1. Nda mɛ tɔndɔngɔ alengbi ti dungɔ pɛnɔ na lo tɛ e nɛ?

 NGOI mɛndɛ̃ mɔ ndo hũ ya, adu kpengbani tɔndɔngɔ? Ni ngandó ngaso na lo tɛ gbia Davidi, ni la lo lindó sambela hɛ̃ Nzapa ya: “za mbi na ya, mbi du na gwɛ̃ ti tɔndɔngɔ.” (Nz. 51:12) Davidi yendó Yehova gba. Abɛse du ya, Davidi yendó Nzapa tɛ lo ko, ngoi mɛndɛ̃ ando dundó pɛnɔ ti nɛngɔ ya, lo du na tɔndɔngɔ. Ni nga ngaso na lo tɛ e. Na lo nɛ? Ti uzu e mundó seliye ti zangangɔ tɔndɔngɔ ka tɛ akotara e. Ti sɛ, Satana ndo to e ya, e tɔmbɔgɔ tɛrɛ Yehova nga ma se mɛndó lo li na ni (2 Kɔr. 11:3) Ti taa, e ge ya gigi mɛ na seliye ti tɔmbɔgɔngɔ, “nyingɔ mɛ na olo ndo li kwa ka ya bɛ azi mɛ ndokɛ̃ tɔndɔngɔ Nzapa.” (Ef. 2:2) Ta yɔ bo ya e li kpengbani na lo ti nwɔngɔ dangɔ bɛ tɛ e ti siɔni ma, kanda ti nɛngɔ nga ya, e gbe bɛ e na ndo mbamba mɛ Satana na gigi tɛ lo ndo kpã ndali e ya, e ko yɔ̃ ndia tɛ Nzapa. Elengbi ti lingɔ kpengbani ya, e tɔndɔ Yehova ná azi mɛ lo hɛ̃ la kumba ti tambwisangɔ e.

2. Dungɔ “dã ti tɔndɔngɔ” alengbi na nɛ? (Zaki 3:17)

² Di Zaki 3:17, NWT. Yakobo sundó na lége ti Nyingɔ vurú ya, azi mɛ na ndara ndo du “dã ti tɔndɔngɔ.” Binga li mɔ ĩ, tɛnɛ mɛ dungɔ dã ti tɔndɔngɔ alengbi na nɛ? Elengbi ti dungɔ dã nga na yengɔ tɔndɔngɔ azi mɛ Yehova hɛ̃ la kumba ti tambwisangɔ e. Kanda ta Yehova yɔ ya, e tɔndɔ azi mɛ ndo to e ya, e ko yɔ̃ andia tɛ lo ma.​—Aw. 4:18-20.

3. Nda mɛ adu ngbondoni ka tɛ Yehova ya, e tɔndɔ azi mɛ na kumba ti tambwisangɔ e nɛ?

³ Ayɔ ya e du dã na tɔndɔngɔ Yehova na nɛngɔ ya, e tɔndɔ azi. Adu nzɔ̃ni na lo mɛ ya, andia tɛ Yehova zu adu ti lengbingɔ. (Nz. 19:7) Ta azi mɛ na kumba ti tambwisangɔ e adu azi ti lengbingɔ ma. Kanda To e ti ndozu ahɛ̃ kumba mɛndɛ̃ hɛ̃ ato ti ndasewa,  agbia ti kwa nga na abiazi. (Mas. 6:20; 1 Tɛs. 5:12; 1 Pet. 2:13, 14) Se e tɔndɔ ala ko, afa ya, e ndo tɔndɔ Yehova. Zia e ba se mɛ elengbi ti tɔndɔngɔ azi mɛ Yehova hɛ̃ ala lo gbia, abɛse na ya ngoi mɛndɛ̃ ando du pɛnɔ tɔndɔ ala bere landangɔ ndia mɛ ala kpã.

4. Nda mɛ apalanga gba ndo kɛ̃ tɔndɔngɔ awa dũngɔ ala nɛ?

⁴ So ya gigi mɛ ko, ta ambanga palanga mɛndɛ̃ ndo ye “tɔndɔ awa dũngɔ ala ma.” (2 Tim. 3:1, 2) Nda mɛ ta ambanga apalanga mɛndɛ̃ ndo tɔndɔ awa dũngɔ ala ma nɛ? Ambageni ndo hũ ya, awa dũngɔ ala adu awa poloso. Na lo mɛ ya, ala ndo yɔ kati ayati ala ya, ala li ye mɛ ta ala nvɛ̃ni ndo li ma. Ambanga ni ndo hũ wangɔ tɛ awa dũngɔ ala ya, aɔ ndoni, ta ala na kokangɔ lingɔ ni ma, bere ni kpengbani. Se du ya mɔ du palanga, mɔ lengbi nga ti mangɔ tɛrɛ mɔ ngaso? Ta apalanga gba ndo ye tɔndɔngɔ andia tɛ Yehova mɛ atɛnɛ ya, “Ĩ ma nyɔ ato ĩ na ata ĩ ta sanga ma adu nzɔ̃ni” ma. (Ef. 6:1) Ye mɛ alengbi ti zangɔ mɔ ya, mɔ li ni nɛ?

5. Nda mɛ adu ye ti kamwangɔ hĩngangɔ ya, Yezo tɔndɔndó awa dũngɔ lo nga ma se mɛ atɛnɛ na ni kaya Luka 2:46-52 nɛ?

⁵ Mɔ lengbi ti landangɔ se lɛlo ti tɔndɔngɔ tɛ Yezo. (1 Pet. 2:21-24) Lo ndó zo ti lengbingɔ, kanda awa dũngɔ lo adundó azi mɛ na tɛrɛ ti zangangɔ lengbingɔ. Yezo ndo tɔndɔndó awa dũngɔ lo na ngoi mɛndó ala ndo yu ndo, bere na ngoi mɛndó ta ala ndo ma lo na se ni ma. (Kob. 20:12) E ba kpale mɛndó ali tɛrɛ lo na ngoi mɛndó Yezo na bulu 12. (Di Luka 2:46-52.) Yezo gwendó ndoni kɔi na awa dũngɔ lo ka Yerusalɛmɛ, kanda ngoi mɛndó ala diri ko, ala hũndó ya, ta Yezo so gunda ala ma. Ayɔndó ya, Yozɛfɛ ná Maria aye na bɛ la kɔi ya, ayangambi zu ndó ndoni kɔi na ala na ngoi mɛndó ala lo ka Yerusalɛmɛ ndo diri. Ngoi mɛndó Yozɛfɛ ná Maria alua Yezo ko, Maria pandó hɛ̃ Yezo pɛnɔ mɛ lo hɛ̃ ala! Ngoi mɛndɛ̃ Yezo lengbindó ti tɛnɛngɔ ya, ta ala tɛnɛ mbilimbilimbi ma. Kanda ta lo lindó ngaso ma, lo hɛ̃ndó ala gbinya ti nzɔ̃ni nga ti tɔndɔngɔ. Ta Yozɛfɛ ná Maria, “gbɔ̃ndó nda tɛnɛ mɛ lo tɛnɛ hɛ̃ ala ma.” Kanda Yezo “ngbã bondó lá kwɛ tɔndɔngɔ ala.”

6-7. Ye mɛ alengbi ti zangɔ apalanga ya, ala tɔndɔ awa dũngɔ ala nɛ?

⁶ Apalanga, alengbi ti dungɔ pɛnɔ na lo tɛ ĩ ti tɔndɔngɔ awa dũngɔ ĩ na ngoi mɛ ala yu ndo, bere ta ala gbɔ̃ nda tɛnɛ mɛ ĩ tɛnɛ hɛ̃ ala na seni ma? Ye mɛ alengbi ti zangɔ ĩ nɛ? Ti uzu, binga li mɔ na se mɛ Yehova lengbi ti mangɔ na tɛrɛ lo. Ngbangɔ tɛnɛ ya, ngoi mɛ ĩ tɔndɔ awa dũngɔ ĩ ko, “adu ye mɛ ndode bɛ Nzapa.” (Kɔl. 3:20) Yehova hĩnga ya, ngoi mɛndɛ̃ ta awa dũngɔ mɔ ndo gbɔ̃ nda tɛnɛ mɛ mɔ ndo tɛnɛ ma, bere ala ndo kpã ndia mɛ kpengbani mɛ ta mɔ na kokangɔ tɔndɔngɔ ni ma. Kanda ngoi mɛ mɔ ndo li kpengbani ti tɔndɔ ala ko, mɔ ndo hɛ̃ ala dengɔ bɛ.

⁷ Ti sɛ, ĩ binga li ĩ na se mɛ awa dũngɔ ĩ alengbi ti mangɔ na tɛrɛ ala. Ngoi mɛ ĩ tɔndɔ awa dũngɔ ĩ ko, ĩ na hɛ̃ngɔ ala dengɔ bɛ, wa ala na kpãngɔ bɛ la gba na ndo ĩ. (Mas. 23:22-25) Ĩ nga na dɔngɔ dã na ala. Alexandre mɛ ndo du ka Belgique atɛnɛ ya, “Ngoi mɛndó mbi banda tɔndɔngɔ aye mɛndó awa dũngɔ mbi ndo yɔ ngoi zu ya, mbi li ko,” “mangbi tɛ mbi ná ala tindó nzɔ̃ni, wa ala ti ngandó na dengɔ bɛ.” b Ti taa, se mɔ tɔndɔ awa dũngɔ mɔ bandangɔ ndɛ̃ ko, ni na dungɔ nzɔ̃ni na lo tɛ mɔ na bi mɛ na gangɔ. Paulo, mɛ ndo du ka Bresil atɛnɛ ya, “ Tɔndɔngɔ awa dũngɔ mbi azandó mbi ya, mbi tɔndɔ Yehova nga na azi mɛndɛ̃ mɛ lo hɛ̃ la lo  gbia.” Tɛnɛ tɛ Nzapa ndo fa se ti nzɔ̃ni mɛ ĩ lengbi ti tɔndɔngɔ na awa dũngɔ ĩ. Ni tɛnɛ ya, se mɔ tɔndɔ to mɔ ná ta mɔ “Wadila mɔ du na dengɔ bɛ, ko mɔ la bulu gba ge lɛ sese.”—Ef. 6:2, 3.

8. Nda mɛ apalanga gba ndo pɔna tɔndɔngɔ awa dũngɔ ala nɛ?

⁸ Apalanga gba ahũ se mɛ kpale ndo ɔ nzɔ̃ni na ngoi mɛ ala ndo du na tɔndɔngɔ na mbage tɛ awa dũngɔ ala. Luiza, mɛ ndo du nga ka Bresil atɛnɛ ya, ni dundó kpengbani na lo tɛ mbi na ebandeli, ta mbi ndo hĩngandó nda mɛ ta mbi ndo lua telefɔnɛ ti sololangɔ na azi na ya ngoi kɔi ngaso ma. Na gesi lo tɛnɛ ya, azi mɛndó e na ala na bulu kɔi ko, ala ndó na telefɔnɛ. Kanda lo ga hĩnga ya, awa dũngɔ lo ndo batandó lo na seni nvɛ̃ni. Lo tɛnɛ na olo ya, “Mbi hĩnga ya, ngoi mɛ mbi ndo tɔndɔ awa dũngɔ mbi ko, ta mbi ndo hũ ya mbi ka bɔlɔkɔ ma, kanda ni ndo bata dungɔ lɛ ngɛ̃́ tɛ mbi.” Nyita wali ti palanga mɛ ili lo la Elizabeth atɛnɛ ya, ngoi mɛndɛ̃ ta lo ndo tɔndɔ awa dũngɔ lo ma. Lo di tɛnɛ ya, “Abɛse ta mbi dɛ hĩnga nda mɛ awa dũngɔ mbi akpã ambanga ndia ya mbi tɔndɔ ma ko, mbi ndo binga li mbi na ya angoi mɛ tɔndɔngɔ ndia tɛ ala ndo bata mbi.” Monica mɛ ndo du ka Arménie aye ya, kpale tɛ mbi zu ndo ɔ nzɔ̃ni, mbi ndo hũ ya tɔndɔngɔ awa dũngɔ mbi la, adu nzɔ̃ni gba ɔngɔ kɛ̃ngɔ tɔndɔngɔ ala, wa ni ndo hɛ̃ mbi dengɔ bɛ ngoi zu.

9. Azi gba ndo hũ tɔndɔngɔ ndia ngasia?

⁹ Azi gba hĩnga ya, ayɔ ya guvɛrnɛma du da wa ayɔ nga ya,e tɔndɔ ambanga andia mɛ “agbia tɛ leta kpã.” (Roma 13:1) Kanda ala nvɛ̃ni ndo hũ tɔndɔngɔ ndia niko ka lɛ ya, ta ni ndu mbilimbili ma bere ni du kpengbani tɔndɔngɔ ni. E mu ndakisa mɛ aba futangɔ lapo. Nɔmbrɛ tɛ azi yakere mɛ ahũnda ala na ndo ka Europe mɛ aba lapo ko, ala tɛnɛ ya, se leta yɔ futangɔ lapo mɛ ala hũ ya, ta ni du mbilimbili ma ko, ta ala na futangɔ ni ma, wa ta lingɔ ngaso adu siɔni ma.” Na lo ni la, kaya kɔdɔrɔ niko ko, ta azi ndo futa alapo zu mɛ agbia tɛ leta ndo kpã ma.

10. Nda mɛ elengbi ti tɔndɔngɔ ndia mɛ ta e ndo ye ni ma nɛ?

¹⁰ Ngbangɔ tɛnɛ ya, lo-lengɔ gbia tɛ azi ndo hɛ̃ pɛnɔ, Satana la ndo tambwisa ni, wa angbã yakere agbɛ̃ lo-lengɔ gbia ni. (Nz. 110:5, 6; Mos. 8:9; Luka 4:5, 6) Ni di tɛnɛ nga hɛ̃ e ya, “zo ko la akɛ̃ nyɔ la ko, afa ya lo kɛ̃ nga ló mɛ Nzapa apa.” Tɔndɔngɔ agbia tɛ leta ndo fa tɔndɔngɔ ebongiseli mɛ Yehova mu ti pɛ ndunu ngoi ti nɛngɔ ya, kpale ɔ na na seni. Ni la, ayɔ ya, “ale ĩ hɛ̃ zo kɔi kɔi ye mɛ ĩ lengbi ti hɛ̃ngɔ lo,” na ndakisa futangɔ lapo, nga tɔndɔngɔ azi mɛ elengbi ti tɔndɔngɔ ala. (Roma 13:1-7) Ngoi mɛndɛ̃ elengbi ti hũngɔ ndia kɔi mɛ akpã ya, ta ni lengbi ma, ta ni mbilimbili ma, bere adu kpengbani tɔndɔngɔ ni. Kanda se e tɔndɔ Yehova ko, elengbi nga ti tɔndɔngɔ agbia se du ya ta  ndia mɛ ala kpã a ko nyɔ ndia tɛ Nzapa ma.​—Aw. 5:29.

11-12. Na bangɔ Luka 2:1-6, nda mɛndó Yozɛfɛ ná Maria tɔndɔ ndia mɛndó ahɛ̃ ala nɛ, wa nzɔ̃ kpale mɛndó ala lua nɛ? (Ba nga limɔ)

¹¹ Elengbi ti luangɔ wangɔ na ndo se lɛlo tɛ Yozɛfɛ ná Maria mɛndó ala dã ti tɔndɔngɔ agbia tɛ leta abɛse du ya, ni dundó pɛnɔ lingɔ ni. (Di Luka 2:1-6.) Ngoi mɛndó Maria mɛ ngɔ ali nzɛ Gumbaya ko, lo ná Yozɛfɛ tengbindó na kpengba kpale mɛ aba tɔndɔngɔ agbia. Ngoi mɛndó Auguste ndo le gbia ka Empire ti Roma ko, lo kpãndó ndia ya, azi zu mɛ ndo du ka kɔdɔrɔ ti Roma lengbi ti gwengɔ sungɔ ili la kaya buku tɛ leta (ressensement). Yozɛfɛ ná Maria lindó kota vuayajɛ ti 150 kilometrɛ na ya talége ti angomba ti nɛngɔ ya, ala gwe ka Bɛtɛlɛmɛ. Ta vuayajɛ niko adundó nzɔ̃ni na lo tɛ Maria ma. Ngoi mɛndɛ̃ Yozɛfɛ ná Maria ndó na sɔngɔ bɛ na lo tɛ bebe mɛ kaya Maria. Ye mɛ na lingɔ tɛrɛ lo se du ya, lo dũ so talege na ngoi mɛ ala ndo li vuayajɛ nɛ? Ala ndó na mbɛtɔ ti batangɔ bebe niko na lo mɛ ya, lo du Masiya mɛ Yehova kokapa tɛ lo. Ni lengbindó ti gbanzingɔ ala na tɔndɔngɔ ndia tɛ Leta?

¹² Ta Yozɛfɛ ná Maria aziandó ya, kpale ti ya dungɔ lɛ ngɛ̃́ tɛ la agbanzi ala na mungɔ ekateli ti tɔndɔngɔ bere kɛ̃ngɔ tɔndɔngɔ ndia tɛ Leta ma. Yehova mandó dengɔ bɛ na lo ti tɔndɔngɔ tɛ la, wa lo sulu ngandó ala. Maria asi ngandó ka Bɛtɛlɛmɛ, wa lo dũ ngandó nyingambi mɛ na sãte ti nzɔ̃ni, wa ni li nga ya, aprofesi ti ya Ngbangɔ ati na se ni!​—Mika 5:2.

13. Se e tɔndɔ ndia ko, ngasia la ni lengbi ti hɛ̃ngɔ ayata nzɔ̃ kpale nɛ?

¹³ Se e tɔndɔ agbia tɛ Leta ko, e nvɛ̃ni na luangɔ anzɔ̃ kpale gba, wa ayata kɔli ná ayata wali nga na luangɔ anzɔ̃ kpale gba. Na lo nɛ? Ti uzu, ta e ndo lua tumbu na kɔngɔ nyɔ ndia tɛ Leta ma. (Roma 13:4) Tɔndɔngɔ ndia tɛ Leta alengbi ti tongɔ ala ya, ala hũ se mɛ Atɛmwɛ tɛ Yehova ndo tɔndɔ na ndia. Na ndakisa, ka Nigeria aɔ ndɛ abulu gba asoda lindó kaya da bombi na ngoi ti lingɔ bombi ti nɛngɔ ya, ala gbɔ̃ zo kɔi mɛ ta lo ye futangɔ lapo ma. Kanda gbia tɛ  asoda pa hɛ̃ la ya, ala gwe, lo tɛnɛ ya: “Ta atɛmwɛ tɛ Yehova ndo kɛ̃ futangɔ lapo ma.” Ngoi zu ko la e ndo ye tɔndɔngɔ ndia mɛ aba futangɔ lapo ko, ni ndo za e ya e du na dɔngɔ nɔ ti nzɔ̃ni mabere Atɛmwɛ tɛ Yehova—wa ngoi mɛndɛ̃ dɔngɔ nɔ ti nzɔ̃ni niko na batangɔ ayata kɔli ná ayata wali.​—Mat. 5:16.

14. Ye mɛndó za Joanna ya, lo tɔndɔ agbia tɛ leta nɛ?

¹⁴ Ngoi mɛndɛ̃ ta e na yengɔ ngoi zu tɔndɔngɔ agbia tɛ Leta ma. nyita wali Joanna mɛ ndo du ka États–Unis tɛnɛ ya, “Ni du nvɛ̃ni kpengbani na lo tɛ mbi ti tɔndɔngɔ adia tɛ Leta, na lo mɛ ya, ambanga azi ti ndasewa tɛ mbi atengbindó na kpengba kpale mɛ aba zangangɔ mbilimbili mɛndó azi tɛ Leta ali tɛrɛ la” Kanda Joanna mundó ekateli ti gbinyangbingɔ se tɛ lo ti bingangɔ li na ndo azi tɛ Leta, wa lo bandangandó tɔndɔngɔ ala. Ti uzu lo zia dingɔ amɛsagɛ mɛ aba agbia tɛ Leta mɛ ndo kpã ka lɛ Internet mɛ ndo li ya, ta lo hũ agbia tɛ Leta nzɔ̃ni ma. (Mas. 20:3) Ti sɛ, lo li sambela hɛ̃ Yehova ya, lo za ni ti nɛngɔ ya, ni kpã bɛ ni na ndo lo, na se lɛ kpãngɔ bɛ ni na ndo gbinyangbingɔ ti lo-lengɔ gbia tɛ azi. (Nz. 9:9, 10) Ti taa, lo di ambeti tɛ e mɛ ndo tɛnɛ ya, ta e yɔrɔ tɛrɛ e na ya kpale ti politikɛ ma. (Yn. 17:16) Na lo mɛ ya, Joanna ndo hɛ̃ na olo agbia tɛ Leta ndima, wa lo ndo tɔndɔ nga ala ko, lo ndo ma na olo “dengɔ bɛ nga na siriri ti bɛ.”

15. Nda mɛ alengbi ti dungɔ pɛnɔ ya, e tɔndɔ ndia mɛ alo ka tɛ linɔ tɛ Yehova nɛ?

¹⁵ Yehova ndo yɔ ka ti e ya, e tɔndɔ ‘azi mɛ ndo tambwisa e.’ (Aeb. 13:17) Yezo du gbia tɛ e, wa lo nga zo ti lengbingɔ, kanda ayata mɛ lo pɔna ala ya, ala tambwisa e ko, ta ala du azi ti lengbingɔ ma. Elengbi ti tɔndɔngɔ ala kpengbani nvɛ̃ni, gba ni na ngoi mɛ ala yɔ ya e li ye kɔi mɛ ta e ndo ye lingɔ ni ma. Toma Petro yɔndó ya, atɔndɔ ndia kɔi mɛ ta lo nvɛ̃ni yendó tɔndɔngɔ ni na ebandeli ma. Ngoi mɛ angelo kɔi hɛ̃ lo ndia mɛ aba tɛngɔ Sa mɛndó asu kaya ndia tɛ Moizɛ ko, Petro kɛ̃ndó​—ta fãni kɔi ma kanda fãni taa! (Aw. 10:9-16) Nda mɛndó lo kɛ̃ nɛ? Ta lo sepalandó na ndia niko ti fãnani ma. Ni ɔngbindó na akpale zu mɛ lo hĩnga na ya dungɔ lɛ ngɛ̃́ tɛ lo. Se du ya, ta Petro tɔndɔ ndia mɛndó angelo mɛ na tɛrɛ ti lengbingɔ hɛ̃ lo ma ko, ta ni du ye ti kamwangɔ ma ya, na ya ngoi mɛndɛ̃ alengbi ti dungɔ kpengbani ya e tɔndɔ ndia te azi ti zangangɔ lengbingɔ!

16. Abɛse toma Polo hĩngandó ya, ta ndia mɛ lo ndo lua adu nzɔ̃ni ma ko, ye mɛndó lo li nɛ? (Aw. 21:23, 24, 26)

¹⁶ Toma Polo ndo “dundó dã ti tɔndɔngɔ” abɛse na ngoi mɛndó lo ndo lua ndia mɛ lo ndo da bɛ lo ya, ta ni nzɔ̃ni ma. Awakristo mɛ Ayuda amandó tɛnɛ na ili Polo ya, lo ndo tɛnɛ hɛ̃ ayuda zu ya, ala zia tɔndɔngɔ “ndia tɛ Moizɛ” wa ta lo nvɛ̃ni ndo tɔndɔ nga ndia tɛ Moizɛ ma. (Aw. 21:21) Awakristo mɛ akangba ti Yerusalemɛ atɛnɛndó hɛ̃ Polo ya, lo mu aya kɔli siɔ mɛ ka tepelo, lo gwe na ala, wa lo li ya ala ti vuru ni na lége ti lingɔ seremɔni ti fangɔ ya, ala ndo tɔndɔ ndia. Kanda Polo hĩngandó ya, ta awakristo dɛ ka gbɛ ndia ma. Wa ta ala ndo li nga ye ti siɔni ma. Ni la, ta Polo bingandó bɛ lo na tɔndɔngɔ ni ma. ‘bi mɛndɛ̃ so pɛ ni, lo mu akɔli niko wa lo li seremɔni ndoni kɔi na ala ti nɛngɔ ya, ala ti vuruni na se mɛ ndia tɛnɛ na ni.’ (Di Awa Pangɔ Kwa 21:23, 24, 26.) Na lo mɛ ya, Polo ndo tɔndɔndó ndia ko, lo lindó ya mangbi du kaya popo tɛrɛ ayata kaya bombi.​—Roma 14:19, 21.

17. Wangɔ mɛ mɔ lengbi ti luangɔ na ndo se lɛlo tɛ Stephanie nɛ?

¹⁷ Ta nyita wali Stephanie ndo yendó ekateli mɛ ayata mɛ ndo tambwisa kpale kaya kɔdɔrɔ tɛ la ndo mu ma. Lo ná kɔ lo ndó na dengɔ bɛ ti lengɔ kwa kaya grupɛ ti tɛnɛngɔ yanga mɛndɛ̃. Kanda Kɔmite ti Filial hondó grupɛ niko, wa lo tondó wali niko ná kɔ lo kaya bombi ti yanga tɛ  la. Stephanie tɛnɛ ya, “Ta ni hɛ̃ndó mbi dengɔ bɛ ma. Ta mbi hĩngandó ya, abombi ti yanga tɛ e na gwɛ̃ ti lisalisi kpengbani ma.” Abɛse ngaso ko, lo mundó ekateli ti tɔndɔngɔ ndia niko. Lo tɛnɛ ya “Na gesindó la mbi hĩnga nda mɛ ayata mu ekateli ti ndara niko. Kaya bombi tɛ e ti fãnani ko, ayata gba ka popo tɛrɛ la, ala bo kɔi la adu Atɛmwɛ tɛ Yehova kaya ndasewa tɛ la, ni la e ti azi ti ndasewa tɛ la, wa e ndo sa nga ngunu bɛ la. Mbi ndo manda Ngbangɔ na nyita wali kɔi mɛ anzɛ̃ na ya nyingɔ. Wa na olo ko, mbi ndo mu ngoi gba ti mandangɔ Ngbangɔ tɛ mbi nvɛ̃ni.” Lo kɔ ndani ya, “Mbi na dangɔ bɛ ti siriri, mbi hĩnga ya mbi li zu mɛ mbi lengbi ti lingɔ ti nɛngɔ ya, mbi du na tɔndɔngɔ.”

18. Ngasia la, elengbi ti luangɔ nzɔ̃ kpale na lo ti tɔndɔngɔ nɛ?

¹⁸ Elengbi ti mandangɔ tɔndɔngɔ. Yezo “mandandó tɔndɔngɔ,” ta na lo mɛ ya, lo na dungɔ lɛ ngɛ̃́ ti nzɔ̃ni ma, kanda na “lo ti aye mɛndó lo hũ pɛnɔ na lo ni.” (Aeb. 5:8) Nga ma Yezo ko, e ndo manda ngoi zu tɔndɔngɔ na ya angoi ti kpengbani. Na ndakisa, na ebandeli ti siɔ ngã ti COVID-19 ngoi mɛndó atɛnɛ hɛ̃ e ya, ta e di li bombi kaya da ti bombi tɛ e ma, wa agbanzi nga kwa ti fangɔ tɛnɛ nyɔda ná nyɔda ko, mɔ hũndó siɔni tɔndɔngɔ? Nga ma se mɛ mɔ hũ na ni, tɔndɔngɔ ndia abatandó mɔ ni li nga ya, mangbi du kaya bombi, wa ni hɛ̃ ngandó Yehova dengɔ bɛ. E zu e lɛkɛ tɛrɛ e nzɔ̃ni ti tɔndɔngɔ na ndia mɛ e na luangɔ na ngoi ti kota pɛnɔ. Tɔndɔngɔ andia niko na batangɔ dungɔ lɛ ngɛ̃́ tɛ e!​—Yobo 36:11.

19. Nda mɛ e ye dungɔ azi ti tɔndɔngɔ nɛ?

¹⁹ Na ya tɛnɛ mɛ e manda ya, tɔndɔngɔ ndo hɛ̃ anzɔ̃ kpale gba. Elengbi ti tɔndɔngɔ Yehova uzu na ya dungɔ lɛ ngɛ̃́ tɛ e na lo mɛ ya, e ndo ye lo wa e ye nga hɛ̃ngɔ lo dengɔ bɛ. (1 Yn. 5:3) Ta elengbi ti diringɔ na aye zu mɛ Yehova li na lo tɛ e ma. (Nz. 116:12) Kanda elengbi ti tɔndɔngɔ lo nga na ayata mɛ lo kpã ala ya, ala tambwisa e. Se e li ngaso ko, e ndo fa ya, e na ndara. Wa ngoi mɛ e li ye na ndara ko, e na hɛ̃ngɔ Yehova dengɔ bɛ.​—Mas. 27:11.