1. Ye mɛ ale ta bɛ e li na ni ma nɛ, wa ye mɛ elengbi ti dungɔ na loyengɔ na lo ni nɛ?

 ALE ta bɛ e li na ni ma ya, e na tengbingɔ na botemeli na ngoi mɛ e ndo li kwa tɛ e ti fangɔ tɛnɛ. Ngoi mɛndɛ̃, botemeli ni na tingɔ kpengbani na bi mɛ na gangɔ. (Da. 11:44; 2 Tim. 3:12; Suma 16:21) Kanda, elengbi ti dungɔ na loyengɔ ya, Yehova na zangɔ e. Na lo nɛ? Na lo mɛ ya, Yehova ndo za ava lo ngoi zu ya, ala kokisa kumba tɛ la, abɛse kpengba kpale mɛ ala ndo tengbi na ni adu ngasia. Zia e ba se lɛlo tɛ Ezekiele mɛndó alua kumba ti pangɔ tɛnɛ tɛ Yehova hɛ̃ azi ti Yuda mɛndó ka gbɛ ngba ti Babilɔnɛ.

2. Tɛnɛ mɛndó Yehova tɛnɛ na lo tɛ azi mɛndó ayɔ ya, Ezekiele pa tɛnɛ tɛ lo hɛ̃ la nɛ, wa aye mɛ ndɛ e na mandangɔ nɛ? (Ezekiele 2:3-6)

² Azi ti ngasia ndó la, ayɔ ya, Ezekiele pa tɛnɛ tɛ Yehova hɛ̃ la nɛ? Yehova pandó ya, ala du azi ti “gwalo,” mɛ “bɛ la kpengbani,” nga “awa kpengba li.” Ala dundó siɔni nga ma tɛ kpu ti ki mɛ nga ma kpéngba nga na kpakete (escorpion), na lo mɛ ya, ala ndo lindó azi mɛ so gunda la siɔni. Na lo ni la, Yehova tɛnɛndó hɛ̃ Ezekiele fãni gba ya: “Ta mɔ du na mbɛtɔ na lo tɛ la ma”! (Di Ezekiele 2:3-6.) Aye mɛndó aza Ezekiele ti nɛngɔ ya, lo li kwa tɛ lo tee ka ndani adu aye mɛ taa, ti (1) Yehova ndó la to lo na kwa, ti (2) Nyingɔ vurú tɛ Yehova ndo zandó lo, wa ti (3) Tɛnɛ tɛ Nzapa lindó ya, loyengɔ tɛ lo ti kpengbani. Ngasia la aye niko azandó Ezekiele nɛ? Wa ngasia la ni lengbi ti zangɔ e ndɛ nɛ?

3. Ngoi mɛndɛ̃, tɛnɛ mɛndó asa ngunu bɛ Ezekiele nɛ, wa ngasia la Yehova lindó ya, lo hĩnga ya, ni na dungɔ ndoni kɔi na lo nɛ?

³ Yehova pandó hɛ̃ Ezekiele ya: ‘Mbi la mbi to mɔ.’ (Ezk. 2:3, 4)  Tɛnɛ niko sandó ngunu bɛ Ezekiele. Na lo nɛ? Na lo mɛ ya, ngoi mɛndɛ̃ Ezekiele ka dandó bɛ lo na se mɛndó Yehova tɛnɛ nga tɛnɛ ti ngaso hɛ̃ Moizɛ ná Yisaya na ngoi mɛndó lo hɛ̃ ala kwa mabere aprɔfeta tɛ lo. (Kob. 3:10; Yis. 6:8) Ezekiele hĩnga ngandó se mɛndó Yehova za na aprɔfeta niko sɛ ya, ala nwɔ akpengba kpale tɛ ala. Na lo ni la, ngoi mɛndó Yehova tɛnɛ hɛ̃ Ezekiele fãni sɛ ya: ‘Mbi la mbi to mɔ’ ko, Ezekiele ndó na aye gba mɛ alengbi ti tongɔ lo ya, lo kpã bɛ lo ya, Yehova na zangɔ lo. Se e ba na seni nvɛ̃ni buku ti Ezekiele ko, e na hũngɔ ya, lo sundó tɛnɛ mɛ fãni gba: “Yehova pandó hɛ̃ mbi ya,” nga na tɛnɛ mɛ “Yehova di pa hɛ̃ mbi fãni mɛndɛ̃ ya.” (Ezk. 3:16; 6:1) Biani Ezekiele yendó na bɛ lo kɔi ya, Yehova ndó la to lo na kwa. Na lo mɛ ya, to Ezekiele dundó nganga nzapa ko, ngoi mɛndɛ̃ lo ka kambisandó hɛ̃ nyi lo ya, Yehova ndo pa ngoi zu hɛ̃ azi mɛ awa kwa tɛ lo ya, ni na dungɔ ndoni kɔi na ala. Na ndakisa, Yehova pandó hɛ̃ Isaka, Yakobo nga na Yirimia ya: “Mbi na dungɔ ndoni kɔi na ĩ.”​—Eb. 26:24; 28:15; Yir. 1:8.

4. Atɛnɛ ti nzɔ̃ni mɛndó asa ngunu bɛ Ezekiele nɛ?

⁴ Ye mɛ aya Izraɛlɛ gba na lingɔ na ngoi mɛ ala na mangɔ tɛnɛ tɛ Ezekiele nɛ? Yehova pandó hɛ̃ lo ya: “Azi ti Izraɛlɛ na kɛ̃ngɔ mangɔ mɔ, na lo mɛ ya, ta ala ye mangɔ mbi ma.” (Ezk. 3:7) Na kɛ̃ngɔ mangɔ Ezekiele ko, azi ti Izraɛlɛ akɛ̃ndó mangɔ Yehova. Tɛnɛ niko zandó Ezekiele ya, lo hĩnga ya, se azi akɛ̃ mangɔ lo ko, ta afa ya, lo li kwa tɛ lo ti prɔfeta na ndenge ti siɔni ma. Yehova pa ngandó hɛ̃ lo ya, ngoi mɛ gbanda tɛnɛ mɛ lo ndo pa hɛ̃ la ati na seni ko, “Ala na hĩngangɔ biani ya, prɔfeta kɔindó la na popo tɛ la.” (Ezk. 2:5; 33:33) Zangangɔ kitɛ, tɛnɛ ti wambangɔ bɛ niko ahɛ̃ndó Ezekiele ngunu ti nɛngɔ ya, lo li kwa tɛ lo ti fangɔ tɛnɛ nzɔ̃ni.

5. Na bangɔ Yisaya 44:8, ye mɛ ndo hɛ̃ e ngunu nɛ?

⁵ Nga ma Ezekiele, e ndo lua ngunu na hĩngangɔ ya, Yehova la hɛ̃ e kumba ti fangɔ tɛnɛ. Lo hɛ̃ e ndima na ndenge mɛ lo ndo ili e ya, Atɛmwɛ tɛ lo. (Yis. 43:10) Wa adu kota ndima nvɛ̃ni na lo tɛ e! Nga ma se kondó Yehova pa hɛ̃ Ezekiele ya: “Ta mɔ du na mbɛtɔ na lo tɛ la ma” ko, Yehova ndo pa nga hɛ̃ e ya: “Ta ĩ du na mbɛtɔ ti kpengbani ma.” Nda mɛ ta elengbi ti kpɛngɔ azi mɛ ndo hɛ̃ e pɛnɔ ma nɛ? Na lo mɛ ya, nga ma Ezekiele, Yehova la hɛ̃ e kumba wa lo nga na dungɔ ndoni kɔi na e so batangɔ e.​—Di Yisaya 44:8.

6. (a) Ngasia la Yehova li ya, e hĩnga ya, lo na zangɔ e nɛ? (b) Ye mɛ ndo wamba bɛ e, wa ando hɛ̃ nga e ngunu nɛ?

⁶ Yehova pa ya ni na zangɔ e. Na ndakisa, uzu ti lo pangɔ ya: “Ĩ du Atɛmwɛ tɛ mbi” ko, lo pa ya: “Na ngoi mɛ mɔ na fangɔ tɛ ko, mbi na dungɔ ndoni kɔi na mɔ, ta tɛ na mungɔ mɔ ma. Se mɔ nɔ nɔ na ndo lɛ wá ko, ta mɔ na gbingɔ ma, ta mɛnga wá na pɔtɔngɔ mɔ ma.” (Yis. 43:2) Na ngoi mɛ e ndo li kwa tɛ e ti fangɔ tɛnɛ ko, elengbi ti tengbingɔ na atara mɛ mabere tɛ, nga na akpengba kpale mɛ nga ma wá. Abɛse ngaso ko, Yehova na zangɔ e ya, e ngbã lá kwɛ lingɔ kwa tɛ e. (Yis. 41:13) Nga ma se mɛndó na ngoi tɛ Ezekiele, azi gba ndo kɛ̃ tɛnɛ mɛ e ndo pa hɛ̃ la. Ale ta bɛ e li na ni ma ya, se azi kɛ̃ nzɔ̃ pa mɛ e ndo pa ko, ta afa ya, e li kwa tɛ e na ndenge ti siɔni ma. Hĩngangɔ ya, bɛ Yehova ndo de na ngoi mɛ e ndo ngbã lá kwɛ pangɔ tɛnɛ tɛ lo ko, ando wamba bɛ e, wa ni ndo hɛ̃ nga e ngunu. Toma Polo sundó ya: “Nzapa ahɛ̃ gbanda zo kɔi kɔi mbana gɛrɛ [na bangɔ] kwa mɛ lo li.” (1 Kɔr. 3:8; 4:1, 2) Nyita wali kɔi mɛndó ali kwa tɛ wa sungɔ lége abulu gba atɛnɛ ya: “Hĩngangɔ ya, Yehova na hɛ̃ngɔ e mbana gɛrɛ na bangɔ ge ge ge tɛ e ko, ando hɛ̃ mbi dengɔ mawoma.”

7. Ezekiele mandó tɛrɛ lo ngasia na ngoi mɛndó lo gbɔ̃ li lo na ndo suma mɛndó lo hũ nɛ? (Ba limɔ ti koko mbeti.)

⁷ Na lége ti suma, Ezekiele hũndó ngunu mɛ Nyingɔ vurú tɛ Nzapa na ni. Lo hũndó se mɛ nyingɔ vurú tɛ Nzapa ndo za aangelo mɛ na ngunu gba ya, ala ndo tambwisa pusu pusu tɛ Yehova ti kpɛ̃nɛ nvɛ̃ni. (Ezk. 1:20, 21) Ye mɛndó Ezekiele li na ngoi mɛndó lo hũ ni nɛ? Lo su ya. “Na ngoi mɛndó mbi hũ ni ko, mbi kukundó na nyɔ kuni mbi, wa mbi zundó na li mbi tise.” Na lo mɛ ya, Ezekiele kamwandó kpengbani ko, lo tindó ka sese. (Ezk. 1:28) Na gesi, ngoi mɛndó Ezekiele gbɔ̃ li lo na ndo suma niko ko, ni zandó lo ya, lo ye na bɛ lo kɔi ya, na lége ti lisalisi tɛ Yehova, lo na lingɔ kumba tɛ lo na seni.

8-9. (a) Ye mɛndó Yehova hɛ̃ Ezekiele nyɔ ya, lo li nɛ? (b) Ngasia la Yehova sandó ngunu bɛ Ezekiele na lo tɛ azi ti kpengba li mɛndó lo na pangɔ tɛnɛ hɛ̃ la nɛ?

⁸ Yehova hɛ̃ndó nyɔ hɛ̃ Ezekiele ya: “Nyi zo, lo ndozu, mbi ye tɛnɛngɔ tɛnɛ hɛ̃ mɔ.” Tɛnɛ niko hɛ̃ndó Ezekiele ngunu ti nɛngɔ ya, lo lo ndozu. Ezekiele sundó ya: “Nyingɔ alindó na ya tɛrɛ mbi, wa ali ya mbi lo ndozu na gɛrɛ mbi.” (Ezk. 2:1, 2) Na gesi, “ti” Nzapa mɛ afa Nyingɔ vurú tɛ lo atambwisandó Ezekiele na ya kwa tɛ lo ti pangɔ tɛnɛ. (Ezk. 3:22; 8:1; 33:22; 37:1; 40:1) Nyingɔ vurú tɛ Nzapa zandó Ezekiele na ya kumba mɛndó lo lua, kumba ti pangɔ tɛnɛ hɛ̃ azi mɛ “bɛ la kpengbani nga awa kpengba li.” (Ezk. 3:7) Yehova pandó hɛ̃ Ezekiele ya: “Ba! mbi li ya, yangba lɛ mɔ ati kpengbani nga ma yangba lɛ la, wa ndo lɛ mɔ nga kpengbani nga ma ndo lɛ la. Mbi li ya, ndo lɛ mɔ ati ga ma diama, ati kpengbani aɔ tɛ̃nɛ ti silex. Ta mɔ du na mbɛtɔ na lo tɛ la ma, ta mɔ kpɛ nga yangba lɛ la ma.” (Ezk. 3:8, 9) Alindó mabere Yehova ndo tɛnɛ hɛ̃ Ezekiele ya: ‘Ta mɔ zia ya, kpengba li tɛ azi niko ahɛ̃ mɔ nzɛ̃ngɔ ma. Mbi na hɛ̃ngɔ mɔ ngunu.’

 ⁹ Na gesi Nyingɔ vurú gwendó na Ezekiele kaya ndo mɛ lo na pangɔ tɛnɛ tɛ Yehova. Ezekiele sundó ya: “Ti Yehova ndo lindó kwa kpengbani na ndo mbi.” Ayɔndó ya, Ezekiele li pɔsɔ kɔi mobimba ti nɛngɔ ya, lo gbɔ̃ tɛnɛ mɛ lo na hangɔ, wa lo tɛnɛ ni na ge ge ge zu. (Ezk. 3:14, 15) Na gesi Yehova pandó hɛ̃ lo ya, lo gwe ka bɛ nyama, kai “nyingɔ vuru alindó ya tɛrɛ [lo].” (Ezk. 3:23, 24) Ezekiele tindó na makoki ti lingɔ kwa tɛ lo.

10. Ti nɛngɔ ya, e li kwa tɛ e ti fangɔ tɛnɛ na ndenge ti nzɔ̃ni, e na gwɛ̃ ti nɛ, wa na lo nɛ?

¹⁰ Ti nɛngɔ ya, e li kwa tɛ e ti fangɔ tɛnɛ na ndenge ti nzɔ̃ni ko, e na gwɛ̃ ti nɛ? Ti nɛngɔ ya, e hɛ̃ gbinya ti hũnda ni ko, zia e ba kpale mɛndó asi na Ezekiele. Uzu ti lo bandangɔ fangɔ tɛnɛ, Nyingɔ vurú tɛ Nzapa hɛ̃ndó lo ngunu. Kwɛ kɔi na Ezekiele, ndɛ na ngoi tɛ e, e na lingɔ kwa tɛ e ti fangɔ tɛnɛ nzɔ̃ni bo se du ya, Nyingɔ vurú tɛ Nzapa aza e. Na lo nɛ? Na lo mɛ ya, Satana ndo tiri e na to ti nɛngɔ ya, e zia kwa ti fangɔ tɛnɛ. (Suma 12:17) Azi gba ndo da bɛ la ya, Satana na ngunu gba, wa ta elengbi ti nwɔngɔ lo ma. Kanda na lége ti kwa ti fangɔ tɛnɛ ko, e ndo nwɔ Satana! (Suma 12:9-11) Ngasia? Na ngoi mɛ e ndo li kwa ti fangɔ tɛnɛ ko, e ndo fa ya, ta e ndo kpɛ mbɛtɔ ti gingɔ lo tɛ Satana ma. Ngoi zu ko la e ndo fa tɛnɛ ko, e ndo nwɔ lo. Tɛnɛ mɛ elengbi ti tɛnɛngɔ na ngoi mɛ e ndo ngbã lá kwɛ fangɔ tɛnɛ abɛse na ngoi mɛ e ndo tengbi na botemeli nɛ? Elengbi ti tɛnɛngɔ yangondo ya, Nyingɔ vurú tɛ Yehova ndo hɛ̃ e ngunu, ando fa nga ya, Yehova ye e.​—Mat. 5:10-12; 1 Pet. 4:14.

11. Ye mɛ Nyingɔ vurú tɛ Nzapa lengbi zangɔ e ya e li nɛ, wa ye mɛ elengbi ti lingɔ ti nɛngɔ ya, e lua ni nɛ?

¹¹ Bingangɔ li e na ndo se mɛndó Yehova hɛ̃ Ezekiele ngunu ya, lo li na kwa tɛ lo ko, ando hɛ̃ e ngunu? Nyingɔ vurú tɛ Nzapa lengbi ti hɛ̃ngɔ e ngunu mɛ na zangɔ e ya, e nwɔ atara zu mɛ e na tengbingɔ na ni na ya kwa ti fangɔ tɛnɛ, abɛse tara ni adu kpengbani ngasia. (2 Kɔr. 4:7-9) Ye mɛndɛ̃ mɛ elengbi ti lingɔ ti  nɛngɔ ya, Nyingɔ vurú tɛ Nzapa angbã lá kwɛ zangɔ e nɛ? Ayɔ ya, e ndo li sambela hɛ̃ Yehova ngoi zu na lo ni, wa e kpã bɛ e ya, lo na mangɔ sambela tɛ e. Yezo pandó hɛ̃ ava lo ya: ‘Ĩ ngbã lá kwɛ yɔngɔ ye, . . . gingɔ ye, . . . nga na gɔngɔngɔ nyɔ ngise.’ E du na loyengɔ ya, Yehova na “hɛ̃ngɔ [Nyingɔ vurú tɛ lo hɛ̃ azi mɛ ndo hũnda lo].”​—Luka 11:9, 13; Aw. 1:14; 2:4.

12. Na bangɔ Ezekiele 2:9–3:3, rulo mɛndó Ezekiele hũ alo ka tɛ na, wa aye mɛndó kaya ni nɛ?

¹² Ta Ezekiele ngbã bondó na luangɔ ngunu na lége ti Nyingɔ vurú ma, kanda Tɛnɛ tɛ Nzapa li ngandó ya, loyengɔ tɛ lo ti kpengbani. Na lége ti suma, Ezekiele hũndó ti zo kɔi agbɔ̃ rulo. (Di Ezekiele 2:9–3:3.) Rulo niko alondó ka wa? Aye mɛndó kaya rulo ni nɛ? Ngasia la ni zandó Ezekiele nɛ? Zia e ba gbinya ti ahũnda ni. Rulo niko alondó ka tɛ Yehova. Alengbi ti dungɔ ya, Yehova salelandó angelo kɔi ka popo tɛ aangelo mɛndó Ezekiele hũ ti nɛngɔ ya, lo hɛ̃ Ezekiele rulo niko. (Ezk. 1:8; 10:7, 20) Rulo nikondó na tɛnɛ tɛ Nzapa kaya ni, adundó tɛnɛ ti fangɔ ngbanga tɛ Yehova mɛ Ezekiele na pangɔ ni hɛ̃ azi ti kpengba li mɛ ka gbɛ ngba ti Babilɔnɛ. (Ezk. 2:7) Asundó tɛnɛ ni ka lɛ rulo mbage na mbage.

13. Ye mɛndó Yehova pa hɛ̃ Ezekiele ya lo li na rulo nɛ, wa na ngasia la nindó mabere kpɔ̃ lavu nɛ?

¹³ Yehova pandó hɛ̃ prɔfeta tɛ lo ya, “lo tɛ rulo ni, wa asĩ ya lo.” Ezekiele tɔndɔndó tɛnɛ niko, wa lo tɛndó rulo niko zu. Suma niko alengbi na nɛ? Ayɔndó ya, Ezekiele gbɔ̃ nda tɛnɛ zu mɛndó ahɛ̃ lo na seni ti nɛngɔ ya, lo kambisa ni nzɔ̃ni. Ayɔndó ya lo ye tɛnɛ ni, wa lo kpã nga bɛ lo na ndo ni ti nɛngɔ ya, lo pa ni na ge ge ge. Kanda kpale kɔi ti kamwangɔ alindó tɛrɛ lo na gesi. Na ngoi mɛndó lo tɛ ni ko, Ezekiele hũndó ya, rulo ni ndo “lɔgɔ nga ma kpɔ̃ lavu.” (Ezk. 3:3) Na lo nɛ? Ka tɛ Ezekiele nzɔ̃ tangɔ ligɛrɛ ti pangɔ tɛnɛ tɛ Yehova adundó mabere kpɔ̃ lavu, bere ye mɛ ndo hɛ̃ dengɔ bɛ. (Nz. 19:8-11) Lo ndó na dengɔ bɛ gba na ndenge mɛndó Yehova ye ya, lo du prɔfeta tɛ ni.

14. Ye mɛndó za Ezekiele na ya kumba tɛ lo nɛ?

¹⁴ Na gesi Yehova pandó hɛ̃ Ezekiele ya: “Zi ma mɔ, wa ma tɛnɛ mɛ mbi ye tɛnɛngɔ hɛ̃ mɔ ti nɛngɔ ya, mɔ bata ni kaya bɛ mɔ.” (Ezk. 3:10) Na bangɔ tɛnɛ niko ko, Yehova yendó pangɔ hɛ̃ Ezekiele ya, lo li kpengbani ti gbɔ̃ngɔ atɛnɛ mɛ asu kaya rulo ni wa, lo gbɔ̃ nga li lo na ndo ni. Na lingɔ ngaso loyengɔ tɛ Ezekiele na tingɔ kpengbani. Hãngɔ ni zingɔ, ni na lingɔ ya, Ezekiele hĩnga nzɔ̃ni tɛnɛ mɛ lo na pangɔ ni hɛ̃ azi. (Ezk. 3:11) Na ngoi mɛndó lo gbɔ̃ nda tɛnɛ tɛ Yehova nzɔ̃ni wa, lo kpã ngandó bɛ lo na ndo ni ko, Ezekiele lengbindó ti bandangɔ fangɔ tɛnɛ, wa lo lengbi ngandó ti lingɔ ni tee ka ndani.​—Ba Nzembo 19:14.

15. Ti nɛngɔ ya, e gbe bɛ e na ya kwa tɛ e ti fangɔ tɛnɛ, ye mɛ ayɔ ya, e bata ni ka bɛ e nɛ”?

¹⁵ Ti nɛngɔ ya, e gbe bɛ e na ya kwa mɛ e ndo li ko, ayɔ ya, e zia tɛnɛ tɛ Nzapa ali ya, loyengɔ tɛ e ati kpengbani. Nga ma Ezekiele, ayɔ ya, e “bata ka bɛ e” aye zu mɛ Yehova pa hɛ̃ e. Ndɛ lo mɛ ko, Yehova ndo tɛnɛ tɛnɛ hɛ̃ e na lége ti Ngbangɔ tɛnɛ tɛ lo. Ngasia la elengbi ti lingɔ ya, tɛnɛ tɛ Nzapa angbã lá kwɛ tambwisangɔ bingangɔ li tɛ e nga na dangɔ bɛ tɛ e nɛ?

16. Ye mɛ ayɔ ya, e li na tɛnɛ tɛ Nzapa nɛ, wa ngasia la elengbi ti tɛngɔ ni nɛ?

¹⁶ Nga ma se ko la e ndo tɛ aye ti nɛngɔ ya, e kã na tɛrɛ e ko, e ndo e kã nga tɛrɛ e ti nyingɔ na ngoi mɛ e ndo manda Tɛnɛ tɛ Nzapa, wa e ndo gbɔ̃ nga li e na ndo ni. Ni la adu wangɔ mɛ Yehova ye ya, e lua na ndo tɛnɛ mɛ aba rulo mɛndó Ezekiele tɛ. Yehova ye ya, Tɛnɛ tɛ lo asĩ  ya e, afa ya, e gbɔ̃ ndani nzɔ̃ni nvɛ̃ni. Elengbi ti lingɔ ngaso na lége ti lingɔ sambela, dingɔ Ngbangɔ, nga na gbɔ̃ngɔ li e na ndo ni. Ti uzu, e ndo li sambela ti nɛngɔ ya, e lɛkɛ bɛ e, wa Yehova ha e na lo. Na gesi e ndo di Ngbangɔ. Na ndani e ndo e dɔ e lo so gbɔ̃ngɔ e li na ndo aye mɛ e di. Anzɔ̃ kpale mɛ e na luangɔ se e li ngaso nɛ? Se e ndo gbɔ̃ li e gba na ndo aye mɛ e ndo di ko, ni na lingɔ ya, loyengɔ tɛ e ti kpengbani.

17. Nda mɛ adu ngbondoni ya, e ndo gbɔ̃ li e na ndo aye mɛ e ndo di nɛ?

¹⁷ Nda mɛ adu ngbondoni ya, e ndo di Ngbangɔ wa e ndo gbɔ̃ nga li e na ndo ni nɛ? Lingɔ ngaso ndo hɛ̃ e ngunu ti pangɔ nzɔ̃ pa ti Lo-lengɔ Gbia ndɛ, wa ni na hɛ̃ngɔ nga e ngunu ti pangɔ pa ti tumbu mɛ angbã yakere e banda lingɔ ni. Hãngɔ ni zingɔ, na ngoi mɛ e ndo gbɔ̃ li e na ndo aseliye tɛ Yehova ti nzɔ̃ni ko, mangbi tɛ e ná lo, ando ti fãni mɛndɛ̃ kpengbani nvɛ̃ni. Ni ndo li ya, e lua ye mɛ ndo lɔgɔ bere ando hɛ̃ dengɔ bɛ gba, siriri ti bɛ nga na sepalangɔ na aye mɛ e na ni.​—Nz. 119:103.

18. Ye mɛ gbanda azi ti ya kɔdɔrɔ tɛ e na yengɔ lo ni nɛ, wa na lo nɛ?

¹⁸ Ɔngbingɔ na Ezekiele, ta e du aprɔfeta ma. Abɛse ngaso ko, e zu e na ekateli ti ngbãngɔ lá kwɛ pangɔ tɛnɛ tɛ Yehova mɛ kaya Ngbangɔ tee ka ngoi mɛ gbanda lo nvɛ̃ni lo hũ ya, kwa ti fangɔ tɛnɛ awɛ. Na ngoi mɛ gbanda ngoi ti fangɔ ngbanga alengbi ko, ta azi ti ya kɔdɔrɔ tɛ e na dungɔ na tɛnɛ ti tɛnɛngɔ ma, na lo mɛ ya, ala zu amandó likebisi tɛ Yehova, wa ta ala yendó kpãngɔ lɛ la na ndo ni ma. (Ezk. 3:19; 18:23) Ala na yengɔ gbanda ya, tɛnɛ mɛ e ndo pa alo ka tɛ Yehova.

19. Aye mɛ na hɛ̃ngɔ e ngunu ti lingɔ kwa tɛ e tee ka ndani nɛ?

¹⁹ Ye mɛ ndo hɛ̃ e ngunu ti lingɔ kwa tɛ e nɛ? Aye taa mɛndó ahɛ̃ Ezekiele ngunu. E ndo ngbã lá kwɛ fangɔ tɛnɛ na lo mɛ ya, e hĩnga ya, Yehova la hɛ̃ e kumba, Nyingɔ vurú tɛ lo ndo hɛ̃ e ngunu, wa Tɛnɛ tɛ lo ndo li ya, loyengɔ tɛ e ati kpengbani. Na lége ti lisalisi tɛ Yehova, e na ekateli ti ngbãngɔ lá kwɛ lingɔ kwa mɛ Yehova hɛ̃ e tee ka ‘nda ni.’​—Mat. 24:13.