1-2. Se du ya, ta mɔ dɛ kokisa masengami ti mungɔ batisimɔ ma, nda mɛ ta mɔ lengbi ti nzɛ̃ngɔ ma nɛ? (Ba limɔ ti koko mbeti.)

 SE DU ya, mɔ na gwɛ̃ ti mungɔ batisimɔ ko, hĩnga ya, mɔ kpã mɔkanɔ ti nzɔ̃ni nvɛ̃ni. Mɔ na olo dã ti mungɔ batisimɔ? Se mɔ da bɛ mɔ ya, mɔ lɛkɛ tɛrɛ mɔ wɛ, wa abiazi ti ya bombi aye nga ya, mɔ mu batisimɔ ko, ta mɔ gbɔ̃ bɛ mɔ na lingɔ ni ma. Se mɔ li ngaso ko, Yehova na hɛ̃ngɔ mɔ bɛta du na ya kwa tɛ lo.

² Kanda ye mɛ mɔ na lingɔ se apa hɛ̃ mɔ ya, ayɔ ya, mɔ kokisa masenga mɛndɛ̃ uzu ti mɔ mungɔ batisimɔ nɛ? Bere mɔ nvɛ̃ni mɔ hũ nga ya, ayɔ ya, mɔ lɛkɛ akpale mɛndɛ̃ uzu ti mɔ mungɔ batisimɔ nɛ? Se adu ngaso ko, ta mɔ nzɛ̃ ma. Mɔ lengbi ti maingɔ ngbĩi mɔ kokisa mokano niko ti ngbondoni, abɛse mɔ du palanga bere bange.

3. Hũnda mɛndó zo kɔi ti ndima ti Etiopia ahũnda na Filipɛ nɛ, wa hũnda mɛ ni si na ni nɛ? (Awa Pangɔ Kwa 8:36, 38)

³ Di Awa Pangɔ Kwa 8:36, 38. Zo kɔi ti ndima ti Etiopia ahũndandó Filipɛ wa fangɔ tɛnɛ ya: ‘ye mɛ ndo gbanzi mbi ya, ta mbi mu batisimɔ ma nɛ? Lo ndó na gwɛ̃ kpengbani ti mungɔ batisimɔ, kanda lo kokisandó masengami ti nɛngɔ ya, lo mu ni?

4. Ngasia la zo ti Etiopia fandó ya, lo na gwɛ̃ ti mandangɔ aye gba ti ya Ngbangɔ nɛ?

⁴ Kɔli niko ti Etiopia “agwe ndo ka Yeruzalɛmɛ so vɔrɔngɔ Nzapa.” (Aw. 8:27) Lo lengbindó ti dungɔ zo ti prɔzelite, kanda lo gbinyangbindó bɛ lo, lo bandandó gwengɔ sambela tɛ ayuda. Ta kitɛ da ma, lo mandandó kpale mɛ aba Yehova kaya Ngbangɔ ti yanga ti Ebré. Abɛse ngaso ko, lo bondó na gwɛ̃ ti mandangɔ aye gba. Na ngoi mɛndó Filipɛ tengbi na kɔli niko ka talége ko, ye mɛndó Filipɛ tã lo ndo li nɛ? Lo ndo mandandó rulo ti prɔfesi  tɛ Yisaya. (Aw. 8:28) Ni dundó hangɔ lo ti kpengbani ti ya Ngbangɔ. Ta zo ti Etiopia niko angbã bondó na mandangɔ aye ti woni nga ti yakere yakere ti ya Ngbangɔ ma; lo ndó na gwɛ̃ ti mandangɔ aye mɛndɛ̃ gba.

5. Ye mɛndó zo ti Etiopia ali na aye mɛndó lo manda nɛ?

⁵ Kɔli niko dundó zo ti ndima ka gbɛ lo-lengɔ gbia tɛ Gbia ti wali Kandasɛ ti Etiopia; lo ndó na kumba ti ‘batangɔ falanga’ tɛ wali niko. (Aw. 8:27) Na lo ni la, lo lengbindó ti dungɔ zo mɛ na akwa gba ti lingɔ na lo mɛ ya, lo ndó na akumba gba. Abɛse ngaso ko, lo ndo mundó ngoi ti vɔrɔngɔ Yehova. Ta lo ngbã bondó na mandangɔ mbilimbili ma; kanda lo ndo kpãndó ni na kwa na ya dungɔ lɛ ngɛ̃́ tɛ lo. Na lo ni la, lo lindó vuayajɛ ti yɔngɔrɔ ni ti nɛngɔ ya, lo vɔrɔ Yehova ka tepelo mɛ ka Yerusalɛmɛ. Vuayajɛ niko ayɔndó ya, lo li abi gba, wa ayɔ ngandó falanga gba nvɛ̃ni, kanda lo ndó na gwɛ̃ ti vɔrɔngɔ Yehova abɛse na yɔngɔ ya, lo li nɛ.

6-7. Ngasia la songo tɛ zo ti Etiopia na mbage tɛ Yehova angbãndó lá kwɛ tingɔ kpengbani nɛ?

⁶ Zo ti Etiopia amandó ambilimbili ti ngbondoni na mbage tɛ Filipe, na ndakisa mbilimbili mɛ aba Masiya. (Aw. 8:34, 35) Ngoi mɛndɛ̃ mbilimbili na lo ti kpale mɛndó Yezo li na lo tɛ lo, agbɔ̃ndó bɛ kɔli niko. Ye mɛ lo na lingɔ na pɛ mandangɔ mbilimbili niko nɛ? Lo lengbindó ti ngbãngɔ nga ma se mɛ lo da, zo ti prɔzelite mɛ ndo sambela Nzapa tɛ Ayuda na mbilimbili zu. Kanda, songo mɛndó lo na ni na lo tɛ Yehova ná Nyi lo atindó kpengbani. Ni tondó lo ya, lo mu ekateli kɔi ti ngbondoni mɛ na gbinyangbingɔ dungɔ lɛ ngɛ̃́ tɛ lo, lo yendó mungɔ batisimɔ ti nɛngɔ ya, lo ti kɔi tɛ ava Yezo. Filipɛ hũndó ya, kɔli niko kokisa masengami ti mungɔ batisimɔ, na lo ni la, lo hɛ̃ndó lo batisimɔ.

⁷ Se du ya, mɔ landa se lɛlo tɛ kɔli niko ti Etiopia ko, mɔ na kokisangɔ masengami ti mungɔ batisimɔ. Mɔ nga na tɛnɛngɔ na bɛ mɔ kɔi zangangɔ mbɛtɔ ya, ‘ye mɛ ndo gbanzi mbi ya, ta mbi mu batisimɔ ma nɛ?’ Zia e ba na olo se mɛ mɔ lengbi ti lingɔ aye nga ma se mɛndó zo ti Etiopia ali na ni: lo ndo mandandó aye ngoi zu, lo lindó aye na mangbi na aye mɛndó lo ndo manda, wa lo lindó zu ya, songo tɛ lo na mbage tɛ Yehova ati kpengbani.

8. Ngasia la mɔ lengbi ti kpãngɔ tɛnɛ mɛ kaya Yoanɛ 17:3 na kwa nɛ?

⁸ Di Yoanɛ 17:3. Tɛnɛ tɛ Yezo mɛ na ya vɛrse mɛ la azandó mɔ ya, mɔ mu ekateli ti mandangɔ Ngbangɔ? Ni zandó azi gba na popo tɛ e. Kanda tɛnɛ niko ndo za mɔ ya, mɔ ngbã lá kwɛ mandangɔ aye? Ĩi. Ta e na “hiñgangɔ gbanda . . . aye zu mɛ Nzapa li bandangɔ na ebandeli tee ka ndani ma.” (Mos. 3:11) E na ngbãngɔ bo gbanda lá kwɛ mandangɔ aye. Wa se e ndo  manda aye gba, e nga na dɔngɔ dã na Yehova fãni mɛndɛ̃ gba.​—Nz. 73:28.

9. Na pɛko mandangɔ mbilimbili ti ebandeli ti ya Ngbangɔ, ye mɛ ayɔ ya, e ngbã lá kwɛ lingɔ nɛ?

⁹ Ti biani ko, na ngoi mɛ e ndo banda mandangɔ akpale mɛ aba Yehova ko, e ndo banda na ndo ahangɔ lo ti ebandali ti ya Ngbangɔ. Na ya mbeti mɛndó lo to hɛ̃ awakristo ti Ebré ko, toma Polo ilindó hangɔ lo niko ya, ‘hangɔ lo ti ebandeli.’ Ta lo zangandó hɛ̃ngɔ ni ndima na ngoi mɛndó lo ili ni ya, “hangɔ lo ti ebandeli” ma; kanda lo hakandó ni na miliki mɛ ando kã na ayangambi. (Aeb. 5:12; 6:1) Wa lo sandó ngunu bɛ awakristo zu ya, ta ala ngbã bo na ndo hangɔ lo niko ti ebandeli ma, kanda, ale ala manda akpale ti ngbondoni ti ya Tɛnɛ tɛ Nzapa. Mɔ ndo du na gwɛ̃ kpengbani ti mandangɔ akpale ti ngbondoni ti ya Ngbangɔ? Mɔ dã ti ngbãngɔ lá kwɛ maingɔ, nga na ngbãngɔ lá kwɛ mandangɔ akpale mɛ aba Yehova nga na nzɔ̃ dangɔ bɛ tɛ lo?

10. Na ndombali nɛ la, mandangɔ aye ando du pɛnɔ na lo tɛ azi mɛndɛ̃ nɛ?

¹⁰ Mandangɔ aye ando du pɛnɔ na lo tɛ azi gba so popo tɛ e. Wa na lo tɛ mɔ mɛ? Na ngoi mɛndó mɔ ka kalasi, mɔ mandandó dingɔ mbeti nga na mandangɔ aye na ndenge ti nzɔ̃ni? Mɔ ndo yendó mandangɔ aye, wa mɔ hũ ya, ni ndo hɛ̃ zo anzɔ̃ kpale? Bere se mɛndó mɔ li na kalasi ali ya, mɔ hũ ya, ta mɔ na makoki ti mandangɔ aye ma? Se adu ngaso ko, hĩnga ya, ta mɔ kɔi ma. Yehova lengbi ti zangɔ mɔ. Lo du zo ti lengbingɔ, wa lo du nga Wa hangɔ azi na ye mɛ aɔ azi mɛndɛ̃ zu.

11. Nda mɛ elengbi ti tɛnɛngɔ ya, Yehova du “Kota wa hangɔ ye” nɛ?

¹¹ Yehova ndo ili tɛrɛ lo nvɛ̃ni ya, “Kota wa hangɔ mɔ na ye.” (Yis. 30:20, 21) Lo du wa hangɔ lo mɛ na nzɔ̃ bɛ, na yɔngɔrɔ bɛ, wa lo ndo kpã nga tɛrɛ lo na ndo tɛ azi. Lo ndo kpã lɛ lo na ndo anzɔ̃ kpale tɛ awa kalasi tɛ lo. (Nz. 130:3) Wa ta lo ndo yɔ ka ti e ya, e li aye mɛ aɔ ngunu tɛ e ma. Ta bɛ mɔ li na ni ma ya, lo la lo li bɔngɔ li mɔ, mɛ adu ye ti nzɔ̃ni nvɛ̃ni. (Nz. 139:14) Lo lindó e na gwɛ̃ ti mandangɔ aye. Lo ye ya, e ngbã lá kwɛ mandangɔ aye bwai na bwai, wa e lua nzɔ̃ kpale na lo ni. Na lo ni la, adu ye ti ndara ya, e du na “gwɛ̃” ti mbilimbili ti ya Ngbangɔ kpengbani bandangɔ ndɛ. (1 Pet. 2:2) Kpã mikanɔ mɛ mɔ lengbi ti kokisangɔ ni, wa kpã prɔgramɛ ti mandangɔ nga na dingɔ Ngbangɔ. (Yos. 1:8) Na lége ti nzɔ̃ sulu tɛ Yehova ko, mɔ na sepelangɔ na mandangɔ aye nga na gbɔ̃ngɔ li mɔ na ndo ni.

12. Nda mɛ mandangɔ se du tɛ Yezo nga na kwa tɛ lo adu ngbondoni nɛ?

¹² Ndo mu ngoi ti nɛngɔ ya, mɔ ndo gbɔ̃ li mɔ na ndo dungɔ lɛ ngɛ̃́ nga na kwa tɛ Yezo. Se e ye lingɔ kwa hɛ̃ Yehova ko, na dungɔ ngbondoni ya, e landa se lɛlo tɛ Yezo na seni nvɛ̃ni, wa gba ni na ya ngoi olo ti siɔni. (1 Pet. 2:21) Yezo pandó hɛ̃ ava lo yangondo ya, ala na tengbingɔ na pɛnɔ, ta lo ɔndɛndó ni na ala ma. (Luka 14:27, 28) Abɛse ngaso ko, lo ndó na loyengɔ ya, ava lo na ngbãngɔ mbilimbili ka tɛ Nzapa nga ma se mɛndó lo ngbã nga mbilimbili. (Yn. 16:33) Manda aye ti yakere yakere mɛ aba dungɔ lɛ ngɛ̃́ tɛ Yezo, wa kpã mɔkanɔ ti landangɔ se lɛlo tɛ lo na ya dungɔ lɛ ngɛ̃́ tɛ mɔ ti bi kɔi kɔi.

13. Ye mɛ mɔ lengbi ti yɔngɔ ka ti Yehova ngoi zu nɛ, wa na lo nɛ?

¹³ Ta bo hĩngangɔ ndo kɔi alengbi ma. Hĩngangɔ ndo na dungɔ ngbondoni se du ya, ni za mɔ ya, mɔ hĩnga Yehova nzɔ̃ni, wa mɔ ti na aseliye ti nzɔ̃ni mabere songo nga na loyengɔ na mbage tɛ lo. (1 Kɔr. 8:1-3) Ngoi zu ko la mɔ ndo manda aye ko, yɔ ka ti Yehova ya, lo za mɔ, mɔ ti na loyengɔ ti kpengbani. (Luka 17:5) Lo ndo hɛ̃ gbinya ti asambela ti ngaso. Bɛta loyengɔ mɛ alo na ndo hĩngangɔ ndo ti mbilimbili na ndo Nzapa tɛ e na zangɔ mɔ ya, mɔ gwe uzu.​—Zaki 2:26.

14. Ngasia la Toma Polo kambisandó nda mɛ adu ngbondoni ya, e ndo kpã aye mɛ e ndo manda na kwa nɛ? (Ba nga limɔ.)

¹⁴ Toma Polo kambisandó nda mɛ adu ngbondoni ya, ava Yezo ndo kpã aye mɛ ala ndo manda na kwa. Lo tɛnɛndó tɛnɛ ti dungɔ lɛ ngɛ̃́ tɛ Noa. Yehova pandó hɛ̃ Noa ya, na lége ti kpengba ngu ko, lo na kpɔngɔ asiɔ azi ti ngoi tɛ lo. Kanda ta hĩngangɔ bo ya, Nzapa na hongɔ gigi na lége ti ngu alengbindó ti songɔ Noa ná ndasewa tɛ lo na kwá ma. Hĩnga ya, Petro ilindó ngoi mɛndó aɔ uzu ti kota ngu ya, “ngoi mɛndó ando kĩ ngɔ.” (1 Pet. 3:20, NWT) Noa ná azi ti ndasewa tɛ lo alindó aye na mangbi na ye mɛndó ala manda, ala kĩndó kota ngɔ. (Aeb. 11:7) Na gesi Petro hakandó ye mɛ Noa li na mungɔ batisimɔ, lo sundó ya: ‘Ngɔ ni ndo fa batisimɔ mɛ ndoso ĩ na olo mɛ.’ (1 Pet. 3:21) Na lo ni la, elengbi ti hakangɔ aye mɛ mɔ ndo li na olo ti nɛngɔ ya, mɔ kokisa masengami ti mungɔ batisimɔ na kwa mɛndó Noa ná azi ti ndasewa tɛ lo ali na ya abulu gba so kĩngɔ ngɔ. Ye mɛ ayɔ ya, mɔ li ti nɛngɔ ya, mɔ kokisa masengami ti mungɔ batisimɔ nɛ?

15. Ye mɛ bɛta gbinyangɔ bɛ na zangɔ mɔ ya mɔ li nɛ?

¹⁵ Ye ti uzu mɛ ayɔ ya, mɔ li adu gbinyangɔ bɛ mɔ na lo ti siɔ kpale tɛ mɔ. (Aw. 2:37, 38) Bɛta gbinyangɔ bɛ na zangɔ mɔ ya, mɔ gbinyangbi aseliye tɛ mɔ na ndenge ti nzɔ̃ni. Mɔ zia lingɔ asiɔ ye mɛ ndo hɛ̃ Nzapa pɛnɔ mabere, pite, nyɔngɔ manga, tɛnɛngɔ siɔ tɛnɛ bere dɛngɔ zonga? (1 Kɔr. 6:9, 10; 2 Kɔr. 7:1; Ef. 4:29) Se du ya, ta mɔ dɛ li ni ma ko, li kpengbani ti nɛngɔ ya, mɔ gbinyangbi ni. Yɔ ka ti zo mɛ ndo manda na mɔ Ngbangɔ bere biazi kɔi ti ya bombi ya, lo za mɔ bere lo hɛ̃ mɔ wangɔ na lo ni. Se mɔ du palanga, wa mɔ ndo du ka tɛ awa dũngɔ mɔ ko, ngbã lá kwɛ yɔngɔ ka ti awa dũngɔ mɔ ya, ala za mɔ, mɔ zia aseliye ti siɔni mɛ mɔ ndo tiri to na ni mɛ ando gbanzi mɔ ya, ta mɔ mu batisimɔ ma.

16. Prɔgramɛ ti nzɔ̃ni ti nyingɔ mɛ ayɔ ya, mɔ du na ni nɛ?

¹⁶ Adu nga ngbondoni ya, mɔ du na prɔgramɛ ti nzɔ̃ni ti lingɔ akpale ti nyingɔ mabere gwengɔ bombi nga na hɛ̃ngɔ gbinya ka bombi. (Aeb. 10:24, 25) Wa na ngoi mɛ mɔ na kokisangɔ masengami ti singɔ kwa ti fangɔ tɛnɛ ko, li  kpengbani ya, mɔ ndo si kwa ti fangɔ tɛnɛ ngoi zu. Se mɔ ndo hɛ̃ tɛrɛ mɔ gba na ya kwa ti fangɔ tɛnɛ ko, mɔ nga na yengɔ kwa niko fãni mɛndɛ̃ gba. (2 Tim. 4:5) Se mɔ du palanga, wa mɔ ndo du ka tɛ awa dũngɔ mɔ ko, hũnda tɛrɛ mɔ na ndo mɛ: ‘Se mbi ndo si kwa ti fangɔ tɛnɛ bere mbi ndo gwe bombi, adu na lo mɛ ya, awa dũngɔ mbi ndo tɛnɛ ni hɛ̃ mbi ngoi zu? Bere mbi nvɛ̃ni la, mbi ndo li ni na bɛ mbi?’ Se mɔ nvɛ̃ni mɔ ndo li aye niko ko, mɔ na fangɔ ya, mɔ na loyengɔ, mɔ ndo ye nga Yehova, wa mɔ ndo hɛ̃ lo sia kɔli na lo ti aye zu mɛ lo li na lo tɛ mɔ. Na lingɔ ngaso, mɔ ndo ‘li aye mɛ afa ya, mɔ na mangbi ti kpengbani na Nzapa,’ ali mabere mɔ ndo hɛ̃ lo tisa mɛ na vɛlɛrɛ gba. (2 Pet. 3:11; Aeb. 13:15) Lingɔ aye ti ngaso na bɛ mɔ kɔi zangangɔ ya, ato mɔ tongɔ ando hɛ̃ Nzapa tɛ e dengɔ bɛ. (2 Kɔrinto 9:7.) E ndo li aye ti ngaso na lo mɛ ya, e ndo ma dengɔ bɛ ti hɛ̃ngɔ Yehova aye tɛ e ti ngbondoni.

17-18. Seliye ti nzɔ̃ni mɛ na zangɔ mɔ ya, mɔ kokisa masengami ti mungɔ batisimɔ nɛ, wa na lo nɛ? (Masese 3:3-6)

¹⁷ Na ngoi mɛ mɔ ndo li zu so kokisangɔ masengami ti mungɔ batisimɔ ko, mɔ na tengbingɔ na akpengba kpale. Ngoi mɛndɛ̃, azi mɛndɛ̃ na gulungɔ mɔ na lo ti loyengɔ tɛ mɔ; ambanga mɛndɛ̃ na temelangɔ mɔ. (2 Tim. 3:12) Na ngoi mɛ mɔ na lingɔ kpengbani ti ziangɔ aseliye tɛ mɔ ti siɔni ko, ngoi mɛndɛ̃ mɔ na diringɔ lingɔ aye niko fãni mɛndɛ̃. Ngoi mɛndɛ̃ mɔ na tingɔ na nzɛ̃ngɔ bere ngɔnzɔ na lo mɛ ya, ta mɔ ndo koka kokisangɔ mɔkanɔ tɛ mɔ ma. Ye mɛ na zangɔ mɔ ya, mɔ gbe bɛ mɔ nɛ? Seliye kɔi ti ngbondoni nvɛ̃ni, songo mɛ mɔ na ni na lo tɛ Yehova.

¹⁸ Songo mɛ mɔ na ni na lo tɛ Yehova adu seliye mɛ aɔ aseliye mɛndɛ̃ zu mɛ mɔ na ni. (Di Masese 3:3-6.) Ngoi gba, Ngbangɔ ndo tɛnɛ tɛnɛ ti songo ti mbilimbili mɛ Yehova na ni na lo tɛ awa kwa tɛ lo. Songo niko ti mbilimbili afa ya, ta lo na ziangɔ awa kwa tɛ lo bɛ fãni kɔi ma, ta lo nga na ziangɔ yengɔ ala bɛ yakere ma. (Nz. 100:5) Na lo mɛ ya, Nzapa li mɔ na yika yika tɛ lo ko, mɔ lengbi ti dungɔ na songo ti ngaso. Ngasia?​—Eb. 1:26

19. Ngasia la mɔ lengbi ti lingɔ ya, mɔ ndo hɛ̃ Yehova sia kɔli bi zu na lo ti anzɔ̃ ye mɛ lo ndo li tɛrɛ mɔ nɛ? (Galatia 2:20)

¹⁹ Ndo hɛ̃ Nzapa sia kɔli. (1 Tɛs. 5:18) Bi zu, ndo hũnda tɛrɛ mɔ na ndo mɛ, ‘Ngasia la, Yehova fa songo na mbi nɛ?’ Na gesi hɛ̃ lo sia kɔli na dingɔ yangondo ye mɛ lo li na lo tɛ mɔ na  lége ti sambela. Nga ma tɛ toma Polo ko, ndo hũ aye ti songo mɛ Yehova ndo li mabere lo ndo li ni tɛrɛ mɔ nvɛ̃ni. (Di Galatia 2:20.) Na gesi hũnda tɛrɛ mɔ na ndo mɛ, ‘Ta ni lengbi ti tongɔ mbi ya, mbi fa nga songo ti ngaso na lo ma?’ Songo mɛ mɔ na ni na lo Yehova na zangɔ mɔ ya, mɔ ngbã lá kwɛ lingɔ kpengbani ti gbengɔ bɛ mɔ se mɔ tengbi na tara wa mɔ nwɔ nga ni. Ni nga na tongɔ mɔ ya, mɔ ngbã lá kwɛ lingɔ kwa hɛ̃ Yehova na ge ge ge, wa mɔ fa na lo ya, mɔ ndo ye lo gba, nga bi zu.

20. Aye mɛ mɔ lengbi ti lingɔ ti nɛngɔ ya, mɔ hɛ̃ tɛrɛ mɔ hɛ̃ Yehova nɛ, wa nda mɛ ni du ekateli kɔi ti ngbondoni nɛ?

²⁰ Yɛkɛ yɛkɛ, songo tɛ mɔ na lo tɛ Yehova na tongo mɔ ya, mɔ li hɛ̃ lo sambela kɔi ti ngbondoni, wa na ya sambela niko ko, mɔ na hɛ̃ngɔ tɛrɛ mɔ hɛ̃ lo. Ta bɛ mɔ li na kpale mɛ ma, na ngoi ko la mɔ hɛ̃ tɛrɛ mɔ hɛ̃ Yehova ko, mɔ na nzɔ̃ dangɔ bɛ kɔi ti ngbondoni: dungɔ zo tɛ lo ti bwai na bwai. Na ngoi mɛ mɔ hɛ̃ tɛrɛ mɔ hɛ̃ Yehova ko, mɔ ko kapa ti vɔngɔrɔ lo na ya ngoi ti nzɔ̃ni nga na ya ngoi ti siɔni. Ta na yɔngɔ ya, mɔ diri mɔ kokapa niko fãni sɛ ma. Ti biani ko, na ngoi mɛ zo ndo hɛ̃ tɛrɛ lo hɛ̃ Yehova ko, lo ndo mu ekateli kɔi ti ngbondoni nvɛ̃ni. Kanda ta bɛ mɔ li na kpale mɛ ma: Na ya dungɔ lɛ ngɛ̃́ tɛ mɔ zu, mɔ na mungɔ gbanda ekateli ti nzɔ̃ni gba, kanda ta omɛ na ɔngɔ ekateli ti hɛ̃ngɔ tɛrɛ mɔ hɛ̃ Yehova da ma. (Nz. 50:14) Satana na lingɔ zu ti nɛngɔ ya, ni gbɛ̃ songo mɛ mɔ na ni na lo tɛ Yehova, ti nɛngɔ ya, mɔ zia dungɔ mbilimbili na mbage tɛ lo. Ta mɔ zia ya, lo li ni ma! (Yobo 27:5) Songo ti kpengbani mɛ mɔ na ni na lo tɛ Yehova na zangɔ mɔ ya, mɔ tɔndɔ kapa mɛ mɔ ko ti vɔrɔngɔ lo bwai na bwai, wa mɔ dɔ nga dã na To mɔ ti ndozu.

21. Nda mɛ elengbi ti tɛnɛngɔ ya, mungɔ batisimɔ adu ebandeli ti kpale, kanda ta kɔngɔ nda kpale zu ma nɛ?

²¹ Na pɛ hɛ̃ngɔ tɛrɛ mɔ hɛ̃ Yehova ko, pa hɛ̃ abiazi ti ya bombi ye mɛndɛ̃ ti ngbondoni mɛ mɔ ye lingɔ, mungɔ batisimɔ. Kanda, ale ta bɛ mɔ li na ni ma ya, ta mungɔ batisimɔ adu kɔngɔ nda kpale zu ma, kanda adu bandangɔ ni. Ni du ebandeli ti dungɔ lɛ ngɛ̃́ mɛ azanga maka na ya kwa tɛ Yehova. Na lo ni la, li ya, songo tɛ mɔ na lo tɛ Yehova ati kpengbani bandangɔ ndɛ. Kpã mikanɔ mɛ na lingɔ ya, songo niko ati kpenbani bi zu. Lingɔ ngaso na sangɔ ngunu bɛ mɔ ya, mɔ mu batisimɔ. Lá ti batisimɔ tɛ mɔ, na dungɔ bi kɔi ti dengɔ bɛ nvɛ̃ni, kanda ni du bo ebandeli ti anzɔ̃ kpale. Na lo ni la, zia ya mɔ ngbã lá kwɛ lingɔ kpengbani ti nɛngɔ ya, songo tɛ mɔ na mbage tɛ Yehova ná Nyi lo amai bwai na bwai!