Tata tɛ e ndó Pastɛrɛ kaya sambala kɔi mɛndó ili ni la, Église unie du Canada, ni la, pɔsɔ zu, lo ndo tondó mbi ná ngambi mbi ti wali ka kalasi mɛndó sambela ndo li na lo tɛ ayangambi na lá yenga na ndatu, na gesi, e ná lo e ndo gwendó sambela na ngoi ti 11:00 ti nɛngɔ ya, lo tamwisa misa. Na pɛ midi, e ná mama e ndo gwendó bombi ka da ti Lo-lengɔ Gbia. Ni la elengbindó ti hũngɔ yangondo ɔngbi mɛ na popo tɛ asambela niko sɛ.

Mama tɛ e akambisandó loyengɔ tɛ lo hɛ̃ kwa lo Bob ná ya lo Marion Hutcheson, wa ala yendó mbilimbili. Na bulu ti 1958 nyita kɔli ná nyita wali Hutcheson amundó mbi ná ayati la kũ e gwe kota bombi ti ndo lɛ gigi zu mɛndó ali tɛrɛ lo ka Etats-unis mɛndó bɛli tɛnɛ ni apa ya, La volonté divine ni lindó bi mwambe. Na olo, mbi gbɔ̃ ndani ya, ta mungɔ mbi gwengɔ na ni ka kota bombi niko adundó ye ti wele na lo tɛ la ma, kanda kota bombi niko adundó ngoi kɔi ti nzɔ̃ni ti ya dungɔ lɛ ngɛ̃́ tɛ mbi mɛ ta bɛ mbi na lingɔ gbanda na ni ma.

Na ngoi mɛndó mbi dɛ nyingambi ko, e ndo dundó ka fɛrmɛ, wa mbi ndo yendó batangɔ asa. Mbi ndó na gwɛ̃ ti lingɔ kalasi ti tingɔ wa batangɔ asa (vétérinaire). Mama tɛ mbi pandó hɛ̃ abiazi ti ya bombi tɛ e. Na songo zu, lo zandó mbi ya, mbi gbɔ̃ nda ni ya, e na “ndangba bi” wa lo hũndandó mbi se mɛ lingɔ Univɛrsite  abulu gba alengbi ti gbɛ̃ngɔ mangbi tɛ mbi na Yehova. (2 Tim. 3:1) Ni la mbi mundó ekateli ya, ta mbi na lingɔ Univɛrsite ma.

Mbi ndo hũndandó tɛrɛ mbi na ndo ngoi zu so hĩngangɔ ye mɛ mbi na lingɔ na pɛ onzingɔ kalasi ti sɛgɔ̃dɛrɛ. Abɛse du ya, mbi ndo sindó kwa ti fangɔ tɛnɛ na lá pɔsɔ ná lá yenga ko, ta mbi ndo yendo ni ma, ta mbi ndo hũ ngandó ya, mbi na kokangɔ lingɔ kwa ti wa sungɔ lége ma. Tata tɛ mbi ná ngambi lo mɛ ta ala du atɛmwɛ tɛ Yehova ma ko, ala tondó mbi ya, mbi li kwa kaya societé kɔi mɛ ndo ba kpale ti assurance ka Toronto. Ngambi to mbi ndó na ndo ti kpengbani kaya societé niko, ni la mbi yendó lingɔ kwa ni.

Ka Toronto, mbi ndo lindó kwa ngoi zu, wa mbi ti ngandó kwa azi mɛ ta ndo vɔrɔ Yehova ma, wa ta mbi di dɛ gwendó bombi, mbi si nga kwa ti fangɔ tɛnɛ na seni ma. Mbi ndo dundó ndoni kɔi na kɔkɔ tɛ mbi ti kɔli mɛ ta lo du Tɛmwɛ tɛ Yehova ma, na gesi lo kpindó, ni la ayɔndó ya, mbi du ka ndo mɛndɛ̃.

Nyita kɔli ná nyita wali Hutcheson, mɛndó amu mbi gwe na ni ka kota bombi ti ndo lɛ gigi zu na bulu ti 1958 ko, ala tindó mabere awa dũngɔ mbi. Ala ilindó mbi ya, mbi diri ka tɛ la, wa mbi maindó na ya nyingɔ na lo tɛ ala. Mbi na nyingambi tɛ la John e mundó batisimɔ ndoni kɔi na bulu ti 1960. John bandandó lingɔ kwa tɛ wa sungɔ lége, ni sandó ngunu bɛ mbi ya, mbi hɛ̃ tɛrɛ mbi gba na ya kwa ti fangɔ tɛnɛ. Ayata ti ya bombi ahũndó ya, mbi ndo mai na ya nyingɔ, ni la ala hɛ̃ndó mbi kumba ti kangbingbɔ adevuar ka bombi. a

Na bulu ti 1966 ko, mbi ná Randi Berge e lindó libala, lo dundó wa sungɔ lége ti ngoi zu mɛ na ge ge ge, lo ndó na gwɛ̃ kpengbani ti hɛ̃ngɔ ti lo ka kɔdɔrɔ mɛ ta awa fangɔ tɛnɛ da gba ma. Wa bangɔ ndo kɛlɛ kɛlɛ mɛ e ka da azandó e gba, lo sandó ngunu bɛ e ya, e hɛ̃ ti e kaya bombi kɔi mɛ ka Orillia ti Ontario. Ni la e dirindó kai.

Na ngoi mɛndó e si ka Orillia ko, mbi bandandó lingɔ kwa tɛ wa sungɔ lége nga ma tɛ Randi. Mbi ti ngandó na dengɔ bɛ nga ma tɛ lo! Na ngoi mɛndó mbi li kpengbani ti tingɔ wa sungɔ lége ti nzɔ̃ni ko, mbi mandó dengɔ bɛ ti salelangɔ Ngbangɔ nga na hũngɔ se mɛ azi ndo ye mbilimbili. Adundó ye ti dengɔ bɛ na  lo tɛ mbi zangɔ kɔli kɔi ná ya lo mɛ adu azi ti Orillia ya, ala gbinyanbi dungɔ lɛ ngɛ̃́ tɛ la, wa ala hɛ̃ tɛrɛ la hɛ̃ Yehova.

Na ngoi mɛndó e gwe ti bangɔ kɔdɔrɔ ti Toronto, mbi tengbindó na nyita Arnold MacNamara, mɛndó lo ka popo tɛ ayata mɛ ndo tambwisa kwa ti Bethel. Lo hũndandó mbi ya, bere e na yengɔ lingɔ kwa tɛ awa sungɔ lége ti kotani. Mbi hɛ̃ndó lo gbinya mbala kɔi ya,: “Ee e na yengɔ lingɔ ni! E na yengɔ gwengɔ akɔdɔrɔ mɛndɛ̃ zu kanda ta kɔdɔrɔ ti Quebec ma!” Ye mɛndó ato mbi ya, mbi tɛnɛ ngaso adu ya, mbi ziandó dangɔ bɛ mɛndó azi ti kɔdɔrɔ ti Canada mɛ ndo tɛnɛ yanga ti Anglais na ni, na ndo azi mɛ ndo tɛnɛ yanga ti Français mɛ ndo du ka Quebec ya, atambwisa mbi. Na ngoi ni kondó ko, azi ti politikɛ ti Quebec ndo tɛnɛndó kpengbani ya, ayɔ ya, akangbi ya kɔdɔrɔ ti Canada, wa ngoi zu kpale ti asosiete ndo gbɛ̃ bo gbɛ̃ngɔ.

Arnold tɛnɛndó hɛ̃ mbi ya, “Quebec bo la adu kɔdɔrɔ kɔi mɛ biro ti filiale alengbi ti tongɔ awa sungɔ lége ti kotani na olo.” Ni la, mbi yendó gwengɔ kai mbala kɔi. Mbi yendó mbala kɔi na lo mɛ ya, mbi hĩndandó ya, Randi na gwɛ̃ ti gwengɔ lingɔ kwa kai. Na gesi mbi gbɔ̃ndó ndani ya, ni du ekateli ti nzɔ̃ni mɛndó mbi mu na ya dungɔ lɛ ngɛ̃́ tɛ mbi!

Na pɛ mandangɔ yanga ti Français na pɛ pɔsɔ kũ ko, mbi ná Randi nga na nyita mɛndɛ̃ ná ya lo e gwendó ka Rimouski, mɛ ni na kilometrɛ bere 540 na kɔdɔrɔ ti Montréal. Kanda e dɛndó na akpale gba ti mandangɔ, na ndakisa ngoi mɛndó e gwe bombi wa ahɛ̃ mbi mayebisi ya mbi di ko, na se lɛ pangɔ hɛ̃ ayata ya, na bombi tɛ e ti pɔsɔ ti gesi ko, e na yambangɔ ayata gba mɛ “alo ka Autriches” pɔsɔ ti gesi mɛ e ka bombi ko, mbi tɛnɛ hɛ̃ la ya, e na yambangɔ ayata mɛ alo ka “Autriche.”

Ayata wali siɔ mɛ awa sungɔ lége ti ge ge ge nga na nyita kɔli Huberdeaus na ayangambi tɛ la ti wali sɛ adirindó ka Rimouski ndoni kɔi na e. Ndasewa tɛ nyita Huberdeaus ndo futandó da kɔi mɛ na achambrɛ mbalambala hɛ̃ awa sungɔ lége. E ndo ilindó da niko ya, da ti fialiale na lo ti angbó ni mɛndó kotani nga na gbɛnyɔ da ni mɛndó ali ni na langi ti mbufuni. E ndó na azi 12 bere 14 mɛ ndo du kaya da ni. Na lo mɛ ya, e dundó awa sungɔ lége ti kotani ko, mbi ná Randi e ndo sindó kwa ti fangɔ tɛnɛ na ndatu, na pɛ midi nga na ndɔ, na lo ni e ndo na dengɔ bɛ na lo mɛ ya, e na ayata gba mɛ elengbi ti singɔ kwa ti fangɔ tɛnɛ ndoni kɔi na ala​—abɛse na ya ngoi mɛ dé ndo ya kpengbani na ndɔ.

E ndó na mangbi ti kpengbani na awa sungɔ lége niko, wa ala tindó mabere azi ti ndasewa tɛ e. Ngoi mɛndɛ̃ e zu e ndo dundó ndoni kɔi ka tɛrɛ wá, e ngandó na bi kɔi mɛndó e zu e ndo tɔ aye ti tɛngɔ ndoni kɔi. Nyita kɔi ka popo tɛ e ahĩngandó yengɔ bia nzɔ̃ni, na lo ni la, na lá pɔsɔ e ndo yendó bia, wa e ndo dɔ ngandó dɔ.

Azi gba ti kɔdɔrɔ ti Rimouski ndo yendó mangɔ tɛnɛ ti ya Ngbangɔ! Na ya bulu kũ, e mandó dengɔ bɛ ti hũngɔ awa mandangɔ Ngbangɔ gba amai na ya nyingɔ wa ala mu nga batisimɔ, wa e tindó na awa fangɔ tɛnɛ 35.

Ka Quebec, e luandó fɔrmasiɔ̃ ti nzɔ̃ni na omɛ aba kwa ti fangɔ tɛnɛ. E hũndó se mɛ Yehova ndo za e na ya kwa ti fangɔ tɛnɛ nga na ya mi. Hãngɔ ni zingɔ, e mandandó yengɔ azi mɛ ndo tɛnɛ yanga ti Français, e manda ngandó yanga tɛ la, nga na akpale ti kɔdɔrɔ tɛ la​—ni lindó ya, e banda nga yengɔ akpale ti akɔdɔrɔ mɛndɛ̃.​—2 Kɔr. 6:13.

Na gesi ayɔndó ka ti e ya, e diri ka kɔdɔrɔ ti Tracadie mɛ ka Estɛ ti kɔdɔrɔ ti Nouveau-Brunswick. Adundó kpengba kpale na lo tɛ e na lo mɛ ya, e londó ti mungɔ da kɔi ti futelangɔ, wa e hɛ̃ndó falanga ti da ni,  mbi ngandó na kwa kɔi ti pɛ ndunu ngoi ti hangɔ kalasi na ya sosiete kɔi. Hãngɔ ni zingɔ, ambanga azi mɛndó e ndo manda na ala Ngbangɔ alondó ti mungɔ batisimɔ, wa ta kwa ti kĩngɔ da ti Lo-lengɔ Gbia adɛndó wɛ ma.

E lindó sambela pɔsɔ mobimba na lo ti gbinyangbingɔ ti kpale niko, wa e gwendó e ba kɔdɔrɔ ti Tracadie, ni hɔngbindó madãma na kɔdɔrɔ ti Rimouski. Kanda e mundó ekateli ya, na lo mɛ ya Yehova ye ya, e gwe kai ko, e na gwengɔ. E kpãndó Yehova na ya tara, wa e hũndó se mɛ lo onzi akpengba kpale tɛ e kɔi kɔi. (Mal. 3:10) Na lo ti loyengɔ ti kpengbani tɛ Randi, seliye tɛ lo ti hɛ̃ngɔ tɛrɛ, nga na se tɛ lo ti tongɔ sasa, alindó ya, e mɛsɛnɛ na kɔdɔrɔ niko ti fãnani iɔ.

Kaya bombi ti fãnani mɛndó ato e da ko, ni bondó na biazo kɔi, nyita Robert Ross. Lo ná ya lo Linda alindó kwa tɛ awa sungɔ lége ti ngoi zu kaya kɔdɔrɔ niko, wa na ngoi mɛndó ala dũ nyingambi ko, ala mundó ekateli ti ngbãngɔ kai. Abɛse kumba mɛndó ala na ni ti kãngɔ nyi la ko, ala sandó ngunu bɛ mbi ná Randi na ndenge mɛndó ala yamba e nzɔ̃ni, nga na lo ti ge ge ge tɛ la na ya kwa ti fangɔ tɛnɛ.

Na pɛ lingɔ kwa tɛ awa sungɔ lége ka Tracadie na pɛ bulu sɛ ko, e di e tengbindó na kpale ti kamwangɔ nvɛ̃ni​—ailindó e ya, e li kwa tɛ awa bangɔ ndo kɛlɛ kɛlɛ. E lindó kwa tɛ awa bangɔ ndo kɛlɛ kɛlɛ kaya kɛlɛ kɛlɛ ti yanga ti Anglais abulu mbalambala, na gesi atondó e kaya kɛlɛ kɛlɛ ti yanga ti Français ka Quebec. Wa bangɔ ndo district tɛ e ka Quebec adu nyita Léonce Crépeault, lo ndo hɛ̃ndó mbi sia kɔli na lo ti diskur tɛ mbi. Kanda lo ndo hũndandó mbi ngoi zu na ndo mɛ, “Ngasia la ni lengbi ti dungɔ nzɔ̃ni nvɛ̃ni nɛ?” b Awangɔ tɛ lo ti nzɔ̃ni azandó mbi ya, mbi kpã lɛ mbi na ndo se mɛ mbi lengbi ti lingɔ ya, adiskur tɛ mbi agbɔ̃ bɛ azi.

Kumba kɔi mɛ ta bɛ mbi na lingɔ gbanda na ni ma adu omɛndó mbi lua na bulu ti 1978 na ngoi ti kota bombi ti ndo lɛ gigi zu mɛ bɛli tɛnɛ ni pa ya, “La foi victorieuse.” Mbi lindó kwa ka ndo ti tɔngɔ tɛ. Azi bere 80 000 la na gangɔ kota bombi ni, wa apa ya, e na salelangɔ kɔdɛ ti fãnani na omɛ aba tɛ ti tɛngɔ. Akpale zu adundó ti fãnani ka tɛ mbi: aye ti kwa, aye ti tɛngɔ, nga na se ti tɔngɔ na ni ko, ta mbi dɛndó mbi li ni uzu ma. E ndó na afrigo ti kotani 20, ngoi mɛndɛ̃ ta ni ndo lindó kwa na seni ma. Bi ti uzu ti nɛngɔ ya e banda kota bombi ko, ta kɔdɛ ti e lingɔ kaya stadɛ uzu ti nɛngɔ ya bɛ bi alengbi da ma, na lo mɛ ya, ando tandó dɛmbo ka stadɛ ni. Wa ayɔndó ya, e banda tɔngɔ ye uzu ti nɛngɔ ya ndã de! E nzɛ̃ndó kpengbani nvɛ̃ni, kanda mbi luandó awangɔ gba na ndo kwa ti kpengbani, seliye ti tongɔ sasa nga na se mɛndó ayata  afa ya, ala du kpengbani na ya nyingɔ. Ni lindó ya, e ti abɛta akwa, wa tee ndɛ mangbi niko adɛ bo kpengbani. Adu ye ti dengɔ bɛ nvɛ̃ni na lo tɛ mbi na ndenge mɛndó mbi li kwa ka kota bombi niko ti ndo lɛ gigi zu ka kɔdɔrɔ ti Quebec, ndo mɛndó botemeli ali tɛrɛ lo ka da kpengbani na ya abulu 1940 tee 1950!

Mbi mandandó akpale gba na mbage tɛ awa bangɔ ndo kɛlɛ kɛlɛ mɛndɛ̃ na ngoi ti kota bombi ti Montréal. Na ya bulu kɔi, nyita David Splane mɛ na olo kaya bombi tɛ adonzi ndó la ndo ba ndo kwa ti kota bombi niko. Kanda na bulu ti gesi ayɔndó ka ti mbi ya, mbi li kumba ni. Abɛse ngaso ko, Davidi ndó na dangɔ bɛ ti nzɔ̃ni.

Na bulu ti 2011, na pɛ lingɔ bulu 36 na ya kwa ti bangɔ ndo kɛlɛ kɛlɛ ndoni kɔi na Randi ko, ailindó mbi ya, mbi ti wa hangɔ kalasi tɛ abiazi ti ya bombi (EAC). Na ya bulu sɛ e landó na ndo ambɛto mɛ akɛsɛnɛ 75, kanda ta adundó wele ma. Na nda pɔsɔ kɔi kɔi, abiazi ndo hɛ̃ndó e sia kɔli gba nvɛ̃ni, na lo mɛ ya, ala ndo hũndó se mɛ bombi tɛ Adonzi ndo kpã lɛ lo na ndo gwɛ̃ tɛ la ti nyingɔ.

Na gesi, mbi bandandó hɛ̃ngɔ formasiɔ̃ ka Eteyelo mpo na bapalanganisi ya sango malamu ya bokonzi. Awa kalasi ndo mandó nzɛ̃ngɔ gba nvɛ̃ni na lo mɛ ya, ala ndó na kwa gba ti lingɔ: bi kɔi kɔi ala ndo lindó sa mbalambala ka kalasi, sa taa ti lingɔ adevuar, ndɔ zu mɔ lengbi ti dungɔ na devuar 4 bere 5 ti bongisangɔ na ya pɔsɔ kɔi. Mbi ná fɔ̃ mbi mɛndɛ̃ mɛ wa hangɔ mbeti e tɛnɛndó hɛ̃ awa kalasi ya, ti nɛngɔ ya ala longa ko, ayɔ ya ala yɔ ka ti Yehova ya, lo za la. Mbi ndo da bo bɛmbi na semɛndó awa kalasi ndo kamwa na ndenge mɛndó ala hũ ya, kpãngɔ bɛ ka tɛ Yehova ni li ya, ala li ye mɛndó ala ndo hũ ya, ta ala na kokangɔ lingɔ ni ma.

Se mɛndó Mama tɛ mbi kpã tɛrɛ lo na ndo tɛ azi mɛndɛ̃, azandó awa mandangɔ Ngbangɔ ya, ala mai nzɔ̃ni na ya nyingɔ, ni za ngandó tata tɛ mbi ya, lo gbinya bingangɔ li tɛ lo na ndo mbilimbili. Bi taa so pɛ kwá tɛ Mama tɛ mbi ko, e kamwandó hũngɔ Tata ka bombi ti mangɔ diskur tɛ azi zu, wa lo ngbã bondó lá kwɛ gwengɔ bombi bulu 26. Na ya kpale niko zu ko, ta tata tɛ mbi amundó batisimɔ ma, kanda abiazi tɛnɛ hɛ̃ mbi ya, lo bo la du zo mɛ ndo si uzu ka da ti bombi, pɔsɔ zu.

Mama tɛ mbi du nzɔ̃ se lɛlo na lo tɛ mbi nga na lo tɛ nyita mbi ti wali. Ayangambi tɛ mbi ti wali taa ná akɔ la ndo vɔrɔ Yehova na mbilimbili zu. Ayata mbi ti wali sɛ ka bethel​—kɔi ka Portugal wa lo mɛndɛ̃ ka Haiti.

Ndɛ lo mɛ ko, mbi ná Randi e du awa sungɔ lége ti kotani ka Hamilton mɛ ka Ontario. Ngoi mɛndó e ndo le kwa ti bangɔ ndo kɛlɛ kɛlɛ ko, e ndó na dengɔ bɛ ti gwengɔ ndoni kɔi na ayata kɔli ná ayata wali bangɔ azi mɛ ala pa nzɔ̃ pa hɛ̃ la ka kwa ti fangɔ tɛnɛ. Wa ndɛ lo mɛ ko, e na dengɔ bɛ ti hũngɔ se mɛ azi mɛ e ndo manda na la Ngbangɔ ndo mai na ya nyingɔ. E na mangbi ti kpengbani na ayata kɔli ná ayata wali ti ya bombi tɛ e ti fãnani, wa e ndo hũ nga ya Yehova ndoni kɔi na ala na ya ngoi ti nzɔ̃ni nga na ya ngoi ti siɔni, ni ndo sa ngunu bɛ e.

Ngoi mɛ e ndo da bɛ e na nzɔ̃ kpale mɛndó azi gba ali tɛrɛ e na ya dungɔ lɛ ngɛ̃́ tɛ e ko, a ndo to e ya, e li nga kpengbani ya, “e fa nga ni” na azi mɛndó e na la ndoni kɔi ti nɛngɔ ya, e sa ngunu bɛ la ya, ala salela ngunu tɛ la na ya kwa tɛ Yehova se alengbi. (2 Kɔr. 7:6, 7) Na ndakisa kaya ndasewa kɔi ko, wali ti ndasewa ná ayati la sɛ, kɔi ti kɔli ná ti wali adundó awa sungɔ lége. Mbi hũndandó kɔ wali niko ya, bere lo ka ndo du na gwɛ̃ ti tingɔ wa sungɔ lége. Lo gbinya hɛ̃ mbi ya, lo zi lége hɛ̃ azi taa ti ndasewa tɛ lo ya, ala ti awa sungɔ lége. Mbi hũnda lo ya, “Ye mɛ mɔ lengbi ti lingɔ ti nɛngɔ ya, mɔ za la gba mɛ aɔ ye mɛ Yehova lengbi ti lingɔ nɛ?” Mbi sandó ngunu bɛ lo ya, lo nvɛ̃ni tara mangɔ dengɔ bɛ mɛ azi ti ndasewa tɛ lo ndo ma. Nzɛ mana na gesi ko, lo tindó wa sungɔ lége.

E ná Randi na ngbãngɔ bo lá kwɛ “tɛnɛngɔ hɛ̃ azi mɛ na gangɔ gesi” aye ti “nzɔ̃ni mɛ Yehova li,” e da bɛ e ya, dengɔ bɛ mɛ ala na luangɔ na ya kwa tɛ Yehova na dungɔ gba ɔngɔ omɛndó e lua.​—Nz. 71:17, 18.