1. Yehova sandó ngunu bɛ awa kwa tɛ lo ti mbilimbili na ngoi ti gã ngasia?

 TƐNƐ tɛ Nzapa ndo fa azi mɛ mbilimbili ngoi zu mabere azi ti ngunu. Kanda abɛse azi mɛ na ngunu ka popo tɛrɛ ala ko, ta ala ndo ma ya tɛrɛ ala ya, ani na ngunu ma. Na ndakisa, na ya ngoi mɛndɛ̃, gbia Davidi mandó tɛrɛ lo ya, “lo na ngunu mabere ngomba,” kanda na ngoi mɛndɛ̃ ndó ko, “lo tindó na mbɛtɔ.” (Nz. 30:7) Nyingɔ tɛ Nzapa hɛ̃ndó Samson tɛrɛ mɛ na ngunu ti kpengbani, kanda Samson hĩngandó ya, se ta du na lo ti ngunu tɛ Nzapa ma ko, “lo na nzɛngɔ, wa lo nga na tingɔ mabere azi zu.” (Bas. 14:5, 6; 16:17) Se awa kwa ti mbilimbili niko zu adundó na ngunu ko,Yehova ndó la ndo hɛ̃ la.

2. Nda mɛ toma Polo tɛnɛ ya, ngoi mɛndɛ̃ mbindó na nzɛ̃ngɔ, wa na ngoi niko ko, mbi ngandó na ngunu nɛ? (2 Kɔrinto 12:9, 10)

² Toma polo hĩnga ngandó ya, ngunu tɛ lo ndo lo ka tɛ Yehova. (Di 2 Kɔrinto 12:9, 10.) Nga ma se tɛ azi gba so popo tɛrɛ e ko, Polo tengbi ngandó na kpale mɛ aba sãte. (Gal. 4:13, 14) Ngoi mɛndɛ̃ ando du ngandó kpengbani ti nɛngɔ ya, lo li aye ti nzɔ̃ni. (Roma 7:18, 19) Wa ni ndo li ngandó ya, lo ti na sɔngɔ bɛ nga na mbɛtɔ na lo ti kpale mɛ na singɔ na lo. (2 Kɔr. 1:8, 9) Kanda ngoi mɛndó lo ndo du na nzɛ̃ngɔ ko, lo ndo tindó na ngunu. Ngasia? Na lo mɛ ya, Yehova ndo hɛ̃ndó Polo ngunu mɛndó lo na gwɛ̃ ni ti nɛngɔ ya, lo gbe bɛ lo na ya kpengba kpale mɛ lo ndo tengbi na ni.

3. Ahũnda mɛ e na hɛ̃ngɔ gbinya ni na ya tɛnɛ mɛ nɛ?

³ Yehova ko nga kapa ya, ni na hɛ̃ngɔ e ngunu ti nɛngɔ ya, e gbe bɛ e na ya kpengba kpale. (1 Pet. 5:10) Se du ya, ta e ndo li ge ge ge ma ko, ta e da bɛ e ya, elengbi ti luangɔ ngunu niko ma. E mu ndakisa kɔi, mɔtɛrɛ lengbi ti hɛ̃ngɔ kamiɔ̃ ngunu mɛ alengbi ya,  agwe uzu, abɛse ngaso ko, se wa kpɛngɔ na ni aye ya, kamiɔ̃ ni hãnɔ ko, ayɔ ya, lo pɛtɛ na ndo accélérateur. Kwɛ kɔi Yehova ndo du dã ti hɛ̃ngɔ e ngunu mɛ e na gwɛ̃ ni, kanda ti nɛngɔ ya, e lua ni ko, ayɔ ya e li ye kɔi. Wa na lége mɛ ngasia la Yehova ndo salela ti nɛngɔ ya, lo hɛ̃ e ngunu nɛ? Ye mɛ elengbi ti lingɔ ti nɛngɔ ya, e lua ngunu niko nɛ? E na luangɔ agbinya ti ahũnda niko na mandangɔ se mɛndó Yehova li ya, azi taa mɛ Ngbangɔ tɛnɛ tɛnɛ tɛ la alua na ngunu​—na lége ti mandangɔ se mɛndó Yehova za na prɔfɛta Yona, Maria mɛ ta Yezo, nga na toma Polo. E nga na hũngɔ se mɛ Yehova ndo li na kpale ti ngaso ti nɛngɔ ya, lo hɛ̃ ngunu hɛ̃ awa kwa tɛ lo.

4. E ndo lua ngunu na lége tɛ Yehova ngasia?

⁴ Kɔi ti se mɛ mɔ lengbi ti luangɔ na ngunu tɛ Yehova adu na lingɔ sambela hɛ̃ lo. Yehova na hɛ̃ngɔ e gbinya na ndo sambela tɛ e na lége ti hɛ̃ngɔ e “kota nguru.” (2 Kɔr. 4:7) Elengbi ti luangɔ ngunu na lége ti dingɔ Ngbangɔ nga na gbɔ̃ngɔ li e na ndo ye mɛ e di. (Nz. 86:11) Yehova ndo tɛnɛ tɛnɛ na e na lége ti Ngbangɔ mɛ na “ngunu gba.” (Aeb. 4:12) Se du ya, mɔ ndo li sambela hɛ̃ lo, wa mɔ ndo di nga tɛnɛ tɛ lo ko, mɔ na luangɔ ngunu mɛ alengbi ti nɛngɔ ya, mɔ gbe bɛ mɔ, wa mɔ bata nga dengɔ bɛ tɛ mɔ bere mɔ nwɔ nga kpengba kpale mɛ mɔ ndo tengbi na ni na ya kokisangɔ kumba tɛ mɔ. Ba se mɛndó Yehova hɛ̃ prɔfeta Yona ngunu.

5. Nda mɛ Prɔfeta Yona ndó na gwɛ̃ ti lisalisi tɛ Yehova nɛ?

⁵ Yona ndó na gwɛ̃ ti luangɔ ngunu. Na lo mɛ ya, lo ndó na mbɛtɔ ti gwengɔ ka ndo mɛndó Yehova to lo da ko, lo mandó na ya masuwa mɛ aga gwe ka ndo mɛndɛ̃. Na lo ni ko, ayɔndó ya, ala tũ ka lɛ ngu na lo ti kpengba yá, kanda lo kpã ngandó dungɔ lɛ ngɛ̃́ tɛ azi mɛndɛ̃ na ya kpengba kpale. Ngoi mɛ abi lo kaya tɛ ko, lo kamwãndó singɔ ka ndo mɛ ta lo sindó da uzu ma​—kota susu gandó mɛnɛ lo. Mɔ hĩnga ndenge mɛndó Yona ma na tɛrɛ lo? Na ebandeli ngoi mɛndɛ̃ lo ka dandó bɛ lo ya, lo na kpingɔ so ndoko? Lo ka dandó bɛ lo ya, Yehova kɛ̃ tɛrɛ lo? Abɛse kpale ni du ngasia ko, Yona mandó sɔngɔ bɛ kpengbani nvɛ̃ni.

6. Na bangɔ tɛnɛ mɛ kaya mbeti ti Yona 2:1, 2, 7, ye mɛndó ahɛ̃ Yona ngunu na ngoi mɛndó lo kaya kota susu nɛ?

⁶ Ye mɛndó Yona li ti nɛngɔ ya, lo lua ngunu na ngoi mɛndó lo kɔi kaya susu na ndo mɛndó ta alengbi ti hũngɔ lo ma nɛ? Lo lindó sambela hɛ̃ Yehova. (Di Yona 2:1, 2, 7.) Abɛse du ya, Yona kɛ̃ndó tɔndɔngɔ tɛnɛ mɛ Yehova tɛnɛ hɛ̃ lo ko, lo gbinyandó bɛ lo wa lo ngandó na loyengɔ ya, Yehova na mangɔ sambela tɛ lo. Yona gbɔ̃ ngandó li lo na ndo avɛrse ti ya Ngbangɔ mɛndó lo di uzu. Nda mɛ elengbi ti tɛnɛngɔ nga so nɛ? Sambela tɛ lo mɛ alo kaya mbeti ti Yona shapitrɛ ti 2, mɛ asalela atɛnɛ mawoma nga na tɛnɛ mɛndɛ̃ mɛ elengbi ti tãngɔ ni kaya mbeti ti Nzembo. (Na ndakisa, e haka mbeti ti Yona 2:2, 5 ná Nzembo 69:1; 86:7.) Ti bɛta kpale ko, Yona hĩngandó tɛnɛ mɛ kaya vɛrse ti Nzembo nzɔ̃ni. Ngoi mɛ lo gbɔ̃ li lo na ndo tara ti kpengbani mɛ lo tengbi na ni ko, lo ye na bɛ lo kɔi ya, Yehova na zangɔ lo. Yehova batandó Yona, wa na gesi Yona yendó kokisangɔ kwa mɛndó Yehova hɛ̃ lo ya, lo li.​—Yona 2:10–3:4.

7-8. Na ya tara, ngasia la nyita kɔli kɔi mɛ ka Taiwan luandó ngunu nɛ?

⁷ Ngoi mɛ e ndo tengbi na tara ndɛ̃ ndɛ̃ ndɛ̃ ko, pandɛ tɛ Yona alengbi ti zangɔ e kpengbani nvɛ̃ni. E mu ndakisa tɛ nyita Zhiming b mɛ ndo du ka Taiwan. Ta lo ndo gbe bo bɛ lo na ndo kpengba kpale mɛ aba sãte tɛ lo ma, kanda lo ndo gbe nga bɛ lo na ndo botemɛli ti kpengbani mɛ azi ti ndasewa tɛ lo ndo temela na lo, na lo mɛ ya lo ndo vɔrɔ Yehova. Ni la, lo ndo lua ngunu ka tɛ Yehova na lége ti lingɔ sambela nga na mandangɔ Ngbangɔ. Lo tɛnɛ ya, “Ngoi mɛndɛ̃  mɛ kpale ndo si ko, mbi ndo du na sɔngɔ bɛ kpengbani ya, ta mbi na kokangɔ gbengɔ bɛ mbi ti nɛngɔ ya, mbi manda Ngbangɔ ma,” kanda Zhiming ndo kpã bɛ lo ka tɛ Yehova ya, lo za ni. “Ti uzu mbi ndo li sambela ya, Yehova za mbi,” lo di tɛnɛ ya. “Ti sɛ mbi ndo kpãndó ecouteur ka ma mbi ti nɛngɔ ya, mbi ma abia ti Lo-lengɔ Gbia. Na ya ngoi gba, mbi ndo ye ni na legɔ̃ ti sese tee mɛ mbi lua siriri ti bɛ. Wa na gesi ko mbi banda mandangɔ Ngbangɔ.”

⁸ Mandangɔ Ngbangɔ tɛ Zhiming la, ahɛ̃ lo ngunu ya, lo gbe bɛ lo na ndo akpengba kpale ndɛ̃ ndɛ̃ ndɛ̃ mɛ lo ndo tengbi na ni. Na ndakisa na pɛ operasiɔ̃ ti kpengbani mɛndó ali na lo ko, taux ti globule rouge tɛ lo ashitendó, wa mɔnganga kɔi ti wali tɛnɛ ya, na lo ti taux ti globule rouge tɛ lo mɛ ashite ko, ayɔ ya akpã mɛnɛ tɛrɛ lo. Kanda na ndɔ ti bi kɔi uzu ti nɛngɔ ya ali Zhiming operasiɔ̃ ko, lo di tɛnɛ tɛ nyita wali kɔi mɛ ali nga lo operesiɔ̃ ti ngaso. Lo hũndó ya, taux ti globule rouge tɛ nyita wali niko ashitendó gba aɔ tɛ lo kanda ta lo yendó ya, akpã mɛnɛ tɛrɛ lo ma, wa lo so ngandó. Tɛnɛ niko ahɛ̃ndó Zhiming ngunu ti nɛngɔ ya, lo ngbã mbilimbili ka tɛ Yehova.

9. Se du ya, mɔ ma nzɛ̃ngɔ na lo mɛ ya, mɔ tengbi na tara ye mɛ mɔ lengbi ti lingɔ nɛ? (Ba nga limɔ)

⁹ Mɔ ka mɔ mandó nzɛ̃ngɔ kpengbani mandangɔ Ngbangɔ bere lingɔ sambela na ngoi mɛndó mɔ tengbi na tara? Se du ngaso ko, hĩnga ya, Yehova hĩnga kpale tɛ mɔ nvɛ̃ni nzɔ̃ni. Abɛse mɔ li sambela kɔi mɛ ndununi ko, hĩnga ya, Yehova na hɛ̃ngɔ mɔ aye mɛ mɔ na gwɛ̃ ni. (Ef. 3:20) Se du ya, na lo ti pɛnɔ mɛ aba tɛrɛ ti mi bere ti bingangɔ li ko, ta na hɛ̃ngɔ mɔ lége ya, mɔ di bere mɔ manda aye ma, ngoi mɛndɛ̃ mɔ lengbi bo ti mangɔ atɛnɛ ti ya Ngbangɔ nga na ambeti mɛ ndo kambisa tɛnɛ ti ya Ngbangɔ na lége ti audio. Mɔ lengbi ti mangɔ audio ti kɔi ti abia tɛ e bere video ti Linɔngi ti Sinzili mɛ kaya jw.org. Yehova ye hɛ̃ngɔ mɔ ngunu wa lo na lingɔ ni na ngoi mɛ mɔ ndo li sambela hɛ̃ lo, mɔ ndo gi nga gbinya ti sambela tɛ mɔ kaya Ngbangɔ, nga kaya ambeti mɛndɛ̃ mɛ linɔ tɛ lo ndo si na ni.

10. Ngasia la, ayata kɔli ná ayata wali ndo sa ngunu bɛ e nɛ?

¹⁰ Yehova lengbi ti salelangɔ ayata kɔli ná ayata wali ti nɛngɔ ya, ala sa ngunu bɛ e. Ala lengbi  ti dungɔ “ndo ti zungɔ na bɛ” na ngoi mɛ e ti na ya pɛnɔ bere na ngoi mɛ ta e ndo koka kokisangɔ kumba kɔi bere kwa kɔi ti kpengbani mɛ ahɛ̃ e ya, e li ni ma. (Kɔl. 4:10, 11) Na ngoi “ti pɛnɔ” la, e ndo du na gwɛ̃ tɛ akwa. (Mas. 17:17) Ayata kɔli ná ayata wali alengbi ti sangɔ ngunu bɛ e, wambangɔ bɛ e, ala lengbi nga ti sangɔ ngunu bɛ e ya, e ngbã lá kwɛ lingɔ kwa hɛ̃ Yehova na ya mbilimbili. E ba se mɛndó Maria mɛ ta Yezo alua ngunu na lége tɛ awa kwa tɛ Yehova mɛndɛ̃.

11. Nda mɛ Maria ndó na gwɛ̃ ti luangɔ ngunu nɛ?

¹¹ Maria ndó na gwɛ̃ ya, asa ngunu bɛ lo. Da bɛ mɔ na ndenge mɛndó Maria ma sɔngɔ bɛ na ngoi mɛndó angelo Gabriel pa hɛ̃ lo ya, lo na mɛngɔ ngɔ abɛse ta lo dɛ hĩngandó kɔli ma. Ta lo dɛndó kã nyi ngambi ma, kanda ayɔndó ya, lo kã nyingambi mɛ na tingɔ Masiya. Hãngɔ ni zingɔ, lo na kambisangɔ tɛnɛ ti ngɔ niko hɛ̃ Yozɛfu mɛ wanda tɛ lo mɛ ta lo na Yozɛfu dɛ mungbindó tɛrɛ la ti kɔli ná wali ma ngasi? Ni dundó kpengbani nvɛ̃ni na lo tɛ lo.​—Luka 1:26-33.

12. Na bangɔ Luka 1:39-45, ngasia la, Maria luandó ngunu mɛ lo na gwɛ̃ ni nɛ?

¹² Maria luandó ngunu ti nɛngɔ ya, lo kokisa na kumba mɛ ta lo mɛsɛnɛ na ni ma nga kpengbani ngasia? Lo gindó wangɔ ka tɛ awa kwa tɛ Yehova mɛndɛ̃. Na ndakisa, lo hũndandó angelo Gabriel na ndo fãni gba ti nɛngɔ ya, lo hĩnga se mɛ lo lengbi ti kokisangɔ na kumba tɛ lo. (Luka 1:34) Na gesi, lo gwe ka Yuda “kɔdɔrɔ mɛ na angomba” ti bangɔ Elizabɛte mɛ kɔi ti ndasewa tɛ la. Vuajɛ kɔi mɛndó ta lo binga bɛ lo na lo ni ma. Elizabɛte yamba Maria wa na lége ti Nyingɔ vurú tɛ Yehova ko, lo pa prɔfesi kɔi ti sangɔ ngunu bɛ na lo tɛ nyi Maria mɛ lo na dũngɔ lo. (Di Luka 1:39-45.) Na pɛni Maria tɛnɛndó ya, Yehova ndo “li akpengba kwa na ngunu tɛ lo.” (Luka 1:46-51) Na lége tɛ angelo Gabriel ná Elizabɛte ko, Yehova hɛ̃ndó Maria ngunu.

13. Ye mɛndó ali tɛrɛ lo na ngoi mɛndó nyita wali kɔi mɛ ka Bolivie ahũnda ayata kɔli ná ayata wali ya, ala za lo nɛ?

¹³ Mabere Maria, mɔ lengbi nga ti luangɔ ngunu ka tɛ awa kwa tɛ Nzapa mɛndɛ̃. Nyita wali Dasuri mɛ ndo du ka Bolivie ndó na gwɛ̃ ti ngunu ko ti ngaso. Ngoi mɛndó alua to lo na ngã kɔi mɛ lo bo na kpingɔ ko, Dasuri yendó dungɔ ka gunda to lo ka dayɔrɔ ti nɛngɔ ya lo salisa lo. (1 Tim. 5:4) Ta ni dundó woni ma. Lo tɛnɛ ya, “Ngoi mɛndɛ̃ mbi ndo hũndó ya, ta mbi na kokangɔ ma.” Dasuri yɔndó ya, aza lo? Na ebandeli ta lo ndo yendó ya, aza lo ma. Lo tɛnɛ ya,“Ta mbi yendó giangɔ ayata kɔli ná ayata wali ma. Mbi ndo tɛnɛndó ya, ‘Yehova na zangɔ mbi.’ Kanda mbi ga hĩnga ya, mbi ndo ɔndɛ tɛrɛ mbi ti nɛngɔ ya, mbi nvɛ̃ni mbi onzi kpale tɛ mbi mbi kɔi.” (Mas. 18:1) Dasuri mundó ekateli, wa lo kambisandó kpale mɛ lo na ni na ya mbeti to hɛ̃ ambanga ayata kɔli ná ayata wali. Lo tɛnɛ ya “Mbi zanga tɛnɛ ti tɛnɛngɔ na lo ti tɛnɛ mɛ ayata kɔli ná ayata wali tɛnɛ mɛ asa ngunu bɛ mbi.” “Ala ga na aye ti mi azia hɛ̃ mbi ka da yɔrɔ, wa ala wamba nga bɛ mbi na vɛrse ti ya Ngbangɔ mɛ ala di hɛ̃ mbi. Adu nzɔ̃ni hĩngangɔ ya, ta e ngbã e kɔi na bɛ e ma. E du kɔi kaya kota ndasewa tɛ azi tɛ Yehova​—ndasewa kɔi mɛ ndo du dã ti zangɔ e, tongɔ to ndoni kɔi na e, hũngɔ nga pɛnɔ ndoni kɔi na e.”

14. Nda mɛ elengbi ti yengɔ wangɔ tɛ abiazi nɛ?

¹⁴ Yehova ndo hɛ̃ nga e ngunu na lége tɛ abiazi. Ala du likabo mɛ Yehova ndo salela ti sangɔ ngunu bɛ mɔ, zungɔ nga na bɛ mɔ. (Yis. 32:1, 2) Ni la, se mɔ du na sɔngɔ bɛ ko, ta mɔ binga bɛ mɔ na tɛnɛngɔ hɛ̃ ala ma. Ta mɔ kɛ̃ wangɔ mɛ ala ndo hɛ̃ mɔ ma. Na lége tɛ la, Yehova lengbi ti lingɔ ya, mɔ ti na ngunu.

15. Nzɔ̃ dangɔ bɛ mɛ awakristo zu na ni nɛ?

¹⁵ Kapa tɛ Nzapa mɛ kaya Ngbangɔ alengbi ti hɛ̃ngɔ e nzɔ̃ dangɔ bɛ na ngunu ti nɛngɔ ya, e ngbã lá kwɛ lingɔ kwa hɛ̃ Yehova. (Roma 4:​3, 18-20) Awakristo ti mbilimbili na nzɔ̃ tangɔ ligɛrɛ ti luangɔ dungɔ lɛ ngɛ̃́ ti kaka kaya Paradizo mɛ  na dungɔ ge lɛ sese, ambangani na nzɔ̃ dangɔ bɛ ti luangɔ dungɔ lɛ ngɛ̃́ ti kaka kaya Lo-lengɔ Gbia mɛ na dungɔ ka ndozu. Nzɔ̃ dangɔ bɛ tɛ e ndo hɛ̃ e ngunu ti gbengɔ bɛ e na ya pɛnɔ, lingɔ kwa ti pangɔ nzɔ̃ pa, lingɔ nga akumba ndɛ̃ ndɛ̃ ndɛ̃ ti zangɔ ayata kɔli ná ayata wali kaya bombi. (1 Tɛs. 1:3) Nga bo nzɔ̃ dangɔ bɛ nikondó la, ahɛ̃ Polo ngunu.

16. Nda mɛ ndó toma Polo na gwɛ̃ ti luangɔ ngunu nɛ?

¹⁶ Polo ndó na gwɛ̃ ti luangɔ ngunu. Kaya mbeti ti sɛ mɛndó lo su to hɛ̃ ayata ti Kɔrinto ko, lo hakandó tɛrɛ lo na ta kɔi mɛ woni. Ahɛ̃ndó lo pɛnɔ ndɛ̃ ndɛ̃ ndɛ̃, akpãndó bɛ lo ndozu wa ‘andokinda ngandó lo.’ Ngoi mɛndɛ̃ dungɔ lɛ ngɛ̃́ tɛ lo tindó na ya kaka. (2 Kɔr. 4:8-10) Polo sundó mbeti niko na ngoi mɛndó lo ga lo li vuajɛ tɛ lo ti taa ti misiɔ̃nɛrɛ. Ta bɛ lo ndo li na ngoi nikondó ma, kanda so pɛni lo di tengbi na kpengba kpale mɛ adi ɔ ti uzu. Azi gba landandó lo, agbɔ̃ lo bi ya tɛ, so pɛni ala di gbɔ̃ nga lo bi bɔlɔkɔ.

17. Na bangɔ 2 Kɔrinto 4:16-18, ye mɛndó sa ngunu bɛ Polo na ya pɛnɔ nɛ?

¹⁷ Polo luandó ngunu ti gbengɔ bɛ lo na lo mɛ ya, lo ndo batandó nzɔ̃ dangɔ bɛ tɛ lo. (Di 2 Kɔrinto 4:16-18.) Lo tɛnɛndó hɛ̃ awakristo ti Kɔrinto ya, abɛse tɛrɛ lo ti mi “gbɛ̃” ko, ta ni la na hɛ̃ngɔ lo nzɛ̃ngɔ ma. Kutu Polo ndo kpã bondó lɛ lo na ndo kpale mɛ ka gbɛlɛ lo. Nzɔ̃ dangɔ bɛ tɛ lo ti luangɔ dungɔ lɛ ngɛ̃́ ti kaka ka ndozu “adu ngbondoni nvɛ̃ni,” ni la, lo yendó gbengɔ bɛ lo abɛse kpale ni du ti ngasia ti nɛngɔ ya, lo lua mbana gɛrɛ ni. Polo ndo gbɔ̃ndó li lo na ndo nzɔ̃ dangɔ bɛ tɛ lo, wa nzɔ̃ dangɔ bɛ niko ndo tindó ka tɛ lo fãnani bi zu.

18. Ngasia la Tihomir ná ndasewa tɛ lo aluandó ngunu na lo ti nzɔ̃ dangɔ bɛ na lo ti bi mɛ na gangɔ nɛ?

¹⁸ Nyita kɔli Tihomir mɛ ndo du ka Bulgarie alua ngandó ngunu na ndo nzɔ̃ dangɔ bɛ tɛ lo mɛ ka gbɛ lɛ lo. Zdravko nyita lo kɔi ti palanga akpindó na lo ti aksidã ali ndɛ abulu gba na ngoi mɛndó lo ndo li vuayajɛ. Na ya ngoi kɔi ndó ko, Tihomir tindó na vundu gba nvɛ̃ni. Ye mɛndó lo li nɛ? Lo ná azi ti ndasewa tɛ lo agbɔ̃ndó li la na ndo bi mɛ gbanda azi mɛ kpili na songɔ kwá. Lo tɛnɛ ya: “Na ndakisa e na hũngɔ kaya bingangɔ li tɛ e ndo mɛ gbanda e na tengbingɔ na Zdravko, tɛ mɛ gbanda e na tɔngɔ hɛ̃ lo, e na ilingɔ lo  ka fɛtɛ mɛ e zu na tengbingɔ ndoni kɔi nga na atɛnɛ mɛ gbanda e na kambisangɔ hɛ̃ lo na lo ti ndangba bi.” Tihomir na azi ti ndasewa tɛ lo abata kaya bingangɔ li tɛ la nzɔ̃ dangɔ bɛ ti songɔ kwá, ni li ya, ala lua ngunu ti gbengɔ bɛ la nga na kungɔ na dengɔ bɛ bi mɛ gbanda Yehova so na azi mɛ akpili.

19. Ye mɛ mɔ lengbi ti lingɔ ti nɛngɔ ya, loyengɔ tɛ mɔ na lo ti kapa tɛ Yehova na ndo bi mɛ na gangɔ ati kpengbani nɛ? (Ba nga limɔ)

¹⁹ Ngasia la, mɔ lengbi ti lingɔ ya, nzɔ̃ dangɔ bɛ tɛ mɔ ati kpengbani nɛ? Na ndakisa se du ya, mɔ na nzɔ̃ dangɔ bɛ ti luangɔ dungɔ lɛ ngɛ̃́ ti kaka ge lɛ sese ko, di wa mɔ gbɔ̃ nga li mɔ na ndo avɛse ti Ngbangɔ mɛ ndo tɛnɛ tɛnɛ ti paradizo. (Yis. 25:8; 32:​16-18) Hũ gigi ti fãnani kaya bingangɔ li tɛ mɔ. Da bɛ mɔ na azi mɛ kaya ni. Ye mɛ mɔ ndo hũ nɛ? Ye mɛ mɔ ndo ma nɛ? Mɔ ndo ma tɛrɛ mɔ ngasia? Ni ndo za mɔ ya, mɔ hũ kaya bingangɔ li tɛ mɔ se mɛ paradizo na dungɔ na ni, bere ba afoto mɛ kaya ambeti tɛ e mɛ ndo kambisa tɛnɛ ti paradizo bere ba video mɛ bɛli tɛnɛ tɛnɛ ya, Na mokili ya sika, Yango oyo na miso bere Kanisá tango wana. Se e kpã lɛ e na ndo nzɔ̃ dangɔ bɛ ti gigi ti fãnani ko, kpengba kpale tɛ e na dungɔ “nyi pɛnɔ mɛ ta ndoninga ma nga woni.” (2 Kɔr. 4:17) Nzɔ̃ dangɔ bɛ mɛ Yehova hɛ̃ alengbi ti zangɔ mɔ ya, mɔ gbe bɛ mɔ na ndo pɛnɔ mɛ mɔ ndo tengbi na ni, ni nga na lingɔ ya, mɔ ti na ngunu.

20. Ngoi mɛ e ndo ma nzɛ̃ngɔ ko, ngasia la elengbi ti luangɔ ngunu na ya pɛnɔ nɛ?

²⁰ Ngoi mɛ e ndo ma nzɛ̃ngɔ ko, “na lége tɛ Nzapa e ndo lua ngunu fãni mɛndɛ̃.” (Nz. 108:13) Ni la, Yehova na lingɔ zu ti nɛngɔ ya, mɔ di lua ngunu. Wa ngoi mɛ mɔ du na gwɛ̃ ya, aza mɔ ti nɛngɔ ya, mɔ kokisa kumba mɛ mɔ na ni, mɔ gbe bɛ mɔ na ya tara bere ti nɛngɔ ya, mɔ du na dengɔ bɛ ko, li sambela hɛ̃ Yehova na ge ge ge zu, wa gi nga litambwisi tɛ lo na lége ti mandangɔ Ngbangɔ tɛ mɔ nvɛ̃ni. Ye tɛnɛ ti sangɔ ngunu bɛ mɛ ayata kɔli ná ayata wali ndo tɛnɛ hɛ̃ mɔ. Ngoi zu, ndo mu ngoi ti gbɔ̃ngɔ li mɔ na ndoni, wa bata nga nzɔ̃ dangɔ bɛ tɛ mɔ na lo ti bi mɛ na gangɔ. Wa ‘Nzapa na kpengbangɔ na bɛ mɔ nzɔ̃ni na lo ngunu tɛ lo mɛ na ndima, wadila na ya lo zu ko, mɔ gbe bɛ mɔ, mɔ du nga na dengɔ bɛ.’​—Kɔl. 1:11.