1-2. Akpale mɛ e ndo tengbi na ni ndɛ mɛ ni kwɛ kɔi na tɛ Lota nɛ?

 NGOI mɛ e ndo hũ ndara ti siɔni mɛ azi na ni ndɛ ko, e ndo ma tɛrɛ e nga ma se mɛndó Lota ma na tɛrɛ lo. Lo “ndó na sɔngɔ bɛ kpengbani na lo ti seliye ti siɔni mɛndó azi mɛ azanga ndia na ni,” na lo mɛ ya, lo hĩngandó ya, bɛ To e mɛ ka ndozu akɛ̃ aseliye ti siɔni. (2 Pet. 2:7, 8) Na lo mɛ ya, Lota ndó na tɔndɔngɔ nga songo ti kpengbani na lo tɛ Nzapa ko, atondó lo ya, lo kɛ̃ asiɔliye mɛndó azi ti ngoi tɛ lo na ni. E nga ndɛ na popo tɛ azi mɛ ta ala ndo tɔndɔ ndia tɛ Nzapa ma. Abɛse ngaso ko, elengbi ti ngbãngɔ lá kwɛ vuruni na ya bingangɔ li tɛ e, se du ya e ndo li ya, songo tɛ e na lo tɛ Yehova ati kpengbani, wa e du nga na seliye ti kpɛ̃ngɔ lingɔ ye mɛ na hɛ̃ngɔ lo sɔngɔ bɛ.​—Mas. 14:2.

² Kaya mbeti ti Masese, Yehova hɛ̃ e awangɔ mɛ alengbi ti sangɔ ngunu bɛ e. AwaKristo zu, akɔli ná awali, apalanga ná abange alengbi ti luangɔ anzɔ̃ kpale na lo ni.

3. Na bangɔ mbeti ti Masese 17:3, ye kɔi ti ngbondoni mɛ ndo to e ya, e bata bɛ e nɛ? (Ba nga limɔ.)

³ Ye ti ngbondoni mɛ ndo to e ya, e bata bɛ e ti yika yika adu ya, Yehova ndo ba bɛ e. Wa ngoi mɛ lo ndo ba bɛ e ko, lo ndo hũ se mɛ e aye mɛ kaya bɛ e, wa lo hĩnga nzɔ̃ni se mɛ e da. (Di Masese 17:3.) Se e kpã bɛ e na ndo wangɔ ti ndara niko ko, ni lengbi ti zangɔ e ya, e du na dungɔ lɛ ngɛ̃́ ti kaka. (Yn. 4:14) Wa ta akpale ti nvɛ̃nɛ nga na seliye ti bí ti gigi tɛ Satana na luangɔ ndo ka bɛ e ma. (1 Yn. 5:18, 19) Se du ya, e ndo dɔ dã na Yehova ko, songo ná tɔndɔngɔ tɛ e na mbage tɛ lo na maingɔ. E ndo kɛ̃ lingɔ siɔ kpale na lo mɛ ya, ta e ye hɛ̃ngɔ To e sɔngɔ bɛ ma. Hãngɔ ni zingɔ, ngoi mɛ bɛ e ndo handa e ti nɛngɔ ya e li siɔ kpale ko, e ndo hũnda tɛrɛ e na ndo mɛ: ngasia la mbi lengbi ti lingɔ ye ti  hɛ̃ngɔ sɔngɔ bɛ hɛ̃ zo mɛ afa mbi na songo nɛ?’​—1 Yn. 4:9, 10.

4. Ngasia la, kpɛngɔ Yehova aza nyita wali kɔi ti nɛngɔ ya, lo nwɔ tara nɛ?

⁴ Nyita wali Marta, mɛ ndo du ka Croatie mɛndó lo tengbi na tara mɛ aba lingɔ pite atɛnɛ ya, “Ta mbi ndo kokandó bingandó li mbi nzɔ̃ni ma, wa adundó pɛnɔ ya, mbi gbe bɛ mbi na omɛ aba kokisangɔ gwɛ̃ ti tɛrɛ mbi. Kanda kpɛngɔ Yehova abatandó mbi.” b Ngasia la, dungɔ na seliye ti kpɛngɔ Nzapa agbanzindó Marta ya, ta lo mu ekateli ti siɔni ma nɛ? Lo tɛnɛ ya, lo gbɔ̃ndó li lo na ndo siɔ kpale mɛ na singɔ se du ya, lo li ye kɔi ti siɔni. Elengbi nga ti lingɔ ngaso. Siɔ kpale mɛ kpengbani adu ya, e na hɛ̃ngɔ Yehova ngɔnzɔ, wa ni na lingɔ ya, ta e du ka popo tɛ azi mɛ na vɔrɔngɔ lo bwai na bwai ma.​—Eb. 6:5, 6.

5. Wangɔ mɛ mɔ lengbi ti luangɔ na ndo tɛnɛ tɛ Leo nɛ?

⁵ Ngoi mɛ e ndo tɔndɔ Yehova ko, e ndo li kpengbani ya, ta e li ye ti siɔni ma. Leo, mɛ ndo du ka Congo-Kinshasa, aluandó wangɔ. Bulu siɔ na pɛ mungɔ batisimɔ tɛ lo ko, lo bandandó nɔngɔ nɔ na akwa ti siɔni. Lo ndo dandó bɛ lo ya, na lo mɛ ya ta lo ndo li tɛ lo ye ti siɔ ma ko, ta Yehova na hũngɔ lo siɔni ma. Kanda so pɛni, siɔ liye tɛ akwa lo ali ya, lo banda nyɔngɔ samba ɔngɔ nyɔ kpɔ̃ ni, lo banda nga lingɔ aye ti bí. Wa na gesi lo banda bingangɔ li lo na ndo ye mɛndó awa dũngɔ lo aha na lo, nga na dengɔ bɛ mɛndó lo na ni na ngoi mɛndó lo ndo li kwa hɛ̃ Yehova. Nzɔ̃ lo mɛndó asi nɛ? Lo dirindó lo banda lingɔ ye mɛndó lo ndo li uzu. Ngoi mɛ abiazi ahɛ̃ lo wangɔ ko, lo dirindó lo banda vɔrɔngɔ Yehova. Ndɛ lo mɛ ko, lo na dengɔ bɛ ti lingɔ kwa mabere biazo, nga wa sungɔ lége ti kotani.

6. Se lɛlo tɛ awali ti sɛ ti yika yika mɛ e na mandangɔ na ya tɛnɛ mɛ nɛ?

⁶ Na ya tɛnɛ mɛ, e na bangɔ mbeti ti Masese shapitrɛ ti 9 mɛ ndo tɛnɛ tɛnɛ tɛ awali sɛ ti yika  yika mɛ kɔi ndo fa ndara, lo mɛndɛ̃ ndo fa yungɔ ndo. (Ba nga Roma 5:14; Gal. 4:24) Ngoi mɛ e ndo manda tɛnɛ mɛ ko, ta bɛ e li na ni ma ya, gigi mɛ tɛ Satana asĩ na kpale mɛ aba bombingɔ tɛrɛ tɛ kɔli ná wali na ndenge ti bí nga na pɔrnɔgrafi. (Ef. 4:19) Adu ngbondoni ya, e ngbã lá kwɛ dungɔ na seliye ti kpɛngɔ Nzapa, wa e kpɛ seliye ti siɔni. (Mas. 16:6) Na lo ni la, zo kɔi kɔi so popo tɛ e, kɔli bere wali alengbi ti luangɔ nzɔ̃ kpale na mandangɔ tɛnɛ mɛ Masese shapitrɛ ti 9 tɛnɛ. Kɔi kɔi ka popo tɛ awali mɛ atɛnɛ tɛnɛ tɛ la ndo ili azi mɛ azanga ndara afa ya, azi mɛ “ta ala na bingangɔ li ti nzɔ̃ni ma.” Lo ndo tɛnɛ hɛ̃ la ya, ‘ĩ ga ĩ tɛ ye ka tɛ mbi!’ (Mas. 9:1, 5, 6, 13, 16, 17) Kanda aye mɛ na singɔ na azi mɛ aye gwengɔ ka tɛ awali niko sɛ mɛ akɛsɛnɛ nɛ?

7. Na bangɔ Masese 9:13-18 ye mɛ ndo si na azi mɛ ndo ye gwengɔ ka tɛ wali ti bubulu nɛ? (Ba nga limɔ.)

⁷ Invitasiɔ̃ mɛ “wali ti bubulu” ndo hɛ̃ azi nɛ? (Di Masese 9:13-18.) Lo ndo ili azi mɛ ta na bingangɔ li ti nzɔ̃ni ma ya, “ĩ li ge.” Lo ye lingɔ fɛtɛ ndoni kɔi na ala. Kanda ye mɛ na singɔ na ala nɛ? Ngbangɔ tɛnɛ ya, “azi mɛ azanga ngunu kaya kwá ndo du kai.” Ngoi mɛndɛ̃ mɔ lengbi ti dangɔ bɛ mɔ na tɛnɛ mɛndɛ̃ mɛ amangbi na tɛnɛ mɛ kaya Masese. Masese shapitrɛ ti 2 atɛnɛ ngaso na lo tɛ “wali ti mobulu” nga na lo tɛ “wali mɛ ndo li aye ti bí,” Ngbangɔ pa ya: “Da tɛ lo ndo to azi na kwá.” (Mas. 2:11-19) Wa Masese 5:3-10 atɛnɛ nga tɛnɛ tɛ wali mɛndɛ̃ ti “kili kili” mɛ “gɛrɛ lo ndo zu kaya [du ti] kwá.”

8. Kpale mɛ elengbi ti tengbingɔ na ni mɛ elengbi ti mungɔ ekateli na lo ni nɛ?

⁸ Azi ko la “wali ti bubulu” ndo ili ala ko, ala na ekateli ti yengɔ bere kɛ̃ngɔ gwengɔ ka tɛ lo. Ngoi mɛndɛ̃ elengbi nga ti tengbingɔ na kpale ti ngaso. Se du ya, zo kɔi to e ya, e li ye ti bí, bere se du ya, kaya internet e si na ndo pɔrnɔgrafi bere aye mɛndɛ̃ ti bí ko, ye mɛ e na lingɔ nɛ?

9-10. Nda mɛ ayɔ ya, e kɛ̃ seliye ti bombingɔ tɛrɛ na ndenge ti bí nɛ?

⁹ E na aye taa mɛ alengbi ti tongɔ e ya, e kɛ̃ lingɔ aye ti bí. “Wali ti bubulu” ndo da bɛ lo ya, “ngu mɛ zo nzĩ ni nzingɔ ko, ando lɔgɔ gba.” Ngu niko mɛ anzĩ ni nzĩngɔ adu nɛ? Ngbangɔ haka bombingɔ tɛrɛ tɛ kɔli ná wali mɛ ali libala na ngu ti dedeni. (Mas. 5:15-18) Kɔli ná wali mɛ ali libala na landangɔ ndia tɛ Nzapa ko, bombingɔ tɛrɛ alengbi ti hɛ̃ngɔ ala dengɔ bɛ. Kanda ni ɔngbi madãma na “ngu mɛ zo nzĩ ni nzĩngɔ.” Na lo nɛ? Na lo mɛ ya, ngu niko afa bombingɔ tɛrɛ na ndenge ti bí mɛ ta Nzapa azi lége na lo ni ma. Azi ko la ndo bombi tɛrɛ na ndenge ti bí ko, ala ndo li ni ngoi zu na ɔndɛngɔ tɛrɛ la nga ma se ko la awa nzĩ ndo li aye na gbɛ mbingo. Ala lengbi ti hũngɔ ya, ‘ngu niko mɛ ala nzĩ ni  nzĩngɔ ando lɔgɔ mawoma’ wa ta zo kɔi alengbi ti hũngɔ ala ma. Kanda ala ndo handa tɛrɛ la nvɛ̃ni na lo mɛ ya, Yehova ndo hũ aye zu. Wa ta ye ti siɔni mɛ aɔ fangɔ mangbi tɛ e ná Yehova da ma. Na lo ni la, ta ye kɔi ti dedeni bere ti nzɔ̃ni na ya lingɔ aye mɛ na gbɛ̃ngɔ mangbi tɛ e na Yehova da ma. (1 Kɔr. 6:9, 10) Ta angbã bo so ndoko ma, akpale mɛndɛ̃ gba ti siɔni alengbi nga ti singɔ na zo mɛ ali aye ti ngaso.

¹⁰ Bombingɔ tɛrɛ na zo mɛndɛ̃ na ndenge ti bí alengbi ti hɛ̃ngɔ kamɛnɛ, bingɔ buba tɛrɛ zo, mɛngɔ ngɔ ti lɛ talége nga na kangbingɔ ndasewa. Ta kitɛ da ma, na dungɔ ye ti ndara se e kɛ̃ na bɛ e kɔi lingɔ kaya da tɛ “wali ti bubulu” wa e kɛ̃ nga tɛngɔ ye ka tɛ lo. Hãngɔ kpingɔ kwá na ya nyingɔ zingɔ ko, azi gba mɛ ndo bombi tɛrɛ la na ndenge ti bí ko, ala lengbi ti mungɔ siɔ ngã mɛ alengbi ti lingɔ ya, ala kpi kwá iɔ nvɛ̃ni. (Mas. 7:23, 26) Vɛrse ti 18 ti shaptrɛ 9 akɔ nda tɛnɛ mɛ na pangɔ ya: “Azi mɛ aye gwengɔ ka tɛ wali niko ko, ala kaya du ti kwá.” Nda mɛ azi gba ndo ye gwengɔ ka tɛ lo, abɛse gwengɔ kai na akpale gba ti siɔni nɛ?​—Mas. 9:13-18.

11. Nda mɛ bangɔ pɔrnɔgrafi adu siɔni nɛ?

¹¹ Ye mɛndɛ̃ mɛ ayɔ ya, e kpɛ adu bangɔ pɔrnɔgrafi, sɔ̃ mɛ azi gba ndo ti ndɛ na ya ni. Azi mɛndɛ̃ ndo da bɛ la ya, ta bangɔ pɔrnɔgrafi adu siɔni ma, ta ni lengbi nga ti singɔ na siɔ kpale ma. Kanda ti biani ko, bangɔ pɔrnɔgrafi adu siɔni nvɛ̃ni, ni ndo li ya, zo zanga tɔndɔngɔ tɛrɛ lo nvɛ̃ni nga na azi mɛndɛ̃, ando du nga kpengbani ya, zo zia mɔmɛsɛnɔ niko ti siɔni. Ando du pɛnɔ ya, bɛ zo li na aye ti bí mɛ lo hũ ni ka lɛ pɔrnɔgrafi iɔ. Ta pɔrnɔgrafi alengbi ti zangɔ zo ya, lo hã agwɛ̃ ti siɔni mɛ ka bɛ lo ma, kutu ni ndo li ya, agwɛ̃ ti ngaso ati kpengbani nvɛ̃ni. (Kɔl. 3:5; Zaki. 1:14, 15) Na lo ni la, azi gba mɛ ndo ba pɔrnɔgrafi ko, ngbĩi ala ndo li aye ti bí.

12. Se e ti na ndo foto bere video kɔi mɛ ta adu ti pɔrnɔgrafi ma, kanda ni lengbi ti lingɔ ya, e ti na gwɛ̃ ti lingɔ aye ti bi ko, ye mɛ elengbi ti lingɔ nɛ?

¹² Na lo mɛ ya, e du awakristo ko, ye mɛ elengbi ti lingɔ se du ya, kpale kɔi ti pɔrnɔgrafi asi ka lɛ telefɔnɛ tɛ e bere ka ndo mɛndɛ̃ na mbala kɔi nɛ? Ayɔ ya, e hã lɛ e mbala kɔi na ndo ni e zi. Na dungɔ woni ya e kɛ̃ bangɔ ni se du ya, e ndo hũ ya, mangbi tɛ e ná Yehova la adu ye mɛ aɔ ngbondoni. Abɛse ta ambanga afoto mɛndɛ̃ adu ti pɔrnɔgrafi ma ko, alengbi ti lingɔ ya, e ti na gwɛ̃ nga na dangɔ bɛ ti lingɔ aye ti bí. Nda mɛ ayɔ ya, e kɛ̃ nga alimɔ ti ngaso nɛ? Na lo mɛ ya, ta e ye lingɔ bɛ yakere aye mɛ na lingɔ ya, e ti kɔmbɛ ka bɛ e ma. (Mat. 5:28, 29) David biazo kɔi mɛ ndo du ka Thailand atɛnɛ ya: “ Na ngoi mɛ mbi ndo hũ afoto bere avideo mɛ ta ni du mbala kɔi video ti pɔrnografi ma ko, mbi ndo hũnda tɛrɛ mbi na ndo mɛ: ‘Abɛse ta ni du ti pɔrnografi ma ko, Yehova na dungɔ na dengɔ bɛ se du ya, mbi ba ni?’ Bingangɔ li ti ngaso ndo za mbi ya, mbi li aye na ndara.”

13. Ye mɛ alengbi ti zangɔ e ya, e li aye na ndara nɛ?

¹³ Dungɔ na mbɛtɔ nga kpɛngɔ lingɔ aye mɛ na hɛ̃ngɔ Yehova vundu na zangɔ e ya, e li aye na ndara. Kpɛngɔ Nzapa adu “tongɔ nda ndara [bere dunda ndara].” (Mas. 9:10) Ni la adu ye mɛ Mbeti ti Masese shapitrɛ ti 9 atɛnɛ ni, kaya vɛrse ni atɛnɛ tɛnɛ tɛ wali ti yika yika mɛ ahaka lo na “bɛta ndara.”

14. Ɔngbi mɛ na ya invitasiɔ̃ mɛ mbeti ti Masese shapitrɛ ti 9:1-6 atɛnɛ tɛnɛ ni na omɛ e lo ti mandangɔ nɛ?

¹⁴ Di Masese 9:1-6. So ya vɛrse mɛ, wali ti ndara mɛ ndo ili azi adu Yehova, zo mɛ bɛta ndara ndo lo ka tɛ lo nga wa lingɔ e. (Mas. 2:6; Roma 16:27) Atɛnɛ nga tɛnɛ ti da kɔi ti kotani mɛ na angbó ti kpengbani mbalambala. Ndakisa mɛ ndo fa ya, Yehova na songo, lo ndo sepala nga na azi zu mɛ ndo kpã awangɔ ti ndara tɛ lo na kwa na ya dungɔ lɛ ngɛ̃́ tɛ la.

15. Ye mɛ Nzapa ndo ili e ya, e li nɛ?

 ¹⁵ Yehova du wa songo, lo ndo hɛ̃ e aye gba so kokisangɔ gwɛ̃ tɛ e. Na bangɔ se lɛlo tɛ wali ti yika yika mɛ ndo fa “ndara ti mbilimbili” ko, e lua wangɔ ya, Yehova du wa songo, wa lo ndo hɛ̃ e aye mɛ e na gwɛ̃ ni. Vɛrse niko tɛnɛ ya, wali niko ndo ili azi ya, ala li kaya da tɛ ni, wa ala tɛ tɛ ti mi mɛ nzɔ̃ni mɛ lo tɔ, wa ala nyɔ̃ nga samba mɛ lo lɛkɛ ni nzɔ̃ni. (Mas. 9:2) Kanda na bangɔ vɛrse ti 4 na ti 5 ko: “[Ndara ti mbilimbili] ndo tɛnɛ hɛ̃ azi mɛ azanga kɔdɛ ya: ‘Ĩ ga ĩ tɛ mapa tɛ mbi.’” Nda mɛ elengbi ti yengɔ gwengɔ ka tɛ wali ti ndara nɛ? Yehova ye ya, ayati lo adu na ndara, wa ta kpale kɔi ti siɔni asi na ala ma. Ta lo ye ya, e li aye mɛ na hɛ̃ngɔ e pɛngɔ, wa e lua wangɔ na gesi ma. Na lo ni la, “lo ndo bata ndara ti mbilimbili na lo tɛ azi ti mbilimbili.” (Mas. 2:7) Se e ndo kpɛ Yehova na bɛ e kɔi ko, e na dungɔ na gwɛ̃ kpengbani ti hɛ̃ngɔ lo dengɔ bɛ, e na landangɔ awangɔ tɛ lo ti ndara, wa e nga na dungɔ na dengɔ bɛ.​—Zaki 1:25.

16. Ngasia la, kpɛngɔ Nzapa azandó Alain ya, lo mu ekateli ti ndara nɛ, wa anzɔ̃ kpale mɛndó lo lua nɛ?

¹⁶ E ba se mɛ tɔndɔngɔ Nzapa aza Alain ya, lo mu ekateli ti ndara. Alain du biazo ti ya bombi, lo nga wa hangɔ mbeti. Lo tɛnɛ ya, “afɔ̃ mbi gba ti kwa ndo hũ ya, afilmɛ ti pɔrnɔgrafi adu ye mɛ ndo za zo ya, lo manda kpale mɛ aba bombingɔ tɛrɛ tɛ kɔli ná wali.” Kanda Alain hĩngandó ya, ta ni du mbilimbili ma. Lo di lo tɛnɛ ya, “Na lo mɛ ya, mbi ye Yehova, wa mbi ndo tɔndɔ nga lo ko, mbi kɛ̃ndó bangɔ afilmɛ niko na bɛ mbi kɔi. Mbi kambisa ngandó hɛ̃ afɔ̃ mbi nda mɛ mbi kɛ̃ bangɔ ni.” Alain kpãndó wangɔ ti “ndara ti mbilimbili” mɛ aba “nɔngɔ nɔ na lége ti hĩngangɔ ndo” na kwa. (Mas. 9:6) Na bangɔ ekateli tɛ Alain ko, ambanga afɔ̃ lo mɛ awa hangɔ mbeti akamwandó gba, ala bandandó mandangɔ Ngbangɔ nga na gwengɔ bombi.

17-18. Nzɔ̃ kpale mɛ azi mɛ ndo ye landangɔ “ndara ti mbilimbili” ndo lua nɛ, wa nzɔ̃ dangɔ bɛ mɛ ala na ni nɛ? (Ba nga limɔ.)

¹⁷ Yehova salela se lɛlo tɛ awali sɛ ti yika yika, kɔi ti bubulu, wa kɔi ti ndara so fangɔ na e aye mɛ elengbi ti lingɔ ti nɛngɔ ya, e du na dengɔ bɛ na bi mɛ na gangɔ. Azi ko la ndo ye gwengɔ ka tɛ “wali ti bubulu” ko, ala ndo gi uzu kokisangɔ agwɛ̃ tɛ la ti bí na gbɛ mbingɔ, wa ala ndo hũ ya, ni ndo “lɔgɔ.” Kanda ala ndo kpã bo lɛ la na ndo dungɔ lɛ ngɛ̃́ tɛ la ti ndɛ, ta na ndo kpale mɛ na singɔ na ala na bi mɛ na gangɔ ma. Kwa tɛ la na lingɔ ya, “ala kpili.”​—Mas. 9:13, 17, 18.

¹⁸ Kpale tɛ azi mɛ aye gwengɔ ka tɛ wali mɛ ndo fa “ndara ti mbilimbili” na kɛsɛnɛngɔ nvɛ̃ni na bi mɛ na gangɔ! Ala na dengɔ bɛ na lo mɛ ya, ala lua aye zu mɛ ala na gwɛ̃ ni ti nɛngɔ ya, ala ngbã lá kwɛ dã na Yehova nga kpengbani na ya nyingɔ. (Yis. 65:13) Na lége tɛ prɔfɛta Yisaya ko, Yehova pa hɛ̃ e ya: “Ĩ ma mbi na seni,  wa ĩ tɛ aye ti nzɔ̃ni, na lingɔ ngaso, ĩ na luangɔ dengɔ bɛ na ya ye ti nzɔ̃ni nvɛ̃ni.” (Yis. 55:1, 2) E ndo manda yengɔ aye mɛ Yehova ndo ye, nga na kɛ̃ngɔ aye mɛ Yehova ndo kɛ̃. (Nz. 97:10) E nga na dengɔ bɛ na lo mɛ ya, elengbi ti ilingɔ azi mɛndɛ̃ ti nɛngɔ ya, ala manda “ndara ti mbilimbili.” E mabere awa lengɔ kwa mɛ “ndo dɛ kɔngɔ kaya gbata ya: ‘ĩ azi zu mɛ ĩ zanga kɔdɛ, ĩ li so ndo olo.’” Mbana gɛrɛ tɛ e ná tɛ azi mɛ ndo ye invitasiɔ̃ tɛ e ko, ta ni du ti pɛ ndunu ngoi ma, kanda ni du ti kaka. E ná azi mɛ ndo ma e, e na nzɔ̃ dangɔ bɛ ti “luangɔ dungɔ lɛ ngɛ̃́” nga na “nɔngɔ nɔ na ya lége ti ndara” bwai na bwai​—Mas. 9:3, 4, 6.

19. Na mangbi na tɛnɛ mɛ kaya Mosakoli 12:13, 14, ye mɛ elengbi ti dungɔ na ekateli ti lingɔ nɛ? (Ba nga Ãkadre mɛ bɛli tɛnɛ ni tɛnɛ ya “ Kpɛngɔ Nzapa ndo hɛ̃ anzɔ̃ kpale.”)

¹⁹ Di Masese 12:13, 14. Zia ya, kpɛngɔ Nzapa angbã lá kwɛ batangɔ bɛ e, wa ni zanga e ya, e du na dɔngɔ nɔ ti vuruni na ya ngoi ti siɔni mɛ e da. Kpɛngɔ Nzapa na ndenge ti nzɔ̃ni na zangɔ e ya, e ngbã lá kwɛ ilingɔ azi gba ti nɛngɔ ya, ala gi “ndara ti mbilimbili” wa ala manda nga ni, na lo mɛ ya, e ndo ye Yehova, wa e ndo tɔndɔngɔ nga lo na bɛ e zu.