KA TƐ azi ti Yuda mɛndó ndo du ka kɔdɔrɔ ti kapa ko, bulu ndo bandandó na ngoi mɛ ndo gbinyangbi sese ná ngoi mɛ ndo lu tɛ, se e haka ni na ngoi tɛ e ko, adu Nzɛ ti Gumbaya bere Nzɛ ti Sui Kɔi.

Azi ndo dikɔndó bí nzɛ na bangɔ nzɛ mɛ si fãnani (a ndo dundó bí nzɛ 29 bere 30). Wa ala ndo bandandó dikɔngɔ bulu na landangɔ lá. Kanda dikɔngɔ bulu na landangɔ nzɛ ndo dundó ndunu ni ɔngɔ dikɔngɔ bulu na landangɔ lá. Ti nɛngɔ ya, ta ɔngbi du ka popo ti akalandrié niko sɛ ma ko, a ndo salɛlandó akɔdɛ ndɛ̃ ndɛ̃ ndɛ̃. Alengbindó ti kpãngɔ abí, bere nzɛ kɔi mobimba na ndo abí nzɛ mɛndɛ̃, ngoi mɛndɛ̃ ndo bakisa nindó na bandangɔ ti bulu mɛ na gangɔ. Ni ndo lindó ya kalandrié mangbi na ngoi ti lungɔ tɛ nga na ngoi ti kɔngɔ tɛ.

Na ngoi tɛ Moizɛ ndó ko, Nzapa kpãndó kalandrié ti sambela mɛndó ndo banda na Nzɛ ti Abibɛ, bere Nizana, na prɛtã. (Kob 12:2; 13:4) Na ya nzɛ niko ko, ando lindó yenga ti orjɛ.​—Kob. 23:15, 16.

Emil Schürer, sundó kaya buku tɛ lo The History of the Jewish People in the Age of Jesus Christ ya, “Ndia mɛndó ndo hɛ̃ lége ya, abakisa bí na ndo bi nzɛ ndo dundó woni, lo di tɛnɛ ya, ayɔ bo ya ali yenga ti Pasika ngoi mɛ nzɛ si mobimba na ya nzɛ ti nisana (14 nzɛ ti nizana), ni ndo tindó ngoi zu uzu ti ngoi mɛ yɔngɔ ti bí na lá ndo du kwɛ kɔi na prɛtã . . . Na ngoi mɛ ala ndo hũndó ya Pasika na tingɔ uzu ti ngoi mɛ yɔngɔ ti bí na lá ndo du kwɛ kɔi na prɛtã ko, ala ndo bakisandó nzɛ ti [13] uzu ti nzɛ ti nizana.”

Atɛmwɛ tɛ Yehova ndo salela nga kɔdɛ niko, ti nɛngɔ ya aza la ya ala kpã na bí mɛ ala lengbi ti lingɔ na Tɛ tɛ Gbia na prɛtã, mɛ ni mangbi na 14 nizana na landangɔ kalandrié tɛ ayuda. Ando pia pa hɛ̃ abombi ti lɛ sese zu, bí nzɛ mɛ ala na lingɔ na Tɛ tɛ Gbia uzu ti nɛngɔ ya bí nzɛ ni alengbi. *

Wa ngasia la azi ti Yizraɛlɛ lengbindó ti hĩngangɔ ngoi mɛ nzɛ kɔi wɛ na ni, nga na ngoi mɛ nzɛ mɛndɛ̃ ndo banda na ni nɛ? Ndɛ lo mɛ ko, azi ndo hĩnga bí nzɛ na lége ti kalandrié ti papié bere ti aparɛyi. Kanda na ngoi ti uzu ndó ko, ta ndo dundó woni hĩngangɔ bí nzɛ ma.

Na ngoi ti kota ngu mɛndó ni na ngoi tɛ Noa ko, nzɛ kɔi ndo dundó na abí nzɛ sui taa. (Eb. 7:11, 24; 8:3, 4) Na gesi, ka tɛ azi ti Izraɛlɛ ta nzɛ kɔi ndo dundó bo na abí nzɛ 30 gɛgɛrɛ ma. Azi ti Izraɛlɛ ndo bandandó dikɔngɔ bí nzɛ na ngoi mɛ nzɛ ndo si fãna ni. Afa ya bí 29 bere 30 na pɛ nzɛ ti fãna ni mɛ alo ti singɔ.

Na ya ngoi mɛndɛ̃, Davidi ná Yonatana, atɛnɛ ngandó tɛnɛ mɛ aba bandangɔ ti nzɛ ti fãnani ya: “Ndã na dungɔ nzɛ ti fãnani.” (1 Sam. 20:5, 18) Alenbgi ti dungɔ ya, na siɛklɛ ti 11 U.N.E. la, abandandó hĩngangɔ bí mɛ nzɛ ti fãnani na bandangɔ uzu ya ni banda. Wa ngasia la azi lengbindó ti hĩngangɔ ngoi mɛ nzɛ ti fãnani na bandangɔ nɛ? Buku Mishnah tɛnɛ ya, ndia nga na akutimɛ tɛ ayuda mɛndó abombi ndoni kɔi kambisa akpale mɛndɛ̃ na ndo lo niko. Atɛnɛ ya na pɛ singɔ tɛ ayuda ka gbɛ ngba ti Babilonɛ ko, ni la dundó ye mɛ sanɛdrina (kota tribinalɛ tɛ ayuda) ndo tɛnɛndó tɛnɛ ndoni. Na ya nzɛ mbala mbala, ala ndo tengbindó na bí ti 30 ti nɛngɔ ya ala kpã bí mɛ nzɛ ti fãnani na bandangɔ na ni. Ye mɛndó ndo za la nɛ?

Ando dɔngɔndó akɔli agini na gbágbá ti Yeruzalɛmɛ, na ndo mɛ ala lengbi ti hũngɔ lɛ ndozu nzɔ̃ni na bi, ti nɛngɔ ya ala hũ ngoi mɛ nzɛ ti fãnani ndo si na ni. Se ala hũ nzɛ ti fãnani si ko, ala ndo pandó iɔ hɛ̃ azi ti sanɛdrina. Ngoi mɛ azi ti sanedrina ma tɛnɛ ti nzɛ ti fãnani mɛ si ka nyɔ̃ akɔli niko gba ko, ala ndo pandó hɛ̃ azi ya nzɛ ti fãnani banda. Wa ye mɛndó ala ndo li na ngoi mɛ da baba ndo gbanzindó ya ta akɔli niko hũ ngoi mɛ nzɛ ti fãnani ndo si na ni ma nɛ? Ala  ndo hɛ̃ndó nyɔ̃ ya, nzɛ olo na wɛngɔ na bí nzɛ 30, wa nzɛ ti fãnani na bandangɔ na pɛni.

Mishnah kambisandó ya, ando pandó ekateli mɛ sanedrina mu na lége ti wá mɛ ndo zɔndó ka ndo lɛ ngomba ti Olivɛ mɛndó dã na Yeruzalɛmɛ. Ti nɛngɔ ya azi mɛndɛ̃ ahĩnga nga ni ko, ando zɔ ndó awá mɛndɛ̃ ka ndo kɔi mɛ ndozu mɛ azi lengbi ti hũngɔ ni kaya Izraɛlɛ zu. Na gesi awa pangɔ kwa ndó la ndo pa ekateli niko hɛ̃ azi. Se mɛndó ndo li na ni ya, ayuda mɛ ndo du ka Yeruzalɛmɛ ná ayuda mɛ ndo du kaya kɔdɔrɔ zu ti Izraɛlɛ nga na ala mɛ ndo du yɔngɔrɔ ni na Yeruzalɛmɛ ndo hĩnga ya, nzɛ ti fãnani banda la. Lingɔ ngaso, ndo zandó ala ya ala li ayenga zu na ngoi kɔi.

Ãkadre mɛ na zangɔ mɔ ya, mɔ hĩnga anzɛ, ayenga nga angoi mɛ kaya kalandrié tɛ ayuda.