1-2. (a) Ngoi mɛ nvɛ̃ni e ndo da bɛ e na zo mɛ e ndo ye lo gba mɛ lo kpi nɛ? (b) Ye mɛndó Yezo li na ndɔ uzu ti lo kpingɔ nɛ?

ABƐSE du ya, zo mɛ e ndo ye lo gba akpi aɔ abulu gba ko, e na dangɔ bɛ e na lo ngoi zu. Se ati na bi mɛndó lo kpi na ni ko, e ndo da bɛ e na lo nga na akpale mɛndó lo li.

² Bulu kɔi kɔi, e ndo bombi tɛrɛ e ndoni kɔi ná amiliɔ̃ tɛ azi na ndo lɛ gigi zu so dangɔ bɛ e na bi ti kwá tɛ zo kɔi mɛ e ndo ye lo gba​—Yezo Kristo. (1 Pet. 1:8) E ndo bombi tɛrɛ e ndoni kɔi so dangɔ bɛ na zo mɛndó ahɛ̃ dungɔ lɛ ngɛ̃́ tɛ lo so tɔ̃ngɔ e kaya siɔ kpale ná kwá. (Mat. 20:28) A du biani ya, Yezo yɔndó ka ti ava lo ya, ala ndo da bɛ la na bi ti kwá tɛ ni. Na ndɔ uzu ti lo kpingɔ ko, lo tondó nda Tɛ tɛ Gbia, wa lo pandó hɛ̃ ava lo ya: “Ale ĩ li so, so dangɔ bɛ ĩ na mbi.”​—Lk. 22:19.

3. Ye mɛ ndɛ e manda nɛ?

³ Ka popo tɛ amiliɔ̃ tɛ azi mɛ ndo gwe bombi ti dangɔ na bi ti kwá tɛ Yezo ko, bo azi yakere la na nzɔ̃ dangɔ bɛ ti luangɔ dungɔ lɛ ngɛ̃́ ti kaka ka ndozu. Kanda butu butu tɛ azi mɛ na dangɔ bɛ ti luangɔ dungɔ lɛ ngɛ̃́ ge lɛ sese ko, ala ndo gwe nga bombi ni. Na ya tɛnɛ mɛ ndɛ e manda ko, e na hĩngangɔ nda mɛ linɔ̃ niko zu sɛ ndo kũ bi ti dangɔ bɛ na bi ti kwá tɛ Yezo na bɛ la ndozu bulu kɔi kɔi. E nga na bangɔ se mɛ e ndo lua na anzɔ̃ kpale na gwengɔ bombi niko. E ba na olo, nda mɛ awakristo mɛ ahĩni la kpɔ̃ ndo gwe bombi ti dangɔ bɛ na bi ti kwá tɛ Yezo.

4. Nda mɛ bo azi mɛ ahĩni la kpɔ̃ la ndo tɛ mapa wa ndo nyɔ̃ nga vinyɔ ka bombi ti dangɔ bɛ na bi ti kwá tɛ Yezo nɛ?

⁴ Bulu kɔi kɔi, awakristo mɛ ahĩni la na kpɔ̃ mɛ ndo gwe bombi ti dangɔ bɛ na bi ti kwá tɛ Yezo ko, ala ndo tɛ mapa wa ala  ndo nyɔ̃ nga vinyɔ. Nda mɛ bo ala la ndo tɛ mapa wa ndo nyɔ nga vinyɔ nɛ? Ti nɛngɔ ya, e hɛ̃ gbinya ti hũnda mɛ ko, ayɔ ya e ba ye mɛndó ali tɛrɛ lo na bi ti ndani mɛndó Yezo na dungɔ lɛ ngɛ̃́ ge lɛ sese. Na pɛ tɛngɔ Pasika ko, Yezo tondó nda lingɔ ye mɛ e ndo ili ni ndɛ ya Tɛ tɛ Gbia. Lo hɛ̃ndó mapa ná vinyɔ hɛ̃ ava lo 11 mɛndó angbã mbilimbili ka mbage tɛ lo ya, ala tɛ wa ala nyɔ̃ nga ni. Yezo tɛnɛndó hɛ̃ la tɛnɛ ti tɛngbingɔ mbele sɛ: tɛngbingɔ mbele ti fãnani nga na tɛngbingɔ mbele ti Lo-lengɔ Gbia. * (Lk. 22:19, 20, 28-30) Tɛngbingɔ mbele niko azindó lége hɛ̃ atoma ná azi yakere ya, ala ti agbia nga anganga nzapa ka ndozu. (Sum. 5:10; 14:1) Bo awakristo mɛ ahĩni la na kpɔ̃ mɛ ala dɛ ge lɛ sese la, ala kaya tɛngbingɔ mbele niko, wa bo ala nga la ndo tɛ mapa, ndo nyɔ̃ nga vinyɔ ka bombi ti dangɔ bɛ na bi ti kwá tɛ Yezo.

5. Ye mɛ awakristo mɛ ahĩni la na kpɔ̃ ahĩnga na omɛ aba nzɔ̃ dangɔ bɛ mɛ ala ni nɛ?

⁵ Ye mɛndɛ̃ mɛ ndo to awakristo mɛ ahĩni la na kpɔ̃ ya, ala kũ na bɛ la ndozu bi mɛ ala na lingɔ bombi ti dangɔ bɛ na bi ti kwá tɛ Yezo du ya, ni ndo hɛ̃ la lége ti bingangɔ li la na ndo nzɔ̃ dangɔ bɛ mɛ ala na ni. Yehova hɛ̃ la nzɔ̃ dangɔ bɛ ti nɛngɔ ya, ala lua dungɔ lɛ ngɛ̃́ mɛ azanga kwá ka ndozu, nga na tɛrɛ mɛ ta alengbi ti zɔ̃ngɔ ma, ti lingɔ kwa ndoni kɔi na Yezo mɛ na ndima gba nga na atãnga azi 144 000, wa omɛ aɔ zu adu lingɔ kwa gbɛlɛ Yehova Nzapa! (1 Kɔr. 15:51-53; 1 Yn. 3:2) Awakristo mɛ ahĩni la na kpɔ̃ ahĩnga ya, aili ani ti nɛngɔ ya, ani li kwa hɛ̃ Yehova ka ndozu. (2 Tim. 4:7, 8) Wa ti nɛngɔ ya, ala lua nzɔ̃ tangɔ li gɛrɛ niko ko, ayɔ ya, ala ngbã mbilimbili tee kwá tɛ la. Ala ndo ma dengɔ bɛ mawoma na ngoi mɛ ala ndo da bɛ la na nzɔ̃ dangɔ bɛ tɛ ala. (Tit. 2:13) Wa “angasã ngbaga mɛndɛ̃ mɛ”? (Yn 10:16) Nda mɛ ala ndo gwe bombi ti dangɔ bɛ na bi ti kwá tɛ Yezo nɛ?

6. Nda mɛ angasã gbaga mɛndɛ̃ ndo gwe bombi ti dangɔ bɛ na bi ti kwá tɛ Yezo bulu kɔi kɔi nɛ?

⁶ Ta angasã gbaga mɛndɛ̃ ndo gwe bombi ti dangɔ bɛ na bi ti kwá tɛ Yezo ti nɛngɔ ya, ani tɛ mapa bere ani nyɔ̃ nga vinyɔ ma, kanda ala ndo du na dengɔ bɛ ti gwengɔ bombi ni. Na bulu ti 1938 ndó la, aili azi mɛ na nzɔ̃ dangɔ bɛ ti luangɔ dungɔ lɛ ngɛ̃́ ti kaka ge lɛ sese ya, ala ga bombi ti dangɔ bɛ na bi ti kwá tɛ Yezo ti fãni ti uzu. Linɔngi ti Sinzili ti 01/03/1938, atɛnɛndó ya: “Adu mbilimbili nga nzɔ̃ni ya, [angasã ngbaga mɛndɛ̃] ndo ga nga bombi mɛ, ala lengbi ti bangɔ akpale mɛ na ɔngɔ ka da . . . Ni du nga ngoi ti dengɔ bɛ na lo tɛ ala.” Nga ma se ko la, zo mɛ aili lo ka fɛtɛ ti libala ndo ma dengɔ bɛ ti bangɔ aye mɛ ndo ɔ ka ndo ti fɛtɛ ni ko, angasã ngbaga mɛndɛ̃ ndo ma nga dengɔ bɛ ti bangɔ aye mɛ ndo li tɛrɛ lo ka bombi ti dangɔ bɛ na bi ti kwá tɛ Yezo.

7. Nda mɛ angasã gbaga mɛndɛ̃ ndo kũ diskur ti dangɔ bɛ na bi ti kwá tɛ Yezo na bɛ la ndozu nɛ?

⁷ Mabere awakristo mɛ ahĩni la na kpɔ̃ ko, angasã gbaga mɛndɛ̃ ndo du nga na dengɔ bɛ ti bingangɔ li la na ndo nzɔ̃ dangɔ bɛ tɛ la. Ala ndo kũ landangɔ diskur ti dangɔ bɛ na bi ti kwá tɛ Yezo na bɛ la ndozu, na lo mɛ ya, ni ndo kambisa aye mɛ Kristo na azi 144 000 mɛ na lengɔ gbia ndoni kɔi na lo na lingɔ na lo tɛ azi mɛ na ngbãngɔ mbilimbili na gbɛ lo-gbia ti bulu koto kɔi. Na lége ti litambwisi tɛ Gbia tɛ la Yezo Kristo ko, azi mɛ na lengɔ gbia ka ndozu na zangɔ azi na kwa ti gbinyangbingɔ  lɛ sese ya, ati paradizo, wa ala ti nga azi ti lengbingɔ. Na ngoi ti dangɔ bɛ na bi ti kwá tɛ Yezo ko, amiliɔ̃ tɛ azi ndo ma dengɔ bɛ gba na mangɔ se mɛ aprɔfesi mɛ kaya Yisaya 35:5, 6; 65:21-23; ná omɛ kaya mbeti ti Suma 21:3, 4 mɛ aba bi mɛ na gangɔ na tingɔ na seni. Bingangɔ li la na ndo se mɛ gbanda ka gigi ti fãnani ala na tengbingɔ na ava la mɛ akpili, ando li ya, nzɔ̃ dangɔ bɛ tɛ ala na lo ti bi mɛ na gangɔ ati kpengbani, wa ala di li zu ti nɛngɔ ya, ta ala zia lingɔ kwa hɛ̃ Yehova ma.​—Mat. 24:13; Gal. 6:9.

8. Ye mɛndɛ̃ mɛ ndo to angasã gbaga mɛndɛ̃ ya, ala ndo gwe bombi ti dangɔ bɛ na bi ti kwá tɛ Yezo nɛ?

⁸ E ba na olo mɛ, aye mɛndɛ̃ mɛ ndo li ya, angasã ngbaga mɛndɛ̃ ndo gwe bombi ti dangɔ bɛ na bi ti kwá tɛ Yezo. Ala na gwɛ̃ ti fangɔ songo mɛ ala na ni nga na hɛ̃ngɔ ti la hɛ̃ awakristo mɛ ahĩni la na kpɔ̃. Ngbangɔ tɛnɛndó ya, mangbi ti kpengbani na dungɔ ka popo tɛ awakristo mɛ ahĩni la na kpɔ̃ ná azi mɛ na nzɔ̃ dangɔ bɛ ti luangɔ dungɔ lɛ ngɛ̃́ ti kaka ge lɛ sese. Ni na lingɔ tɛrɛ lo ngasia? Zia e ba ambanga atɛnɛ ni.

9. Na bangɔ prɔfesi mɛ kaya Zekaria 8:23, angasã ngbaga mɛndɛ̃ ndo ma tɛrɛ ngasia na lo tɛ awakristo mɛ ahĩni la na kpɔ̃ nɛ?

⁹ Di Zekaria 8:23. Ni du prɔfesi mɛ akambisa na ndenge ti nzɔ̃ni nvɛ̃ni se mɛ angasã gbaga mɛndɛ̃ ndo ma na tɛrɛ na lo tɛ ayata la awakristo mɛ ahĩni la na kpɔ̃. Tɛnɛ mɛ “zo ti yuda” ná “ĩ,” ando fa bo bombi tɛ azi kɔi​—awakristo mɛ ahĩni la na kpɔ̃ mɛ ala dɛ ge lɛ sese. (Rom. 2:28, 29) Wa “azi sui kɔi ti ayanga ti akɔdɔrɔ zu” ando fa angasã ngbaga mɛndɛ̃. Ala ‘gbɔ̃ bɔngɔ tɛ zo ti yuda kpengbani.’ Ni fa ya, ala bombi tɛrɛ la na mbilimbili zu ndoni kɔi na awakristo mɛ ahĩni la na kpɔ̃ kaya sambela ti vuruni. Na bombingɔ ndoni kɔi na azi mɛ ahĩni na kpɔ̃ na ndɔ ti dangɔ bɛ na bi ti kwá tɛ Yezo ko, angasã gbaga mɛndɛ̃ ndo fa songo mɛ ala na ni na mbage tɛ awakristo mɛ ahĩni la na kpɔ̃.

10. Ye mɛ Yehova li ti nɛngɔ ya, prɔfesi mɛ kaya Ezekiele 37:15-19, 24, 25 ati na seni nɛ?

¹⁰ Di Ezekiele 37:15-19, 24, 25. Ti nɛngɔ ya, prɔfesi niko ati na seni ko, Yehova kpã mangbi ti bwai na bwai ka popo tɛ angasã gbaga mɛndɛ̃ ná awakristo mɛ ahĩni la na kpɔ̃. Prɔfesi niko atɛnɛndó tɛnɛ ti andunu kɛkɛ sɛ. Azi mɛ na nzɔ̃ dangɔ bɛ ti gwengɔ ka ndozu ahaka ala na ndunu kɛkɛ “tɛ yuda” (ndasewa mɛndó ndo pɔna agbia ti Izraɛlɛ ka da), kanda azi mɛ na nzɔ̃ dangɔ bɛ ti luangɔ dungɔ lɛ ngɛ̃́ ti kaka ge lɛ sese, ahaka la na ndunu kɛkɛ “tɛ Efraimɛ.” * Yehova na gwɛ̃ ti bombingɔ bombi tɛ azi niko sɛ ya, ala ti bo “ndunu kɛkɛ kɔi.” Ni fa ya, ala ndo li kwa ndoni kɔi ka gbɛ Lo-lengɔ Gbia tɛ Gbia kɔi, Yezo Kristo. Bulu kɔi kɔi, awakristo mɛ ahĩni la na kpɔ̃ ná angasã gbaga mɛndɛ̃ ndo gwe bombi ti dangɔ bɛ na bi ti kwá tɛ Yezo ndoni kɔi, ta mabere bombi tɛ azi sɛ mɛ akangbi ya tɛrɛ lo ma, kanda mabere “angasã ngbaga ti gbágbá kɔi” ná “wa batangɔ la . . . nga kɔi.”​—Yn. 10:16.

11. Ngasia la “angasã ngbaga” mɛ atɛnɛ tɛnɛ tɛ la kaya mbeti ti Matie 25:31-36, 40 ndo hɛ̃ ti la hɛ̃ ayata Kristo nɛ?

¹¹ Di Matie 25:31-36, 40. “Angasã ngbaga” mɛ Yezo tɛnɛ tɛnɛ tɛ la adu azi ti mbilimbili mɛ na dungɔ lɛ ngɛ̃́ na ndangba bi mɛ e na ni, mɛ na luangɔ dungɔ lɛ ngɛ̃́ ge lɛ sese,​—ala la adu angasã gbaga mɛndɛ̃. Ala ndo hɛ̃ ti la na mbilimbili zu ti zangɔ ayata Kristo mɛ ahĩni la na kpɔ̃ na ya kwa kɔi ti ngbondoni​—fangɔ tɛnɛ ge lɛ gigi zu nga ti lingɔ ya, azi ti ava Yezo.​—Mat. 24:14; 28:19, 20.

12-13. Ndenge mɛndɛ̃ mɛ angasã gbaga ndo hɛ̃ na ti la hɛ̃ ayata Kristo nɛ?

¹² Bulu zu, apɔsɔ gba uzu ti lá ti dangɔ bɛ na  bi ti kwá tɛ Yezo ko, angasã gbaga mɛndɛ̃ ndo hɛ̃ ti la hɛ̃ ayata Kristo na hɛ̃ngɔ tɛrɛ la zu kaya kwa ti kangbingɔ invitasiɔ̃ na ngoi ti kapanyɛ ti ilingɔ azi ya, ala ga bombi ti dangɔ bɛ na bi ti kwá tɛ Yezo. (Ba ãkadre: “ Mɔ ndo lɛkɛ tɛrɛ mɔ ti kũngɔ na ngoi ti dangɔ bɛ na bi ti kwá tɛ Yezo?”) Ala ndo hɛ̃ nga ti la na lɛkɛngɔ kpale zu ti nɛngɔ ya, ta ye kɔi azanga na ngoi ti dangɔ bɛ na bi ti kwá tɛ Yezo kaya bombi mɛ ala ka da ma, abɛse du ya, ta zo kɔi mɛ ndo tɛ mapa bere ndo nyɔ̃ vinyɔ kaya bombi tɛ ala da ma. Angasã gbaga mɛndɛ̃ ndo du na dengɔ bɛ ti hɛ̃ngɔ ti la hɛ̃ ayata Kristo na ndenge ti ngaso. Angasã ni ahĩnga nzɔ̃ni ya, Yezo ndo hũ aye zu mɛ ala ndo li tɛrɛ azi mɛ ahĩni la kpɔ̃ mabere ala ndo li ni tɛrɛ lo nvɛ̃ni.​—Mat. 25:37-40.

¹³ Ambanga aye mɛndɛ̃ mɛ ndo to e zu ya, e ndo gwe bombi ti dangɔ bɛ na bi ti kwá tɛ Yezo adu nɛ?

14. Ngasia la Yehova ná Yezo fa songo mɛ aɔ asongo zu na e nɛ?

¹⁴E ndo hɛ̃ sia kɔli hɛ̃ Yehova ná Yezo na lo ti songo mɛ ala fa na e. Yehova fandó songo tɛ lo na mbage tɛ e na ndenge gba, kanda kɔi ka popo ni aɔ omɛndɛ̃ zu. Nzapa tɛ e fa e na songo mɛ aɔ asongo zu na tongɔ Nyi lo ti kpɔ̃ bɛ lo ti nɛngɔ ya, lo hũ pɛnɔ̃ wa lo kpi nga na lo tɛ e. (Yn. 3:16) Na lo mɛ ya, Yezo ye ngandó hɛ̃ngɔ dungɔ lɛ ngɛ̃́ tɛ lo na lo tɛ e ko, lo fa nga songo mɛ lo na ni na mbage tɛ e. (Yn. 15:13) Ta e na ye kɔi mɛ elengbi ti futangɔ na Yehova ná Yezo na lo ti songo mɛ a la fa na e ma. Kanda elengbi ti fangɔ ya, e ndo hɛ̃ ala siɔ kɔli na bangɔ ye mɛ e ndo li na ya du tɛ e ti bi kɔi kɔi. (Kɔl. 3:15) Gwengɔ bombi ti dangɔ bɛ na bi ti kwá tɛ Yezo ndo li ya, e da bɛ e na songo tɛ ala na mbage tɛ e, wa e fa nga songo mɛ e na ni na mbage tɛ ala.

15. Nda mɛ awakristo mɛ ahĩni la na kpɔ̃ ná angasã gbaga mɛndɛ̃ ndo hũ ya, tɔ̃ngɔ adu ye ti ndima nɛ?

¹⁵E ndo e hũ ya, tɔ̃ngɔ adu ye ti ndima nvɛ̃ni. (Mat. 20:28) Tɔ̃ngɔ adu ngbondoni ka tɛ awakristo mɛ ahĩni la na kpɔ̃ na lo mɛ ya ni li ya, nzɔ̃ dangɔ bɛ tɛ ala ati bɛtani. Na lo ti loyengɔ mɛ ala na ni na ndo tɔ̃ngɔ mɛ Kristo tɔ̃ na ala ko, Yehova ndo hũ la ya, ala du azi ti mbilimbili ka lɛ lo, lo mu la ya ala ti ayangambi tɛ lo. (Rom. 5:1; 8:15-17, 23) Angasã gbaga mɛndɛ̃ nga na dengɔ bɛ ti luangɔ anzɔ̃ kpale na lo ti tɔ̃ngɔ. Na lo mɛ ya, ala ndo fa loyengɔ na lo ti mɛnɛ tɛrɛ Yezo mɛndó asa ko, ala ti vuruni ka lɛ Nzapa, ala lengbi nga ti lingɔ hɛ̃ lo kwa mɛ santo, wa ala nga na dangɔ bɛ ti songɔ kwá na ngoi ti “kota pɛnɔ [NWT].” (Sum. 7:13-15) Ye mɛ awakristo mɛ ahĩni la na kpɔ̃ ná angasã gbaga mɛndɛ̃ ndo li ti hɛ̃ngɔ Yehova ná Yezo sia kɔli adu na gwengɔ bombi ti dangɔ bɛ na bi ti kwá tɛ Yezo bulu zu.

16. Ye mɛndɛ̃ mɛ ndo to e ya, e gwe bombi ti dangɔ bɛ na bi ti kwá tɛ Yezo nɛ ?

¹⁶ Ye mɛndɛ̃ mɛ ndo to e ya, e gwe bombi ti dangɔ bɛ na bi ti kwá tɛ Yezo adu ya, e ye tɔndɔngɔ Yezo. Na bangɔ nzɔ̃ dangɔ bɛ mɛ e na ni na ndo bi mɛ na gangɔ ko, ni ndo to e ya, e tɔndɔ na bɛ e kɔi ndia tɛ Yezo mɛ: “ale ĩ li so, so dangɔ bɛ ĩ na mbi.”​—1 Kɔr. 11:23, 24.

17. Ngasia la dangɔ bɛ na bi ti kwá tɛ Yezo ndo za e ya, e dɔ dã na Yehova nɛ?

¹⁷E ndo dɔ dã na Yehova. (Zk. 4:8) Nga ma se mɛ e lo ti mandangɔ na ni, dangɔ bɛ na bi ti kwá tɛ Yezo ndo hɛ̃ e lége ti nɛngɔ ya, ta bɛ e li na nzɔ̃ dangɔ bɛ mɛ Yehova hɛ̃ e ma, wa e gbɔ̃ nga li e na ndo songo mɛ lo fa na e. (Yir. 29:11; 1 Yn. 4:8-10) Ngoi ko la e ndo gbɔ̃ li e na ndo nzɔ̃ dangɔ bɛ mɛ e na ni na ndo bi mɛ na gangɔ nga na ndo songo mɛ Nzapa fa na e  ko, ando li ya, songo tɛ e ka tɛ lo ati kpengbani wa e ti nga na mangbi ti kpengbani na lo.​—Rom. 8:38, 39.

18. Ye mɛ bingangɔ li na ndo se lɛlo tɛ Yezo alengbi ti tongɔ e ya, e li nɛ?

¹⁸Ni ndo to e ya e landa pa gɛrɛ Yezo. (1 Pet. 2:21) Na ya abi mɛ ndo du uzu ti lá ti dangɔ bɛ na bi ti kwá tɛ Yezo ko, e ndo hɛ̃ tɛrɛ e gba na dingɔ akpale mɛ kaya Ngbangɔ mɛndó ali tɛrɛ lo na ya apɔsɔ ti ndani mɛndó Yezo na dungɔ lɛ ngɛ̃́ ge lɛ sese, kwá tɛ lo nga na songɔ kwá tɛ lo. Kanda na ndɔ ti dangɔ bɛ na bi ti kwá tɛ Yezo ko, diskur mɛ ndo li tɛrɛ lo, ando li ya, e da bɛ e na songo mɛndó Yezo fa na mbage e. (Ef. 5:2; 1 Yn. 3:16) Bingangɔ li e na ndo se mɛndó Yezo hɛ̃ dungɔ lɛ̃ ngɛ̃́ tɛ lo na lo tɛ e na tongɔ e, e li ya, “du tɛ e adu nga ma du tɛ Yezo.”​—1 Yn. 2:6.

19. Ngasia la elengbi ti ngbãngɔ kaya songo tɛ Yehova nɛ?

¹⁹E na gwɛ̃ kpengbani ti ngbãngɔ kaya songo tɛ Nzapa. (Yud. 20, 21) Elengbi ti ngbãngɔ kaya songo tɛ Nzapa se du ya, e ndo li zu ti nɛngɔ ya e tɔndɔ lo, e hɛ̃ ili lo gonda, wa e hɛ̃ nga lo dengɔ bɛ. (Mas. 27:11; Mat. 6:9; 1 Yn. 5:3) Gwengɔ bombi ti dangɔ bɛ na bi ti kwá tɛ Yezo ndo za e ya, e li zu mɛ elengbi ti lingɔ ti nɛngɔ ya, ye mɛ e ndo li na ya dungɔ lɛ ngɛ̃́ tɛ e ti bi kɔi kɔi ali mabere e ndo tɛnɛ hɛ̃ Yehova ya, ‘mbi na gwɛ̃ ti ngbãngɔ kaya songo tɛ mɔ bwai na bwai!’

20. Aye mɛ ndo to e ya, ta e zia gwengɔ bombi ti dangɔ bɛ na bi ti kwá tɛ Yezo ma nɛ?

²⁰ Abɛse du ya, e na nzɔ̃ dangɔ bɛ ti luangɔ dungɔ lɛ ngɛ̃́ ti bwai na bwai ka ndozu bere ge lɛ sese ko, e na aye gba mɛ ndo to e ya, e ndo gwe bombi ti dangɔ na bi ti kwá tɛ Yezo. Bulu zu, na ngoi mɛ e ndo bombi tɛrɛ e ndoni kɔi na bi niko ko, e ndo da bɛ e na zo kɔi mɛ e ndo ye lo gba, Yezo Kristo. Omɛ aɔ zu, e ndo da bɛ e na songo mɛ aɔ asongo zu, songo mɛndó Yehova fa na e na hɛ̃ngɔ Nyi lo ya, lo ga lo tɔ̃ e. Na bulu mɛ, e na dangɔ bɛ e na bi ti kwá tɛ Yezo na ndɔ ti bi kwa kũ, bi nzɛ ti 15 ti nzɛ ti Siɔ, 2022. E ndo ye Yehova ná Nyi lo, na lo ni la, na lá ti dangɔ bɛ e na bi ti kwá tɛ Yezo ko, ta ye kɔi mɛ ndo du ngbondoni na lo tɛ e aɔ gwengɔ bombi niko da ma.