PANDƐ TI DUNGƆ LƐ NGƐ̃́
“Mbi yendó lingɔ kwa hɛ̃ Yehova”
E ONZINDÓ vizite kaya grupɛ kɔi ti yakere mɛ dã na kɔdɔrɔ ti Granbori, mɛ ka Suriname mɛ ka gbɛ ndo nvɛ̃ni. Na gesi, e mandó ya ngɔ kɔi mɛ yɔngɔrɔni nvɛ̃ni ka lɛ tɛ ti Tapanahoni. Na ngoi mɛndó e ndo fa ndo kɔi ka lɛ tɛ mɛ ando suwa kpengbani ko, ngɔ tɛ e agundó tɛ̃nɛ ka gbɛ ngu. Na mbala kɔi, li ngɔ ni alindó gbɛ ngu wa e zu e minandó ka gbɛ ngu. Bɛ mbi bandandó sɔ̃ngɔ kpengbani. Abɛse du ya, mbi nɔndó nɔ ka lɛ tɛ abulu gba so bangɔ bombi ko, ta mbi hĩngandó liangɔ tɛ ma!
Uzu ti nɛngɔ ya, mbi kambisa hɛ̃ ĩ ye mɛndó ali tɛrɛ lo na gesi ko, zia mbi kambisa hɛ̃ ĩ se mɛndó mbi banda na kwa ti ngoi zu.
Adũndó mbi na bulu ti 1942 kaya kɔdɔrɔ ti Caraïbes, kaya zwá ti nzɔ̃ni nvɛ̃ni ti Curaçao. To mbi dundó zo ti Suriname, kanda lo dirindó ka Curaçao so gingɔ kwa. Abulu yakere uzu ti dũngɔ mbi ko, lo tindó zo ti uzu mɛ ati Tɛmwɛ tɛ Yehova mɛ amu batisimɔ kaya kɔdɔrɔ Curaçao. a Pɔsɔ zu, lo ndo mandandó na e Ngbangɔ, abɛse ta e ayangambi e ndo landandó prɔgramɛ ti mandangɔ Ngbangɔ na seni ma. Ngoi mɛndó mbi ti na bulu 14 ko, e dirindó ka Suriname ti nɛngɔ ya, tata tɛ e aza koko tɛ e ti wali mɛndó ati bange.
AKWA TI NZƆ̃NI AZANDÓ MBI GBA
Ka Suriname, mbi tindó kwa apalanga mɛndɛ̃ ti ya bombi tɛ e mɛndó ala ndo li kwa hɛ̃ Yehova na ge ge ge nvɛ̃ni. Ala ɔndó mbi na bulu yakere, wa ala ndo lindó kwa mabere awa sungɔ lége ti ngoi zu. Ngoi mɛndó ala ndo kambisa anzɔ̃ kpale mɛndó ala ndo tengbi na ni na ya kwa ti fangɔ tɛnɛ ko, ala ndó na dengɔ bɛ nvɛ̃ni. Na pɛ bombi, e ndo tɛnɛndó tɛnɛ mɛ aba Ngbangɔ, ngoi mɛndɛ̃ e ndo lindó ni ka gigi na ngoi mɛ nzɛ ndo sũ. Ala zandó mbi ya, mbi hĩnga aye mɛ mbi na lingɔ na ya dungɔ lɛ ngɛ̃́ tɛ mbi; lingɔ kwa na lo tɛ Yehova. Na lo ni la mbi mundó batisimɔ na ngoi mɛndó mbi na bulu 16. Na gesi na ngoi mɛndó mbi ti na bulu 18, mbi bandandó lingɔ kwa tɛ wa ti sungɔ lége ti ngoi zu.
MBI MANDA AKPALE GBA TI NZƆ̃NI
Ngoi mɛndó mbi ndo li kwa tɛ wa sungɔ lége ka Paramaribo
Mbi mandandó aye gba ti nzɔ̃ni na ya kwa ti sungɔ lége, wa ni zandó mbi na ya dungɔ lɛ ngɛ̃́ tɛ mbi zu, na nga na ya kwa tɛ mbi ti ngoi zu. Na ndakisa, kɔi ti aye mɛndó mbi manda adu nda mɛ adu ngbondoni ya, e hɛ̃ azi mɛndɛ̃ fɔrmasiɔ̃. Na ngoi mɛndó mbi banda kwa tɛ wa sungɔ lége ko, nyita kɔi mɛndó misiɔnɛrɛ mɛ ili lo la Willem van Seijl amundó mbi abandandó hɛ̃ngɔ mbi fɔrmasiɔ̃. b Lo handó na mbi akpale gba na omɛ aba se ti lingɔ kumba kɔi ge ya bombi. Na ngoi nikondó ko, ta mbi hũndó nda mɛ fɔrmasiɔ̃ niko adu ngbondoni na lo tɛ mbi ma. Bulu kɔi na gesi, mbi tindó wa sungɔ lége ti kotani, wa atondó mbi kaya grupɛ kɔi ti yakere mɛ ka gbɛ ndo nvɛ̃ni ti kɔdɔrɔ ti Suriname. Mbi ndo hɛ̃ ayata zu nga na nyita Willen sia kɔli na lo ti afɔrmasiɔ mɛndó ala hɛ̃ mbi! Bandangɔ so ndoko mbi ndo li kpengbani ti landangɔ se lɛlo tɛ la na ndenge mɛ mbi ndo mu ngoi ti hɛ̃ngɔ ayata mɛndɛ̃ fɔrmasiɔ̃.
Ye ti sɛ mɛndó mbi manda adu anzɔ̃ kaple mɛ zo ndo lua se lo du na dungɔ lɛ ngɛ̃́ ti yapuni mɛ na mɔlɔngɔ. Na ebandeli ti anzɛ̃ zu, mbi ná fɔ̃ mbi mɛndɛ̃ mɛ nga wa sungɔ lége ti kotani, e ndo lindó listɛ ti aye mɛ e na dungɔ na gwɛ̃ ni na ya apɔsɔ mɛ na gangɔ. Na gesi, kɔi ka popo tɛ e ndo gwendó ka gbata so vɔngɔ aye mɛ e na gwɛ̃ ni. E ndo salelandó falanga nga na aye tɛ e ti tɛngɔ na seni nvɛ̃ni ti nɛngɔ ya, agwe na e tee ka nda nzɛ. Ayɔndó ya, ta aye wɛ ti e na mbala kaka ma, na lo mɛ ya, ka gbɛ ndo, ta azi ndó gba ma, wa ta zo ti zangɔ nga e ndó da ma. Ta kitɛ da ma, na lo mɛ ya, mbi mandandó bandangɔ na nyingambi dungɔ na dungɔ lɛ ngɛ̃́ ti yapuni nga ti mɔlɔngɔ ko, ni zandó mbi ya, mbi kpã lɛ mbi na ndo kwa mɛ mbi ndo li hɛ̃ Yehova na ya dungɔ lɛ ngɛ̃́ tɛ mbi zu.
Ye ti taa mɛndó mbi manda adu nda mɛ adu ngbondoni ya, zo manda mbilimbili na yanga ti kɔdɔrɔ tɛ lo nvɛ̃ni. Na ngoi mɛndó mbi dɛ nyingambi ko, mbi hĩngandó tɛnɛngɔ yanga ti, Néerlandais, Anglais, Papiamento, nga na Sranantongo (ando ili nga yanga niko ya, Sranan), yanga mɛ azi gba ti Suriname ndo tɛnɛ. Kanda, mbi hũndó ya, azi gba mɛ ndo du kaya kɔdɔrɔmɛ ka gbɛ ndo ko, ala ndo sepalandó na mbilimbili na ngoi mɛndó e ndo pa ni hɛ̃ la na yanga tɛ la nvɛ̃ni. Adundó pɛnɔ ya, mbi hĩnga tɛnɛngɔ yanga mabere Saramacca, mɛndó na atɛnɛ ti kpengbani nvɛ̃ni. Abɛse ngaso ko, ta ge ge ge tɛ mbi adundó ti gɛgɛrɛ ma. Na ya abulu niko zu, mbi ndó na lége ti pangɔ mbilimbili hɛ̃ azi gba na lo mɛ ya, mbi ndo tɛnɛndó yanga ti kɔdɔrɔ tɛ la.
Ti biani, ngoi mɛndɛ̃ mbi tengbindó na akpale mɛndɛ̃ ti kamɛnɛ na ngoi mɛndó mbi ndo manda yanga ni. Na ndakisa, lá kɔi mbi yendó hũndangɔ wali kɔi mɛ ndo manda Ngbangɔ mɛ lo ndo tɛnɛ yanga ti Saramacca se mɛ na olo, lo ndo ma tɛrɛ lo na lo mɛ ya asipi ndo giandó lo. Na se lɛ tɛnɛngɔ ngaso ko, mbi hũndandó lo ya, bere lo mɛ ngɔ! Ti biani hũnda tɛ mbi ahɛ̃ndó lo kamɛnɛ. Abɛse na ya yungɔ ndo tɛ mbi ko, ngoi zu mbi ndo lindó kpengbani ti tɛnɛngɔ yanga tɛ azi ti teritoirɛ tɛ mbi.
MBI YENDÓ AKUMBA MƐNDƐ̃
Na bulu ti 1970, mbi luandó kumba tɛ wa bangɔ ndo kɛlɛ kɛlɛ. Bo na bulu niko, mbi lindó adiskur mɛndó kaya ni, mbi ndo fandó video kɔi mɛ apa ya, “Une visite au siège mondial des Témoins de Jéhovah” hɛ̃ ayata kɔli ná aya ta wali gba mɛ ndo du kaya kɔdɔrɔ mɛ ka gbɛ ndo. Mbi ná ayata mɛndɛ̃ e ndo salelandó ngɔ ti nɛngɔ ya, e gwe ka tɛ aya niko. E ndo gwendó na groupe électrogène kɔi, bidon kɔi ti kotani mɛ na essence, mwinda ti petrɔle, nga na aye mɛndɛ̃ mɛ na zangɔ e ya, e fa video ni. Na pɛ singɔ ka nyɔ tɛ, e ndo lindó voyagɛ ka gbɛ ndo, e ndo yɔndó aye tɛ e ti fangɔ na video tee ka ndo mɛ e na fangɔ na ni. Ye mɛndó agbɔ̃ bɛ mbi gba na ya ngoi niko adundó se mɛ ayata ndo mu kpale ti fangɔ video na valɛrɛ
gba. Mbi ndó na dengɔ bɛ ti zangɔ azi gba ya, ala hĩnga Yehova nga na linɔ tɛ lo mɛ ge lɛ sese nzɔ̃ni. Anzɔ̃ sulu ti nyingɔ mɛndó mbi lua aɔ madãma aye ti mi zu mɛndó mbi zia ti nɛngɔ ya, mbi li kwa hɛ̃ Yehova.LIBALA
Mbi ná Ethel na lá ti libala tɛ e na nzɛ ti 09/1971
Abɛse du ya, mbi hĩngandó nzɔ̃ni se mɛ dungɔ mɔdo ndo za zo ya, lo li akumba mabere omɛndó mbi na ni na seni ko, mbi ngandó na gwɛ̃́ ti dungɔ na wali. Na lo ni la mbi bandandó lingɔ sambela hɛ̃ Yehova ti nɛngɔ ya, lo za mbi, mbi lua wali mɛ na zangɔ mbi ya, e li kwa ndoni kɔi na dengɔ bɛ abɛse ka gbɛ ndo. Abulu bere kɔi na gesi, mbi ná Ethel mɛ lo nga wa sungɔ lége ti kotani, e mangbindó ya, e dungbi, lo ye ngandó lingɔ kwa hɛ̃ Yehova abɛse ta adundó woni ma. Na ngoi mɛndó lo dɛ palanga, Ethel ndo sepalandó na se lɛlo tɛ toma Polo wa lo ye ngandó hɛ̃ngɔ tɛrɛ lo na ya kwa ti fangɔ tɛnɛ nga ma se mɛndó Polo li na ni. E lindó libala na bulu ti 1971 wa e bandandó lingɔ kwa tɛ awa bangɔ ndo kɛlɛ kɛlɛ ndoni kɔi.
Ethel maindó kaya ndasewa tɛ azi mɛ ta ala na aye ti mi gba ma, na lo ni la lo mɛsɛnɛndó iɔ na kwa ti bangɔ ndo kɛlɛ kɛlɛ kaya akɔdɔrɔ mɛ ka gbɛ ndo. Na ndakisa, ngoi mɛndó e ndo lɛkɛ tɛrɛ e so gwengɔ bangɔ bombi kɔi mɛ kaya kɔdɔrɔ mɛ yɔngɔrɔ ni ko, ta e gwendó na aye gba ma. E ndo e kpondó abɔngɔ tɛ e, wa e ndo gbɔ̃ndó ngu kaya ngu bere kaya tɛ. E mɛsɛnɛ ngandó tɛngɔ aye zu mɛ azi ndo hɛ̃ e—e ndo tɛndó sa mɛ nga ma kale bere gazele, asusu mɛ ando ili ni ya, mbubu bere asa zu mɛndó ala ho ni kaya ndo bere kaya ngu. Ngoi mɛndó ta la ndo du na sãni (bere sɛmbɛ) ti tɛngɔ na ye ma ko, e ndo tɛndó ye kaya sã fɔndɔ bere sã tabe. Se ta kele bere kanya adundó da ti tɛngɔ na ye ma ko, e ndo tɛndó ye na ti e. Mbi ná Ethel, e hũndó ya, vɔrɔngɔ Yehova ndoni kɔi na ya kwa ti ngoi zu alindó ya, e du na ya libala ti akpu taa ti kpengbani mɛ agbe ni ndoni kɔi. (Mos. 4:12) Ta e na ziangɔ dungɔ lɛ ngɛ̃́ mɛ e na ni na lo ti ye kɔi mɛ so ya gigi olo ma!
Na ngoi mɛndó e onzi bangɔ ayata mɛ kaya kɔdɔrɔ mɛ ka gbɛ ndo e ga e diri la, e tengbindó na kpale mɛ fale mbi tɛnɛ ni na ebandeli. Na pɛ
nĩngangɔ yakere ka gbɛ ngu ko, ngɔ tɛ e adirindó atwa ge ndo lɛ ngu. Ye ti dengɔ bɛ, e yundó abɔngɔ ti fangɔ na ngu (gilets de sauvetage) wa ta zo kɔi ka popo tɛ e azindandó ma. Kanda ngu sĩndó kaya ngɔ tɛ e. E sandó atɛ ti tɛngɔ mɛndó kaya sasu mɛndó e na ni kaya ngɔ wa e mundo ni, e hele na ngu kaya ngɔ tɛ e.Na lo mɛ ya, e sandó atɛ tɛ e ti tɛngɔ ko, e bandandó gingɔ susu na ngoi mɛndó e ndo e sua ka lɛ tɛ. Kanda ta e ndo gbɔ̃ndó bɛ le susu kɔi ma. Na lo ni la, e lindó sambela hɛ̃ Yehova ya, lo hɛ̃ e tɛ ti tɛngɔ ti bi niko. Bo na pɛ lingɔ sambela, kɔi ka popo tɛ e agbɔ̃ndó susu kɔi ti kotani mɛndó aza e zu kũ ya, e tɛ ye na lá niko.
KƆLI TI NDASEWA, TO TI NDASEWA, NGA WA BANGƆ NDO KƐLƐ KƐLƐ
Na pɛ lingɔ abulu kũ na ya kwa ti bangɔ ndo kɛlɛ kɛlɛ ko, mbi ná Ethel e luandó nzɔ̃ sulu mɛndó ta e da bɛ e na ni ma, e ga e dũ nyingambi. Mbi mandó dengɔ bɛ gba na ngoi mɛndó mbi ma tɛnɛ ni abɛse mbi ndó na sɔngɔ bɛ yakere na ndo se mɛ dungɔ lɛ ngɛ̃́ tɛ e na tingɔ na ni. Mbi ná Ethel ndó na gwɛ̃ kpengbani ti ngbãngɔ kaya kwa ti ngoi zu, se alengbi. Na bulu ti 1976 e dũndó nyi e ti kɔli Ethniël, wa e dũndó ngambi lo ti kɔli Giovanni bulu sɛ na gesi.
Mbi gwe ka ndo mɛ ando hɛ̃ ayata batisimɔ kaya ngu ti Tapanahoni mɛ ka dã na Godo Holo (Ni ka Estɛ ti Suriname) na bulu ti 1983
Na lo mɛ ya, gwɛ̃ ti fangɔ tɛnɛ dɛndó kpengbani ka Suriname na ngoi niko ko, bethel mundó ekateli ya, mbi ngbã lá kwɛ lingɔ kwa tɛ mbi ti bangɔ ndo kɛlɛ kɛlɛ, wa mbi ndo kã nga ayati mbi. Na ngoi mɛndó ayati e adɛ ayangambi ko, ando tondó mbi kaya kɛlɛ kɛlɛ mɛ ta abombi da gba ma. Ni ndo zandó mbi ya, mbi li kwa ti bangɔ ndo kɛlɛ kɛlɛ apɔsɔ yakere na ya nzɛ, wa atãnga apɔsɔ mɛndɛ̃, mbi ndo lindó kwa tɛ wa sungɔ lége kaya bombi mɛndó mbi da. Ethel ná ayangambi tɛ e ndo gwendó ndoni kɔi na mbi na ngoi mɛndó mbi ndo gwe ti bangɔ bombi mɛ so dã na e. Kanda ngoi mɛndó mbi ndo gwe so bangɔ abombi mɛ yɔngɔrɔ bere so lingɔ akota bombi ti kɛlɛ kɛlɛ ko, mbi ndo gwendó mbi kɔi.
Na ngoi mɛndó mbi wa bangɔ ndo kɛlɛ kɛlɛ ko, mbi ndo lindó voyagɛ gba na ngɔ so bangɔ abombi
Ti nɛngɔ ya, mbi li kwa tɛ mbi na ndenge ti nzɔ̃ni nvɛ̃ni ko, ayɔndó ya, mbi ndo lɛkɛ akpale tɛ mbi na seni. Mbi ndo lindó kpengbani ya, apɔsɔ zu e ndo li bombi ti ndasewa. Na ngoi mɛndó mbi ndo gwe so bangɔ abombi mɛ kaya kɔdɔrɔ mɛ ka gbɛ ndo ko, Ethel ndo tambwisandó bombi ti ndasewa. Ngoi mɛndó e ndo lua lége, e ndo lindó ni e zu ndoni kɔi. E ndo le ngandó wele ndoni kɔi na ayati e ngoi gba, e ndo si ngandó fãna ndoni kɔi na ala. Ngoi gba ta mbi ndo landó langɔ iɔ ma ti nɛngɔ ya, mbi lɛkɛ akumba tɛ mbi ti teokrasi. Wa Ethel nga ma wali ti nzɔ̃ni mɛ atɛnɛ Masese 31:15. Lo ndo zingɔndó na ndatu, wa lo ndo lindó zu ti nɛngɔ ya, e di tɛnɛ ti ya Ngbangɔ ti bi kɔi kɔi ndoni kɔi, wa e tɛ nga nyi ye na ndapelele uzu ti ayangambi gwengɔ kalasi. Mbi na dengɔ bɛ gba na ndenge mɛndó mbi lua wali ti ngaso mɛ ndo li aye na lo ti nzɔ̃ kpale tɛ azi mɛndɛ̃, wa lo ndo za mbi ngoi zu ya, mbi li kwa tɛ mbi na seni!
tɛnɛ tɛ lo kayaNa lo mɛ ya, e dundó awa dũngɔ ayangambi ko, e lindó kpengbani ti zangɔ ayati e ya, ala ye Yehova ná kwa ti fangɔ tɛnɛ. Gwɛ̃́ tɛ e dundó ya, ala pɔna lingɔ kwa ti ngoi zu na ya dungɔ lɛ ngɛ̃́ tɛ la, ta bo na lo ti hɛ̃ngɔ e dengɔ bɛ ma, kanda na lo mɛ ya, ala nvɛ̃ni la aye lingɔ ni. E ndo pandó hɛ̃ la ngoi zu dengɔ bɛ mɛ ndo lo na ndo lingɔ kwa ti ngoi zu. E ndo pa ngandó hɛ̃ la akpengba kpale mɛ e ndo tengbi na ni, kanda e ndo pandó hɛ̃ la ngoi gba se mɛ Yehova sulu na ndasewa tɛ e. E ndo li ngandó kpengbani ya, ala du na akwa mɛ ndo kpã Yehova na ndo ti uzu na ya dungɔ lɛ ngɛ̃́ tɛ la.
Yehova ndo hɛ̃ndó e ngoi zu aye mɛndó e na gwɛ̃ ni. Ti pangɔ bɛta tɛnɛ ko, mbi ndo lindó zu mɛ mbi lengbi ti lingɔ ti nɛngɔ ya, mbi za ndasewa tɛ mbi. Na ngoi mɛndó mbi dɛ wa sungɔ lége ti kotani ko, mbi mandandó salelangɔ falanga ná aye mɛndɛ̃ na seni. Kanda, abɛse e zu ka ndasewa e ndo lindó kpengbani na ya kpale ti ngaso ko, ngoi mɛndɛ̃ e ndo zangandó aye mɛndɛ̃. Na ngoi mɛndó kpale ti ngaso ndo si ko, Yehova ndo zandó e iɔ nvɛ̃ni. Na ndakisa, na nda bulu ti 1980 nga na ebandeli ti bulu ti 1990, to tindó kaya kɔdɔrɔ ti Suriname. Na ya abulu niko ko, adundó pɛnɔ nvɛ̃nɛ luangɔ aye ti zangɔ na tɛrɛ. Abɛse ngaso ko, Yehova ndo hɛ̃ndó e aye mɛndó e na gwɛ̃ ni.—Mat. 6:32.
MBI GBƆ̃ LI MBI NA NDO DUNGƆ LƐ NGƐ̃́ TƐ MBI
Bandangɔ na ndo ga tee ka ndo kɔti: Mbi ná ya mbi Ethel
Nyi e ti kɔzo ni Ethniël ná ya lo Natalie
Nyi e Giovanni ná ya lo Christal
Na ya dungɔ lɛ ngɛ̃́ tɛ e zu, Yehova bata e, lo sulu e, wa ngoi zu lo li ya, e du na dengɔ bɛ na ya dungɔ lɛ ngɛ̃́ tɛ e. Ayati e adu aye ti nzɔ̃ni nvɛ̃ni mɛ alo ka tɛ Yehova, wa adu kota ndima na lo tɛ e, ndenge mɛ e za la zu sɛ ya, ala ti awa kwa tɛ lo. E nga na dengɔ bɛ gba na ndenge mɛndó ala pɔna lingɔ kwa ti ngoi zu na ya dungɔ lɛ ngɛ̃́ tɛ la. Ethniël ná ngambi lo Giovanni amundó diplome ka kalasi ti Lo-lengɔ Gbia, wa ala ndo li kwa ka bethel ti Suriname ndoni kɔi na awoti la.
Ndɛ lo mɛ ko, mbi ná Ethel e ti akangba, kanda e dɛ bo e li kwa hɛ̃ Yehova mabere awa sungɔ lége ti kotani. Tee mɛ, e dɛ bo na kwa gba ti lingɔ wa ta mbi dɛ mbi lua ngoi ti mandangɔ liangɔ tɛ ma! Abɛse ngaso ko, ta mbi na sɔngɔ bɛ kɔi ma! Na ngoi mɛ mbi ndo gbɔ̃ li mbi na ndo dungɔ lɛ ngɛ̃́ tɛ mbi ko, mbi ndo tɛnɛ zangangɔ kakatanangɔ ya, pɔnangɔ lingɔ kwa ti ngoi zu na ya dungɔ lɛ ngɛ̃́ tɛ mbi na ngoi mɛndó mbi dɛ palanga adundó ekateli ti nzɔ̃ni mɛndó mbi mu.
b Mɔ lengbi ti tãngɔ pandɛ ti dungɔ lɛ ngɛ̃́ tɛ Willem van Seijl kaya Lamuka! ti 08/10/1999, mɛ apa ya, “La réalité a dépassé mes attentes.”