AZI gba ndo hĩnga pandɛ mɛ aba kwá tɛ Yezo, nga na se mɛndó a gɔngɔ na lo ndo kɛkɛ ka popo tɛ asiɔ azi sɛ mɛndó a gɔngɔ nga la ka ndo kɛkɛ ndoni kɔi na lo. (Mat. 27:35-38) Ta azi ndo ye ya tɛnɛ mɛ Ngbangɔ tɛnɛ ya, a lɛkɛndó kinda tɛ Yezo ti nɛngɔ ya a hɔ ni kaya du ti sɛndɛ ya ni du bɛta tɛnɛ ma.​—Mar. 15:42-46.

Ta azi mɛ ndo gi nda tɛnɛ ti Aevanzilɛ ndo ye ya zo mɛ a ho lo ka ndo kɛkɛ, alengbi ti zungɔ na kinda tɛ lo, hɔngɔ ni kaya du ti sɛndɛ na ndima ma. Ala ndo dandó bɛ la ya, alengbindó ti lingɔ kpale tɛrɛ zo ti ngaso na ndenge mɛndɛ̃. Journaliste kɔi mɛ ili lo la Ariel Sabar kambisandó kaya zulunalo Smithsonian nda mɛ azi ndo du na dangɔ bɛ niko ya: “Gɔngɔngɔ zo ndo kɛkɛ ndo fa tumbu mɛ ndo hɛ̃ siɔ zo mɛ azi kɛ̃ tɛrɛ lo, wa azi mɛndɛ̃ ti ndara ndo héndó tɛnɛ mɛ Ngbangɔ tɛnɛ ya ta azi ti Roma alengbindó ti zingɔ lége ya a hɔ kinda tɛ zo ti ngaso na ndima ma.” Azi ti Roma ndo lindó ngaso ti gbɛ̃ngɔ ndima tɛ siɔ zo niko, ti nɛngɔ ya a zɔ̃ ka ndo kɛkɛ wa asa tɛ ni. Na gesi ando sandó tanga tɛrɛ siɔ zo niko mɛ ngbã kaya du mɛ ndo sa na asiɔ ndo zu da.

Kanda azi ti arkeoloji tãndó ye mɛ akɛsɛnɛ na tɛnɛ olo mɛ, mɛ aba ambanga Ayuda mɛndó a ho nga la ka ndo kɛkɛ. Na bulu ti 1968 atãndó abio tɛrɛ zo kɔi ti yuda mɛndó a hɔ lo na siɛklɛ ti uzu kaya du ti sɛndɛ mɛndó ndo hɔ na azi ti yuda, dã na Yeruzalɛmɛ. A kpãndó ni ka ndo mɛ ndo bombi na abio tɛrɛ azi mɛ kpili mɛ a lua ni na gesi. Na ya abio mɛndó alua ko, ala lua ngandó bio ti nda gɛrɛ zo. Ala hũndó bio niko mɛ a gɔngɔ ni ndo kɛkɛ ndo ni kɔi na sɛtɛ ti 11.5 cm. Sabar tɛnɛ ya, “bio ti nda gɛrɛ zo niko adu tɛ Yohanan, ni kɔndó nda kitɛ mɛndó azi ndo dɛ na pɛ yɔngɔrɔ ngoi ya a hɔndó kinda tɛ Yezo kaya du ti sɛndɛ.” Na lo mɛ ya, a luandó “bio ti nda gɛrɛ Yohanan kaya du ti sɛndɛ ko, ni fa ya azi ti Roma azindó lége ya, a hɔ kinda tɛ siɔ zo mɛ a ho lo ka ndo kɛkɛ na landangɔ se mɛndó azi ti Yuda ndo hɔ na kinda.”

Bio ti nda gɛrɛ zo niko ali ya azi ti na bingangɔ li ndɛ̃ ndɛ̃ ndɛ̃ na bangɔ se mɛndó a gɔngɔ na Yezo ka ndo kɛkɛ. Kanda adu biani ya, asiɔ zi mɛndó ndo ho la ka ndo kɛkɛ ko, ndo zundó na kinda tɛ la, a hɔ ni, ta ndo sandó tãnga tɛrɛ la mɛ ngbã kaya du mɛ ndo sa na asiɔ ndo zu ma. Afa ya, tɛnɛ mɛ Ngbangɔ tɛnɛ ya a hɔndó kinda tɛ Yezo kaya du ti sɛndɛ ko, adu bɛta tɛnɛ. Ni du tɛnɛ mɛ azi ti arkeoloji aye ngandó lo ni.

Omɛ du ngbondoni du ya, Yehova nvɛ̃ni piandó tɛnɛ ya, na hɔngɔ kinda tɛ Yezo kaya du ti sɛndɛ tɛ zo kɔi mɛ wa ye, wa ta ye kɔi mɛ lengbi ti gbanzingɔ ya tɛnɛ tɛ lo ti na seni da ma.​—Yis. 53:9; 55:11.