1. Tɛnɛ mɛ Angelo kɔi tɛnɛ nɛ, wa ni fa nɛ na lo tɛ e nɛ?

 SE ANGELO kɔi tɛnɛ tɛnɛ hɛ̃ mɔ, mɔ lengbi ti mangɔ lo? Biani, ndɛ lo mɛ ko, angelo kɔi ndo pa nzɔ̃ pa hɛ̃ “azi ti lɛ sese zu, ti ale zu, nga ti yanga kɔdɔrɔ zu.” Wa tɛnɛ mɛ lo ndo pa hɛ̃ azi nɛ? “Ale ĩ kpɛ Nzapa, ĩ gonda nga lo . . . Ale ĩ vɔrɔ lo mɛ lo li ndozu, na sese.” (Suma 14:6, 7) Bo Yehova kɔi la, lo du Nzapa ti mbilimbili mɛ ayɔ ya azi zu vɔrɔ lo. Ayɔ ya e hɛ̃ lo sia kɔli na lo mɛ ya, lo hɛ̃ e nzɔ̃ tangɔ ligɛrɛ ti nɛngɔ ya, e vɔrɔ lo kaya tepelo tɛ lo ti nyingɔ!

2. Tepelo tɛ Yehova ti nyingɔ du nɛ? (Ba Ãkadre mɛ apa ya, “ Ta tepelo ti nyingɔ adu . . . ”)

² Tepelo ti nyingɔ adu nɛ, elengbi ti luangɔ tɛnɛ mɛ aba ni ka wa? Ta tepelo ti nyingɔ adu da kɔi ngaso ma. Tepelo niko ndo fa ebongiseli mɛ Yehova mu na lége ti kwá tɛ Yezo mɛ ndo za e ya, e vɔrɔ lo na se mɛ lo ndo ye. Toma Polo tɛnɛ tɛnɛ gba na ndo ebongesili niko kaya mbeti ti uzu mɛndó lo to hɛ̃ Awakristo ti Ebre ti siɛklɛ ti uzu mɛndó ndo du ka Yuda. b

3-4. (a) Nda mɛ Polo sundó mbɛti to hɛ̃ awakristo ti Ebreo mɛndó ndo du ka Yudea nɛ? (b) Wa tɛnɛ mɛndó lo kambisa kaya mbeti niko ti nɛngɔ ya aza ala nɛ?

³ Nda mɛ Polo kambisandó tɛnɛ niko hɛ̃ Awakristo ti Ebre mɛndó ndo du ka Yuda nɛ? Ngoi mɛndɛ̃ ni du na lo ti akpale sɛ ti ngbondoni. Ti uzu, adu na lo ti sangɔ ngunu bɛ la. Gba ka popo tɛ la maindó kaya sambela tɛ Ayuda, wa ngoi mɛndɛ̃ agbia ti sambela tɛ ala ti gã ndo hendó ala. Na lo nɛ? Na lo mɛ  ya, ta Awakristo niko ndo vɔrɔndó Nzapa kaya tepelo ti kpɛ̃nɛ ma, ta ala ngandó na nzɔ̃ ndo ti zɔngɔ na mbeka ma, wa ta ala ngandó na anganga nzapa mɛ alengbi ti zɔngɔ mbeka na lo tɛ ala ma. Ngoi mɛndɛ̃, héngɔ niko alengbindó ti nzɛ̃ngɔ na ava Yezo nga na loyengɔ tɛ ala. (Aeb. 2:1; 3:12, 14) Ni lengbi ngandó ti tongɔ ambanga ni ka popo tɛrɛ ala ya, ala diri kaya sambela tɛ Ayuda.

⁴ Ti sɛ, Polo tɛnɛndó hɛ̃ awakristo ti Ebre ya, ta ala ndo li kpengbani ti nɛngɔ ya, ala gbɔ̃ nda tɛnɛ ti nyingɔ mɛ asi fãnani bere ti ngbondoni ma, afa ya, “kpengba tɛ” mɛ e ndo lua na ya tɛnɛ tɛ Nzapa. (Aeb. 5:11-14) Kanda ambanga ni ka popo tɛ la ndo tɔndɔndó ndia tɛ Moizɛ kpengbani nvɛ̃ni. Ni la Polo kambisandó hɛ̃ ala ya, hɛ̃ngɔ tisa na bangɔ ndia ni ta ni hɛ̃ lége ti kangɔ lɛ na do siɔ kpale tɛ ala bwai ma. Na lo ni la, “ahãndó ndia ni.” Wa na gesi Polo handó ala na mbilimbili tɛ Nzapa na seni nvɛ̃ni. Lo pandó hɛ̃ la ya, ala na ‘nzɔ̃ dangɔ bɛ’ na lége ti kwá tɛ Yezo, mɛ alengbi ti zangɔ ala ya, ala ĩ ‘tɛrɛ la dã na Nzapa.’​—Aeb. 7:18, 19.

5. Ye mɛ mbɛti ti Ebre aza e ya e gbɔ̃ ndani nɛ, wa nda mɛ ni du ngbondoni ya e gbɔ̃ ndani nɛ?

⁵ Polo kambisandó hɛ̃ Awakristo ti Ebre nda mɛ sambela ti vuruni mɛ ala ndo vɔrɔ ndɛ aɔ madãma se mɛndó ala ndo vɔrɔ na ni uzu. Akpale ndɛ̃ ndɛ̃ ndɛ̃ ti sambela tɛ ayuda adu bondó “yikayika ti bɛta ye mɛ na gangɔ gesi, kanda bɛta ye ni la Yezo Kristo.” (Kɔl. 2:17) Yikayika ti ye kɔi ndo fa ye ni, kanda ta bɛta ye ni nvɛ̃ni la ma. Kwɛ kɔi sambela mɛndó ayuda ndo li hɛ̃ Nzapa na ngoi ti gã ko, adu bo yikyika ti bɛta lo mɛ na gangɔ. Ayɔ ya e hĩnga bibongiseli mɛ Yehova mu ti nɛngɔ ya, lo ka lɛ lo na ndo siɔ kpale tɛ e, wa e vɔrɔ nga lo na se mɛ bɛ lo ndo ye na ni. Na ya tɛnɛ mɛ, e na hakangɔ “yikayika” (se mɛndó Ayuda ndo vɔrɔ na Nzapa) na “bɛta” (se mɛ Awakristo ndo vɔrɔ na Nzapa) na bangɔ se mɛ mbeti ti Ebre kambisa na ni. Ni na zangɔ e ya, e gbɔ̃ ndani nzɔ̃ni bere tepelo ti nyingɔ afa nɛ, wa ni ba nga e na nɛ.

6. Kwa mɛndó Tabɛrnaklɛ ndo li nɛ?

⁶ Se mɛ Ayuda ndo vɔrɔ na Nzapa na ngoi ti gã. Na ya tɛnɛ tɛ Polo ko, lo da bɛ lo na tabɛrnaklɛ mɛndó Mɔizɛ kĩ na bulu ti 1512 U.N.E. (Ba tɛnɛ mɛ “Limɔ ná Beta ye”) Tabɛrnaklɛ ndó mabere nyi da (tente). Na ebandeli ngoi mɛndó aya Izraɛlɛ ndo ye lingɔ vuayajɛ ko, ala ndo yɔndó ni gwe na ni. Ala salelandó ni tee  ngoi mɛ kwa ti kĩngɔ tepelo ka Yerusalɛmɛ wɛ, afa ya na ya bulu 500. (Kob. 25:8, 9; Mit. 9:22) Na lége ti “tabɛrnaklɛ” niko ndó la aya Izraɛlɛ ndo tengbindó so hɛ̃ngɔ Nzapa tisa, nga na vɔrɔngɔ lo. (Kob. 29:43-46) Kanda tabɛrnaklɛ ndo fa aye ti nzɔ̃ni mɛndó alengbi ti singɔ na awakristo.

7. Tepelo ti nyingɔ asindó na ngoi ni nɛ?

⁷ Bɛta vɔrɔngɔ Nzapa tɛ awakristo. Tabɛrnaklɛ adu “yikayika ti alo mɛ ka yayu,” ni ndo fa kota tepelo tɛ Yehova ti nyingɔ. E hĩnga ya, Polo ye tɛnɛngɔ ya, gofa ni adu ndakisa na lo tɛ e ndɛ. (Aeb. 8:5; 9:9, NWT) Afa ya, ngoi mɛndó Polo su mbeti to hɛ̃ azi ti Ebre ko, akĩndó tepelo ti nyingɔ wɛ. Ni ndó da na bulu ti 29 N.E. Na bulu nikondó la Yezo mu batisimɔ, wa Nyingɔ vúru asa ngandó ndo lo, lo banda ngandó lingɔ kwa hɛ̃ Yehova ka tepelo ti nyingɔ mabere “kota gbia tɛ awa lungɔ nzapa na ye.” c​—Aeb. 4:14; Aw. 10:37, 38.

8-9. Na bangɔ mbeti ti Aebreo 7:23-27, kota ɔngbi mɛ ka popo tɛ awa lungɔ nzapa na ye ti Izraɛlɛ ná Yezo mɛ kota gbia tɛ awa lungɔ nzapa na ye nɛ?

⁸ Se mɛ Ayuda ndo vɔrɔ na Nzapa na ngoi ti gã. Akota awa lungɔ Nzapa na ye ndó na kumba ti kpãngɔ mangbi ka popo tɛ azi ná Nzapa. Arona kota wa lungɔ nzapa na ye ti uzu, Yehova nvɛ̃ni ndó la ahɛ̃ Arona kumba niko na ngoi ti lingɔ fɛtɛ ti Tabernaklɛ. Kanda na gesi nga ma se mɛ Polo kambisa na ni ko, “awa lungɔ Nzapa na ye ndo kpili ndo ko ala ndo dɔndó lingɔ kwa tɛ ala azia, nda mɛ ndo ala ti ma wo ma la.” d (Di Aebreo 7:23-27.) Wa na lo mɛ ya, ala dundó azi ti zangɔ lengbingɔ ko, ayɔndó ya, awa lungɔ nzapa na ye ahɛ̃ tisa ti nɛngɔ ya, nzapa ka lɛ lo na ndo siɔ kpale tɛ ala nvɛ̃ni. Ɔngbi mɛ ka popo tɛrɛ ala ná Yezo Kristo mɛ kota gbia tɛ awa lungɔ nzapa na ye la.

⁹ Bɛta vɔrɔngɔ Nzapa tɛ awakristo. Yezo mɛ kota gbia tɛ awa lungɔ Nzapa na ye ndo li kwa tɛ lo na gbɛ “beta gofa . . . Ti tandi mɛ Gbia Nzapa nvɛni awa, ta zo la awa gofa ni ma.” (Aeb. 8:1, 2) Polo pa ya “na lo mɛ ya, ta [Yezo] na kpingɔ kwá ma ko, ta zo mɛndɛ̃ na tingɔ kota wa lungɔ nzapa na ye ma.” Wa lo di kambisa na lo tɛ lo ya “lo du zo ti lengbingɔ mɛ ta londo li siɔ kpale ma” ni la, lo ɔngbi na akota awa lungɔ nzapa na ye ti Izrael ko, “ta lo na gwɛ̃ ti lungɔ zapa na ye bi zu so vingɔ” siɔ kpale tɛ lo ma. Zia e ba na olo ɔngbi mɛ kaya ndo ti zɔngɔ na mbeka nga na mbeka, e ba nga ɔngbi mɛ kaya se mɛndó ayuda ndo vɔrɔ na Nzapa (limɔ) nga na se mɛndó (abeta) awakristo ndo vɔrɔ na Nzapa.

10. Na lo nɛ la aya Izraɛlɛ ndo hɛ̃ndó mbeka ka ndo ti zongɔ na mbeka nɛ?

¹⁰ Se mɛ Ayuda ndo vɔrɔ na Nzapa na ngoi ti gã. Ndo ti zɔngɔ na mbeka hɛ̃ngɔ Yehova ndó so dã na nyɔ da ti tabɛrnaklɛ. (Kob. 27:1, 2; 40:29) Kanda ta mbeka mɛndó ala ndo hɛ̃ alengbi ti lingɔ ya, aka lɛ bwai na ndo siɔ kpale tɛ la ma. (Aeb. 10:​1-4) Hɛ̃ngɔ tisa ti sa mɛndó ala ndo hɛ̃ ngoi zu ka tabɛrnaklɛ ndo fandó tisa kɔi mɛ ngbondoni mɛ na lo ni la, na kangɔ lɛ na ndo siɔ kpale tɛ azi ti bwai.

11. Ndo ti zɔngɔ na mbeka mɛ wa ndó la Yezo hɛ̃ tɛrɛ lo nga ma mbeka ka da wa? (Aebreo 10:5-7, 10)

¹¹ Bɛta vɔrɔngɔ Nzapa tɛ awakristo. Yezo hĩngandó ya, Yehova to ni ge lɛ sese so kangɔ tɛrɛ ni na lo tɛ e azi nga na tɔ̃ngɔ e na ya siɔ lo. (Mat. 20:28) Na ngoi mɛndó lo mu batisimɔ ko, Yezo fandó na Yehova ya, ni ye lingɔ sɛ bɛ  lo kanda ta se bɛ ni nvɛ̃ni ma. (Yn. 6:38; Gal. 1:4) Lo hɛ̃ndó tɛrɛ lo ka ndo ti zɔngɔ na mbeka ti yikayika mɛ ndo fa lingɔ “se bɛ” Nzapa. Dangɔ bɛ tɛ Nzapa adundó ya, Yezo hɛ̃ dungɔ lɛ ngɛ̃́ tɛ lo ti mi nga ti lengbingɔ na lo tɛ azi. Yezo kpindó “fani kɔi ti bwai” ti nɛngɔ ya, zo zu ko la na fangɔ loyengɔ ka tɛ lo ko, Nzapa ka lɛ lo na ndo siɔ kpale tɛ lo ti bwai. (Di Aebreo 10:5-7, 10.) E ba na olo aye mɛndó kaya tabɛrnaklɛ.

12. Azi mɛndó na kumba ti lingɔ ka ndo mɛ sãnto na, wa azi mɛ ngandó na kumba ti lingɔ ka ndo mɛ sãnto sĩ nvɛ̃ni la ana?

¹² Se mɛ Ayuda ndo vɔrɔ na Nzapa na ngoi ti gã. Tabɛrnaklɛ ná tepelo mɛndó akĩ ka Yeruzalɛmɛ ko, nindó kwɛ kɔi. Akangbindó ya ni na sɛ—“ndo mɛ santo” na “ndo mɛ santo sĩ nvɛ̃ni.” (Aeb. 9:2-5; Kob. 26:31-33) Ndo mɛ Santo ndó na aye ti kpãngɔ na wá mɛ alini na wɔlɔ, ndo kɔi ti zɔngɔ na ta yɔmbɔ, ni ngandó na mɛsa mɛ ndo kpã amapa ti kwa. Bo “awa lungɔ nzapa na ye” mɛ a hini la na kpɔ̃ ndó la, na kumba ti lingɔ ka ndo mɛ santo ti nɛngɔ ya, ala li kwa tɛ la ti vuru ni mɛ aba lungɔ nzapa na ye. (Mit. 3:3, 7, 10) Akpãndó sandugu ti mbele mɛndó tɛrɛ ni na wɔlɔ mɛndó ndo fa Yehova ka ndo mɛ santo sĩ nvɛ̃ni. (Kob. 25:21, 22) Bo akota awa lungɔ nzapa na ye ndó la na kumba ti lingɔ kai fãni kɔi na ya bulu na ngoi mɛndó azi ndo gwe ti lɛkɛngɔ kpale ka popo tɛrɛ la na Nzapa. (Le. 16:2, 17) Bulu kɔi kɔi, ala ndo lindó kai na mɛ̃nɛ tɛ asa so yɔngɔ ya, aka lɛ na ndo siɔ kpale tɛ la nvɛ̃ni, nga na siɔ kpale tɛ azi zu. Na gesi, na lége ti Nyingɔ vúru  tɛ lo ko, Yehova fandó aye mɛ ndo fa aye mɛ kaya tabɛrnaklɛ.​—Aeb. 9:6-8. e

13. Ndo mɛ santo na ndo mɛ sãnto sĩ nvɛ̃ni ndo fa nɛ?

¹³ Bɛta vɔrɔngɔ Nzapa tɛ awakristo. Ahĩni nɔmbrɛ tɛ ava Yezo na kpɔ̃ ti nyingɔ, wa ala nga na mangbi ti kpengbani na Yehova. Ala du azi 144 000 mɛ ala na lingɔ kwa tɛ anganga nzapa ndoni kɔi na Yezo. (Suma 1:6; 14:1) Ndo mɛ Santo ti tabɛrnaklɛ ndo fa ya, ala du aya Nzapa mɛ lo pɔna ala na lége ti Nyingɔ vurú abese ala dɛ ge lɛ sese. (Roma 8:15-17) Ndo mɛ santo sĩ nvɛ̃ni kaya tabɛrnaklɛ ndo fa ndozu, ndo mɛ Yehova ndo du da. “Rido” mɛ ndo kangbi ndo mɛ santo ná ndo mɛ santo sĩ nvɛ̃ni ndo fa tɛrɛ Yezo ti mi mɛ ndo gbazindó lo mɛ kota gbia tɛ awa lungɔ nzapa na ye ti nɛngɔ ya, lo li ka ndozu mbala kɔi. Kpingɔ tɛ Yezo na lo tɛ azi, azi lége hɛ̃ Awakristo zu mɛ a hini la na kpɔ̃ ya, ala lua dungɔ lɛ ngɛ̃́ ka ndozu. Ala nga na ziangɔ tɛrɛ la ti mi ti nɛngɔ ya ala lua mbana gɛrɛ ka ndozu. (Aeb. 10:19, 20; 1 kɔr. 15:50) Na pɛko songɔ kwá tɛ Yezo ko, lo li ndó ka ndo mɛ santo sĩ nvɛni mɛ kaya tepelo ti nyingɔ, mɛ ali ya Awakristo zu mɛ a hini la na kpɔ̃ ti nyingɔ ya ala landa lo.

14. Ngasia la Aebreo 9:12, 24-26, afa tepelo ti nyingɔ tɛ Yehova nɛ?

¹⁴ Akpale ni ko zu afa yangondo bibongiseli ti nzɔ̃ni mɛ Yehova mu na ndombali sambela ti vuruni tɛ lo na lége ti kwá tɛ Yezo nga na lo ti kota kumba ti nganga nzapa mɛ Yezo na ni. Ka Izraɛlɛ ti gã, kota wa lungɔ nzapa na ye ndo lindó na mɛnɛ tɛrɛ asa so lungɔ nzapa na ye ka ndo mɛ santo sĩ nvɛ̃ni mɛ ali na ti. Kanda Yezo “lindó ka ndozu,” mbala kɔi ka ndo mɛ sãnto sĩ nvɛ̃ni ti nɛngɔ ya lo si ka gbɛlɛ Yehova. Lo hɛ̃ndó rapɔrt ti dungɔ lɛ ngɛ̃́ tɛ lo ge lɛ sese lo hɛ̃ To lo mabere zo ti lengbingɔ ti nɛngɔ ya, e lua nzɔ̃ kpale na lége tɛ lo, mɛ ni nga na “hãngɔ siɔ kpale” na lége ti kwa tɛ lo. (Di Aebreo 9:12, 24-26.) Kwá tɛ Yezo adu ngbondoni mawoma, ni li ya aka lɛ na ndo siɔ kpale ti bwai. Nga ma se mɛ e ga e hũ na ni, abese e na nzɔ̃ tangɔ li gɛrɛ ti luangɔ dungɔ lɛ ngɛ̃́ ka ndozu bere ge ti se ko, e zu elengbi ti vɔrɔngɔ Yehova ka tepelo tɛ lo ti nyingɔ.

15. Azi mɛ ndo lindó kwa kaya gbagba ti Tabɛrnaklɛ la ana?

¹⁵ Se mɛ Ayuda ndo vɔrɔ na Nzapa na ngoi ti gã. Kaya Tabɛrnaklɛ, nindó na ndo kɔi mɛ awa lungɔ nzapa ndo lindó na kwa tɛ la. Kaya gbagba nindó na ndo ti lungɔ Nzapa na ye nga na sãni kɔi mɛ na ngu ka da, mɛndó anganga nzapa ndo salela ti kpongɔ na ti la nga na gɛrɛ la uzu ti nɛngɔ ya ala li kwa tɛ la ti vuru ni. (Kib. 30:17-20; 40:6-8) Ni la na ya tepelo mɛndó akĩ ni na gesi ko, alɛkɛndó ndo so gigi ti tepelo ti nɛngɔ ya, azi mɛ ta ala adu anganga nzapa ma ko, ala lengbi ti vɔrɔ Nzapa.

16. Azi mɛ ndo li kwa hɛ̃ Yehova kaya tepelo ti nyingɔ mɛ kaya gbagba la ana, wa azi mɛ ndo li kwa hɛ̃ Yehova kaya gbagba ti tepelo ti nyingɔ na?

¹⁶ Bɛta vɔrɔngɔ Nzapa tɛ awakristo. Uzu ti nɛngɔ ya awakristo mɛ ahĩni la na kpɔ̃ ti nyingɔ agwe ndozu ali kwa ndoni kɔi na Yezo mabele anganga Nzapa ko, ala ndo li kwa hɛ̃ Yehova na mbilimbili zu ge lɛ sese kaya tepelo mɛ kaya gbagba ti nyingɔ. Kota sãni mɛ na ngu ka da ndo dandó bɛ Awakristo mɛ ahĩni la kpɔ̃ nga na Awakristo mɛndɛ̃ zu nda mɛ ala lengbi ti dungɔ vuru ni na ya bingangɔ li nga na ya nyingɔ. Wa “butu butu,” tɛ Awakristo mɛ ndo hɛ̃ ti la hɛ̃ Awakristo mɛ ahĩni la kpɔ̃ na mbilimbili zu mɛ? Ala ndo vɔrɔ Yehova ka wa? Na ya suma mɛ Yoanɛ hũ, butu butu tɛ azi ni “alongala so gbɛlɛ ngɛndɛ Gbia tɛ Nzapa,” wa  ala ndo “lekwa hɛ̃ Nzapa bi zu”(Suma 7:9, 13-15) Ala ndo li kwa ti vuru ni niko ge lɛ sese, kaya gbagba ti tepelo ti nyingɔ. Ni du nvɛ̃ni kota dengɔ bɛ na ndenge mɛ Yehova hɛ̃ e lége ti vɔrɔngɔ lo so ya tepelo tɛ lo ti nyingɔ!

17. Nzɔ̃ tangɔ li gɛrɛ mɛ e na ni ti zɔngɔ mbeka hɛ̃ Yehova nɛ?

¹⁷ Ndɛ lo mɛ ko, Awakristo zu na nzɔ̃ tangɔ li gɛrɛ ti lingɔ kwa hɛ̃ Nzapa na ngoi tɛ la, ngunu tɛ la, nga na aye ti mi mɛ ala na ni ti hɛ̃ngɔ ti la na ya kwa ti Lo-lengɔ Gbia. Nga ma se mɛ Polo tɛnɛ na ni hɛ̃ Awakristo ti Ebre ko, ayɔ ya e hɛ̃ “Nzapa gonda ngoi zu ti ndo Yezo. Ko gondangɔ ni adu nga ma ye mɛ e mu e lu na lo. Alengbi ya, ale e gonda lo ngoi zu na atɛnɛ ti nyɔ e.” (Aeb. 13:15) Biani, elengbi ti fangɔ ya, e ndo li zu mɛ elengbi ti lingɔ ti nɛngɔ ya, e hɛ̃ Yehova aye ti ngbondoni ti ya dungɔ lɛ ngɛ̃́ tɛ e.

18. Na bangɔ mbeti ti Aebreo 10:22-25, ye mɛ ta elengbi ti mungɔ ni na wele ma nɛ, wa ye mɛ ta bɛ e lengbi ti lingɔ na ni ma nɛ?

¹⁸ Di Aebreo 10:22-25. Na kɔngɔ nda mbeti mɛndó Polo su to hɛ̃ azi ti Ebre ko, lo dikɔndó aye ndɛ̃ ndɛ̃ ndɛ̃ mɛ kaya sambela tɛ e mɛ ta elengbi ti mungɔ ni na wele ma. Lo kambisa ya, ayɔ ya e dɔ dã na Yehova na lége ti sambela, e kambisa nzɔ̃ dangɔ bɛ tɛ e hɛ̃ azi, ni na bombingɔ e ndoni kɔi na ayata ti ya bombi, wa ni nga na lingɔ ya, e sangbi ngunu bɛ e. Wa lo di tɛnɛ ya “na lo ni la, ĩ hũ bi tɛ Yehova dɛ dã.” Na kɔngɔ nda buku ti suma ko, angelo pa hɛ̃ mbi ya: “Ale mbi vɔrɔ bo Nzapa!” (Suma 19:10; 22:9) Ta bɛ e lengbi ti lingɔ na mbilimbili ti ngbondoni mɛ aba kota tepelo tɛ Yehova ti nyingɔ nga na nzɔ̃ tangɔ ligɛrɛ mɛ e na ni ti vɔrɔngɔ Nzapa tɛ e mɛ kota ni ma!