1. Na bangɔ 1 Petro 5:2, kwa ti ngbondoni mɛ abiazi na ni nɛ?

 YEHOVA hɛ̃ abiazi ti ya bombi kumba ti batangɔ angasã gbaga tɛ lo. Ala ndo mu kwa ti zangɔ ayata kɔli ná ayata wali ya, adu ngbondoni ka lɛ la, na lo ni la, ala ndo li kwa kpengbani ti dungɔ ‘awa bangangɔ ngasã gbaga mɛ ndo bata ala nzɔ̃ni nvɛ̃ni.’ (Yir. 23:4; di 1 Petro 5:2.) E ndo hɛ̃ Yehova sia kɔli gba na ndenge mɛ lo hɛ̃ e akɔli ti ngaso ge ya bombi!

2. Ngoi mɛndɛ̃, kpengba kpale mɛ abiazi ndo tengbi na ni nɛ?

² Abiazi ndo tengbi na akpengba kpale gba na ya kwa tɛ la. Na ndakisa, ala ndo li kwa kpengbani ti nɛngɔ ya, ala bata bombi. Tony, biazo kɔi mɛ ndo du ka États-Unis, amandandó dungɔ na zungɔ na tɛrɛ na omɛ aba akumba mɛ lo lengbi ti yengɔ lingɔ ge ya bombi. Lo tɛnɛ ya: “Na ebandeli ti COVID-19 ko, mbi ndo lindó kwa gba so lɛkɛngɔ bombi nga na kwa ti fangɔ tɛnɛ. Kanda abɛse mbi ndo lindó kpengbani ngasia ko, aye ti lingɔ bondó da gba. Ni lindó ya, dingɔ Ngbangɔ, mandangɔ aye tɛ mbi nvɛ̃ni nga na lingɔ asambela abandandó diringɔ gesi.” Nyita Ilir, biazo kɔi mɛ ndo du ka Kosovo, atengbindó na kpengba kpale mɛndɛ̃. Na ngoi mɛndó to ati kaya kɔrɔ mɛ lo ka da ko, atindó pɛnɔ na lo tɛ lo ya, lo ndo tɔndɔ andia ti linɔ tɛ Yehova. Lo tɛnɛ ya: “Ge ge ge tɛ mbi atengbindó na tara na ngoi mɛndó ayata ti filiale ahɛ̃ mbi kumba ti zangɔ ayata mɛ ndo du ka ndo mɛ to ndo tiri kpengbani nvɛ̃ni. Mbi mandó mbɛtɔ kpengbani, wa andia mɛndó ala ndo hɛ̃ mbi ko, mbi ndo hũndó ya, ta ni na lengbingɔ ma.” Nyita kɔli Tim mɛ misiɔnɛrɛ ka Asie ahũndó ya, adu pɛnɔ ti nɛngɔ ya, lo li aye zu mɛ lo na gwɛ̃ ni. Lo tɛnɛ ya: “na ya ngoi mɛndɛ̃, mbi ndo hũndó ya, ta mbi na ngunu ti nɛngɔ ya, mbi za ayata ma.” Aye mɛ alengbi ti zangɔ abiazi mɛ ndo tengbi nga na akpale ti ngaso nɛ?

3. Ngasia la e zu elengbi ti luangɔ anzɔ̃ kpale na mandangɔ se lɛlo tɛ Gedeon nɛ?

³ Abiazi alengbi ti luangɔ awangɔ gba na ndo se lɛlo tɛ wa fangɔ ngbanga Gedeon. (Aeb. 6:12; 11:32) Lo luandó kumba ti batangɔ  nga na zangɔ azi tɛ Nzapa na ngoi kɔi ti siɔni nvɛ̃ni. (Bas. 2:16; 1 Nt. 17:6) Kwɛ kɔi na Gedeon, Yehova hɛ̃ abiazi kumba ti bantangɔ azi tɛ lo na ya ngoi olo ti siɔni. (Aw. 20:28; 2 Tim. 3:1) Abɛse ngaso ko, se lɛlo tɛ Gedeon alengbi ti hɛ̃ngɔ e zu wangɔ na omɛ aba dungɔ na wo tɛrɛ, zungɔ na tɛrɛ, nga na dungɔ na tɔndɔngɔ. Na ngoi mɛndó lo ndo kokisa kumba tɛ lo ko, ge ge ge tɛ lo atengbindó na tara. Abɛse du ya, e du abiazi bere ta e du abiazi ma ko, elengbi ti luangɔ awangɔ na omɛ aba hɛ̃ngɔ abiazi sia kɔli ngoi zu. Elengbi nga ti zangɔ ayata niko mɛ ndo le kwa kpengbani ti nɛngɔ ya, ala bata e kaya bombi.​—Aeb. 13:17.

4. Ngasia la Gedeon fandó seliye ti wongɔ na tɛrɛ nga na zungɔ na tɛrɛ nɛ?

⁴ Gedeon dundó zo ti wongɔ na tɛrɛ nga na zungɔ na tɛrɛ. b Na ngoi mɛndó angelo pa hɛ̃ lo ya, Yehova pɔna lo ya, lo du wa sarangɔ azi ti Izraɛlɛ na bɛ ti azi ti Mɛdianɛ ko, lo tɛnɛndó na zungɔ na tɛrɛ zu ya: “Ndasewa tɛ mbi adu ndasewa mɛ yakere na ya ndasewa tɛ Manase, wa mbi du zo mɛ yakere nvɛ̃ni na ya ndasewa tɛ ato mbi.” (Bas. 6:15) Lo hũndó ya, ta ni lengbi na kumba niko ma, kanda Yehova hĩngandó ya, lo na kokisangɔ kumba ni. Na lége ti lisalisi tɛ Yehova ko, Gedeon kokisandó kumba tɛ lo na ndenge ti nzɔ̃ni nvɛ̃ni.

5. Na ya kpale mɛ wa la, seliye ti wongɔ na tɛrɛ ná zungɔ na tɛrɛ tɛ biazo alengbi ti tengbingɔ na pɛnɔ nɛ?

⁵ Abiazi ndo li kpengbani ti dungɔ na wo tɛrɛ nga na zungɔ na tɛrɛ na ya akpale zu. (Mik. 6:8; Aw. 20:18, 19) Ta ala ndo gonda tɛrɛ la na ndo aye mɛ ala na makoki ti lingɔ bere aye mɛndó ala li ma; wa ta ala ndo hũ nga ya, ani zanga tina na lo mɛ ya, ala ndo yu nga ndo ma. Abɛse ngaso ko, ala ndo tengbi na kpengba kpale na omɛ aba dungɔ na seliye ti wongɔ na tɛrɛ nga na zungɔ na tɛrɛ. Na ndakisa, biazo kɔi lengbi ti yengɔ lingɔ akumba gba, kanda na gesi ati pɛnɔ ti nɛngɔ ya, lo kokisa akumba niko zu na seni. Ngoi mɛndɛ̃ alengbi ti tɛnɛngɔ siɔni na lo tɛ ala na ndenge mɛ ala li na kumba kɔi ngaso bere gondangɔ ala na ndenge mɛ ala li kumba kɔi ngaso. Na ya akpale niko zu, alengbi ti dungɔ pɛnɔ ya, ala du na seliye ti wongɔ na tɛrɛ nga na zungɔ na tɛrɛ. Ngasia la se lɛlo tɛ Gedeon alengbi ti zangɔ ala na ya akpale ti ngaso nɛ?

6. Wangɔ mɛ abiazi alengbi ti luangɔ na omɛ aba seliye ti wongɔ tɛrɛ tɛ Gedeon nɛ? (Ba nga limɔ.)

 ⁶ Yɔ ya, azi mɛndɛ̃ aza mɔ. Zo mɛ na seliye ti wongɔ na tɛrɛ ko, lo ndo hĩnga ndo mɛ makoki tɛ lo angbã na ni, lo ndo ye ya, ta ni lengbi ti lingɔ aye zu ni kɔi ma. Gedeon fandó ya, lo na seliye ti wongɔ na tɛrɛ na ngoi mɛndó lo yɔ ka ti azi mɛndɛ̃ ya, ala za lo. (Bas. 6:27, 35; 7:24) Abiazi mɛ na ndara ndo li nga ngaso. Tony mɛ fale e tɛnɛ tɛnɛ tɛ lo uzu atɛnɛ ya: “Na lo ti se mɛndó akã na mbi na nyingambi ko, mbi ndo yendó lingɔ akwa zu abɛse omɛndó ta mbi na ngunu ti lingɔ ni ma. Na lo ni la mbi kpandó kpale mɛ aba dungɔ na seliye ti wongɔ tɛrɛ kaya prɔgramɛ tɛ e ti sambela ti ndasewa, wa mbi hũndandó ya mbi ya, lo tɛnɛ dangɔ bɛ tɛ lo na ndo seliye niko. Mbi ba ngandó kaya jw.org video mɛ bɛli tɛnɛ ni atɛnɛ ya, Pesáká formasyo, tyeláká basusu motema mpe pesáká bango nguya, ndenge Yesu asalaka.” Tony bandandó ilingɔ azi mɛndɛ̃ ya, ala ndo za lo na ya kwa. Anzɔ̃ kpale mɛndó lo lua nɛ? Tony tɛnɛ ya: “Akwa ti ya bombi ndo ɔndó na seni, wa mbi lua ngandó ngoi gba ti nɛngɔ ya, mbi li ya mangbi tɛ mbi na Yehova adu la kwɛ kpengbani.”

7. Se du ya, azi mɛndɛ̃ atɛnɛ siɔni na lo tɛ biazo kɔi, ngasia la lo lengbi ti landangɔ se lɛlo tɛ Gedeon nɛ? (Zaki 3:13)

⁷ Ta mɔ ma ngɔnzɔ na ngoi mɛ azi mɛndɛ̃ atɛnɛ siɔni na lo tɛ mɔ ma. Kpengba kpale mɛndɛ̃ mɛ abiazi ndo tengbi na ni adu na ngoi mɛ azi mɛndɛ̃ ndo tɛnɛ siɔni na lo tɛ la. Se lɛlo tɛ Gedeon alengbi ti zangɔ ala fãni mɛndɛ̃. Lo hĩngandó ya, ni du zo ti zangangɔ lengbingɔ, na lo ni la, lo dirindó na nzɔ̃ tɛnɛ na ngoi mɛndó azi ti ndasewa ti Efraimɛ atɛnɛ siɔni na lo tɛ lo. (Bas. 8:1-3) Ta Gedeon dirindó na tɛnɛ na ngɔnzɔ hɛ̃ la ma. Lo fandó ya, lo na zungɔ na tɛrɛ na ndenge mɛndó lo ma ala na seni nvɛ̃ni, wa na ndara zu lo lindó ya, ta kpengba tɛnɛ asi na popo tɛ la ma. Abiazi ti ndara ndo landa se lɛlo tɛ Gedeon na ndenge mɛ ala ndo ma azi mɛndɛ̃ na seni, wa ala ndo hɛ̃ gbinya ti nzɔ̃ni na ngoi mɛ ando tɛnɛ siɔni na lo tɛ la. (Di Zaki 3:13.) Na lingɔ ngaso ala ndo li ya, siriri ná mangbi adu ge ya bombi.

8. Ye mɛ ayɔ ya, abiazi ndo li na ngoi mɛ ahɛ̃ la gonda nɛ? Hɛ̃ se lɛlo kɔi.

⁸ Hɛ̃ Yehova ngoi zu gonda. Na ngoi mɛndó ahɛ̃ Gedeon gonda na ndenge mɛndó lo nwɔ azi ti Mediane ko, lo hɛ̃ndó ndima ni hɛ̃ Yehova. (Bas. 8:22, 23) Ngasia la ayata mɛ na kumba alengbi ti landangɔ se lɛlo tɛ Gedeon nɛ? Ale ala ndo hɛ̃ Yehova gonda na lo ti aye mɛ ala ndo li. (1 Kɔr. 4:6, 7) Na ndakisa, se agonda bianzo kɔi na lo ti makoki tɛ lo ti lingɔ adiskur ko, lo lengbi ti pangɔ hɛ̃ azi ya, e ndo lua fɔrmasiɔ̃ na lége ti tɛnɛ tɛ Nzapa, wa e ndo manda nga akpale gba na lége ti linɔ tɛ lo. Ale abianzi ndo hũnda tɛrɛ la na ndo mɛ: mbi ndo li adiskur ti nɛngɔ ya, mbi hɛ̃ Yehova gonda bere mbi ndo ye kamwisangɔ azi mɛndɛ̃? E mu se lɛlo tɛ nyita kɔli kɔi mɛ ili lo la Timothy. Na ngoi mɛndó lo lua kumba ti biazo fãnani ko, Timothy ndo yendó lingɔ adiskur mawoma. Lo tɛnɛ ya: “Mbi ndo sindó na tɛnɛ ti ebandeli nga na ase lɛlo mɛ mbi nvɛ̃ni mbi lɛkɛ. Azi ndo hɛ̃ndó mbi sia kɔli gba na lo ni. Ni ndo lindó ya, azi ndo kpã lɛ la na ndo mbi gba, kanda ta na ndo Ngbangɔ bere Yehova ma.” Timothy gbɔ̃ndó ndani ya, ayɔ ya, lo lɛkɛ se ti hangɔ lo tɛ lo ti nɛngɔ ya, ta azi ndo kpã lɛ la na ndo lo nvɛ̃ni ma, kanda na ndo Yehova. (Mas. 27:21) Ye mɛndó ni si na ni nɛ? Lo tɛnɛ ya: “Ayata gba apandó hɛ̃ mbi se mɛ adiskur tɛ mbi ndo za ala ya, ala gbe bɛ la na ya kpengba kpale, ala nwɔ ni, wa ala dɔ nga dã na Yehova. Atɛnɛ ti ngaso ahɛ̃ndó mbi dengɔ bɛ gba aɔ gonda mɛndó ando hɛ̃ mbi uzu na ya abulu gba.”

9. Ngasia adundó pɛnɔ ti nɛngɔ ya, Gedeon tɔndɔ Yehova wa lo du nga na ge ge ge nɛ? (Ba limɔ ti koko mbeti.)

⁹ Na pɛ luangɔ kumba ti fangɔ ngbanga tɛ aya Izraɛlɛ ko, mbilimbili nga na ge ge ge tɛ Gedeon atindó na ya tara. Lo luandó kumba ti kalangɔ etumbelo ti sambela ti Baala mɛndó to lo kĩ.  (Bas. 6:25, 26) Na gesi na pɛ bombingɔ asoda ti nɛngɔ ya, ala gwe to ko, Yehova pandó hɛ̃ Gedeon fãni sɛ ya, lo diri na asoda mɛndɛ̃ ka da tɛ ala, wa lo ngba bo na asoda yakere. (Bas. 7:2-7) Wa na ndani apandó hɛ̃ lo ya, lo tiri to na awa kula na bɛ bi.—Bas. 7:9-11.

10. Ngasi la alengbi ti tingɔ pɛnɔ ya, abiazi adu na tɔndɔngɔ nɛ?

¹⁰ Ayɔ ya, abiazi adu “dã ti tɔndɔngɔ.” (Zaki 3:17) Abiazi mɛ ndo du na tɔndɔngɔ ndo landa mbala kɔi wangɔ ti ya Ngbangɔ nga na ndia mɛ linɔ tɛ Yehova ndo hɛ̃. Na lingɔ ngaso, ala ndo zia se lɛlo ti nzɔ̃ni hɛ̃ azi mɛndɛ̃. Abɛse ngaso ko, ngoi mɛndɛ̃ alengbi ti dungɔ pɛnɔ ya, ala du na seliye ti tɔndɔngɔ. Na ndakisa, ala lengbi ti luangɔ andia ti fãnani gba na mbala kɔi, wa na gesi adi gbinyangbi ndia niko iɔ, na ngoi niko ko, alengbi ti dungɔ pɛnɔ ya, ala du na tɔndɔngɔ. Ngoi mɛndɛ̃ ala lengbi ti tingɔ na kitɛ na ndo andia ni, ala lengbi ti hũngɔ ya, ta ndia ni na lengbingɔ ma, bere ta ni du ti ndara ma. Ngoi mɛndɛ̃ alengbi ti hɛ̃ngɔ ala kumba mɛ na kpãngɔ dungɔ lɛ ngɛ̃́ tɛ la na ya kaka bere ala lengbi ti lingɔ bɔlɔkɔ na lo ni. Ngasia la abiazi alengbi ti landangɔ se lɛlo ti tɔndɔngɔ tɛ Gedeon na ya akpale ti ngaso nɛ?

11. Ye mɛ na zangɔ abiazi ya, ala du na tɔndɔngɔ nɛ?

¹¹ Landa andia na seni, wa kpã nga ni na kwa. Nzapa pandó hɛ̃ Gedeon se mɛ lo lengbi ti kalangɔ na etumbelo mɛndó to lo kĩ, ndo mɛ lo na kĩngɔ na etumbelo tɛ Yehova nga na sa mɛ lo na zɔngɔ ka ndo ni. Ta Gedeon tɛnɛndó siɔni na lo ti andia niko ma, lo tɔndɔndó ni na seni nvɛ̃ni. Ndɛ lo mɛ ko, abiazi ndo lua andia na lége ti linɔ tɛ Yehova na lége ti ambeti, pangɔ lo nga na andia mɛndɛ̃ mɛ ndo bata e na ya mi nga na ya nyingɔ, wa ni ndo li nga ya, e du dã na Yehova. E ndo ye abiazi gba na ndenge mɛ ala ndo landa na mbilimbili zu andia ti teokrasi. Ni ndo li ya, ayata zu ti ya bombi alua anzɔ̃ kpale.​—Nz. 119:112.

12. Ngasia la abiazi alengbi ti kpãngɔ wangɔ mɛ kaya Aebreo 13:17 na kwa se du ya, kpale kɔi agbinyangbi nɛ?

¹² Du dã ti mɛsɛnɛngɔ na akpale. Ta bɛ e li na ni ma ya, Yehova pandó hɛ̃ Gedeon ya, lo diri na ambanga asoda tɛ lo kaya da, wa lo ngbã na la yakere. (Bas. 7:8) Ngoi mɛndɛ̃ Gedeon ka hũndandó tɛrɛ lo ya, ‘Gbinyangbingɔ ti kpale mɛ adu nvɛ̃ni ngbondoni? Ni na longangɔ biani?’ Abɛse ngaso ko, Gedeon tɔndɔndó ndia niko. Abiazi ndo landa se lɛlo tɛ Gedeon ndɛ na ndenge mɛ ala ndo tɔndɔ andia ti teokrasi na ngoi mɛ ayɔ ka ti la ya, ala li kpale na landangɔ ndia ti fãnani. (Di Aebreo 13:17.) Na ndakisa, na bulu ti 2014 bombi tɛ adonzi agbinyangbindó se ti luangɔ falanga mɛ ndo kĩ na ada ti bombi nga na ada ti kota bombi. (2 Kɔr. 8:12-14) Ta bombi kɔi kɔi la na hɛ̃ngɔ falanga ti kĩngɔ na da ti bombi tɛ lo ma. Kanda ayata ti ya abombi ti ndo lɛ gigi zu na hɛ̃ngɔ falanga ti nɛngɔ ya, abombi ndɔni kɔi ti nɛngɔ ya, ando kĩ na ada ti bombi nga na ti kota bombi na ndo zu, abɛse ta ayata ti ya bombi niko ahɛ̃ falanga mɛ alengbi ti kĩngɔ na da ti ngaso ma. Na ngoi mɛndó nyita José ma tɛnɛ niko ko, lo dɛndó kitɛ, wa lo tɛnɛndó ya: ‘Ta ni na lengbingɔ ma, ta ala na kĩngɔ bɛ da ti bombi kɔi ma. Ta se mɛ kpale ndo nɔ na nɔ na ya gigi olo la ma.’ Ye mɛndó za José ya, lo landa ndia niko nɛ? Lo tɛnɛ ya:  “Tɛnɛ mɛ kaya Masese 3:5, 6 azandó mbi ya, mbi kpã bɛ mbi na ndo Yehova, wa ni hɛ̃ndó mbi anzɔ̃ kpale gba! Ta e ngbã bo na kĩngɔ ada ti bombi gba ma, kanda ni li nga ya e hɛ̃ atisa ndɛ̃ ndɛ̃ ndɛ̃ ti nɛngɔ ya, ta ɔngbi adu da ma.”

13. (a) Ye mɛndó Gedeon ye na bɛ lo kɔi nɛ? (b) Wa ngasia la abiazi alengbi ti landangɔ se lɛlo tɛ lo nɛ? (Ba nga limɔ.)

¹³ Li se bɛ Yehova na ge ge ge zu. Gedeon tɔndɔndó Yehova abɛse na ngoi mɛndó lo na mbɛtɔ, nga na ngoi mɛndó kwa mɛ ahɛ̃ lo alengbi ti kpãngɔ dungɔ lɛ ngɛ̃́ tɛ lo na ya kaka. (Bas. 9:17) Na pɛ tɛnɛngɔ tɛnɛ na Yehova ko, Gedeon yendó na bɛ lo kɔi ya, Yehova na zangɔ ni na ya kwa ti batangɔ azi tɛ lo. Abiazi mɛ ndo du kaya kɔdɔrɔ mɛ agbanzi kwa tɛ e ko, ala ndo landa se lɛlo tɛ Gedeon. Na ge ge ge zu, ala ndo mu ebongiseli ti tambwisangɔ abombi nga na kwa ti fangɔ tɛnɛ abɛse ando gbɔ̃nɔ ala, ndo sambisa ala, kwa tɛ la ndo wɛ bere ando hɛ̃ ala pɛnɔ. c Na ngoi mɛ gbanda kota pɛnɔ na bandangɔ, na yɔngɔ gbanda ya, abiazi adu na ge ge ge ti nɛngɔ ya, ala landa andia mɛ gbanda ala na luangɔ, abɛse ni na kpãngɔ dungɔ lɛ ngɛ̃́ tɛ la na ya kaka. Ngoi mɛndɛ̃ e na luangɔ gbanda andia na omɛ aba pangɔ tɛnɛ ti fangɔ ngbanga mɛ Ngbangɔ haka ni na ngu ti nganda ngombe, bere andia na ndo aye mɛ elengbi ti lingɔ ti nɛngɔ ya, e so kwá na ngoi ti to ti Armagedona.​—Ezk. 38:18; Suma 16:21.

14. Ngasi ala adundó kpɛnɔ ya, Gedeon gbe bɛ lo nɛ?

¹⁴ Ti nɛngɔ ya, Gedeon kokisa kumba mɛndó lo na ni mabere wa fangɔ ngbangɔ ko, lo lindó kwa kpengbani nvɛ̃ni. Na ngoi mɛndó azi tɛ lo ndo tiri to na bi na azi ti Mediane mɛ akpɛlɛ ko, Gedeon landandó ala na lége mɛ aɔ ti gbɛ ndo ti Jezreɛlɛ tee ka nyɔ tɛ ti Yɔrdani, mɛndó ngoi mɛndɛ̃ asĩ na asã. (Bas. 7:22) Gedeon ngbã bondó so nyɔ tɛ ti Yɔrdani? Ipɔ! Abɛse du ya, ala nzɛ̃ndó ko, lo ná asoda tɛ lo 300 afandó tɛ niko wa ala landandó awa kula tɛ la. Gbĩi ala gbɔ̃ndó azi ti Mediane wa ala nwɔndó ala na to ni.—Bas. 8:4-12.

15. Nda mɛ ngoi mɛndɛ̃ alengbi ti dungɔ pɛnɔ ya, biazo gbe bɛ lo nɛ?

¹⁵ Ngoi mɛndɛ̃ biazo lengbi ti hũngɔ ya, ta ni na ngunu ti batangɔ ayata ti ya bombi, kokisangɔ gwɛ̃ tɛ azi ti ndasewa tɛ ni, na ya mi na ya bingangɔ  li, nga na se mɛ ala ndo ma na tɛrɛ la ma. Na ya ngoi ti ngaso, ngasia la abiazi alengbi ti landangɔ se lɛlo tɛ Gedeon nɛ?

16-17. Ye mɛndó aza Gedeon ya lo gbe bɛ lo nɛ, wa ye mɛ abiazi alengbi ti yengɔ lo ni na bɛ la kɔi nɛ? (Yisaya 40:28-31) (Ba nga limɔ.)

¹⁶ Kpã bɛ mɔ ya, Yehova na hɛ̃ngɔ mɔ ngunu. Gedeon yendó na bɛ lo kɔi ya, Yehova na hɛ̃ngɔ lo ngunu, wa ta Yehova bindó kamɛnɛ lɛ lo ma, Yehova hɛ̃ndó lo ngunu biani. (Bas. 6:14, 34) Lá kɔi ndó ko, Gedeon ná asoda tɛ lo alandandó agbia see tɛ asoda ti Midiane na kpɛ na gɛrɛ la, ngoi mɛndɛ̃ agbia ni kondó ka ndo apunda. (Bas. 8:12, 21) Kanda na lége ti lisalisi tɛ Yehova ko, ge ge ge tɛ aya Izraɛlɛ ahɛ̃ndó nzɔ̃ sulu, ala gbɔnɔndó agbia niko. Abiazi, nga ma tɛ Gedeon ko, ĩ kpã bɛ ĩ na ndo Yehova, zo mɛ “ta ngunu ndo wɛ tɛrɛ lo ma, ta lo ndo nzɛ̃ nga ma.” Lo na hɛ̃ngɔ ĩ ngunu mɛ ĩ na gwɛ̃ ni.​—Di Yisaya 40:28-31.

¹⁷ E mu se lɛlo tɛ Mattew, nyita kɔli kɔi mɛ ndo li kwa kaya kɔmite ti dungɔ na mangbi na amɔnganga. Ye mɛndo aza lo ya, lo gbe bɛ lo nɛ? Matthew tɛnɛ ya: “Mbi hũndo se mɛ tɛnɛ mɛ kaya Filipɛ 4:13 adu biani. Ngoi mɛ ngunu ndo wɛ tɛrɛ mbi, wa ta kɔdɛ ti lingɔ aye mɛndɛ̃ ndo du da ma ko, mbi ndo li sambela na bɛ mbi kɔi hɛ̃ Yehova ya, lo hɛ̃ mbi ngunu ná bingangɔ li ti nzɔ̃ni ti nɛngɔ ya, mbi za ayata mbi awakristo. Na ya ngoi ti ngaso, mbi ndo hũndó se mɛ Nyingɔ vurú tɛ Yehova ndo hɛ̃ mbi ngunu ti nɛngɔ ya, mbi gbe bɛ mbi.” Nga ma Gedeon, abiazi ndo li kwa kpengbani ti bantangɔ angasã gbanga tɛ Yehova, abɛse ta ni ndo ndu ngoi zu woni ma. Kanda ale ala ndo du na seliye ti wongɔ na tɛrɛ, ta bɛ la li na ni ma ya, ta ala lengbi ti lingɔ aye zu mɛ ala na gwɛ̃ ti lingɔ ma. Ala lengbi ti kpãngɔ bɛ la ya, Yehova na mangɔ sambela tɛ la, wa lo na hɛ̃ngɔ ala ngunu ti nɛngɔ ya, ala gbe bɛ la.​—Nz. 116:1; Fil. 2:13.

18. Na ndunu ni, ngasia la abiazi alengbi ti landangɔ se lɛlo tɛ Gedeon nɛ?

¹⁸ Abiazi alengbi ti luangɔ awangɔ gba na mbage tɛ Gedeon. Ayɔ ya, abiazi ndo du ngoi zu na seliye ti wongɔ na tɛrɛ nga na zungɔ na tɛrɛ na ngoi mɛ ala ndo kokisa kumba tɛ la, na ngoi mɛ ahɛ̃ la gonda bere na ngoi mɛ ando tɛnɛ siɔni na lo tɛ la. Ayɔ ya, ala du na ge ge ge ná tɔndɔngɔ gba ni na ya ngoi mɛ ndangba bi adɛ dã. Wa ayɔ nga ya, ala du na loyengɔ ya, abɛse akpengba kpale mɛ la na tengbingɔ na ni adu ti ngasia ko, Nzapa na hɛ̃ngɔ ala ngunu. Biani, e ndo ye ayata kɔli niko mɛ ndo le kwa kpengbani, wa ‘e ndo ye la kwɛ̃ hɛ̃ngɔ ala ndima.’​—Fil. 2:29.