1-2. Ahũnda mɛ elengbi ngoi mɛndɛ̃ ti hũndangɔ na tɛrɛ e na lo ti sambela mɛ e ndo li nɛ?

 TA ADƐNDÓ asi na mɔ ya, mɔ hũnda tɛrɛ mɔ bere Yehova ndo hɛ̃ gbinya ti sambela tɛ mɔ ma? Se adu ngaso ko, hĩnga ya, ta mɔ kɔi ma. Ayata kɔli ná ayata wali gba ama ngandó tɛrɛ la ngaso na ngoi mɛndó ala tengbi na tara. Se du ya e ndo hũ pɛnɔ ko, alengbi ti dungɔ kpengbani ya, e hũ se mɛ Yehova ndo hɛ̃ gbinya ti asambela tɛ e.

² Na ya tɛnɛ mɛ, e na bangɔ nda mɛ elengbi ti yengɔ na bɛ e kɔi ya, Yehova na hɛ̃ngɔ gbinya ti asambela tɛ awa kwa tɛ lo ti mbilimbili. (1 Yn. 5:15) E nga na hɛ̃ngɔ gbinya ti ahũnda mɛ: Nda mɛ na ya ngoi mɛndɛ̃ elengbi ti hũngɔ ya, ta Yehova ndo hɛ̃ gbinya ti asambela tɛ ma nɛ? Ngasia la Yehova ndo hɛ̃ gbinya ti asambela tɛ e ndɛ nɛ?

3. Nda mɛ Yehova ye ya, e ndo li sambela hɛ̃ lo nɛ?

³ Ngbangɔ tɛnɛ ya, Yehova ndo ye e mawoma, wa e du ngbondoni ka lɛ lo. (Hag. 2:7; 1 Yn. 4:10) Na lo ni la, lo pa hɛ̃ e ya, e ndo yɔ ka ti lo na ya sambela ya, lo za e. (1 Pet. 5:6, 7) Lo ye zangɔ e ya, e du dã na lo, wa e nwɔ akpengba kpale mɛ e ndo tengbi na ni.

4. Ngasia la e hĩnga ya, Yehova ndo hɛ̃ gbinya ti sambela tɛ awa kwa tɛ lo nɛ? (Ba nga limɔ.)

⁴ Kaya Ngbangɔ, elengbi ti tãngɔ se lɛlo gba mɛ ndo fa ya, Yehova ndo hɛ̃ gbinya ti asambela tɛ awa kwa tɛ lo ti mbilimbili. Mɔ ndo da bɛ mɔ na se lɛlo kɔi? E mu se lɛlo tɛ Gbia Davidi. Lo tengbindó na awa kula gba na ya dungɔ lɛ ngɛ̃́ tɛ lo, ni  la lo yɔndó ka ti Yehova ngoi gba na ya sambela ya, lo za ni. Lá kɔi lo vɔrɔndó tɛrɛ lo hɛ̃ Yehova ngaso mɛ: “Oo Yehova, se mɔ ye, ma sambela tɛ mbi; ma to to tɛ mbi. Na lo mɛ ya, mɔ du bɛta zo nga zo ti mbilimbili ko, hɛ̃ gbinya na sambela tɛ mbi.” (Nz. 143:1) Yehova hɛ̃ndó gbinya ti sambela tɛ Davidi, wa lo sara ngandó lo ka bɛ ti awa kula tɛ lo. (1 Sa. 19:10, 18-20; 2 Sa. 5:17-25) Na lo ni la, Davidi lengbindó ti tɛnɛngɔ na dengɔ bɛ zu ya: “Yehova ndo du dã na azi mɛ ndo ili lo.” E zu elengbi nga ti kpãngɔ bɛ e na ndo tɛnɛ niko.​—Nz. 145:18.

5. Yehova ndo hɛ̃ndó gbinya ti sambela tɛ awa kwa tɛ lo ngoi zu nga ma se mɛ bɛ la ye na ni? Hɛ̃ lɛlo kɔi. (Ba nga limɔ.)

⁵ Ngoi mɛndɛ̃, ta Yehova ndo hɛ̃ gbinya ti asambela tɛ e nga ma se mɛ bɛ e ye na ni ma. Kpale mɛndó asi na toma Polo la. Lo yɔndó ka ti Yehova ya, lo hã “ki kɔi kaya mi tɛrɛ lo, lo zi.” Na ya ngoi kɔi ko, Polo lindó sambela na lo ti kpengba kpale niko fãni taa. Yehova hɛ̃ndó lo gbinya na lo ti sambela tɛ lo? Ĩi, kanda ta na se mɛndó Polo ndo da na bɛ lo ma. Na se lɛ hãngɔ pɛnɔ tɛ lo ko, Yehova hɛ̃ndó lo ngunu mɛ na zangɔ lo ya, lo ngbã lá kwɛ vɔrɔngɔ lo na mbilimbili zu.​—2 Kɔr. 12:7-10.

6. Na ya ngoi mɛndɛ̃, nda mɛ elengbi ti hũngɔ ya, ta Yehova ndo hɛ̃ gbinya ti sambela tɛ e ma nɛ?

⁶ Ngoi mɛndɛ̃ Yehova lengbi nga ti hɛ̃ngɔ gbinya ti sambela tɛ e na ndenge mɛ ta e da bɛ e na ni ma. Elengbi ti kpãngɔ bɛ e ya, Yehova hĩnga ndenge ti nzɔ̃ni nvɛ̃ni mɛ lo lengbi ti zangɔ e. Lo lengbi ti lingɔ aye “ɔngɔ ndo ye zu mɛ e ndohũnda bere ɔngɔ ndo dangɔ bɛ tɛ e.” (Ef. 3:20) Na lo ni la, lo lengbi ti hɛ̃ngɔ gbinya ti sambela tɛ e na ngoi nga na se mɛ ta e ndo da bɛ e na ni ma.

7. Nda mɛ ngoi mɛndɛ̃ na yɔngɔ ya, e gbinyangbi aye mɛ e ndo li sambela na lo ni nɛ? Hɛ̃ se lɛlo kɔi.

⁷ Ngoi mɛndɛ̃ elengbi ti gbinyangbingɔ aye mɛ e ndo li sambela na lo ni se du ya, e hĩnga na seni nvɛ̃ni dangɔ bɛ tɛ Yehova. E mu se lɛlo tɛ nyita Martin Poetzinger. Nyi ngoi yakere na pɛ libala tɛ lo ko, agbɔ̃ndó lo ka bɔlɔkɔ ti Nazi. Na ebandeli lo lindó sambela hɛ̃ Yehova ya, lo za ni, ni si ka bɔlɔkɔ ti nɛngɔ ya, ni za ya ni, wa ni hɛ̃ nga tɛrɛ ni gba na ya kwa ti fangɔ tɛnɛ. Abɛse ngaso ko, na pɛ pɔsɔ sɛ, ta lo hũndo ye kɔi mɛ ndo fa ya, Yehova na lingɔ ya, lo si ka bɔlɔkɔ ma. Na lo ni la lo gbinyangbindó sambela tɛ lo, lo bandandó yɔngɔ ka ti Yehova ya: “Se mɔ ye Yehova, fa na mbi aye mɛ mɔ ye ya, mbi li.” Na gesi lo bandandó  gbɔ̃ngɔ li lo na ndo kpale mɛ ayata mɛndɛ̃ mɛ ka bɔlɔkɔ ndo gbe bɛ la na ya ni. Gba ka popo tɛ la ngandó na sɔngɔ bɛ na lo tɛ ayati la bere awoti la. Na gesi nyita Poetzinger lindó sambela mɛ: “Sia kɔli Yehova na lo ti kumba ti fãnani mɛ mɔ hɛ̃ mbi. Za mbi ya, mbi sa ngunu bɛ ayata mbi.” Lo lindó abulu gumbaya ka bɔlɔkɔ ti Nazi, wa lo ndo sa bondó ngunu bɛ ayata!

8. Ye mɛ ta bɛ e lengbi ti lingɔ na ni na ngoi mɛ e ndo li sambela ma nɛ?

⁸ Ale ta bɛ e li na ni ma ya, Yehova na nzɔ̃ dangɔ bɛ kɔi mɛ lo kpã na ngoi mɛ gbanda lo na kokisangɔ ni. Nzɔ̃ dangɔ bɛ ni aba onzingɔ ti bwai na bwai akpale zu mɛ ndo hɛ̃ azi pɛnɔ ndɛ, aye mabere pɛnɔ mɛ ndo lo na ndo yengingɔ ti sese bere kpengba yá, ngã ná kwá. Yehova na lingɔ ni na lége ti Lo-lengɔ Gbia tɛ lo. (Da. 2:44; Suma 21:3, 4) Kanda uzu ti nɛngɔ ya, ngoi niko lengbingɔ ko, Yehova zi lége ya, Satana ndo le gbia na ndo lɛ gigi olo. b (Yn. 12:31; Suma 12:9) Se Yehova onzi apɛnɔ tɛ azi na olo ko, na singɔ mabere ya, Satana ndo le gbia na ndenge ti nzɔ̃ni. Ayɔ ya, e kũ akapa tɛ Yehova ya, ati na seni. Kanda ta afa ya, Yehova na kũngɔ gbanda tee ka ngoi niko alengbi wa lo za e ma. Zia e ba na olo ambanga aye mɛ Yehova ndo li so zangɔ e ndɛ.

9. Ngasia la Yehova ndo za e na ngoi mɛ e ye mungɔ ekateli kɔi ti ngbondoni nɛ? Hɛ̃ se lɛlo kɔi.

⁹ Lo ndo hɛ̃ e ndara. Yehova ko kapa hɛ̃ e ya, ni na hɛ̃ngɔ e ndara mɛ na zangɔ e ya, e mu ekateli ti nzɔ̃ni. E na gwɛ̃ ti ndara mɛ alo ka tɛ Yehova gba ni na ngoi mɛ e ye mungɔ ekateli kɔi mɛ na gbinyangbingɔ dungɔ lɛ ngɛ̃́ tɛ e bwai na bwai mabere ekateli ti lingɔ libala bere ta lingɔ libala ma. (Zaki 1:5) E mu se lɛlo tɛ nyita wali mɛ palanga mɛ ili lo la Maria. c Lo ndo lindó kwa tɛ wa sungɔ lége ti ngoi zu na dengɔ bɛ na ngoi mɛndó lo tengbi na nyita kɔli kɔi. Lo tɛnɛ ya: “Na ngoi mɛndó mangbi tɛ e sɛ ndo mai ko, e ndo yengbindó fãni mɛndɛ̃ gba. Mbi hĩngandó ya, ayɔ ya, mbi mu ekateli. Mbi lindó sambela gba na lo ni. Mbi ndó na gwɛ̃ ti litambwisi tɛ Yehova, kanda mbi hĩnga ngandó ya, ta Yehova na mungɔ ekateli na pɛnda mbi ma.” Lo hũndó ya, Yehova hɛ̃ gbinya ti sambela tɛ lo, wa Yehova hɛ̃ndó lo ndara. Ngasia? Na ngoi mɛndó lo li bolukiluki kaya ambeti tɛ e ko, lo luandó bɛli tɛnɛ kɔi kaya ambeti tɛ e mɛ ndo kambisa tɛnɛ niko. Lo mu ngandó ekateli ti landangɔ wangɔ ti ndara tɛ mama tɛ lo mɛ ndo li kwa hɛ̃ Yehova na mbilimbili zu. Ni zandó Maria ya, lo diri lo ba agwɛ̃ tɛ lo, wa lo mundó ekateli ti ndara.

10. Na bangɔ Mbeti ti Filipɛ 4:13, Yehova ndo za awa kwa tɛ lo ngasia? Hɛ̃ se lɛlo kɔi. (Ba nga limɔ.)

 ¹⁰ Lo ndo hɛ̃ e ngunu. Nga ma se mɛndó lo li ni na lo tɛ toma Polo ko, Yehova ndo hɛ̃ e ngunu mɛ e na gwɛ̃ ni ti nɛngɔ ya, e gbe bɛ e na ya pɛnɔ. (Di Filipɛ 4:13.) E ba se mɛ Yehova za nyita kɔli kɔi mɛ ili lo la Benjamin ya, lo gbe bɛ lo na ya pɛnɔ. Na ngoi mɛndó lo dɛ palanga ko, ndasewa tɛ Benjamin ndo dundó kaya kã tɛ azi mɛ akpɛlɛ to ka Afrika. Benjamin tɛnɛ ya: “Mbi ndo lindó sambela ngoi zu hɛ̃ Yehova, mbi ndo yɔndo ka ti lo ya, lo hɛ̃ mbi ngunu mbi li aye mɛ ando hɛ̃ lo dengɔ bɛ. Yehova hɛ̃ndó gbinya ti sambela tɛ mbi na ndenge mɛndó lo hɛ̃ mbi siriri ti bɛ, lo hɛ̃ mbi ngunu ti ngbãngɔ lá kwɛ fangɔ tɛnɛ, wa lo hɛ̃ ngandó mbi ambeti ti nɛngɔ ya, mbi ngbã lá kwɛ dã na lo.” Lo di tɛnɛ nga ya: “Dingɔ pandɛ ti dungɔ lɛ ngɛ̃́ tɛ ayata kɔli ná ayata wali mɛndɛ̃ nga na mandangɔ se mɛndó Yehova za na ala ya, ala gbe bɛ la ko, alindó ya, mbi du na ekateli ti kpengbani ti ngbãngɔ mbilimbili.”

11-12. Ngasia la Yehova lengbi ti salelangɔ ayata e awakristo ya, lo hɛ̃ gbinya ti sambela tɛ e nɛ? (Ba nga limɔ.)

¹¹ Lo ndo salela ndasewa tɛ e ti nyingɔ. Na bi uzu ti lo kpingɔ ko, Yezo lindó sambela ti kpengbani nvɛ̃ni. Lo yɔndó ka ti Yehova ya, lo li ya, ta azi mu ni mabere zo mɛ wa gulungɔ Nzapa ma, wa ta ala ho nga ni nga ma zo ti ngaso ma. Na se lɛ lingɔ ngaso ko, Yehova tondó angelo mɛ Yezo hĩnga lo nzɔ̃ni ti nɛngɔ ya, lo sa ngunu bɛ Yezo. (Luka 22:42, 43) Kwɛ kɔi, Yehova lengbi nga ti lingɔ ngaso na lo tɛ e, lo lengbi ti tongɔ nyita kɔi ya, lo ili e na telefɔnɛ bere lo ga ba e so sangɔ ngunu bɛ e. Zo kɔi kɔi na popo tɛ e alengbi ti gingɔ lége ti pangɔ “nzɔ̃ tɛnɛ” hɛ̃ ayata lo awakristo.​—Mas. 12:25.

¹² E mu se lɛlo tɛ nyita wali kɔi mɛ ili lo la Miriam. Apɔsɔ yakere na pɛ kwá tɛ kɔ lo ko, lo ngbãndó lo kɔi na bɛ lo, vundu na sɔngɔ bɛ aɔndó ndo lo. Lo ndo tondó to bi zu, wa lo ndó na gwɛ̃ ti kambisangɔ sɔngɔ bɛ tɛ lo hɛ̃ zo kɔi. Lo pa ya: “Ta mbi ndó na ngunu ti ilingɔ zo kɔi ma, na lo ni la mbi lindó sambela hɛ̃ Yehova. Na ngoi mɛndó mbi so to to na lingɔ sambela ko, mbala kɔi mbi ma telefɔnɛ tɛ mbi akpale. Adundó biazo kɔi ná ya lo, mɛ ala du akwa e ti kpɔ̃ bɛ e.” Biazo niko ná ya lo awambandó bɛ nyita wali Miriam. Lo yendó na  bɛ lo kɔi ya, Yehova la to nyita niko ya, lo ili ni.

13. Hɛ̃ se lɛlo kɔi mɛ afa se mɛ Yehova lengbi ti salelangɔ azi mɛ ta ndo vɔrɔ lo ma ya, lo hɛ̃ gbinya ti sambela tɛ awa kwa tɛ lo.

¹³ Lo lengbi ti salengɔ azi mɛ ta ndo vɔrɔ lo ma. (Mas. 21:1) Na ya ngoi mɛndɛ̃, Yehova ndo hɛ̃ gbinya ti sambela tɛ awa kwa tɛ lo na tongɔ azi mɛ ta ndo vɔrɔ lo ma ya, ala za ala. Na ndakisa, lo tondó gbia Artaxerxes ya, lo zi lége hɛ̃ Nehemia ya, lo diri ka Yerusalɛmɛ wa lo hɛ̃ ti lo na ya kwa ti diringɔ kĩngɔ kɔdɔrɔ niko. (Ne. 2:3-6) Ndɛ na ngoi tɛ e, Yehova lengbi nga ti tongɔ azi mɛ ta ndo vɔrɔ lo ma ya, ala za e.

14. Wangɔ mɛ mɔ lua na ndo se lɛlo tɛ Soo Hing nɛ? (Ba nga limɔ.)

¹⁴ Nyita wali kɔi mɛ ili lo la Soo Hing ahũndó ya, Yehova za lo na lége tɛ dɔktɛrɛ kɔi. Nyi lo ti kɔli alindó aksidã na kamiɔ̃ wa lo tindó na ngã ti kpengbani kaya bɔngɔ li lo. Na lo ni la, lo ná kɔ lo aziandó lingɔ kwa ti nɛngɔ ya, ala ndo bata lo, wa ni li ya, ta ala di dɛ na falanga gba ma. Soo Hing tɛnɛ ya, lo ndo hũndó ya, ta lo lengbi ti gbengɔ bɛ lo na ya kpale niko ma. Lo zindó bɛ lo hɛ̃ Yehova na ya sambela, wa lo yɔndó ya, Yehova za lo. Dɔktɛrɛ kɔi yendó zangɔ lo ná ndasewa tɛ lo. Na lége tɛ dɔktɛrɛ niko ko, leta mundó ala so zangɔ ala, wa ahɛ̃ ngandó ala ndo kɔi ti nzɔ̃ni ti dungɔ na ni. Na gesi Soo Hing tɛnɛ ya: “E hũndó ti Yehova na ya kpale niko, lo du biani ‘Wa mangɔ sambela.’”​—Nz. 65:2.

15. Ye mɛndó aza nyita wali kɔi ya, lo hĩnga se mɛ Yehova ndo hɛ̃ gbinya ti sambela tɛ lo nɛ?

¹⁵ Ta Yehova ndo hɛ̃ gbinya ti asambela tɛ e na ndenge ti kamwangɔ ma. Kanda lo ndo hɛ̃ e gbinya ngoi zu na ndenge mɛ alengbi ti zangɔ e ya, e ngbã mbilimbili ka tɛ lo. Na lo ni la, ndo gi hĩngangɔ se mɛ Yehova ndo hɛ̃ gbinya ti sambela tɛ mɔ. Nyita wali kɔi mɛ ili lo la Yoko ahũndó ya, ta Yehova ndo hɛ̃ gbinya ti Asambela tɛ lo ma, na lo ni la, lo bandandó sungɔ ni na lɛ mbeti. Na pɛ angoi gba, lo bandó mbeti niko wa, lo hũndó ya, Yehova hɛ̃ gbinya ti asambela tɛ lo gba, abɛse asambela mɛndɛ̃ mɛ ta lo nvɛ̃ni ndo da bɛ lo na ni ma. Ayɔ ya, e ndo gbɔ̃ li e na ndo se mɛ Yehova ndo hɛ̃ gbinya ti sambela tɛ e.​—Nz. 66:19, 20.

16. Ngasia la elengbi ti fangɔ ya, e na loyengɔ na ngoi mɛ e ndo li sambela nɛ? (Aebreo 11:6)

¹⁶ Ta e na fangɔ bo loyengɔ na lingɔ sambela  hɛ̃ Yehova ma, kanda e na fangɔ nga ya, e na loyengɔ se e ye gbinya mɛ lo ndo hɛ̃ e abɛse ni du ti ngasia. (Di Aebreo 11:6.) E mu se lɛlo tɛ Mike nga na ya lo, Chrissy. Ala ndó na mɔkanɔ ti lingɔ kwa ka bethel. Nyita Mike tɛnɛ ya, “Mbi ná ya mbi e tondó afɔrmilɛrɛ fãni gba, wa e li ngandó sambela hɛ̃ Yehova na lo ni, abɛse ngaso ko, ta ailindó e ma.” Mike ná Chrissy ayendó na bɛ la kɔi ya, ɔngɔ azi mɛndɛ̃ zu, Yehova hĩnga se ti nzɔ̃ni mɛ lo lengbi ti salelangɔ ala na ya kwa tɛ lo. Ala ngbãndó lá kwɛ lingɔ aye mɛ ala lengbi ti lingɔ, ala hɛ̃ndó ti la mabere awa sungɔ lége ka ndo mɛ gwɛ̃ tɛ awa fangɔ tɛnɛ da gba, wa ala li ngandó kwa ti kĩngɔ ada ti Lo-lengɔ Gbia. Ndɛ lo mɛ ko, ala ndo li kwa tɛ awa bangɔ ndo kɛlɛkɛlɛ. Mike tɛnɛ ya, “Ta Yehova hɛ̃ndó gbinya ti sambela tɛ e nga ma se mɛndó e ye na ni ma, kanda lo hɛ̃ndó gbinya ni na ndenge ti nzɔ̃ni nvɛ̃ni mɛndó ta e da bɛ e na ni ma.”

17-18. Na bangɔ Nzembo 86:6, 7, ye mɛ elengbi ti yengɔ na bɛ e kɔi nɛ?

¹⁷ Di Nzembo 86:6, 7. Davidi yendó na bɛ lo kɔi ya, Yehova ndo ma, wa lo ndo hɛ̃ nga gbinya ti asambela. Mɔ lengbi nga ti kpãngɔ bɛ mɔ na ndo kpale niko. Se lɛlo tɛ azi mɛ e ba na ya tɛnɛ mɛ afa yangondo ya, Yehova lengbi ti hɛ̃ngɔ e ndara ná ngunu ti nɛngɔ ya e gbe bɛ e na ya pɛnɔ. Lo lengbi ti salelangɔ ayata e awakirsto nga na azi mɛ ta adɛ ti awa kwa tɛ lo ma ya, ala za e.

¹⁸ Ta Yehova ndo hɛ̃ gbinya ti asambela tɛ e ngoi zu na ndenge mɛ bɛ e ye ma, kanda e hĩnga ya, abɛse ngasia ko, lo na hɛ̃ngɔ gbinya ti sambela ni. Lo ndo hɛ̃ e aye mɛ e na gwɛ̃ ni nga na ngoi mɛ alengbi. Na lo ni la, ngbã lá kwɛ lingɔ sambela hɛ̃ Yehova, na loyengɔ zu, kpã bɛ mɔ ya, bandangɔ ndɛ, lo na hɛ̃ngɔ mɔ aye mɛ mɔ na gwɛ̃ ni, wa na bi mɛ na gangɔ lo na “kokisangɔ gw̃ɛ tɛ azi zu” ka gigi ti fãnani.​—Nz. 145:16.