Zia e ba se mɛ Ngbangɔ hɛ̃ gbinya na ndo hũnda niko.

Awa Pangɔ kwa 24:15 atɛnɛ ya, “anzɔ̃ zi na asiɔ zi” mɛ akpili ko, ala na songɔ kwá. Anzɔ̃ azi adu azi mɛndó ali kwa hɛ̃ Nzapa na mbilimbili zu, uzu ti la kpilingɔ, wa asu nga ili la kaya buku ti dungɔ lɛ ngɛ̃́. (Mal. 3:16) Asiɔ azi, adu azi zu mɛndó akpili zangangɔ luangɔ nzɔ̃ tangɔ ligɛrɛ ti mandangɔ tɛnɛ mɛ aba Yehova, ta asu ili la kaya buku ti dungɔ lɛ ngɛ̃́ ma.

Grupɛ tɛ azi mɛ Yoanɛ 5:28, 29 atɛnɛ tɛnɛ tɛ la adu kwɛ kɔi na omɛ kaya Awa Pangɔ kwa 24:15. Yezo tɛnɛ ya, “ala ko ndo awa lingɔ nzɔ̃ ye ko, Nzapa so gbanda la ya, ni hɛ̃ la bɛta du [bere dungɔ lɛ ngɛ̃́ ti kaka], kanda ala ko ndo la awa lingɔ siɔ ye ko, Nzapa aso gbanda la ya, ni fa ngbanga ni bi li la.” Azi ti mbilimbili adu azi mɛndó ali aye ti nzɔ̃ni uzu ti la kpilingɔ. Ala na luangɔ songɔ kwá ti dungɔ lɛ ngɛ̃́ na lo mɛ ya, asu ili la kaya buku ti dungɔ lɛ ngɛ̃́. Kanda azi mɛ azanga mbilimbili adu azi mɛndó ali asiɔ ye uzu ti la kpingɔ. Ala na luangɔ songɔ kwá ti nɛngɔ ya, afa ngbanga abi li la, na lo mɛ ya, ta asu ili la kaya buku ti dungɔ lɛ ngɛ̃́ ma, wa na ngoi ti fangɔ ngbanga la, na bangɔ azi niko bere ala na gbinyangbingɔ seliye tɛ la bere ta ala na gbinyangbingɔ ni ma. Na ya ngoi niko ko, ala na luangɔ nzɔ̃ tangɔ ligɛrɛ ti mandangɔ kpale mɛ aba Yehova, wa na sungɔ nga ili la kaya buku ti dungɔ lɛ ngɛ̃́.

Suma 20:12, 13 akambisa ya, na yɔngɔ ya, azi zu mɛ na songɔ kwá atɔndɔ ‘aye mɛ asu kaya rulo,’ afa andia ti fãnani mɛ Nzapa na kpãngɔ hɛ̃ e kaya gigi ti fãnani. Azi ko la ta ala na tɔndɔ ndia niko ma ko, Yehova na kpɔngɔ ala ti bwai.​—Yis. 65:20.

Daniel 12:2 piandó tɛnɛ ya, ambanga zi mɛ akpili ko, ala na songɔ, ti “luangɔ dungɔ lɛ ngɛ̃́ ti kaka, ambanga ni na songɔ kwá ti kamɛnɛ nga na lo ti kɛ̃ngɔ ala bwai na bwai.” Averse mɛ ndo kambisa ya, fangɔ ngbanga ti ndani na lingɔ ya, azi mɛ na songɔ kwá alua “dungɔ lɛ ngɛ̃́ ti kaka” bere ‘akɛ̃ ala ti bwai na bwai.’ Na lo ni la, na nda lo-lengɔ gbia ti bulu koto ko, ambanga na luangɔ dungɔ lɛ ngɛ̃́ ti bwai; azi mɛndɛ̃ na kpilingɔ ti bwai.​—Suma 20:15; 21:3, 4.

Elengbi ti hakangɔ kpale tɛ azi mɛ kaya grupɛ sɛ mɛ na songɔ kwá na tɛ azi mɛ aye luangɔ visa (ambeti) ti dungɔ kaya kɔdɔrɔ mɛndɛ̃. Azi ti mbilimbili adu nga mabere azi mɛ guvɛrnɛma hɛ̃ la viza ti lingɔ kwa kaya kɔdɔrɔ niko, bere ti dungɔ kai bwai na bwai, wa ala nga na lotomo ti lingɔ aye mɛndɛ̃. Kanda asiɔ azi adu mabere, azi mɛ alua visa tɛ awa ndola (bere awa ndɛ̃), ala na dungɔ kaya kɔdɔrɔ bo na pɛ nyi ngoi yakere. Se ala aye ngbãngɔ so ya kɔdɔrɔ niko ngoi yɔngɔrɔ ni ko, ayɔ ya, ala tɔndɔ andia ti kɔdɔrɔ ni, wa di la ahɛ̃ ala viza ti dungɔ kai ti bwai na bwai. Kwɛ kɔi, na pɛ songɔ kwá tɛ azi mɛ azanga mbilimbili ko, ayɔ ya, ala tɔndɔ andia tɛ Yehova, wa ala li nga akpale ti nzɔ̃ni ti nɛngɔ ya, ala angbã kaya Paradizo. Abɛse du ya, viza mɛ ahɛ̃ ala na ebandeli adu ti ngasia ko, azi mɛndɛ̃ ndo ngbã kaya kɔdɔrɔ ni wa ala ti nga aya kɔdɔrɔ na lo mɛ ya, ala ndo tɔndɔ andia ti ya kɔdɔrɔ ni, kanda ando toma ala mɛndɛ̃. Na mungɔ ekateli ti ndani na bangɔ seliye tɛ zo na zo, nga na dɔngɔ nɔ tɛ lo kaya fãna kɔdɔrɔ. Kwɛ kɔi fangɔ ngbanga ti ndani na lo tɛ azi zu mɛ na songɔ kwá na bangɔ mbilimbili ná seliye mɛ ala na dungɔ na ni kaya gigi ti fãnani.

Ta Yehova du bo Nzapa mɛ na bɛ ti vundu ma, kanda, lo du nga Nzapa mɛ ndo fa ngbanga ti mbilimbili. (Mib. 32:4; Nz. 33:5) Lo na fangɔ songo tɛ lo na lége ti songɔ na grupɛ tɛ azi sɛ kaya kwá. Azi ti mbilimbili ná azi mɛ azanga mbilimbili. Kanda, ta lo na gbinyangbingɔ ndia tɛ lo ti mbilimbili mɛ aba siɔ lo ná nzɔ̃ lo ma. Bo azi ko la na yengɔ lo, ala nga na tɔndɔngɔ andia tɛ lo la na luangɔ lége ti dungɔ lɛ ngɛ̃́ kaya kɔdɔrɔ ti fãnani bwai na bwai.