1. Ye mɛ ayata gba so popo tɛrɛ e atengbi na ni nɛ?

 MƆ KA mɔ kpãndó mokanɔ kɔi ti nyingɔ, kanda ta mɔ kokisa ni ma? b Se du ngaso ko, ta mɔ kɔi ma. Philip ndó na gwɛ̃ ti lingɔ sambela ngoi zu nga na lɛkɛngɔ se tɛ lo ti lingɔ sambela, kanda ta lo ndo luandó ngoi ti lingɔ sambela ma. Erika kpãndó mokanɔ ti singɔ ka ndo ti bombi ti fangɔ tɛnɛ na ngoi, kanda ngoi zu lo ndo tindó ndani. Tomáš mɛndó atara dingɔ Ngbangɔ na mobimba ni fãni gba atɛnɛ ya: “Ta mbi ndo luandó dengɔ bɛ na ya dingɔ Ngbangɔ ma. Mbi ndiri ndondani fãni taa, ngoi zu mɛndó mbi ndo si ka ndo mbeti ti Balevi ko, mbi ndo ziandó dingɔ Ngbangɔ.”

2. Se du ya, ta e kokisa mokanɔ ti nyingɔ mɛ e kpã ma, nda mɛ ta elengbi ti nzɛ̃ngɔ ma nɛ?

² Se ta mɔ ndo kokisa mokanɔ tɛ mɔ ti nyingɔ ma ko, mɔ lengbi ti tingɔ na nzɛ̃nngɔ. Kanda ale ta mɔ nzɛ̃ ma na lo mɛ ya, abɛse adu mokanɔ ti yakere ko, ando yɔ ngoi ná ge ge ge. Se mɛ mɔ ndo li zu ti kokisangɔ mokanɔ tɛ mɔ ti nyingɔ ando fa ya, mɔ ndo mu mangbi tɛ mɔ ná Yehova ya, adu ngbondoni, mɔ ye nga hɛ̃ngɔ lo aye ti ngbondoni ti ya dungɔ lɛ ngɛ̃́ tɛ mɔ. Wa Yehova ndo hũ ge ge ge mɛ mɔ ndo li ya, adu ngbondoni. Ti biani ko, ta lo ndo gi ya, mɔ li aye mɛ aɔ ngunu tɛ mɔ ma. (Nz. 103:14; Mik. 6:8) Na lo ni la, kpã mokanɔ mɛ alengbi na ngunu tɛ mɔ na bangɔ makoki mɛ mɔ na ni. Ye mɛ mɔ lengbi ti lingɔ ti nɛngɔ ya, mɔ kokisa ni nɛ? Ba ambanga akpale mɛ mɔ lengbi ti lingɔ.

3. Nda mɛ adu ngbondoni ya, e du na ge ge ge nɛ?

³ Se e ye kokisangɔ mokanɔ tɛ e ti nyingɔ ko, ayɔ ya e du na ge ge ge. Se e du na gwɛ̃ kpengbani ti kokisangɔ mokano tɛ e ti nyingɔ ko, e na lingɔ kwa kpengbani ti nɛngɔ ya, e kokisa ni. Elengbi ti hakangɔ gwɛ̃ ti kpengbani mɛ mɔ na ni nga na ge ge ge tɛ mɔ na yá mɛ ndo pusa masuwa ti nɛngɔ ya, ni si ka ndo mɛ lo ga gwe da. Se yá ando yá kpengbani ko, ni lengbi ti singɔ ka ndo mɛ lo ye gwengɔ da iɔ. Kwɛ kɔi, se e du na ge ge ge ko, na dungɔ woni ya, e kokisa mokanɔ tɛ e. Nyita David mɛ ndo du ka Salvador atɛnɛ ya, “Se e du na ge ge ge ko, e nga na lingɔ kpengbani”. E nga na dungɔ na kpengba lɛ ya, “ta ye kɔi agbanzi e na kokisangɔ mokanɔ tɛ e ma.” Ye mɛ mɔ lengbi ti lingɔ ti nɛngɔ ya, mɔ du na ge ge ge nɛ?

4. Ye mɛ elengbi ti yɔngɔ ka ti Yehova na ya sambela nɛ? (Filipɛ 2:13) (Ba nga limɔ.)

⁴ Yɔ ka ti Yehova ya, lo za mɔ, mɔ ti na gwɛ̃ kpengbani ti lingɔ kwa. Na lége ti Nyingɔ vurú tɛ lo ko, Yehova lengbi ti hɛ̃ngɔ e ngunu ya, e kokisa mokanɔ tɛ lo. (Di Filipɛ 2:13.) Ngoi mɛndɛ̃ e ndo kpã mokanɔ mɛ e hĩnga ya, e na kokisangɔ ni, wa ni du ye ti nzɔ̃ni. Kanda ngoi mɛndɛ̃ ta e ndo du na gwɛ̃ kpengbani ti kokisangɔ ni ma. Ni du ye mɛndó asi na nyita wali Norina mɛ ndo du ka Ounganda. Lo kpãndó mokanɔ ti mandangɔ na azi Ngbangɔ, kanda ta lo ndó na gwɛ̃ kpengbani ti lingɔ ni ma, na lo mɛ ya, lo ndo hũndó ya, ta lo hĩnga hangɔ tɛnɛ nzɔ̃ni ma. Ye mɛ za lo nɛ? Lo tɛnɛ ya: “Mbi bandandó hũndangɔ Yehova ngoi zu ya, lo hɛ̃ mbi gwɛ̃ ti kpengbani ti bandangɔ mandangɔ na azi Ngbangɔ. Wa ti nɛngɔ ya, mbi li aye na mangbi na sambela tɛ mbi ko, mbi bandanndó lɛkɛngɔ se tɛ mbi ti hangɔ tɛnɛ ti nɛngɔ ya, mbi ti nzɔ̃ wa hangɔ tɛnɛ. Yɛkɛ yɛkɛ mbi tindó na gwɛ̃ ti bandangɔ mandangɔ na azi Ngbangɔ, na ya bulu niko ko, mbi bandandó mandangɔ Ngbangɔ na azi sɛ.”

5. Ti nɛngɔ ya, e du na ge ge ge ye mɛ ayɔ ya, e gbɔ̃ li e na ndo ni nɛ?

⁵ Gbɔ̃ li mɔ na ndo aye mɛ Yehova li na lo tɛ mɔ. (Nz. 143:5) Toma Polo ndo gbɔ̃ndó li lo na ndo aye mɛndó Yehova li na lo tɛ lo, wa ni ndo tondó lo ya, lo li kwã na ngunu zu. (1 Kɔr. 15:9, 10; 1 Tim. 1:12-14) Kwɛ kɔi, se mɔ ndo gbɔ̃ li mɔ na ndo aye mɛ Yehova ndo li tɛrɛ mɔ ko, mɔ na tingɔ na gwɛ̃ kpengbani ti kokisangɔ mokanɔ tɛ mɔ. (Nz. 116:12) Nyita wali kɔi mɛ ndo du ka Honduras ndó na gwɛ̃ ti tingɔ wa sungɔ lége ti ngoi zu. Lo kambisa ye mɛ aza lo ya, lo kokisa mokanɔ tɛ lo. Lo tɛnɛ ya, “Mbi gbɔ̃ndó li mbi na ndo songo mɛ Yehova na ni na lo tɛ mbi. Lo zandó mbi ya, mbi li kaya ndasewa tɛ lo, lo ndo kokisa gwɛ̃ tɛ mbi, wa lo ndo bata nga mbi. Gbɔ̃ngɔ li mbi na ndo aye niko zu ali ya, mbi ye lo gba wa mbi ti nga na gwɛ̃ ti kpengbani ti lingɔ kwa hɛ̃ lo.”

6. Ye mɛndɛ̃ mɛ elengbi ti lingɔ ya, e du na ge ge ge nɛ?

⁶ Gbɔ̃ li mɔ na ndo anzɔ̃ kpale mɛ mɔ na luangɔ se mɔ kokisa mɔkanɔ tɛ mɔ. Erika mɛ fale e tɛnɛ tɛnɛ tɛ lo uzu, akokisandó mokanɔ tɛ lo na omɛ  aba tɔndɔngɔ ngoi. Ngasia? Lo tɛnɛ ya: “Mbi hũndó ya, na ngoi mɛ mbi ndo si ka ndo ti mbombi ti fangɔ tɛnɛ na ndani ko, aye gba ndo ɔ mbi. Se mbi si ka ndo ti bombi ti fangɔ tɛnɛ na ngoi ko, mbi lengbi ti balangɔ ayata nga na tɛnɛngɔ tɛnɛ na ala. Mbi nga na mangɔ awangɔ na omɛ aba kwa ti fangɔ tɛnɛ mɛ na zangɔ mbi ya, mbi du na dengɔ bɛ wa mbi li nga kwa tɛ mbi na seni.” Erika gbɔ̃ndó li lo na ndo anzɔ̃ kpale mɛ lo na luangɔ se lo du zo mɛ ndo tɔndɔ ngoi, wa ni lindó ya, lo kokisa mokano tɛ lo. Wa mɔ mɛ, anzɔ̃ kpale mɛ mɔ na luangɔ se du ya, mɔ kokisa mokano tɛ mɔ nɛ? Se mɔ ye lɛkɛngɔ se tɛ mɔ ti mandangɔ Ngbangɔ nga na lingɔ sambela ko, da bɛ mɔ na se mɛ ni na lingɔ ya, mangbi tɛ mɔ na Yehova ati kpengbani. (Nz. 145:18, 19) Se mɔ ye tingɔ na seliye ti nzɔ̃ni tɛ awakristo ko, da bɛ mɔ na se mɛ mangbi tɛ mɔ ná ayata mɔ na tingɔ kpengbani. (Kɔl. 3:14) Wa na ndombali nɛ la, ta mɔ lengbi ti lingɔ liste ti amokanɔ mɛ mɔ kpã mɛ mɔ ye kokisangɔ ni ma nɛ? Na gesi ndo ba ni ngoi zu. Tomáš mɛ fale e tɛnɛ tɛnɛ tɛ lo uzu ko, lo tɛnɛ ya, “Se mbi du na aye gba mɛ ndo to mbi ya, mbi kokisa mokano tɛ mbi ko, mbi ndo li kpengbani ya, mbi kokisa ni.”

7. Ye mɛndó aza nyita Julio ná ya lo ya, ala kokisa mokanɔ tɛ ala nɛ?

⁷ Ndo du ndoni kɔi na azi mɛ na zangɔ mɔ ya, mɔ kokisa mɔkanɔ tɛ mɔ. (Mas. 13:20) Julio ná ya lo alongandó hɛ̃ngɔ tɛrɛ gba na ya kwa tɛ Yehova. Ngasia? Julio tɛnɛ ya, “e pɔnandó akwa mɛ na sangɔ ngunu bɛ e ya, ta e nzɛ̃ ma, e ndo tɛnɛ tɛnɛ na ala ngoi zu na omɛ aba mokanɔ tɛ e. Ambeni gba so ya popo tɛ la akokisandó mokanɔ tɛ la wɛ, wa ala ndo hɛ̃ e awangɔ ti nzɔ̃ni nvɛ̃ni. Ala ndo hũndandó se mɛ kpale tɛ e ndo nɔ na nɔ, wa ala ndo sa ngandó ngunu bɛ e.”

8. Ye mɛ alengbi ti singɔ se du ya, e ndo li kpengbani ti kokisangɔ mokanɔ tɛ e bo na ngoi mɛ e na gwɛ̃ ni nɛ? (Ba nga limɔ.)

⁸ Ti bɛ ta kpale ko, ngoi mɛndɛ̃ ando si na e zu ya, e zanga ge ge ge. Ni fa ya, ta elengbi ti kokisangɔ mokanɔ tɛ e ma? Ipɔ. E mu se lɛlo kɔi, na ngoi mɛ yá ndo ya kpengbani ko, ni lengbi ti gwengɔ na masuwa tee ka ndo mɛ ni ga gwe da, kanda ta yá ndo ya bo ngoi zu kpengbani ma, abi mɛndɛ̃ nga ko, ta yá ndo ya ma. Ni fa ya, ta awa kpɛngɔ na masuwa na gwengɔ uzu ma? Ta seni la ma. Amasuwa mɛndɛ̃ ndo du na mɔtɛrɛ, wa atãnga ni ndo du na gbí mɛ awa kpɛngɔ na masuwa alengbi ti salelangɔ ni ti nɛngɔ ya, ala ndo gwe uzu. Nga ma se ti ngunu tɛ yá, ngoi mɛndɛ̃ ge ge ge tɛ e alengbi ti mangɔ bere zungɔ, wa abi mɛndɛ̃ elengbi ti zangangɔ nvɛ̃ni ge ge ge. Kanda se e ndo li kpengbai ti kokisangɔ mokanɔ tɛ e bo na ngoi mɛ e na gwɛ̃ ti lingɔ ni ko, ngoi mɛndɛ̃ ta e na kokisangɔ ni ma. Nga ma se ko la wa kpɛngɔ na masuwa ndo gi kɔdɛ mɛndɛ̃ ti nɛngɔ ya, lo ndo gwe uzu wa lo si ka ndo mɛ lo ga gwe da ko, elengbi ti lingɔ kpengbani gwengɔ uzu nga na lingɔ ya, e kokisa mokanɔ tɛ e abɛse ta e di dɛ na gwɛ̃ ni ma. Ta lingɔ ni adu woni ma, ando yɔ ya, zo gbanzi tɛrɛ lo na aye mɛndɛ̃, kanda se e ba anzɔ̃ kpale mɛ e na luangɔ ko, adu ngbondoni ya, e li ni. Uzu ya  e ba aye mɛ elengbi ti lingɔ ni ko, zia e ba ahũnda mɛ azi mɛndɛ̃ ndo hũnda na tɛrɛ la.

9. Adu siɔni lingɔ kpengbani so kokisangɔ mokanɔ mɛ zo kpã? Kambisa.

⁹ Yehova ye ya, e vɔrɔ lo na dengɔ bɛ nga na bɛ e zu. (Nz. 100:2; 2 Kɔr. 9:7) Ayɔ ya, e li kpengbani ti kokisangɔ mokanɔ tɛ e abɛse du ya, ta e di dɛ na gwɛ̃ ni ma? Polo pandó ya, “mbi ndohɛ̃ kota pɛnɔ hɛ̃ tɛrɛ mbi nvɛni [nga ma tɛ mbɛ].” (1 Kɔr. 9:25-27) Abɛse na ngoi mɛndó ta lo na gwɛ̃ ti lingɔ aye mɛ Yehova yɔ ya, lo li ma ko, Polo ndo lindó kpengbani ti lingɔ ni. Bɛ Yehova ndo dendó na lo ti aye mɛndó Polo ndo li na ya kwa tɛ lo? Ĩi. Kutu lo hɛ̃ndó Polo mbana gɛrɛ na lo ti ge ge ge tɛ lo.​—2 Tim. 4:7, 8.

10. Ngasia la Yehova lengbi ti zangɔ e ya, e du na gwɛ̃ kpengbani ti kokisangɔ mokanɔ tɛ e nɛ?

¹⁰ Kwɛ kɔi, bɛ Yehova ndo de gba na ngoi mɛ lo ndo hũ ge ge ge mɛ e ndo li ti kokisangɔ mokanɔ tɛ e abɛse e ti na nzɛ̃ngɔ bere ta e di dɛ na gwɛ̃ ti lingɔ ni ma. Bɛ lo ndo de gba na lo mɛ ya, lo hĩnga ya, songo la ndo to e ya, e li ni. Ngoi mɛndɛ̃ ta bɛ e ndo ye aye mɛ e kpã mokanɔ na lo ni ma, kanda e ndo ye Yehova. Lo na sulungɔ ge ge ge tɛ e ga ma se mɛndó lo sulu na tɛ toma Polo. (Nz. 126:5) Wa nzɔ̃ sulu tɛ Yehova na lingɔ ya, e ti na gwɛ̃ ti lingɔ kwa. Lucyna nyita wali kɔi mɛ ndo du ka Pologne, atɛnɛ ya, “na ya ngoi mɛndɛ̃, ta mbi ndo ye singɔ kwa ti fangɔ tɛnɛ ma se du ya mbi nzɛ̃, kanda na pɛ fangɔ tɛnɛ ko, mbi ndo ma dengɔ bɛ gba, ni du nzɔ̃ mbana gɛrɛ mɛ mbi lua.” Zia e ba na olo ambanga aye mɛ elengbi ti lingɔ se du ya, ta e du na ge ge ge ma.

11. Ngasia la Yehova lengbi ti zangɔ e ya, e du na seliye ti fɔ̃ngɔ bɛ nɛ?

¹¹ Yɔ ka ti Yehova ya, lo za mɔ mɔ ti na seliye ti fɔ̃ngɔ bɛ. Fɔngɔ bɛ̃ adu seliye mɛ ndo za zo ya, ta agwɛ̃ ti tɛrɛ lo ako ndo lo ma, wa lo du gbia na ndo bingangɔ li tɛ lo nga na kwa tɛ lo. Tɛnɛ ni ko ndo hɛ̃ dangɔ bɛ ti fɔ̃ngɔ bɛ na ngoi mɛ zo ye lingɔ siɔ ye. Kanda e nga na gwɛ̃ ti seliye ti fɔ̃ngɔ bɛ ti nɛngɔ ya, e li aye ti nzɔni, na ndakisa na ngoi mɛ ahɛ̃ e kumba mɛ kpengbani ya e li, kanda ta e na gwɛ̃ ti lingɔ kumba niko ma. Ale ta bɛ mɔ li na ni ma ya, seliye niko ti ngbondoni adu kɔi ti alé ti nyingɔ. Ni la, ti nɛngɔ ya, mɔ ti na seliye niko ko, hũnda Yehova ya, lo za mɔ na nyingɔ vurú tɛ lo. (Luka 11:13; Gal. 5:22, 23) David mɛ fale e tɛnɛ tɛnɛ tɛ lo uzu ndó na gwɛ̃ ti lɛkɛngɔ se tɛ lo ti mandangɔ Ngabangɔ. Lo kambisa se mɛ lingɔ sambela aza lo, lo tɛnɛ ya: “Mbi ndo yɔndó ka ti Yehova ya, lo hɛ̃ mbi seliye ti fɔ̃ngɔ bɛ. Na lo tɛ lo ko, mbi bandandó landangɔ prɔgramɛ ti nzɔ̃ni ti mandangɔ Ngbangɔ wa mbi ndo lindó ni ngoi zu.”

12. Ngasia la wangɔ mɛ kaya Mosakoli 11:4 aba nga mokanɔ tɛ e ti nyingɔ nɛ?

¹² Ta mɔ kũ bo ya, akpale tɛ mɔ zu ati nzɔ̃ni wa di la ma. So ya gigi mɛ ndɛ e na ni ko, ta zo mɛ na dungɔ lɛ ngɛ̃́ mɛ azanga pɛnɔ da ma, se e kũ bo ya e ti na dungɔ lɛ ngɛ̃́ mɛ azanga pɛnɔ ko, ta e na kokisangɔ mokanɔ tɛ e ma. (Di Mosakoli 11:4.) Nyita kɔli Dayniel atɛnɛ ya: “Ta kpale mɛ azanga pɛnɔ so ya gigi olo da ma. Ta ayɔ ya, e kala ti e, e du sese ma, ale e hɛ̃ tɛrɛ e na kwa.” Paul nyita kɔi mɛ ndo du ka Ouganda akambisa nda mɛ ayɔ ya, ta e ndo diri na kpale gesi ma, lo tɛnɛ ya: “Se e hɛ̃ tɛrɛ wa e banda lingɔ ye kɔi abɛse lingɔ ni adu kpengbani ko, e na hɛ̃ngɔ Yehova lége ya, lo sulu e.”​—Mal. 3:10.

13. Nda mɛ adu nzɔ̃ni ya, mɔ banda kpãngɔ mokanɔ ti yakere yakere nɛ?

¹³ Banda ni yɛkɛ yɛkɛ. Ngoi mɛndɛ̃ e ndo ti na nzɛ̃ngɔ na lo mɛ ya, adu pɛnɔ kokisangɔ mokanɔ mɛ e kpã. Se mɔ hũ ya, ta mɔ na kokisangɔ mokanɔ mɛ mɔ kpã ko, nda mɛ ta mɔ lengbi ti kpãngɔ mokanɔ mɛndɛ̃ mɛ mɔ lengbi ti kokisangɔ ni ma nɛ? Se mokanɔ tɛ mɔ adu ti dungɔ na seliye tɛ wakristo, nda mɛ ta mɔ lengbi ti bandangɔ fangɔ ni na ndo akpale ti yakere yakere ma nɛ? Se du ya, mokanɔ tɛ mɔ adu ti dingɔ Ngbangɔ na mobimba ko, nda mɛ ta mɔ lengbi ti bandangɔ dingɔ ni yakere yakere ma nɛ?  Tomáš mɛ fale e tɛnɛ tɛnɛ tɛ lo na ebandeli ko, ta lo ndo kokandó dingɔ Ngbangɔ na mobimba ni na ya bulu kɔi ma. Lo tɛnɛ ya: “Mbi hũndó ya, mbi ndo dindó Ngbangɔ na kpɛ. Mbi mundó ekateli ti bandangɔ ni fãni mɛndɛ̃. Kanda na olo ko, mbi li prɔgramɛ ti dingɔ shapitrɛ kɔi bere sɛ, wa mbi gbɔ̃ nga li mbi na ndo ni. Ni la mbi bandandó sepalangɔ na dingɔ Ngbangɔ.” Na lo mɛ ya Tomáš bandandó sepalangɔ na dingɔ Ngbangɔ ko, lo banda ngandó dingɔ ni bi zu nga ngoi yɔngɔrɔni. Wa lo onzindó dingɔ ni zu. c

14. Ye mɛ lengbi ti singɔ na e zu nɛ?

¹⁴ Na vundu zu, abɛse e du na ge ge ge wa e li nga zu ko, elengbi ti tengbingɔ na kpengba kpale. Na ndakisa “akpale mɛ ndo si mbalakaka” alengbi ti lingɔ ya, ta e du na ngoi ti kokisangɔ mokanɔ tɛ e ma. (Mos. 9:11) Akpengba kpale alengbi ti lingɔ ya, e ti na nzɛ̃ngɔ wa ta e du nga na ngunu ma. (Mas. 24:10) Tɛrɛ ti zangangɔ lengbingɔ mɛ e na ni alengbi ti tongɔ e ya, e mu ekateli mɛ alengbi ti gbanzingɔ e ya, ta e kokisa mokanɔ tɛ e ma. (Roma 7:23) Bere ngoi mɛndɛ̃ elengbi ti nzɛ̃ngɔ. (Mat. 26:43) Ye mɛ lengbi ti zangɔ e ya, e nwɔ akpengba kpale niko nɛ?

15. Se mɔ tengbi na kpengba kpale, nda mɛ ta mɔ lengbi ti tɛnɛngɔ ya, ta mɔ na kokisa gbanda mokanɔ tɛ mɔ ma nɛ? Kambisa. (Nzembo 145:14)

¹⁵ Hĩnga ya, se mɔ tengbi na kpengba kpale ko, ta afa ya, mɔ na zangangɔ kokisangɔ mokanɔ tɛ mɔ ma. Ngbangɔ tɛnɛ ya, ngoi mɛndɛ̃ elengbi ti tengbingɔ na kpengba kpale ndoni ndoni. Kanda ni ndo tɛnɛ nga ya, elengbi ti longangɔ ni na lége ti lisalisi tɛ Yehova. (Di Nzembo 145:14.) Nyita Philip, mɛ fale e tɛnɛ tɛnɛ tɛ lo uzu, atɛnɛ ngaso mɛ: “Ta mbi ndo kpã lɛ mbi na ndo nɔmbrɛ ti amikanɔ mɛndó mbi kpã mɛ ta mbi kokisa ni ma, ma. Kanda mbi ndo kpã lɛ mbi na ndo ge ge ge mɛ mbi li bere fãni kɛ̃ ti nɛngɔ ya mbi kokisa ni.” Davidi mɛ fale e tɛnɛ nga tɛnɛ tɛ lo uzu ko, lo tɛnɛ ya: “Ta mbi ndo hũ akpale ti pɛnɔ mɛndó mbi tengbi na ni mabere  akpengba kpale ma, kanda mbi ndo hũ ni mabere nzɔ̃ tangɔ li gɛrɛ mɛndó mbi lua ti fangɔ na Yehova ya, mbi ndo ye lo.” Ni la, se mɔ ngbã bo lá kwɛ gwengɔ uzu abɛse mɔ tengbi na kpengba kpale ko, mɔ na fangɔ na Yehova ya, mɔ ye hɛ̃ngɔ lo dengɔ bɛ. Wa da bɛ mɔ na dengɔ bɛ mɛ lo ndo ma na ngoi mɛ lo ndo hũ mɔ, mɔ ndo li ge ge ge ti nɛngɔ ya mɔ kokisa mokanɔ tɛ mɔ!

16. Wangɔ mɛ elengbi ti luangɔ na ndo aye mɛ ali ya, ta e kokisa mɔkanɔ tɛ e ma nɛ?

¹⁶ Lua wangɔ na ndo aye mɛ ali ya, ta mɔ kokisa mɔkano tɛ mɔ ma. Binga li mɔ na ndo aye mɛ ali ya, kpale ti ngaso ali tɛrɛ lo. Hũnda tɛrɛ mɔ na ndo mɛ, ‘Ye mɛ mbi lengbi ti lingɔ ti nɛngɔ ya, ta kpale niko di li tɛrɛ lo fãni mɛndɛ̃ ma nɛ?’ (Mas. 27:12) Ngoi mɛndɛ̃ zangangɔ kokisangɔ mɔkanɔ kɔi ngaso alengbi ti fangɔ ya, ta e pɔnandó mokanɔ mɛ na dungɔ woni ti nɛngɔ ya, e kokisa ni nga ma se mɛndó e da na bɛ e ma. Se mɔ hũ ya, kpale mɛ aba nga mɔ ko, di mɔ binga li mɔ fãni mɛndɛ̃ so hĩngangɔ bere mɔ na makoki ti kokisangɔ mokanɔ mɛ mɔ na ni. d Se du ya ta mɔ kokisa mokanɔ kɔi mɛndó mɔ kpã, kanda ta ni lengbi na makoki tɛ mɔ ma ko, ta Yehova na hũngɔ mɔ siɔni ma.​—2 Kɔr. 8:12.

17. Nda mɛ ayɔ ya, ta bɛ e li na aye mɛndó e li ma nɛ?

¹⁷ Ta bɛ mɔ li na amikanɔ mɛndó mɔ kokisa ni ma. Ngbangɔ tɛnɛ ya, ‘Ta Nzapa zanga mbilimbili ti nɛngɔ ya, bɛ lo li na kwa tɛ ĩ ma.’ (Aeb. 6:10) Ni la, ale ta bɛ e nvɛ̃ni ali na ni ma. Da bɛ mɔ na mokanɔ mɛndó mɔ kokisa ni uzu​—ngoi mɛndɛ̃, mɔ tindó na mangbi ti kpengbani na Yehova, wa mɔ banda kambisangɔ tɛnɛ tɛ lo hɛ̃ngɔ azi mɛ so gunda mɔ, bere mɔ mu batisimɔ. Se du ya, mɔ linndó kpengbani mɔ kokisa mikanɔ na ya abi mɛ aɔ ko, nda mɛ ta mɔ lengbi ti ngbãngɔ lá kwɛ gwengɔ uzu nga na lingɔ kpengbani so kokisangɔ mokanɔ ti nyingɔ mɛndɛ̃ mɛ mɔ na ni ma nɛ?​—Fil. 3:16.

18. Ngoi mɛ e ndo li kpengbani ti kokisangɔ mokanɔ tɛ e ko, ye mɛ ta bɛ elengbi ti lingɔ na ni ma nɛ? (Ba nga limɔ.)

¹⁸ Na lége ti lisalisi tɛ Yehova ko, mɔ lengbi ti kokisangɔ mokanɔ tɛ mɔ, nga ma se mɛ wa kpɛngɔ na masuwa mɛ ndo du na dengɔ bɛ na ngoi mɛ lo si ka ndo mɛ lo ndo gwe da. Kanda ale ta bɛ mɔ li na ni ma ya, azi mɛ ndo kpɛ na masuwa ko, ala ndo du nga na dengɔ bɛ ti lingɔ vuayajɛ. Kwɛ kɔi, ngoi ko la mɔ ndo li kpengbani ti kokisangɔ mokanɔ tɛ mɔ ti nyingɔ ko, ndo sepala na vuayajɛ, mu ngoi ti hũngɔ se mɛ Yehova ndo za mɔ, wa lo ndo sulu nga mɔ. (2 Kɔr. 4:7) Se ta mɔ zia ma ko, mɔ na luangɔ anzɔ̃ sulu gba.​—Gal. 6:9.