Na lo mɛ ya ta Yezo ndó ndoni kɔi na ava lo 70 na ngoi ti tɛ tɛ Gbia ma ko, elengbi ti tingɔ na dangɔ bɛ ya ta ala ndo yendó lo ma, bere ala kpɛndó lo. Kanda, Yezo ye bondó lingɔ ni ná atoma tɛ lo.

Yezo pɔna bo azi 12 ka popo tɛ akɔli niko 70 ya, ala du atoma. Abɛse du ya, lo ndo yendó ala zu. (Luka 6:12-16) Londó ka Galile na ngoi mɛndó “lo bombi ava lo 12” wa “lo tondó ala ya, ala nɔ pa nzɔ̃ pa ti Lo lengɔ Gbia tɛ Nzapa, wa ala sara nga awa ngã.” (Luka 9:1-6) Na pɛni ngoi mɛndó lo ka Yuda ko, lo “pɔnandó azi mɛndɛ̃ 70 wa lo to ala sɛ sɛ.” (Luka 9:51; 10:1) Ni la, Yezo ná ava lo gwendó ka kɔdɔrɔ ndɛ̃ ndɛ̃ ndɛ̃ na lo ti pangɔ nzɔ̃ pa.

Ayuda mɛndó ti ava Yezo ko, ala ngbãndó lá kwɛ lingɔ yenga ti pasika bulu zu ndoni kɔi na ndasewa tɛ ala. (Kob. 12:6-11, 17-20) Uzu ti nɛngɔ ya lo kpi ko, Yezo ná ava lo gwendó ka Yeruzalɛmɛ. Kanda ta lo lɛkɛndó kota pasika mɛ alengbi ti bombingɔ ava lo ti Yuda, Galilea ná ti Perea ma, ti biani ko Yezo yendó lingɔ pasika ndoni kɔi na atoma tɛ lo. Wa lo pa hɛ̃ ala ya: “Mbi sepala ndo ma wo ma ya, mbi na ĩ e tɛ yenga ti pasika olo uzu ti mbi hũngɔ pɛnɔ.”​—Luka 22:15.

Lo ndó na rɛzɔ̃ ti lingɔ ni. Yezo gwe ti kpingɔ ngama “Nyi ngasã gbaga tɛ Nzapa mɛ aga so hãngɔ siɔ ye tɛ azi ti lɛ gigi zu.” (Yn. 1:29) Ni lengbindó ti lingɔ tɛrɛ lo ka Yeruzalɛmɛ kota gbata mɛndó ndo hɛ̃ na mbeka ti vɔrɔngɔ na Nzapa gã. Kwá tɛ Yezo azi lége kɔi mɛ kotani hɛ̃ e, ɔngɔ Nyi ngasã gbaga mɛndó aya Izraɛlɛ ndo tɛ ka ndasewa tɛ ala na ndɔ uzu ti ala singɔ ka gbɛ mbɛ. (1 Kɔr. 5:7, 8) Ye mɛndó Yezo li azi lége ti nɛngɔ ya, atoma 12 ati azi ti uzu kaya bombi tɛ awakristo ti mbilimbili wa ala le nga kwa kɔi mɛ ngbondoni na lo tɛ awakristo la. (Ef. 2:20-22) Ni du ngbondoni e hĩnga ya, Yeruzalɛmɛ kɔdɔrɔ mɛ santo “alo na ndo atɛ̃nɛ sui kɔi ndoni sɛ.” “Asulu ili awa pangɔ kwa tɛ Nyi ngasã gbaga sui kɔi ndoni sɛ na ndo atɛ̃nɛ ni kɔi kɔi zu.” (Suma 21:10-14) Biani atoma niko ti mbilimbili na lingɔ kwa ti ngbondoni ti kokisangɔ dangɔ bɛ tɛ Yehova. E ga e hĩnga nda mɛndó Yezo ye ya, atoma tɛ lo adu so gunda lo na ngoi mɛndó ala ndo tɛ pasika ti ndani, wa na pɛ ni ala banda tɛ tɛ Gbia.

Ta ava lo 70 ná azi mɛndɛ̃ ndó ndoni kɔi na lo so tɛngɔ tɛ tɛ Gbia ma. Kanda se du ya ala zu ngbã mbilimbili ko, ala na luangɔ nzɔ̃ kpale na ndo tɛ tɛ gbia mɛndó Yezo tondani. Ni la ava lo mɛ ahĩni ala na kpɔ̃ mɛ na ngbãngɔ mbilimbili tee ka lo ga ko, ala na tɛngbingɔ mbele ti Lo-lengɔ Gbia mɛndó Yezo tɛnɛ tɛnɛ ni hɛ̃ atoma tɛ lo na ndɔ niko.​—Luka 22:29, 30.