndo hũndó pɛnɔ mawoma na lo mɛ ya, azi ti Filistia ndo lendó gbia na ndo la na ndenge ti siɔni nvɛ̃ni. Yehova pɔnandó Samson ya, lo “so na aya Izraɛlɛ ka bɛ ti azi ti Filistia.” (Bas. 13:5) Adundó kumba kɔi ti kpengbani nvɛ̃ni! Ti nɛngɔ ya, lo kokisa kumba niko nzɔ̃ni ko, ayɔ ya Samson kpã bɛ lo zu ka tɛ Yehova.

4. Ngasia la Yehova zandó Samson ya, lo nwɔ azi ti Filistia? (Basambisi 15:14-16)

 ⁴ E ba se lɛlo kɔi mɛ afa ya, Samson kpãndó bɛ lo zu na ndo Yehova, wa lo ye ngandó ya, Yehova na zangɔ ni. Lá kɔindó ko, asoda ti Filistia agandó so gbɔ̃ngɔ Samson ka Léhi mɛ ka Yuda. Azi ti Yuda mɛ adu ayata Samson nvɛ̃ni akpɛndó mbɛtɔ, wa ala mundó ekateli ti hɛ̃ngɔ lo hɛ̃ awa kula. Ala gbendó Samson na kpu ti fãnani, wa ala gwendó na lo hɛ̃ azi ti Filistia. (Bas. 15:​9-13) Kanda “Nyingɔ tɛ Yehova hɛ̃ndó Samson ngunu,” wa lo falandó kpu ni ka tɛrɛ lo. Na gesi, lo ‘luandó bio ti nda ngbangba punda mɛ akpi fãnani,’ wa lo mundó ni, lo kpɔ na azi ti Filistia 1000!​—Di Basambisi 15:14-16.

5. Ngasia la tiringɔ to na ngbangba punda afandó ya, Samson ndo kpã bɛ lo na ndo Yehova nɛ?

⁵ Nda mɛndó Samson salela bio ti nda ngbangba punda nga ma ye ti tiringɔ na na to nɛ? Ni du ye kɔi mɛ ta azi ndo salelandó ni so tiringɔ na to ma! Ta kitɛ da ma, Samson hĩngandó ya, ta nwa ti to mɛ lo na ni la na zangɔ lo ya, lo nwɔ azi ti Filistia ma, kanda lo na nwɔngɔ ala na lége ti lisalisi tɛ Yehova. Kɔli niko ti loyengɔ asalelandó ye mɛ lo na ni so lingɔ se bɛ Yehova. Samson nwɔndó awa kula niko zu na lo mɛ ya, lo kpãndó bɛ lo na ndo Yehova!

6. Se Yehova hɛ̃ e kumba kɔi ngaso, ngasia la kpale mɛndó asi na Samson alengbi ti zangɔ e nɛ?

⁶ Yehova lengbi nga ti hɛ̃ngɔ e ngunu mɛ e na gwɛ̃ ni ti nɛngɔ ya, e li aye zu mɛ lo ndo yɔ ka ti e ya e li, abɛse adu kumba mɛ e ndo hũ ya, ta e na kokangɔ lingɔ ni ma. Wa Nzapa lengbi nga ti zangɔ e na ndenge mɛ ta e ndo da bɛ e na ni ma. Hĩnga ya, se mɔ kpã bɛ mɔ zu na ndo Yehova, lo na hɛ̃ngɔ mɔ ngunu wa lo nga na zangɔ mɔ ya, mɔ li se bɛ lo nga ma tɛ Samson.​—Mas. 16:3.

7. Hɛ̃ se lɛlo kɔi mɛ ndo fa ya, adu ngbondoni ya, e gi litambwisi tɛ Yehova.

⁷ Ayata kɔli ná ayata wali gba mɛ ndo hɛ̃ ti la na ya kwa ti kĩngɔ ada ti Lo-lengbia ko, ala fa ya, ala ndo kpã bɛ la zu na ndo Yehova. Uzundó ko, ayata ndo kĩndó ada ti Lo-lengɔ Gbia nga na ada mɛndɛ̃ ti Lo-lengɔ Gbia zu ti fãnani. Kanda na lo mɛ ya, nɔmbrɛ tɛ azi mɛ ndo ti awa kwa tɛ Yehova ndo mai bo maingɔ ko,  linɔ tɛ Yehova yɔndó ya, agbinyangbi akpale mɛndɛ̃. Na pɛ gbɔ̃ngɔ li la nga na lingɔ sambela hɛ̃ Yehova ko, ayata mɛ ndo ba kwa ti kĩngɔ ada ti Lo-lengɔ Gbia asindó na kɔdɛ ti fãnani ti vɔ̃ngɔ lopangɔ mɛ akĩ da ka da wa ala diri lɛkɛ bo da niko. Nyita Robert mɛ na ya abulu mɛ alo ti ɔngɔ, lo li akwa ti kĩngɔ ada ti Lo-lengɔ Gbia gba na ndo lɛ gigi zu atɛnɛ ya, “Na ebandeli, adundó pɛnɔ ya, azi mɛndɛ̃ aye kɔdɛ niko ti fãnani. Ni ɔngbindó madãma na se mɛndó e ndo li na ni uzu. Kanda ayata ndó dã ti mɛsɛnɛngɔ na akpale ti fãnani, wa e hũndó yangondo ya, Yehova ndo sulu gbinyangbingɔ ti akpale niko.” Adu se lɛlo kɔi mɛ ndo fa ndenge mɛ Yehova ndo tambwisa na azi tɛ lo ti nɛngɔ ya, ala li se bɛ lo. Na lo ni la, e hũnda tɛrɛ e na ndo mɛ: ‘Mbi ndo zia ya, Yehova dɔ mbi na nɔ, wa mbi ndo du nga dã ti mɛsɛnɛngɔ na akpale se agbinyangbi?’

8. Na ngoi mɛndó Samson ma gwɛ̃ ngu kpengbani, ye mɛndó lo li nɛ?

⁸ Ngoi mɛndɛ̃ mɔ ka di ambanga akpale ti kpɛ̃nɛ mɛndó Samson li. Lo hondó zɛ̃ na ti lo, wa lo kɔi lo kpɔndó azi 30 kaya kɔdɔrɔ ti Ashkelon mɛ ka Filistia. (Bas. 14:5, 6, 19) Samson ndo lindó aye ti kpɛ̃nɛ nvɛ̃ni. Kanda lo hĩngandó ya, se ta Yehova za lo ma ko, ta lo lengbi ti lingɔ ni ma. Ye kɔi mɛndó lo li na pɛ kpɔngɔ azi ti Filistia 1000 afa ni yangondo. Na pɛ kpɔngɔ azi niko gba ko, lo mandó gwɛ̃ ngu kpengbani, na nɛngɔ ya, lo kpã bɛ lo bo na ndo makoki tɛ lo nvɛ̃ni ti nɛngɔ ya, lo lua ngu ti nyɔngɔ ko, lo yɔndó ka ti Yehova ya, lo za ni.​—Bas. 15:18.

9. Ye mɛndó Yehova li na ngoi mɛndó Samson li sambela hɛ̃ lo ya, lo za ni nɛ? (Basambisi 15:19)

⁹ Yehova hɛ̃ndó gbinya ti sambela tɛ Samson na hɛ̃ngɔ lo ngu na ndenge ti kpɛ̃nɛ, lo sindó na lingu kɔi hɛ̃ Samson. Na pɛ nyɔngɔ ngu niko ko, Samson “luandó ngunu, wa lo di tindó na ge ge ge.” (Di Basambisi 15:19.) Alengbi ti dungɔ ya, abulu gba na gesi na ngoi mɛndó Samuele su buku ti mbeti tɛ awa fangɔ ngbanga ko, lingu niko adɛ bondó da. Ngoi mɛndó azi ti Izraɛlɛ ndo hũ lingu niko ko, ni ndo zandó ala ya, ala da bɛ la ngoi zu ya, awa kwa tɛ Yehova alengbi ti kpãngɔ bɛ la na ndo lo ti nɛngɔ ya, lo za ala na ya ngoi ti siɔni.

10. Ye mɛ elengbi ti lingɔ ti nɛngɔ ya, Yehova za e nɛ? (Ba nga limɔ.)

¹⁰ Ayɔ nga ya, e yɔ ka ti Yehova ya, lo za e, abɛse e hĩnga akpale gba, makoki mɛ e na ni, bere aye mɛndó e li na ya kwa tɛ lo gã adu ti ngasia. Ayɔ nga ya, e hĩnga ndo mɛ makoki tɛ e suka na ni, wa ta bɛ e li na ni ma ya, e na lingɔ aye mɛ Yehova ndo yɔ ge ti e bo se du ya, e kpã bɛ e na ndo lo. Nga ma se mɛndó Samson lua ngunu na ngoi mɛndó lo nyɔ ngu mɛndó Yehova hɛ̃ lo ko, e na gwɛ̃ ya, Yehova za e, e du na loyengɔ na mbage tɛ lo​—Mat. 11:28.

11. Aye mɛ elengbi nvɛ̃ni ti lingɔ ti nɛngɔ ya, Yehova za e nɛ? Hɛ̃ se lɛlo kɔi.

¹¹ E ba ndakisa tɛ nyita kɔli Aleksey mɛ ndo du ka Russie mɛndó lo tengbi na botemeli gba. Ye mɛndó aza lo ya, lo gbe bɛ lo na ya kpengba kpale na ngoi niko nɛ? Lo ná ya lo ndó na mɔmɛsɛnɔ ti mandangɔ Ngbangɔ ngoi zu. Lo tɛnɛ ya: “Mbi lindó kpengbani ti batangɔ mɔmɛsɛnɔ ti mandangɔ aye mbi kɔi na bɛ mbi nga na dingɔ Ngbangɔ bi zu. Na nda pelele zu, mbi ná ya mbi e ndo dindó tɛxtɛ du jour, wa e ndo li ngandó sambela hɛ̃ Yehova ngoi zu ndoni kɔi ti nɛngɔ ya, lo za e, e nwɔ nzɛ̃ngɔ tɛ e.” Wangɔ mɛ elengbi ti luangɔ na ndo se lɛlo tɛ lo nɛ? Na nɛngɔ ya e kpã bɛ e na ndo makoki tɛ e nvɛ̃ni ko, ayɔ ya, e kpã bɛ e na ndo Yehova. Elengbi ti lingɔ ni ngasia? E na lingɔ ni se e li ya, loyengɔ tɛ e ati kpengbani na mandangɔ Ngbangɔ, lingɔ sambela hɛ̃ Yehova, gwengɔ bombi nga na pangɔ  nzɔ̃ pa. Wa Yehova na sulungɔ ge ge ge mɛ e ndo li ti vɔrɔngɔ lo. Lo hɛ̃ndó Samson ngunu, lo lengbi nga ti hɛ̃ngɔ e ngunu.

12. (a) Ekateli ti siɔni mɛndó Samson mu nɛ? (b) Ɔngbi mɛndó na popo tɛ Delila ná wali ti Filistia nga na wali ndumba nɛ?

¹² Samson ngandó zo ti zangangɔ lengbingɔ nga ma e. Ni la, na ya ngoi mɛndɛ̃ lo mundó ekateli ti siɔni. Ekateli kɔi mɛndó lo mu ko, ni sindó na asiɔ kpale gba. Na pɛ lingɔ kwa tɛ wa fangɔ ngbanga na ya ngoi kɔi ngaso ko, Samson “yendó wali kɔi ka kɔdɔrɔ ti Shorek mɛndó ili lo la Delila.” (Bas. 16:4) Uzu ko, Samson yendó dungɔ na wali mɛ zo ti Filistia, “Yehova ndó la aye ya lo mu wali niko,” lo “ndo gindó lége ti gbɛ̃ngɔ azi ti Filistia.” Na gesi Samson lekisandó ngoi yakere ka tɛ wali ndumba kɔi kaya kɔdɔrɔ ti Gaza mɛ ka Filistia. Na ngoi niko ko, Nzapa hɛ̃ndó Samson ngunu ti nɛngɔ ya, lo hã nyɔ ngise ti gbata ni, wa ta ye ti batangɔ kɔdɔrɔ niko adi dɛndó da ma. (Bas. 14:1-4; 16:1-3) Kanda kpale tɛ Delila aɔngbindó na tɛ ala na lo mɛ ya, alengbi ti dungɔ ya, Delila dundó zo ti Izraɛlɛ, ta Samson yendó lo ti nɛngɔ ya, lo lua lége ti tiringɔ to na azi ti Filistia ma.

13. Na lo mɛ ya, Samson kpãndó bɛ lo na ndo Delila, kpengba kpale mɛndó lo tengbi na ni nɛ?

¹³ Delila yendó mungɔ falanga gba mɛ azi ti Filistia ahɛ̃ lo ti nɛngɔ ya, lo ka Samson hɛ̃ la. Nda mɛ ta Samson ndó na kpengba lɛ na ndo lo ma nɛ? Lo ziandó ya, yengɔ mɛ lo ye na wali niko avĩ lɛ lo, wa ta lo ndo hũndó aye mɛ lo ye lingɔ ma? Abɛse adu ngasia ko, Delila kpãndó katɛ Samson ndozu ya, lo tɛnɛ hɛ̃ ni ndo mɛ ngunu tɛ lo ndo lo da, tee na tee Samson andó gbengɔ bɛ lo gba, wa lo kambisandó ni hɛ̃ lo. Na vundu zu, ekateli tɛ Samson akpãndó lo na ya kpale mɛ ato lo ya, lo li ye ti siɔni mɛ ali ya,  ngunu tɛ lo wɛ, wa na ya ngoi kɔi, ta Yehova di dɛndó ye lo ma.​—Bas. 16:16-20.

14. Ye mɛndó asi na Samson na lo mɛ ya, lo kpãndó bɛ lo zu ka ndo Delila nɛ?

¹⁴ Na lo mɛ ya, Samson kpãndó bɛ lo na ndo Delila na se lɛ kpãngɔ bɛ lo na ndo Yehova ko, lo tengbindó na apɛnɔ ti kpengbani. Azi ti Filistia agbɔ̃ndó Samson wa ala hondó lɛ lo, lo tindó wa ziba. Ala bindó lo ka bɔlɔkɔ ka kɔdɔrɔ ti Gaza, kɔdɔrɔ mɛndó lo sambwisa azi ni, lo tindó zo mɛ ndo li kwa ti dɔlɔngɔ le tɛ. Wa ala gbɛ̃ndó ndima tɛ lo na ngoi mɛndó ala li fɛtɛ kɔi na lo tɛ nzapa tɛ la mɛ ili lo la Dagon. Ala ndo dandó bɛ la ya, Dagon nzapa tɛ la ti nvɛ̃nɛ la azi lége ya, ala gbɔ̃ Samson, na lo ni la ala zɔndó mbeka so gondangɔ na lo. Ti nɛngɔ ya, ala hé Samson, wa lo “le wele” mɛ na hɛ̃ngɔ ala ngia ko, ala sindó na lo ka bɔlɔkɔ, wa ala kpãndó lo ka gbɛlɛ azi zu na ngoi ti fɛtɛ.—Bas. 16:21-25.

15. Ngasia la Samson di fandó ya, lo ndo kpã bɛ lo na ndo Yehova nɛ? (Basambisi 16:28-30; ba nga limɔ ti koko mbeti.)

¹⁵ Abɛse Samson lindó ye ti siɔni mɛ ahɛ̃ lo apɛnɔ gba ko, ta lo ziandó vɔrɔngɔ Yehova ma. Lo gindó lége ti nɛngɔ ya, lo kokisa kumba mɛndó Nzapa hɛ̃ lo, kumba ti tiringɔ to na azi ti Filistia. (Di Basambisi 16:28-30.) Samson vɔrɔndó tɛrɛ lo na ya sambela hɛ̃ Yehova ya: “Zia mbi gɛ̃ kula na ndo azi ti Filistia.” Nzapa ti mbilimbili hɛ̃ndó gbinya ti sambela tɛ Samson, wa lo di hɛ̃ndó lo ngunu mɛndɛ̃ ti kpengbani. Na lo ni la, Samson kpɔndó na lá niko azi ti Filistia gba aɔ nɔmbrɛ ti kpɔngɔ mɛndó lo kpɔ na ala uzu.

16. Wangɔ mɛ elengbi ti luangɔ na ndo yungɔ ndo tɛ Samson nɛ?

¹⁶ Abɛse Samson tengbindó na apɛnɔ na lo ti siɔ lo tɛ lo ko, ta lo ziandó lingɔ se bɛ Yehova ma, lo bondó na gwɛ̃ kpengbani ti lingɔ aye mɛ Yehova ye. Se du ya, mɔ li siɔ kpale kɔi, wa na lo ni alonzi mɔ, bere kumba tɛ mɔ ge ya bombi awɛ na lo ni ko, ta mɔ zia lingɔ kpengbani so lingɔ se bɛ Yehova ma. Hĩnga ya, Yehova ndo du lá kwɛ dã ti kangɔ lɛlo ndo na siɔ kpale tɛ e. (Nz. 103:8-10) Abɛse na ya yungɔ ndo tɛ e ko, Yehova lengbi ti hɛ̃ngɔ e ngunu ti nɛngɔ ya, e li na kwa tɛ lo mabere se tɛ Samson.

17-18. Nda mɛ se lɛlo tɛ Michael alengbi ti sangɔ ngunu bɛ mɔ nɛ? (Ba nga limɔ.)

¹⁷ E mu se lɛlo tɛ nyita kɔli ti palanga mɛ ili lo la Michael. Lo hɛ̃ndó tɛrɛ lo gba na ya kwa tɛ Yehova, lo ndo lindó kwa tɛ wa zangɔ na kwa, lo ngandó wa sungɔ lége ti ngoi zu. Na vundu  zu, lo lindó siɔ kpale mɛ ali ya, kumba tɛ lo awɛ kaya bombi. Lo tɛnɛ ya, “Mbi ndo lindó kwa hɛ̃ Yehova na ge ge ge nvɛ̃ni, kanda na mbala kɔi akpale zu adɔndó lo. Ta mbi dandó bɛ mbi fãni kɔi ya, bɛ Yehova li na mbi ma. Kanda mbi ndo hũndandó tɛrɛ mbi na ndo ya, mbi na tingɔ gbanda na mangbi ti nzɔ̃ni na lo nga ma se mɛndó mbi na ni uzu, bere mbi na diringɔ gbanda lingɔ kwa ge ya bombi na ge ge ge nga ma se ti uzu?”

¹⁸ Ta Michael ziandó lingɔ kpengbani ti hɛ̃ngɔ ili Yehova gonda ma. Lo tɛnɛ ya: “Mbi lindó kpengbani ti nɛngɔ ya, mbi lɛkɛ mangbi tɛ mbi ná Yehova, na zingɔ bɛ mbi hɛ̃ lo na ya sambela ngoi zu, na lége ti mandangɔ Ngbangɔ nga na gbɔ̃ngɔ li mbi na ndoni.” Yɛkɛ yɛkɛ ayata ti ya bombi abandandó hɛ̃ngɔ Michael ndima. Ndɛ lo mɛ ko, lo ndo li kwa nga ma biazo nga wa sungɔ lége ti ngoi zu. Lo tɛnɛ ya: “Ndenge mɛndó abiazi aza mbi, ala sa nga ngunu bɛ mbi azandó mbi, mbi gbɔ̃ ndani ya, Yehova ndo ye mbi ngoi zu. Mbi lengbi na olo ti lingɔ kwa hɛ̃ lo kaya bombi na bingangɔ li ti vuru ni. Wangɔ mɛ mbi lua adu ya, Yehova na kangɔ lɛ lo na ndo siɔ kpale tɛ azi zu ko la ndo li kpengbani ti gbinyangɔ bɛ la.” Se du ya, e li siɔ kpale, wa e li zu mɛ elengbi ti lingɔ, ti nɛngɔ ya, e lɛkɛ kpale wa e ngbã lá kwɛ kpãngɔ bɛ e na ndo Yehova ko, elengbi ti yengɔ na bɛ e kɔi ya, lo na salelangɔ e, wa lo nga na sulungɔ e.​—Nz. 86:5; Mas. 28:13.

19. Ngasia la pandɛ ti dungɔ lɛ ngɛ̃́ tɛ Samson asa ngunu bɛ mɔ nɛ?

¹⁹ Na ya tɛnɛ mɛ, e tɛnɛ tɛnɛ na ndo ambanga kpale ti ngbondoni ti ya dungɔ lɛ ngɛ̃́ tɛ Samson. Ta lo dundó zo ti lengbingɔ ma, abɛse na pɛ lingɔ siɔ kpale na lo tɛ Delila ko, ta lo ziandó lingɔ kpengbani ti vɔrɔngɔ Yehova na mbilimbili ma. Na pɛ akpale zu mɛndó lo tengbi na ni ko, Yehova salelandó lo ti nɛngɔ ya, lo li ye mɛndɛ̃ ti kpɛ̃nɛ. Yehova ndo hũ bondó lo ngoi zu ya, lo du kɔli kɔi mɛ na loyengɔ ti kpengbani. Wa abulu gba na gesi, Yehova sundó ili lo ka popo tɛ awa kwa tɛ lo ti mbilimbili mɛ atɛnɛ tɛnɛ tɛ la kaya mbeti ti Aebreo shapitrɛ 11. Adu nvɛ̃ni ye ti sangɔ ngunu bɛ hĩngangɔ ya, Nzapa mɛ e ndo vɔrɔ lo ko, lo du To ti songo mɛ ndo ye sangɔ ngunu bɛ e na ngoi mɛ e ti na nzɛ̃ngɔ! Na lo ni la, nga ma Samson, zia ya, e vɔrɔ tɛrɛ e hɛ̃ Yehova ya: “Se mɔ ye, da bɛ mɔ na mbi, wa hɛ̃ mbi ngunu.”​—Bas. 16:28.