1-2. Ye mɛ ndo li tɛrɛ lo na ngoi mɛ azi ndo mu batisimɔ nɛ, wa ye mɛ ndɛ e na mandangɔ nɛ?

 TA ADƐNDÓ asi na mɔ ya, mɔ ba azi mɛ aye mungɔ batisimɔ ma? Na ngoi mɛndó ala hɛ̃ gbinya ti ahũnda sɛ ti hɛ̃ngɔ tɛrɛ la ko, mɔ ma na lége ti legɔ̃ la ya, ala ye na bɛ la kɔi aye mɛ ala manda ni. Mu hũndó ka lɛ azi ti ndasewa nga na akwa la ya, ala na dengɔ bɛ gba nvɛ̃ni. Wa na ngoi mɛndó ala lo kaya ngu asi ko, mɔ ma se mɛ azi ndo sɔ̃ ti la na dengɔ bɛ na lo tɛ la, wa mɔ hũ nga dengɔ bɛ mɛ ala na ni. Pɔsɔ zu, amiliɔ̃ tɛ azi ndo hɛ̃ tɛrɛ la hɛ̃ Yehova na lége ti batisimɔ, wa ala ndo ti nga Atɛmwɛ tɛ lo.

² Wa mɔ mɛ? Mɔ ndo gbɔ̃ li mɔ na ndo mungɔ batisimɔ? Se adu ngaso ko, hĩnga ya, mɔ du zo kɔi mɛ ngbondoni na ya gigi olo ti siɔni na lo mɛ ya, mɔ ndo “gi Yehova.” (Nz. 14:1, 2) Tɛnɛ ti mandangɔ mɛ aba mɔ, abɛse mɔ du nyingambi bere mɔ du kangba. Kanda ni ba nga azi zu mɛ amu batisimɔ, na lo mɛ ya, ala nga na ekateli ti kpengbani ti lingɔ kwa hɛ̃ Yehova ngoi zu. Na lo ni la, zia e ba aye taa na ya aye gba mɛ ndo to e ya, e vɔrɔ Yehova.

3. Nda mɛ awa kwa tɛ Yehova ndo ye mbilimbili nɛ? (Nzembo 119:128, 163)

³ Yehova yɔ ka ti azi tɛ lo ya, ala “ye mbilimbili.” (Zek. 8:19) Yezo yɔndó ka ti ava lo ya, ala landa mbilimbili. (Mat. 5:6) Afa ya, ale e du na gwɛ̃ kpengbani ti lingɔ aye mɛ nzɔ̃ni, aye ti mbilimbili, nga aye mɛ vuruni ka lɛ Nzapa. Mɔ ndo ye dungɔ mbilimbili wa mɔ ndo li nga nzɔ̃ ye? E ye na bɛ e kɔi ya, mɔ ndo li ni. Bɛ mɔ ndo kɛ̃ nvɛ̃nɛ nga na aye zu ti siɔni. (Di Nzembo 119:128, 163.) Zo ko la ndo pa nvɛ̃nɛ ko, lo ndo landa se lɛlo tɛ Satana, gbia ti gigi olo. (Yn. 8:44; 12:31) Mokano tɛ Satana kɔi adu ti gbɛ̃ngɔ ili Yehova mɛ adu santo. Lo bandandó pangɔ nvɛ̃nɛ na lo tɛ Nzapa tɛ e bandangɔ ka yaka ti Edene. Lo kalandó  lo tɛrɛ Yehova ya, lo du siɔ gbia mɛ ndo gi bo nzɔ̃ kpale tɛ lo nvɛ̃ni, wa lo gbanzi azi na aye ti nzɔ̃ni. (Eb. 3:1, 4, 5) Tee ndɛ, nvɛ̃nɛ tɛ Satana dɛ bo to azi gba ya, ala du na dangɔ bɛ ti siɔni na lo tɛ Yehova. Na ngoi mɛ azi mɛndɛ̃ ndo pɔna kɛ̃ngɔ “mbilimbili” ko, Satana lengbi ti tongɔ ala ya, ala ti na dɔngɔ nɔ ti siɔni, wa ala hɛ̃ tɛrɛ la na ya kpale zu ti siɔni.​—Roma 1:25-31.

4. Ngasia la, Yehova ndo fa ya, lo du “Nzapa ti mbilimbili nɛ”? (Ba nga limɔ)

⁴ Yehova du “Nzapa ti mbilimbili,” na songo zu, lo ndo fa mbilimbili na azi mɛ ndo ye lo. (Nz. 31:5) Na lingɔ ngaso, lo ndo hã ala ka gbɛ nvɛ̃nɛ tɛ Satana ndo zi. Yehova ndo ha nga na ava lo ya, ala ndo tɛnɛ ngoi zu bɛta tɛnɛ, wa ala du nga mbilimbili. Lingɔ ngaso ndo li ya, ala ndo hɛ̃ tɛrɛ la nvɛ̃ni ndima, wa ala ndo du nga na siriri ti bɛ. (Mas. 13:5, 6) Yehova li ngandó ngaso na lo tɛ mɔ na ngoi mɛndó mɔ ndo manda Ngbangɔ? Na mandangɔ Ngbangɔ mɔ hĩnga ya, landangɔ andia tɛ Yehova la adu ye mɛ nzɔ̃ni na lo tɛ azi zu, nga na lo tɛ mɔ nvɛ̃ni. (Nz. 77:13) Na lo ni la, mɔ ye mungɔ ekateli ti lingɔ aye mɛ Yehova ndo ye. (Mat. 6:33) Mɔ ye pangɔ mbilimbili hɛ̃ azi mɛndɛ̃ so fangɔ ya, Satana tɛnɛndó nvɛ̃nɛ na lo tɛ Yehova. Ngasia la mɔ lengbi ti lingɔ ni nɛ?

5. Ngasia la mɔ lengbi ti fangɔ ya, mɔ ndo hɛ̃ ti mɔ na ya mbilimbili nɛ?

⁵ Mɔ lengbi ti pɔnangɔ dungɔ lɛ ngɛ̃́ mɛ na lingɔ ya, azi mɛndɛ̃ ahũ yangondo ya, mɔ kɛ̃ nvɛ̃nɛ tɛ Satana, mɔ ye hɛ̃ngɔ tɛrɛ mɔ na ya mbilimbili, mɔ ye ya, Yehova du gbia tɛ mɔ, wa mɔ ye nga lingɔ aye mɛ lo ye. Ngasia la mɔ lengbi ti lingɔ ni nɛ? Mɔ lengbi ti lingɔ ni na lége ti hɛ̃ngɔ tɛrɛ mɔ hɛ̃ Yehova na ya sambela nga na yengɔ na gbɛlɛ azi zu ya, mɔ hɛ̃ tɛrɛ mɔ hɛ̃ lo na mungɔ batisimɔ. Songo na lo ti mbilimbili la adu ye mɛ na hɛ̃ngɔ mɔ ngunu ti nɛngɔ ya, mɔ mu batisimɔ.

6. Na bangɔ Nzembo 45:4 ye mɛ ndo to mɔ ya, mɔ ye Yezo nɛ?

⁶ Mɔ ndo ye Yezo na lo nɛ? Ambanga aye mɛ ndo to mɔ ya, mɔ ye Yezo ko, atɛnɛ ni kaya mbeti ti Nzembo 45:4. (Di.) Verse niko pa ya, Yezo ndo ye mbilimbili, zungɔ na tɛrɛ nga na fangɔ ngbanga ti mbilimbili. Se mɔ ye mbilimbili, wa mɔ ndo ye nga dungɔ mbilimbili ko, afa ya, mɔ ndo ye Yezo. Gbɔ̃ li mɔ ndo se mɛndó Yezo ndo hɛ̃ ti lo na ya kpale mɛ aba dungɔ mbilimbili. (Yn. 18:37) Ngasia la Yezo ndo kpãndó kpale mɛ aba dungɔ na seliye ti zungɔ na tɛrɛ na ndo ti uzu nɛ?

7. Ye mɛ mɔ sepala na ni gba na ya seliye tɛ Yezo ti zungɔ na tɛrɛ nɛ?

 ⁷ Yezo ndo kpã kpale mɛ aba dungɔ na seliye ti zungɔ na tɛrɛ na ndo ti uzu na ndenge mɛ lo nvɛ̃ni lo du se lɛlo ti nzɔ̃ni na omɛ aba dungɔ na zungɔ na tɛrɛ. Na ndakisa, lo ndo hɛ̃ gonda ngoi zu hɛ̃ To lo, ta bɛ fãni kɔi lo ndo hɛ̃ tɛrɛ lo nvɛ̃ni gonda ma. (Mar. 10:17, 18; Yn. 5:19) Mɔ ma tɛrɛ mɔ ngasia na hĩngangɔ seliye ti zungɔ na tɛrɛ ti ngaso mɛ Yezo na ni nɛ? Ta ni to mɔ ya, mɔ ye Nyi Nzapa, wa mɔ mu nga ekateli ti landangɔ se lɛlo tɛ lo ma? Ta kitɛ da ma ya, ni to mɔ ya mɔ li ngaso. Nda mɛ Yezo na seliye ti zungɔ na tɛrɛ nɛ? Yezo na seliye niko na lo mɛ ya, lo ndo ye, wa lo ndo landa nga se lɛlo tɛ To lo mɛ lo du zo ti zungɔ na tɛrɛ. (Nz. 18:35; Aeb. 1:3) Ta hĩngangɔ ni ali ya, mɔ ti na gwɛ̃ ti dɔngɔ dã na Yezo, zo mɛ ndo landa se lɛlo tɛ Yehova na ndenge ti lengbingɔ ma?

8. E ndo ye Gbia tɛ e Yezo gba na lo nɛ?

⁸ E na dengɔ bɛ gba na ndenge mɛ Yezo du Gbia tɛ e na lo mɛ ya, lo du nzɔ̃ gbia mɛ aɔ agbia zu. Yehova nvɛ̃ni la hɛ̃ nyi lo fɔrmasiɔ̃, wa lo hɛ̃ lo kumba ti lengɔ gbia. (Yis. 50:4, 5) Gbɔ̃ li mɔ na ndo songo mɛ azanga gingɔ nzɔ̃ kpale tɛ lo nvɛ̃ni mɛndó Yezo fa na azi mɛndɛ̃. (Yn. 13:1) Na lo mɛ ya, lo du Gbia tɛ mɔ ko, Yezo du zo mɛ ayɔ ya, mɔ ye lo na bɛ mɔ zu. Lo kambisandó ya, azi mɛ ndo ye lo na bɛ la kɔi, wa lo ndo ili la ya, akwa lo ko, ala ndo fa ya, ala ndo ye lo na tɔndɔngɔ andia tɛ lo. (Yn. 14:15; 15:14, 15) Adu kota ndima nvɛ̃ni na lo tɛ mɔ dungɔ kwa Nyi Yehova!

9. Ngasia la batisimɔ tɛ ava Yezo adu kwɛ kɔi na tɛ lo nɛ?

⁹ Kɔi ti andia mɛndó Yezo hɛ̃ ava lo adu ya, ala mu batisimɔ. (Mat. 28:19, 20) Wa lo nvɛ̃ni, lo hɛ̃ ngandó se lɛlo ti nzɔ̃ni na lo ni. Na ya akpale mɛndɛ̃, batisimɔ tɛ Yezo akɛsɛ na tɛ ava lo. (Ba ãkadre “ Ɔngbi mɛ na popo ti batisimɔ tɛ Yezo ná tɛ ava lo nɛ?”) Kanda na ya kpale mɛndɛ̃ ko, ni du kwɛ kɔi. Na ngoi mɛndó lo mu batisimɔ ko, Yezo hɛ̃ndó tɛrɛ lo ti nɛngɔ ya, lo li se bɛ To lo. (Aeb. 10:7) Kwɛ kɔi, ava Yezo ndo mu nga batisimɔ so fangɔ na azi zu ya, ala hɛ̃ tɛrɛ la hɛ̃ Yehova. Nga ma tɛ Yezo, na mungɔ batisimɔ, lingɔ se bɛ Yehova ndo ti ye ti uzu nga ti ngbondoni na ya dungɔ lɛ ngɛ̃́ tɛ la, kanda ta lingɔ se bɛ la nvɛ̃ni ma. Na lingɔ ngaso, ala ndo landa se lɛlo tɛ Gbia tɛ la.

10. Ye mɛ ndo to mɔ ya, mɔ ye Yezo nɛ, wa ye mɛ songo tɛ mɔ na lo tɛ lo alengbi ti tongɔ mɔ ya, mɔ li nɛ?

¹⁰ Mɔ ndo ye na bɛ mɔ kɔi ya, Yezo du ngbongi Nyi Nzapa, wa lo du nga gbia mɛ Nzapa kpã lo ya, lo le gbia na ndo e. Mɔ hĩnga ya, Yezo du zo ti zungɔ na tɛrɛ, wa lo ndo landa se lɛlo tɛ to lo na ndenge ti lengbingɔ. Mɔ mandandó ya, lo hɛ̃ndó azi gba tɛ ti tɛngɔ, lo sandó ngunu bɛ azi mɛ anzɛ̃, wa lo sara ngandó awa ngã. (Mat. 14:14-21) Mɔ hũ na lɛ mɔ nvɛ̃ni se mɛ lo ndo tambwisa bombi ndɛ na ngoi tɛ e. (Mat. 23:10) Wa mɔ hĩnga ya, lo na lingɔ aye gba na bi mɛ na gangɔ mabere Gbia ti Lo-lengɔ Gbia tɛ Nzapa. Ngasia la mɔ lengbi ti fangɔ ya, mɔ ndo ye lo nɛ? Mɔ na fangɔ ya, mɔ ndo ye lo na landangɔ se lɛlo tɛ lo. (Yn. 14:21) Mɔ lengbi ti bandangɔ ni na hɛ̃ngɔ dungɔ lɛ ngɛ̃́ tɛ mɔ hɛ̃ Yehova nga na mungɔ batisimɔ.

11. Ye ti uzu mɛ ndo to e ya, e mu batisimɔ nɛ, wa na lo nɛ?

¹¹ Ye ti ngbondoni mɛ ndo to e ya, e mu batisimɔ adu nɛ? Yezo fandó na azi ndia mɛ aɔ andia zu na ngoi mɛndó lo pa ya, “Ale mɔ ye [Yehova] Nzapa tɛ mɔ na na bɛ mɔ kɔi, na . . . tɛrɛ mɔ zu, na kɔdɛ tɛ mɔ zu, nga na nguru tɛ mɔ zu.” (Mar. 12:30) Se mɛ mɔ ndo ye na Nzapa la?

12. Mɔ ndo ye Yehova na lo nɛ? (Ba nga limɔ)

¹² E na aye gba mɛ alengbi ti tongɔ e ya, e ye Yehova. Na ndakisa, mɔ gbɔ̃ nda ni ya, “dungɔ lɛ ngɛ̃́ ndo lo ka tɛ lo” wa ‘anzɔ̃ ye zu, nga na aye ti lengbingɔ ndo lo ka tɛ lo.’ (Nz. 36:9;  Zaki 1:17) Aye zu ti nzɔ̃ni mɛ mɔ ndo sepala na ni ndo lo ka tɛ Yehova mɛ To e ti songo.

13. Nda mɛ tɔ̃ngɔ azi adu ye mɛ aɔ aye zu mɛ Nzapa hɛ̃ e nɛ?

¹³ Tɔ̃ngɔ azi adu ye mɛ aɔ aye zu mɛ Yehova hɛ̃ e. Nda mɛ elengbi ti tɛnɛngɔ ngaso nɛ? Gbɔ̃ li mɔ na ndo songo ti kpengbani mɛ na popo tɛ Yehova ná Nyi lo. Yezo pandó ya: ‘To mbi ndo ye mbi’ wa mbi ndo ‘ye nga To mbi.’ (Yn. 10:17; 14:31) Ala tindó na mangbi ti kpengbani ti ngaso na lo mɛ ya, ala lindó amiliɔ̃ ti abulu ndoni kɔi. (Mas. 8:22, 23, 30) Na olo mɛ, gbɔ̃ li mɔ na ndo pɛnɔ mɛndó Yehova ma na ngoi mɛndó lo zi lége ya, Nyi lo ga hũ pɛnɔ, wa lo kpi. Yehova ndo ye azi mawoma​—abɛse mɔ nga—​na lo ni la, lo zindó lége ti nɛngɔ ya, Nyi lo ti kpɔ̃ bɛ lo akpi kwá ti nɛngɔ ya, mɔ ná azi mɛndɛ̃, ĩ lua nzɔ̃ tangɔ li gɛrɛ ti luangɔ dungɔ lɛ ngɛ̃́ ti kaka. (Yn. 3:16; Gal. 2:20) Ni la adu ye ti uzu mɛ ndo to e ya, e ye Nzapa.

14. Ye mɛ mɔ lengbi ti lingɔ na ya dungɔ lɛ ngɛ̃́ tɛ mɔ mɛ aɔ aye mɛndɛ̃ zu nɛ?

¹⁴ Na lo mɛ ya, mɔ manda akpale gba na lo tɛ Yehova ko, ni li ya songo tɛ mɔ na mbage tɛ lo ati kpengbani. Wa mɔ na olo na gwɛ̃ ti dɔngɔ dã na lo bandangɔ ndɛ nga bwai na bwai. Ti biani ko, mɔ lengbi ti lingɔ ni. Lo yɔ ka ti mɔ ya, mɔ li zu ti hɛ̃ngɔ lo dengɔ bɛ. (Mas. 23:15, 16) Mɔ lengbi ti lingɔ ni, ta bo na nyɔ mɔ ma, kanda nga na lége ti kwa tɛ mɔ. Ekateli mɛ mɔ na  mungɔ na ya dungɔ lɛ ngɛ̃́ tɛ mɔ na fangɔ ya, mɔ ndo ye Yehova na bɛ mɔ kɔi. (1 Yn. 5:3) Ni la adu ye mɛ aɔ aye zu mɛ mɔ lengbi ti lingɔ na ya dungɔ lɛ ngɛ̃́ tɛ mɔ.

15. Ngasia la mɔ lengbi ti fangɔ ya, mɔ ndo ye Yehova nɛ?

¹⁵ Ngasia la mɔ lengbi ti fangɔ ya, mɔ ndo ye Yehova nɛ? Uzu, li sambela hɛ̃ lo so pangɔ hɛ̃ lo ya, mɔ hɛ̃ tɛrɛ mɔ hɛ̃ lo. (Nz. 40:8) Na gesi, fa yangondo ya, mɔ hɛ̃ tɛrɛ mɔ hɛ̃ lo na lége ti mungɔ batisimɔ. Nga ma se mɛ fale e tɛnɛ na ni kaya aparagrafɛ mɛ aɔ, mungɔ batimɔ na dungɔ ngoi ti dengɔ bɛ nga ye ti ngbondoni ti ya dungɔ lɛ ngɛ̃́ tɛ mɔ. Mɔ na bandangɔ dungɔ lɛ ngɛ̃́ ti fãnani, ta na lo tɛ mɔ nvɛ̃ni ma, kanda nda lo tɛ Yehova. (Roma 14:8; 1 Pet. 4:1, 2) Ti biani ko, ni du ekateli kɔi ti kotanani. Kanda ni la na zingɔ lége hɛ̃ mɔ ya, mɔ lua bɛta dungɔ lɛ ngɛ̃́. Ngasia?

16. Na bangɔ Nzembo 41:12 mbana gɛrɛ mɛ Yehova na hɛ̃ngɔ azi ko la ndo hɛ̃ dungɔ lɛ ngɛ̃́ tɛ la hɛ̃ lo nɛ?

¹⁶ Yehova du zo mɛ aɔ azi zu na songo. Abɛse aye mɛ mɔ hɛ̃ lo adu ti ngasia ko, lo na futangɔ mɔ ɔngɔ omɛ mɔ hɛ̃ lo. (Mar. 10:29, 30) Lo na hɛ̃ngɔ mɔ bɛta dungɔ lɛ ngɛ̃́, dungɔ lɛ ngɛ̃́ mɛ na tina nga ti dengɔ bɛ bandangɔ ndɛ na ya gigi mɛ ti siɔni. Wa oko adu bo ebandeli ti anzɔ̃ ye. Dungɔ lɛ ngɛ̃́ mɛ mɔ na bandangɔ ni na lá ti batisimɔ tɛ mɔ ko, ta nda ni na dungɔ da ma. Mɔ lengbi ti vɔrɔngɔ To mɔ mɛ mɔ ndo ye lo gba ti bwai na bwai. Songo mɛ na popo tɛ mɔ ná To mɔ na maingɔ ngoi zu, wa mɔ na dungɔ na dungɔ lɛ ngɛ̃́ kwɛ kɔi na tɛ lo, dungɔ lɛ ngɛ̃́ ti bwai na bwai mɛ ta na maka ma.​—Di Nzembo 41:12.

17. Ye mɛ ta Yehova na ni ma, mɛ mɔ lengbi ti hɛ̃ngɔ lo nɛ?

¹⁷ Se mɔ mu ekateli ti hɛ̃ngɔ tɛrɛ mɔ hɛ̃ Yehova, wa mɔ mu nga batisimɔ ko, mɔ na luangɔ lége ti hɛ̃ngɔ To mɔ ti ndozu ye kɔi mɛ ngbondoni. Aye ti nzɔ̃ni zu mɛ mɔ na ni nga na aye zu mɛ ndo hɛ̃ mɔ dengɔ bɛ ndo lo ka tɛ lo. So fangɔ ya, mɔ ndo hɛ̃ wa lingɔ ndozu ná sese sia kɔli ko, hɛ̃ lo ye kɔi mɛ ta lo na ni ma​—ye ni adu hɛ̃ngɔ tɛrɛ mɔ hɛ̃ lo, vɔrɔngɔ lo na bɛ mɔ kɔi nga na mbilimbili zu. (Yobo 1:8; 41:11; Mas. 27:11) Dungɔ lɛ ngɛ̃́ ti ngaso la adu dungɔ lɛ ngɛ̃́ mɛ aɔ adungɔ lɛ ngɛ̃́ zu mɛ mɔ lengbi ti dungɔ na ni. Ta kitɛ da ma, songo mɛ mɔ na ni na lo tɛ Yehova la adu ye ti uzu mɛ alengbi ti tongɔ mɔ ya, mɔ mu batisimɔ.

18. Ahũnda mɛ mɔ lengbi ti hũndangɔ na tɛrɛ mɔ nɛ?

¹⁸ Se ahũnda mɔ ya: mɔ na mungɔ batisimɔ? Gbinya mɛ mɔ na hɛ̃ngɔ nɛ? Bo mɔ nvɛ̃ni la mɔ hĩnga gbinya ti hũnda niko. Kanda ye mɛ lengbi ti zangɔ mɔ ya, mɔ hɛ̃ gbinya ti hũnda ni adu ya, mɔ nvɛ̃ni mɔ hũnda tɛrɛ mɔ na ndo mɛ, ‘nda mɛ ayɔ ya, ta mbi diri na ni gesi ma nɛ?’ (Aw. 8:36) Da bɛ mɔ na aye taa mɛ alengbi ti tongɔ mɔ ya, mɔ mu batisimɔ mɛ e lo ti mandangɔ ni. Ti uzu, mɔ ndo ye mbilimbili, wa mɔ ye nga dungɔ mbilimbili. Hũnda tɛrɛ mɔ na ndo mɛ: ‘Mbi ye dungɔ na dungɔ lɛ ngɛ̃́ na ngoi mɛ gbanda azi zu na tɛnɛngɔ bɛta tɛnɛ, wa ala na dungɔ nga mbilimbili?’ Ti sɛ, mɔ ndo ye Yezo. Hũnda tɛrɛ mɔ na ndo mɛ, ‘Mbi ye ya, Yezo du Gbia tɛ mbi, wa mbi ye nga landangɔ se lɛlo tɛ lo?’ Wa ti taa, ɔngɔ aye mɛndɛ̃ zu, mɔ ndo ye Yehova. Hũnda tɛrɛ mɔ na ndo mɛ, ‘Mbi ye hɛ̃ngɔ Yehova dengɔ bɛ na vɔrɔngɔ lo mabere Nzapa tɛ mbi?’ Se du ya, mɔ hɛ̃ gbinya, ĩi, na ndo ahũnda niko zu ko, nda mɛ ta mɔ lengbi ti mungɔ batisimɔ ma nɛ? Na lo nɛ la, mɔ lengbi ti diringɔ na ni gesi nɛ?​—Aw. 16:33.

19. Nda mɛ ta mɔ lengbi ti kakatanangɔ na mungɔ batisimɔ ma nɛ? Hɛ̃ se lɛlo kɔi. (Yn. 4:34)

¹⁹ Se du ya, mɔ ndo kpɛ mbɛto ti mungɔ batisimɔ ko, da bɛ na ndakisa mɛndó Yezo hɛ̃. (Di Yoanɛ 4:34.) Yezo hakandó lingɔ se bɛ To lo na tɛ ti tɛngɔ. Na lo nɛ? Tɛ ti tɛngɔ adu nzɔ̃ni na lo ti sãte tɛ e. Yezo hĩngandó ya, aye zu mɛ Yehova ndo yɔ ka ti e ya e li ni ko, adu na na ndombali nzɔ̃ kpale tɛ e. Ta Yehova lengbi ti yɔngɔ ka ti e ya, e li aye mɛ na hɛ̃ngɔ e pɛnɔ ma. Ye kɔi mɛ Yehova ye ya, mɔ li adu mungɔ batisimɔ? Ĩi. (Aw. 2:38) Na lo ni la, mɔ lengbi ti yengɔ na bɛ mɔ kɔi ya, tɔndɔngɔ ndia niko na hɛ̃ngɔ mɔ anzɔ̃ kpale. Se du ya, ahɛ̃ mɔ ye kɔi ti nzɔ̃ni ti tɛngɔ, mɔ na fɔ̃ngɔ bɛ mɔ na tɛngɔ ni? Ipɔ. Se du ya, ta mɔ ndo fɔ̃ bɛ mɔ na tɛngɔ ye mɛ nzɔ̃ni ma, nda mɛ mɔ na fɔ̃ngɔ bɛ mɔ na mungɔ batisimɔ nɛ?

20. Ye mɛ e na mandangɔ na pɔsɔ ti gesi nɛ?

²⁰ Nda mɛ azi mɛndɛ̃ ndo diri na mungɔ batisimɔ gesi nɛ? Azi gba alengi ti tɛnɛngɔ ya, “Ta mbi dɛ mbi ti dã ma.” Ye mɛ ale ta bɛ mɔ li na ni ma du ya, ekateli ti mungɔ batisimɔ adu ekateli ti ngbondoni mɛ aɔ ekateli zu mɛ mɔ na mungɔ na ya du tɛ mɔ. Na lo ni la, gbɔ̃ li mɔ ndo ni na seni, wa ngoi mɛndɛ̃, na yɔngɔ ngoi ná ge ge ge ti nɛngɔ ya, mɔ kokisa masengami ti ya Ngbangɔ. Kanda se mɔ du na gwɛ̃ kpenbani ti mungɔ batisimɔ ko, ye mɛ mɔ lengbi ti lingɔ na olo ti nɛngɔ ya, mɔ lɛkɛ tɛrɛ mɔ nɛ? E na hɛ̃ngɔ gbinya ti hũnda niko na pɔsɔ ti gesi.