Adɛ si na mɔ ya ta mɔ da na bɛ mɔ na aye mɛ mɔ manda ni wɛ ma? Ni ndo si na e zu na ya ngoi gba. Ye mɛ lengbi ti zangɔ mɔ nɛ? Diri mɔ ba aye mɛ ngbondoni.

Ngoi mɛ mɔ ndo manda Ngbangɔ ko, na ngoi mɛndɛ̃ mɔ lengbi ti dɔngɔ longɔ wa mɔ su ambanga aye mɛ ngbondoni. Ba se mɛndó Toma Polo za na azi mɛndó ndo di mbeti mɛ su na ngoi mɛ ala ndo di ni, lo su ya: “Na olo ĩ ma ngbondo tɛnɛ na ya ni lo mɛ.” (Aeb. 8:1) Na tɛnɛngɔ ngaso, lo ye zangɔ awa dingɔ lo ya, ala hĩnga ɔngbi mɛ popo ti atɛnɛ kɔi kɔi nga na bɛli tɛnɛ ni.

Mɔ lengbi ti batangɔ ngoi yakere, alengbi ti dungɔ miniti 10 ka nda ngoi ti mandangɔ Ngbangɔ tɛ mɔ ti nɛngɔ ya, mɔ gbɔ̃ li mɔ na aye ti ngbondoni mɛ mɔ manda. Se du ya ta mɔ ndo da na bɛ mɔ ma ko, ba abɛli tɛnɛ ti yakere bere atɛnɛ mɛndɛ̃—​alengbi ti dungɔ atɛnɛ ti uzu ti paragrafɛ​—ti nɛngɔ ya, ala adiri ga ka li mɔ. Se mɔ manda atɛnɛ ti fãnani ko, mɛka kambisangɔ ni na atɛnɛ tɛ mɔ nvɛ̃ni. Ngoi mɛ mɔ ndo ba atɛnɛ ti ngbondoni kɔi kɔi ko, ta ni na zangɔ bo mɔ ya, mɔ da na bɛ mɔ ma, mɔ na hũngɔ se mɛ tɛnɛ niko lengbi ti zangɔ mɔ na ya dungɔ lɛ ngɛ̃́ tɛ mɔ.