1. Ye mɛ ayɔ ya, e li ti nɛngɔ ya, e kũ bi tɛ Yehova nɛ?

 BI TƐ Yehova adu nɛ? Kaya Ngbangɔ tɛnɛ niko ndo fa ngoi mɛ Yehova na gangɔ kpɔngɔ awa kula tɛ lo, wa lo hɛ̃ azi mɛ ndo vɔrɔ lo dungɔ lɛ ngɛ̃́. Ndó na ngoi ti gã ko, Yehova ndo hɛ̃ndó tumbu hɛ̃ ambanga akɔdɔrɔ mɛndɛ̃ mɛndó ta ala ndo tɔndɔ lo ma. (Yis. 13:1, 6; Ezk. 13:5; Zek. 1:8) “Bi tɛ Yehova” mɛ e ndo kũ ya, aga na ngoi tɛ e ko, na bandangɔ na ngoi mɛ na hongɔ Babilɔnɛ kota kɔdɔrɔ, wa ndani na kɔngɔ na ngoi ti to ti Armagedona. Ti nɛngɔ ya, e so na ngoi ti “bi” niko ko, ayɔ ya, e banda lɛkɛngɔ tɛrɛ e na ngoi mɛ. Yezo yɔ ka ti e ya, e du dã na lo ti bi ti “kota pɛnɔ.” Tɛnɛ tɛ lo fa ya, ta ayɔ ya e lɛkɛ bo tɛrɛ e ma, kanda ayɔ nga ya, e “du dã” na lo ni.​—Mat. 24:21; Luka 12:40.

2. Ngasia la, mbeti ti 1 Tɛsalonikɛ alengbi ti zangɔ e nɛ?

² Kaya mbeti ti uzu mɛndó Toma Polo su to hɛ̃ awakristo ti Tɛsalonikɛ ko, lo salelandó andakisa ti zangɔ ala ya, ala du dã na lo ti kota bi ti fangɔ na ngbanga tɛ Yehova. Polo hĩngandó ya, ta bi tɛ Yehova na gangɔ bo na ngoi niko ma. (2 Tes. 2:1-3) Kanda lo sandó ngunu bɛ ayata lo ya, ala lɛkɛ tɛrɛ la mabere bi niko na gangɔ iɔ na ngoi niko. Elengbi nga ti kpãngɔ wangɔ tɛ lo na kwa na ya dungɔ lɛ ngɛ̃́ tɛ e. Zia e ba akpale mɛ: ti (1) Se mɛ bi tɛ Yehova na gangɔ na ni, ti (2)p azi mɛ ta na songo ma na, wa ti (3) se mɛ elengbi ti lɛkɛngɔ na tɛrɛ e.

3. Ngasia la, bi tɛ Yehova na gangɔ nga ma tɛ wa nzĩ na bi nɛ? (Ba nga limɔ)

³ “Nga ma se mɛ wa nzĩ ndo ga na ni na bi.” (1 Tɛs. 5:2) Adu se lɛlo ti uzu kaya ase lɛlo taa mɛ Polo salela ti fangɔ se mɛ bi tɛ Yehova na gangɔ na ni. Awa nzĩ ndo li ye iɔ iɔ, wa ala ndo li nga ni na bi na ngoi mɛ ta azi na kpengba lɛ ma. Bi tɛ Yehova nga na gangɔ mbalakaka, na butangɔ azi butangɔ. Abɛse awakristo ti  mbilimbili ko, ala nga na sutukangɔ na bi mɛ kpale niko na lingɔ na tɛrɛ lo. Kanda na ɔngbingɔ na asiɔ azi, ta ala kpilingɔ ma.

4. Ngasia la, bi tɛ Yehova na dungɔ mabere pɛnɔ tɛ wali mɛ gwa tɛ lo nɛ?

⁴ “Nga ma pɛnɔ ti gwa [tɛ] ta ngɔ.” (1 Tɛs. 5:3) Ta wali mɛ na ngɔ alengbi ti hĩngangɔ ngoi mɛ lo na dũngɔ na ni ma, kanda lo ndo hĩnga ya, lá kɔi gbanda ko, bi niko na gangɔ. Wa ngoi mɛ bi niko na lengbingɔ ko, ni na butangɔ lo butangɔ, na dungɔ bi ti pɛnɔ, ta lo nga na gbanzingɔ ni ma. Kwɛ kɔi, ta e hĩnga ngoi mɛ gbanda bi tɛ Yehova na gangɔ na ni ma, ta e hĩnga bi ná ngoi ni ma. Abɛse ngaso ko, e hĩnga ya, bi niko na gangɔ gbanda, Nzapa na fangɔ ngbanga tɛ asiɔ azi na mbala kaka, ta zo mɛ na banzingɔ ni da ma.

5. Ngasia la, kota pɛnɔ na dungɔ nga ma lá ti ndapelele nɛ?

⁵ Mabere tɛ lá mɛ ndo si na ndapelele. Ndakisa ti taa mɛ Polo hɛ̃ adu tɛ wa nzĩ mɛ ndo zi nzĩ na bi. Kanda ngoi mɛ Polo ndo hɛ̃ ndakisa niko ko, lo li mabere lo haka bi tɛ Yehova na ndapelele. (1 Tɛs. 5:4) Awa nzĩ ko la ndo zi nzĩ na bi ko, ngoi mɛndɛ̃ ta ala ndo da bɛ la ya, ngoi ndo ɔ iɔ iɔ ma. Na mbalakaka ndã lengbi ti dengɔ ala so ndoni, wa azi agbɔ̃ ala. Kwɛ kɔi, kota pɛnɔ na butangɔ azi mɛ nga awa nzĩ, na ndenge mɛ ala ndo ngbã lá kwɛ lingɔ aye mɛ bɛ Yehova ndo kɛ̃ na ya mbingo. Na ɔngbingɔ na azi ko ti ngaso ko, elengbi ti dungɔ dã ti kɛ̃ngɔ aseliye zu mɛ bɛ Yehova ndo kɛ̃, wa e li “akpale zu ti nzɔ̃ni, ti bɛtani, nga ti mbilimbili.” (Ef. 5:8-12) Polo salelandó andakisa niko sɛ ti fangɔ azi mɛ ta na songɔ na bi tɛ Yehova ma.

6. Ngasia la, azi gba ndo la langɔ ndɛ nɛ? (1 Tɛsalionikɛ 5:6, 7)

⁶ “Azi mɛ ndo la langɔ.” (Di 1 Tɛsalonikɛ 5:6, 7.) Polo haka azi mɛ ta na songɔ na lá ti bi tɛ Yehova ma na azi mɛ ndo la langɔ. Na lo mɛ ya,  ta ala ndo kpã lɛ la na ndo akpale mɛ ndo ɔ so gunda la nga na ngoi mɛ e na ni ma ko, ta ala na kɔdɛ ti hĩngangɔ akpale mɛ ndo ɔ so lɛ gigi ma, ni la ta ala ndo li ye kɔi ma. Ndɛ lo mɛ ko, azi gba ndo la langɔ ti nyingɔ. (Roma 11:8) Ta la ndo li ye mɛ ndo fa ya, e na olo na “ndangba bi” wa angbã dã bi ti kota pɛnɔ abanda ma. Akpengba kpale mɛ ndo li tɛrɛ lo so lɛ gigi zu alengbi ti zingɔngɔ na ambanga azi ka popo tɛrɛ la na ya langɔ ti nyingɔ ya, ala fa loyengɔ yakere na lo ti nzɔ̃ pa mɛ e ndo pa hɛ̃ la. Kanda na vundu zu, azi gba ka popo tɛ la ndo diri la langɔ na se lɛ nɛngɔ ya, ala zingɔ. Abɛse ambanga azi mɛndɛ̃ ndo da bɛ la na bi ti fangɔ ngbanga tɛ Yehova ko, ala ndo hũ ya, bi ni dɛ yɔngɔrɔ ni. (2 Pet. 3:3, 4) Kanda lá kɔi kɔi mɛ ndo ɔ ko, ni ndo fa na e ya, adu ngbondoni nvɛ̃ni ti nɛngɔ ya, e landa wangɔ tɛ Polo mɛ aba kɛ̃ngɔ langɔ langɔ.

7. Ngasia la, ahaka azi mɛ na kpilingɔ na lá ti ngɔnzɔ tɛ Nzapa na awa nyɔngɔ samba ɔngɔ nyɔ kpɔ̃ ni nɛ?

⁷ “Awa nyɔngɔ kana (samba) ɔngɔ nyɔ kpɔ̃ ni.” Toma Polo haka azi mɛ Nzapa na kpɔngɔ la mabere awa nyɔngɔ samba ɔngɔ nyɔ kpɔ̃ ni. Ta azi mɛ ati ambɛ ti samba ndo mu ekateli iɔ na ndo akpale mɛ ndo ɔ so gunda ala ma, wa ngoi gba, ala ndo mu gi ekateli ti siɔni. Kwɛ kɔi, ta asiɔ zi ndo ye nzɔ̃ pa tɛ Nzapa ma. Ala ndo pɔna bo lége mɛ ndo to la na kwá. Kanda ando hɛ̃ awakristo wangɔ ya, ala bata bingangɔ li tɛ la, wa ta ala tɛ bere ala nyɔ ɔngɔ nyɔ kpɔ̃ ni ma. (1 Tɛs. 5:6) Zo kɔi mɛ ndo ba kpale ti Ngbangɔ atɛnɛ ya, “zo mɛ ta lo ndo nyɔ samba ma ko, lo ndo du na bingangɔ li nga na dangɔ bɛ ti nzɔ̃ni, lo ndo du so kpɔ, ta lo ndo li aye ɔngɔ nyɔ kpɔ̃ ni ma, wa lo ndo mu nga ekateli ti nzɔ̃ni.” Nda mɛ ayɔ ya, e du so kpɔ, wa ta e ndo li aye ɔngɔ nyɔ kpɔ̃ ni ma nɛ? Ti nɛngɔ ya, ta e yɔrɔ tɛrɛ e na ya kpale ti politikɛ ti gigi olo ma. Azi na kpãngɔ katɛ e ndozu ya, e li na ya kpale ti politikɛ na ngoi mɛ bi tɛ Yehova adɛ dã ti gangɔ. Kanda ta bɛ e lengbi ti sɔngɔ na se mɛ e na lingɔ na kpale ma. Nyingɔ tɛ Nzapa na zangɔ e ti nɛ ya, e du so kpɔ, e bata bingangɔ li tɛ e, wa e mu nga ekateli ti ndara.​—Luka 12:11, 12.

8. Ngasia la, ndakisa ti seliye mɛ kaya 1 Tɛsalionikɛ 5:8 na zangɔ e ya, ta e la langɔ ma, wa e du na kpengba lɛ nɛ? (Ba nga limɔ.)

⁸ ‘E yu bɔngɔ ti nwa ti loyengɔ ná ti songo . . . wa e yu nga . . . kpɔtɔ ti nwa ti nzɔ̃ dangɔ bɛ.’ Polo haka e na asoda mɛ ndo yu bɔngɔ ti gwengɔ to. (Di 1 Tɛsalionikɛ 5:8.) Soda mɛ kpengbani ndo du lá kwɛ dã ti gwengɔ to. Ni nga ngaso na lo tɛ e. E ndo du lá kwɛ dã na lo ti bi tɛ Yehova na ndenge mɛ e ndo yu bɔngɔ ti nwa ti loyengɔ ná ti songo, nga na yungɔ kpɔtɔ ti nzɔ̃ dangɔ bɛ. Aseliye niko alengbi ti zangɔ e gba nvɛ̃ni.

9. Ngasia la, loyengɔ tɛ e ndo bata e nɛ?

⁹ Bɔngɔ ti nwa ndo bata bɛ soda. Loyengɔ ná songo ndo bata nga bɛ e. Ni na zangɔ e ya, e ngbã lá kwɛ lingɔ kwa hɛ̃ Nzapa nga na landangɔ pa gɛrɛ Yezo. Loyengɔ ndo to e, e ye na bɛ e kɔi ya, Yehova na hɛ̃ngɔ e mbana gɛrɛ na ndenge mɛ e ndo gi lo na bɛ e zu. (Aeb. 11:6) Ni na tongɔ e ya, e ngbã mbilimbili na mbage tɛ Gbia tɛ e Yezo abɛse na yɔngɔ ya e gbe bɛ e na ya pɛnɔ. Elengbi ti dungɔ na loyengɔ ti kpengbani ti nɛngɔ ya, e gbe bɛ e na ya akpengba kpale ti ya dungɔ lɛ ngɛ̃́ na mandangɔ se lɛlo tɛ azi ti ngoi tɛ e mɛ ala bata loyengɔ tɛ la, abɛse na ya tara bere kpengba kpale mɛ aba luangɔ falanga. Wa elengbi ti kpɛngɔ sɔ̃ ti dungɔ na gwɛ̃ ti aye ti gigi gba se du ya, e landa se lɛlo tɛ azi mɛ alɛkɛ kpale ti ya dungɔ lɛ ngɛ̃́ tɛ la ti nɛngɔ ya, ala kpã kwa ti Lo-lengɔ Gbia na ndo ti uzu kaya dungɔ lɛ ngɛ̃́ tɛ la. b

10. Ngasia lá songo mɛ e na ni na lo tɛ Nzapa nga na lo tɛ azi ti kartié tɛ e ando za e ya, e gbe bɛ e nɛ?

 ¹⁰ Songo ndo za zo ti nɛngɔ ya, ta lo la langɔ ma wa lo bata nga bingangɔ li tɛ lo. (Mat. 22:37-39) Songo tɛ Nzapa ndo za e ya, e gbe bɛ e kaya kwa ti fangɔ tɛnɛ abɛse akpengba kpale mɛ e ndo tengbi na ni kaya kwa ni adu ngasia. (2 Tim. 1:7, 8) Na lo mɛ ya, e ndo fa songo tɛ e na azi mɛ ta e na la na ya loyengɔ kɔi ma ko, e ndo ngbã lá kwɛ fangɔ tɛnɛ nga na lingɔ kwa na ya teritwarɛ tɛ e, ti nɛngɔ ya, e pa nzɔ̃ pa abɛse na lége ti telefɔnɛ nga na lége ti sungɔ ambeti. Ta e ndo nzɛ̃ ma, na lo mɛ ya, e na loyengɔ ya, lá kɔi gbanda ko, azi mɛ e na la na ya kartie kɔi na gbinyangbingɔ, wa ala nga na bandangɔ lingɔ aye mɛ mbilimbili.​—Ezk. 18:27, 28.

11. Nda mɛ adu ngbondoni ya, e du na songo na lo tɛ ayata kɔli ná ayata wali nɛ? (1 Tɛsalionikɛ 5:11)

¹¹ E ndo ye nga ayata kɔli ná ayata wali mɛ awakristo. E ndo fa ya, e ndo ye la na lége ti “sangbingɔ ngunu bɛ e nga na lingɔ ya, loyengɔ tɛ e ati kpengbani.” (Di 1 Tɛsalionikɛ 5:11.) Nga ma asoda mɛ ndo hɛ̃ngbi ti la ti nɛngɔ ya, ala nwɔ to ko, e ndo sangbi nga ngunu bɛ e. Ti biani ko, soda lengbi ti dɛngɔ fɔ̃ lo soda na kã zangangɔ ya, lo li ni na sãna. Kwɛ kɔi ta e ndo ye lingɔ aye ti siɔni tɛrɛ ayata e na sãna ma, ta e ndo ye nga diringɔ na siɔ kpale na ndo siɔ kpale ma. (1 Tɛs. 5:13, 15) E nga na fangɔ songo tɛ e na tɔndɔngɔ ayata mɛ ndo tambwisa kpale kaya bombi. (1 Tɛs. 5:12) Ngoi mɛndó Polo su mbeti ti uzu ato hɛ̃ ayata ti Tɛsalonikɛ ko, bombi ti Tɛsalonikɛ asindó fãnani, ta adɛ tindó bulu kɔi ma. Ayata mɛndó alua kumba ko, ta la ndɛ tindó kpengbani na ya nyingɔ ma, wa ala ndo yu ngandó ndo. Ayɔndó ya ando tɔndɔ ala. Se e dɔ dã na kota bi ti pɛnɔ ko, e na dungɔ na gwɛ̃ ti litambwisi tɛ abiazi ti ya bombi gba ɔngɔ ngoi mɛ ndɛ e na ni. Ngoi mɛndɛ̃, ta e na luangɔ malako mbala kɔi mɛ alo ka tɛ ayata mɛ kaya bombi tɛ Adonzi nga na biro ti filiale ma, ni la adu ngbondoni ya, e ye abiazi ti ya bombi wa e ndo tɔndɔ ala bandangɔ ndɛ. Abɛse kpale ni adu ngasia ko, e bata bingangɔ li tɛ e, ta e kpã bo lɛ e na ndo zangangɔ lengbingɔ tɛ la ma, kanda e kpã lɛ e na ndo se mɛ Yehova ndo tambwisa ayata niko ti mbilimbili na lége tɛ Yezo.

12. Ngasia la, nzɔ̃ dangɔ bɛ tɛ e ndo bata bingangɔ li tɛ e nɛ?

 ¹² Nga ma se mɛ kpɔtɔ ti nwa ndo bata li soda ko, nzɔ̃ dangɔ bɛ ndo bata nga bingangɔ li tɛ e. Bɛta nzɔ̃ dangɔ bɛ mɛ e na ni ndo za e ya, e hĩnga ya, ta aye ti gigi mɛ na tina bɛ yakere ma. (Fil. 3:8) Nzɔ̃ dangɔ bɛ tɛ e ndo za e ya, e du so kpɔ, wa ta li e titiri ma. Ni du nga kpale mɛ asi na Wallace ná Laurinda, mɛ ndo vɔrɔ Yehova kaya kɔdɔrɔ kɔi ti Afrique. Awa dũngɔ ala zu sɛ akpilindó bo na ya pɔsɔ taa gɛgɛrɛ. Na lo ti siɔ ngã ti COVID-19 ko, ta ala gwendó ba azi ti ndasewa tɛ la na lo ti kwá ni ma. Wallace tɛnɛ ya: “Na lo ti nzɔ̃ dangɔ bɛ tɛ e ko, ngoi mɛ mbi ndo da bɛ mbi na ala ko, ta mbi hũ la nga ma se mɛndó mbi ndo hũ na la uzu ti la kpilingɔ ma, kanda mbi ndo hũ ala mabere bi ti uzu mɛ ala na singɔ na ni kaya gigi ti fãnani. Nzɔ̃ dangɔ bɛ niko ndo zu na bɛ mbi na ngoi mɛ mbi ndo li kpengbani ti nɛngɔ ya, mbi hã asɔngɔ bɛ bere abingangɔ li mɛ mbi ndo du na ni na lo tɛ azi tɛ mbi mɛ akpili.”

13. Ye mɛ elengbi ti lingɔ ti nɛngɔ ya, e lua Nyingɔ vurú nɛ?

¹³ “Ta e mingɔ wá ti nyingɔ ma.” (1 Tɛs. 5:19, NWT) Polo haka Nyingɔ vurú mabere wá mɛ ndo za kaya tɛrɛ e. Ngoi mɛ e ndo lua Nyingɔ vurú tɛ Nzapa ko, e ndo ti na ge ge ge nga na dengɔ bɛ kpengbani na lo ti aye mɛ mbilimbili, wa e ndo ti nga na ngunu ti lengɔ kwa na lo tɛ Yehova. (Roma 12:11) Ye mɛ elengbi ti lingɔ ti nɛngɔ ya, e lua Nyingɔ vurú nɛ? Elengbi ti lingɔ sambela na lo ni, mandangɔ tɛnɛ tɛ Nzapa mɛ asu ni na lége ti Nyingɔ vurú tɛ lo, wa e du nga na mangbi na linɔ tɛ lo mɛ lo ndo tambwisa ni na lége ti Nyingɔ vurú. Se e li ngaso ko, ni na zangɔ e ya, “e ti na le ti nyingɔ.”​—Gal. 5:22, 23.

14. Aye mɛ ayɔ ya, e kpɛ ni se e ye ngbãngɔ lá kwɛ luangɔ Nyingɔ vurú tɛ Nzapa nɛ? (Ba nga limɔ.)

¹⁴ Se Nzapa hɛ̃ e Nyingɔ vurú tɛ lo ko, ayɔ ya e du na kpengba lɛ ya, “ta e mingɔ wá ti nyingɔ ma.” Nzapa ndo hɛ̃ Nyingɔ vurú tɛ lo hɛ̃ azi mɛ ndo bata bingangɔ li tɛ la nga na seliye tɛ la. Se du ya, e ndo du na bingangɔ li ti siɔni, wa e ndo  mu nga ekateli ti siɔni ko, ta lo na ngbãngɔ lá kwɛ hɛ̃ngɔ e Nyingɔ vurú tɛ lo ma. (1 Tɛs. 4:7, 8) Ti nɛngɔ ya, e ngbã lá kwɛ luangɔ Nyingɔ vurú tɛ Nzapa ko, ayɔ ya, ‘ta e hũ atɛnɛ ti aprɔfesi ya, adu ye ti gɛgɛrɛ ma.’ (1 Tɛs. 5:20)Tɛnɛ mɛ “Prɔfesi”, ndo fa tɛnɛ mɛ Yehova ndo tɛnɛ hɛ̃ e na lége ti Nyingɔ vurú, wa gba ni na lo ti ngoi mɛ lo na gangɔ na ni, nga na lo ti akpale mɛ na lingɔ tɛrɛ lo iɔ na ngoi tɛ e. Ta elengbi ti dungɔ na dangɔ bɛ ya, bi niko adɛ yɔngɔrɔni wa, ta Armagedona nga na gangɔ tãngɔ e na dungɔ lɛ ngɛ̃́ ma. Kanda e ye batangɔ bi niko kaya bingangɔ li tɛ e, wa e da nga bɛ e ya ayɔ ya, na ya dungɔ lɛ ngɛ̃́ tɛ e ti bi zu ko, e du na seliye ti nzɔ̃ni, wa “e li nga ye mɛ ndode bɛ Nzapa.”​—2 Pet. 3:11, 12.

15. Ngasia la, elengbi ti kɛ̃ngɔ tɛnɛ ti nvɛ̃nɛ tɛ asiɔ nyingɔ mɛ ala ndo tɛnɛ na ndo zu nɛ? (1 Tɛsalionikɛ 5:21)

¹⁵ Angbã yakere awa kula tɛ Nzapa na tɛnɛngɔ ya: “Siriri ta ye ti kpɛngɔ da ma!” (1 Tɛs. 5:3, NWT) Tɛnɛ tɛ asiɔ nyingɔ na mungɔ lɛ sese zu, wa ni nga na handangɔ azi gba. (Suma 16:13, 14) Wa e mɛ? Ta e na ziangɔ ya, tɛnɛ tɛ la handa e ma, se du ya, “e ndo ba akpale zu na seni bere e ndo ‘gi hĩngangɔ’ aye zu.” (Di 1 Tɛsalionikɛ 5:21.) Tɛnɛ ti grɛkɛ mɛ agbinyangbi na “bangɔ kpale zu na seni” ando salela nindó na lo ti aye mɛ azi ndo li so tarangɔ nwã mɛ ngbondoni. Ni la, ayɔ ya e tara akpale mɛ e ndo ma nga na aye mɛ e ndo di ti hĩngangɔ bere tɛnɛ ni du biani. Ni dundó ngbondoni na lo tɛ azi ti Tɛsalonikɛ, wa ni nga na dungɔ ngbondoni na lo tɛ e na ngoi mɛ e dɔ dã na kota bi ti pɛnɔ. Na nɛngɔ ya, e ye tɛnɛ mɛ azi ndo tɛnɛ hɛ̃ e na ndo ngbongbo ko, elengbi ti salelangɔ bingangɔ li tɛ e ti hakangɔ kpale mɛ e ndo di ná kpale mɛ e ndo ma na omɛ Ngbangɔ ndo tɛnɛ nga na omɛ linɔ tɛ Yehova ndo ha. Se e li ngaso ko, ta tɛnɛ tɛ asiɔ nyingɔ bere sɔ̃ tɛ la na handangɔ e ma.​—Mas. 14:15; 1 Tim. 4:1.

16. Nzɔ̃ dangɔ bɛ mɛ e ndo ye lo ni na bɛ e kɔi nɛ, wa ekateli mɛ e mu nɛ?

¹⁶ E hĩnga ya, awa kwa tɛ Yehova na songɔ na ngoi ti kota bi ti pɛnɔ. Kanda ta e hĩnga ye mɛ na singɔ na zo kɔi kɔi so popo tɛ e ma. (Zaki 4:14) Na lo ni la, abɛse ngoi ti kota bi aga tã e bere e kpili uzu ti nɛngɔ ya ni ga ko, e zu na luangɔ mbana gɛrɛ ti dungɔ lɛ ngɛ̃́ ti kaka se du ya, e ngbã mbilimbili. Awakristo mɛ ahĩni la na kpɔ̃ na dungɔ ndoni kɔi na Yezo ka ndozu. Angasã ngbaga mɛndɛ̃ na dungɔ ka paradiso ge lɛ sese. Ayɔ ya, e zu e kpã lɛ e na ndo nzɔ̃ dangɔ bɛ niko, wa e lɛkɛ tɛrɛ e na lo ti bi tɛ Yehova mɛ angbã dã!