1. Mɔ lengbi ti kambisangɔ se mɛndó ndasewa tɛ Yakobo da?

YAKOBO mɛ nyita Yezo, amanyindó kaya ndasewa mɛ kpengbani na ya nyingɔ. * To lo Yozefɛ ná ta lo Maria ndo yendó Yehova mawoma, wa ala ndo vɔrɔngɔndó Lo na bɛ la zu. Yakobo lua ngandó sulu gba, to gbia lo la dundó Mɛsiya mɛ ako kapa tɛ lo. Dungɔ kaya ndasewa niko adundó nzɔ̃ tangɔ li gɛrɛ na lo tɛ Yakobo!

2. Aye gba mɛndó ato Yakobo ya, lo sepala na to gbia lo nɛ?

² Yakobo ndó na aye gba mɛ alengbi ti tongɔ lo ya, lo sepala na to gbia lo. (Mat. 13:55) Na ndakisa, na ngoi mɛndó Yezo na bulu 12 ko, lo hĩngandó Tɛnɛ tɛ Nzapa nzɔ̃ni nvɛ̃ni, tɛnɛ tɛ lo ndo kamwisandó awa hangɔ lo mɛ ka Yerusalɛmɛ. (Lk. 2:46, 47) Ngoi mɛndɛ̃ Yakobo ná Yezo alindó kwa ti mabaya ndoni kɔi. Se adu ngaso ko, lo hĩngandó nyita lo Yezo nzɔ̃ni nvɛ̃ni. Nyita kɔli Nathan Knorr * ndo tɛnɛndó ngoi ya, “Mɔ lengbi ti mandangɔ kpale gba ka tɛ zo se du ya, mɔ ná lo ĩ ndo li kwa ndoni kɔi.” Zangangɔ kitɛ, Yakobo hũ ngandó se mɛ “Yezo ndomai ndo ndoni kɔi na ndara [nga na tɛrɛ NWT]. Ko bɛ Nzapa na bɛ azi ndode ndo na lo tɛ lo.” (Lk. 2:52) Na lo ni la, elengbi ti dangɔ na bɛ e ya, lo ndó ka popo tɛrɛ azi ti uzu mɛndó ati ava Yezo. Kanda ta adundó ngaso ma.

3. Ngoi mɛndó Yezo dɛ ge lɛ sese ko, ye mɛndó Yakobo li nɛ?

³ Ngoi mɛndó Yezo dɛ ge lɛ sese ko, ta Yakobo tindó kɔi tɛ ava Yezo ma. (Yn. 7:3-5 ) Alengbi ti dungɔ ya, lo ngandó ka popo tɛrɛ ayata Yezo mɛndó ndo da bɛ la ya, “Nyingɔ ahã lo.”  (Mar. 3:21) Ta ye kɔi mɛ afa nga ya, Yakobo ndó ndoni kɔi na ta lo Maria na ngoi mɛndó aga ho Yezo ka ndo kɛkɛ ti pɛnɔ da ma.​—Yn. 19:25-27.

4. Ye mɛ ndɛ e mandangɔ nɛ?

⁴ Na gesi, Yakobo tindó na loyengɔ na lo tɛ Yezo, wa lo ti ngandó kɔi tɛ awakristo mɛ ayata ndo tɔndɔndó lo gba. Na ya tɛnɛ mɛ, e na bangɔ awangɔ sɛ mɛ elengbi ti luangɔ ka tɛ Yakobo: ti (1) Nda mɛ elengbi ti dungɔ na seliye ti zungɔ na tɛrɛ. Ti (2) se mɛ elengbi ti tingɔ azi mɛ ahĩnga hangɔ tɛnɛ nzɔ̃ni.

5. Ye mɛ Yakobo li na ngoi mɛndó Yezo si gbɛ lɛ lo na pɛ songɔ kwá tɛ lo nɛ?

⁵ Ngoi mɛndó Yakobo ti kɔi tɛ ava Yezo nɛ? Na pɛ songɔ kwá tɛ lo ko, Yezo “fa nga tɛrɛ lo fani mɛndɛ̃ na Zaki. So pɛni, lo fa tɛrɛ lo na awa pangɔ kwa tɛ lo zu” (1 Kɔr. 15:7) Tengbingɔ na Yezo agbinyangbindó dungɔ lɛ ngɛ̃́ tɛ Yakobo. Londó ndoni kɔi na atoma ka Yeruzalɛmɛ na ngoi mɛndó ala bombi tɛrɛ la so kũngɔ Nyingɔ vurú mɛndó ako kapa ni hɛ̃ la kaya da kɔi ti etagɛ. (Aw. 1:13, 14) So pɛni Yakobo luandó dengɔ bɛ ti dungɔ kɔi tɛ azi ti ya Bombi tɛ Adonzi ti Siɛklɛ ti uzu (Aw. 15:6, 13-22; Gal. 2:9) Uzu ti bulu ti 62 ti N.E., na lége ti Nyingɔ vurú, lo sundó mbeti hɛ̃ awakristo mɛ ahĩni la na kpɔ̃. Mbeti niko ndo za nga e ndɛ, abɛse e na dangɔ bɛ ti luangɔ dungɔ lɛ ngɛ̃́ ka ndozu, bere ge sese. (Zk. 1:1) Wa sungɔ tɛnɛ ti apandɛ kɔi ti Yuda mɛ ili lo la Flavius Josèphe asu ya, nyingambi kɔi ka popo tɛ aya kota nganga nzapa ti yuda Anasi ndó la ahɛ̃ nyɔ̃ ya, aho Yakobo. Lo ngbãndó mbilimbili ka tɛ Yehova tee kwa tɛ lo.

6. Ɔngbi mɛndó ka popo tɛ Yakobo na agbia ti sambela ti ngoi tɛ lo nɛ?

⁶Yakobo ndó na seliye ti zungɔ na tɛrɛ. Nda mɛ e tɛnɛ ngaso nɛ? na ɔngbingɔ na agbia ti sambela ti ngoi tɛ lo, Yakobo yendó na gesi ya, Yezo la adu Mɛsiya. Na ngoi mɛndó Yakobo gbɔ̃ ndani na seni ya Yezo du Nyi Nzapa ko, lo yendó lo ni na zungɔ na tɛrɛ zu. Kanda ta akota nganga nzapa ti Yeruzalɛmɛ alindó ni ma. Na ndakisa, ta ala kɛ̃ndó ya, Yezo sondó na Lazalo kaya kwá ma. Na se lɛ yengɔ ya Yezo lo ka tɛ Yehova ko, ala gindó légé ti hongɔ Yezo ná Lazalo. (Yn. 11:53; 12:9-11) Na pɛ ni, ngoi mɛ Yezo sondó kaya kwá ko, ala gindó lége ti hɔndɛngɔ tɛnɛ ni na azi. (Mat. 28:11-15) Yakɛ tondó agbia ti sambela ya, ala kɛ̃ tɛrɛ Mɛsiya.

7. Nda mɛ ayɔ ya, e kɛ̃ yakɛ nɛ?

⁷Wangɔ mɛ elengbi ti luangɔ: Ta e du awa yakɛ ma, wa e zia ya, Yehova ha e na ye. Nga  ma se ko la ngã lengbi ti lingɔ ya, ta bɛ zo mɛ tɛrɛ lo ndo sɔ asɔ̃ na seni ma ko, yakɛ lengbi ti lingɔ ya, bɛ e ti yika yika ati kpengbani, wa e kɛ̃ mangɔ wangɔ tɛ Yehova. Na lo mɛ ya, azi ti farisai adundó awa yakɛ ko, ala kɛ̃ndó yengɔ akpale mɛndó ndo fa ya, Yezo la du Nyi Nzapa, wa Nyingɔ vurú ndo li kwa ndo lo. (Yn. 12:37-40) Ni dundó siɔ kpale na lo tɛ ala na lo mɛ ya, ni lengbi ti gbanzingɔ ala na dungɔ lɛ ngɛ̃́ ti kaka na bi mɛ na gangɔ. (Mat. 23:13, 33) Adu nvɛ̃ni ngbondoni ya, e zia Tɛnɛ tɛ Nzapa nga na Nyingɔ vurú te lo agbinyangbi seliye, bingangɔ li, nga na ekateli tɛ e! (Zk. 3:17) Na lo mɛ ya, Yakobo ndó na seliye ti zungɔ na tɛrɛ ko, ni la, lo yendó ya, Yehova ha ni na ye. Nga ma se mɛ ndɛ e manda na ni, na lége ti seliye ti zungɔ na tɛrɛ tɛ lo la, lo ti nzɔ̃ wa hangɔ tɛnɛ.

8. Ye mɛ alengbi ti zangɔ e ya, e ti awa hangɔ tɛnɛ nzɔ̃ni nɛ?

⁸ Ta Yakobo lindó kalasi gba ma. Agbia ti sambela ti ngoi tɛ lo ndo hũndó lo ma bere se mɛ ala ndo hũ na toma Petro na Yoanɛ​—ma bere azi mɛ “gɛgɛrɛ . . . mɛ ta amanda mbɛti gba ma.” (Aw. 4:13) Kanda Yakobo mandandó se ti hangɔ tɛnɛ nzɔ̃ni, mabere se ko la elengbi ti hũngɔ na ni na ngoi mɛ e di mbeti mɛ asu na ili lo. Ma bere Yakobo, ta e li nga kalasi gba ma. Abɛse ngaso ko, Nyingɔ vurú tɛ Yehova ná aye mɛ linɔ tɛ lo ndo ha na e, ni ndo za e ya, e hĩnga hangɔ tɛnɛ nzɔ̃ni nvɛ̃ni. Wa e ba se lɛlo ti nzɔ̃ni mɛ Yakobo zia hɛ̃ e na omɛ aba hangɔ tɛnɛ nga na wangɔ mɛ elengbi ti luangɔ ni.

9. Yakobo ndo handó tɛnɛ na azi ngasia?

⁹Ta Yakobo ndo handó tɛnɛ mɛ adu kpengbani ya zo gbɔ̃ ndani ma. Ni lindó ya, azi mɛ ndo ma lo agbɔ̃ nda tɛnɛ tɛ lo, ala hĩnga nga se mɛ ala kpã ni na kwa. Na ndakisa e ba se ti woni mɛ Yakobo ha na awakristo na se mɛ ala lengbi ti gbengɔ bɛ la na ngoi mɛ ando hɛ̃ la pɛnɔ̃ na ndo kpale mɛ azanga mbilimbili. Lo sundó ya: “E ndopa ya, ala awa dengɔ bɛ, na lo mɛ ya, ala gbe ndo bɛ la sĩ. Ĩ ma ndo pa ti gbengɔ bɛ tɛ Yɔbɔ, ko ĩ hĩnga nga ye mɛ ndo Gbia Nzapa ahɛ̃ lo na pɛni. Ta sanga ma, vundu bɛ Nzapa sĩ, ko bɛ lo nga nzɔ̃ni ma wo ma” (Zk. 5:11) Hĩnga ya, tɛnɛ mɛ Yakobo su ko, alo  kaya Ngbangɔ. Lo salela ndó Tɛnɛ tɛ Nzapa ti nɛngɔ ya, lo to awa mangɔ lo agbɔ̃ ndani ya, Yehova ndo hɛ̃ azi ko la, ndo ngbã mbilimbili ngoi zu mbana gɛrɛ mabere se mɛndó tɛ Yobo. Yakobo tɛnɛndó tɛnɛ na ndenge ti woni ti nɛngɔ ya, azi gbɔ̃ ndani. Ta lo bendandó likebi tɛ azi na ndo lo nvɛ̃ni ma, kanda lo bendandó likebi tɛ la ka ndo Yehova.

10. Ngasia la elengbi ti fangɔ ya, e ndo landa se lɛ lo tɛ Yakobo na ngoi mɛ e ndo ha tɛnɛ nɛ?

¹⁰Wangɔ mɛ elengbi ti luangɔ: ha tɛnɛ mɛ adu woni ti nɛngɔ ya, azi gbɔ̃ ndani, wa ha tɛnɛ mɛ alo kaya Tɛnɛ tɛ Nzapa. Ta gwɛ̃ tɛ e du ya, e kamwisa azi na lége ti aye gba mɛ e hĩnga ma, kanda e ha na la aye zu mɛ, Yehova hĩnga, nga na se mɛ lo hĩnga na gwɛ̃ tɛ la. (Rom. 11:33) Elengbi ti zangɔ la nzɔ̃ni se du ya, e ndo tɛnɛ ngoi zu tɛnɛ mɛ alo kaya Tɛnɛ tɛ Nzapa. Na se lɛ tɛnɛngɔ hɛ̃ azi mɛ e na ala ndo manda Ngbangɔ ya, se du mbi ko mbi lengbi tɛ mbi ti lingɔ ngaso ko, ale e za ala ya, ala binga li la na ndo se lɛlo tɛ azi mɛ Ngbangɔ tɛnɛ tɛnɛ tɛ la nga na sɛ mɛ Yehova ndo ba na kpale ni, nga na se mɛ lo ndo ma na tɛrɛ lo. Ni na tongɔ ala ya, ala li aye mɛ na hɛ̃ngɔ Yehova dengɔ bɛ, kanda ta e ma.

11. Akpale mɛ awakristo tengbi na ni na ngoi tɛ Yakobo nɛ, wa wangɔ mɛndó lo hɛ̃ la nɛ? (Zk. 5:13-15)

¹¹Yakobo tɛnɛndó tɛnɛ ti aye mɛ ndo li tɛrɛ lo biani. Kaya mbɛti tɛ lo, Yakobo fandó yangondo ya, lo hĩnga akpengba kpale mɛ ayata lo awakristo ndo tengbi na ni, ni la lo hɛ̃ndó ala wangɔ mɛ aba se ti nwɔngɔ akpengba kpale ni. Na ndakisa, ta ambanga awakristo ndo kpãndó awangɔ na kwa iɔ ma. (Zk. 1:22).Ala mɛndɛ̃ ndo lindó nzɔ̃ kpale tɛrɛ awa ye gba aɔ tɛ awa yɛlɛ. (Zk. 2:1-3) Adu ngandó pɛnɔ ka tɛ ambanga ya, ala keba na tɛnɛ mɛ ala ndo tɛnɛ. (Zk. 3:8-10) Ambanga awakristo mɛndɛ̃ ndó na seliye mɛ siɔni, kanda Yakobo hĩngandó ya, ala lengbi ti gbinyangbingɔ. Na wo bɛ, lo hɛ̃ndó la wangɔ ti yangondo, wa lo sa ngandó ngunu bɛ ambanga azi mɛ na ngã ti nyingɔ ya, ala gi wangɔ ka tɛ abiazi.​—Di Zaki 5:13-15.

12. Ngasia la elengbi ti dungɔ na bingangɔ li ti nzɔ̃ni na ngoi mɛ e ndo za zo mɛ e ndo manda lo na Ngbangɔ nɛ?

¹²Wangɔ mɛ elengbi ti luangɔ: tɛnɛ tɛnɛ ti aye mɛ ndo li tɛrɛ lo biani, du na nzɔ̃ dangɔ bɛ na ndo azi. Ando du kpengbani ka tɛ azi mɛ e na la ndo manda Ngbangɔ ya, ala kpã atɛnɛ mɛ ala ndo manda na kwa. (Zk. 4:1-4) Ando yɔ ngoi gba ti nɛngɔ ya, ala zia dɔngɔ nɔ̃ ti siɔni, wa ala ti na seliye tɛ awakristo. Mabere Yakobo, ayɔ ya, e tɛnɛ yangondo hɛ̃ azi mɛ e ndo manda ala na Ngbangɔ aye mɛ ala gbinyangbi na ya dungɔ lɛ ngɛ̃́ tɛ ala. Ayɔ ya, e du na bingangɔ li ti nzɔ̃ni, wa e ye nga ya, Yehova na zangɔ azi mɛ na seliye ti zungɔ na tɛrɛ, wa lo nga na hɛ̃ngɔ ala ngunu ti gbinyangbingɔ kpale na ya dungɔ lɛ ngɛ̃́ te la.​—Zk. 4:10.

13. Nga ma se ko la mbeti ti Zaki 3:2 atɛnɛ na ni, ye mɛndó ta bɛ Yakobo li na ni ma nɛ?

¹³Ta Yakobo ndo hũndó tɛrɛ lo ya lo ɔ azi mɛndɛ̃ ma. Ta lo ndo hũndó ya, na lo mɛ ya, ni lo kaya ndasewa tɛ Yezo, bere ni na kumba kaya bombi ko, ni ɔ ayata mɛndɛ̃ ma. Lo ndo ilindó ayata lo awakristo ya “ayata mbi ti kpɔ̃ bɛ mbi.” (Zk. 1:16, 19; 2:5) Ta lo lindó ye ti tongɔ azi hũ ya, lo du zo ti lengbingɔ ma. Na se lɛ lingɔ ngaso ko, lo tɛnɛndó ya: “E zu e ndoyu ndo na lege ndɛ̃ ndɛ̃ ndɛ̃.”​—Di Zaki 3:2.

14. Nda mɛ ayɔ ya, e ye ya, e ndo yu nga ndo nɛ?

¹⁴Wangɔ mɛ elengbi ti luangɔ: Ta bɛ mɔ li na ni ma ya, e zu e du awa lingɔ siɔ kpale. Ta elengbi ti hũngɔ tɛrɛ e ya, e ɔ azi mɛ e ndo manda ala na Ngbangɔ ma. Na lo nɛ? Na lo mɛ ya, se e ndo gi fangɔ na azi mɛ e na la ndo manda Ngbangɔ ya, ta e ndo li siɔ kpale ma ko, ala na hũngɔ ya, ta ala na kokangɔ tɔndɔngɔ andia tɛ  Nzapa ma. Wa se du ya e ndo ye na mbilimbili zu ya, ta adundó woni na lo tɛ e lingɔ aye ngoi zu na mangbi na Tɛnɛ tɛ Nzapa ma, wa e kambisa hɛ̃ ala se mɛndó Yehova za na e ya, e nwɔ̃ na akpengba kpale mɛndó e tengbi na ni ko, na zangɔ ala hũ ya, ala lengbi nga ti lingɔ kwa hɛ̃ Yehova.

15. Yakobo ndo salelandó ndakisa mɛ ngasia?

¹⁵Yakobo ndo salelandó ndakisa mɛ ndo gbɔ̃ bɛ azi. Ta kitɛ da ma ya, Nyingɔ vurú la ndo zandó lo, wa lo ti ngandó wa hangɔ tɛnɛ nzɔ̃ni, na bangɔ andakisa mɛndó to gbia lo Yezo ndo hɛ̃. Andakisa mɛndó Yakobo salela kaya mbeti tɛ lo adudó woni, wa wangɔ ni ngandó yangondo ti nɛngɔ ya, zo gbɔ̃ ndani.​—Di Zaki 3:2-6, 10-12.

16. Nda mɛ ayɔ ya, e salela ndakisa ti nzɔ̃ni nɛ?

¹⁶Wangɔ mɛ elengbi ti luangɔ: hɛ̃ ndakisa mɛ ndo li tɛrɛ lo biani. Se mɔ salela ndakisa mɛ amangbi na tɛnɛ mɛ mɔ ye tɛnɛngɔ ko, azi mɛ ndo ma mɔ na hũngɔ ni kaya bingangɔ li tɛ la. Ali ma bere mɔ fa la na foto na ya bingangɔ li tɛ la. Foto ni na zangɔ ala ya, ala hũ mbilimbili ti ya Ngbangɔ ya, adu ngbondoni. Yezo hĩngandó salelangɔ ndakisa mɛ amangbi na tɛnɛ mɛ lo ndo ha, wa nyita lo Yakobo landa ngandó se lɛlo tɛ lo. Wa zia e ba ndakisa kɔi mɛndó Yakobo salela, wa e ba nga nda mɛ ndakisa niko adundó nzɔ̃ni.

17. Nda mɛ ndakisa mɛ kaya Zaki 1:22-25 adu nzɔ̃ni nɛ?

¹⁷ Di Zaki 1:22-25. Ndakisa tɛ Yakobo mɛ aba tala tala adundó nzɔ̃ni na bangɔ akpale gba. Yakobo yendó hɛ̃ngɔ azi wangɔ ti ngbondoni, ti nɛngɔ ya e lua anzɔ̃ kpale ti Ngbangɔ ko, ta ayɔ ya, e ngbã bo na dingɔ ni dingɔ ma, ayɔ ya, e kpã atɛnɛ mɛ e di na kwa. Yakobo hɛ̃ndó ndakisa mɛ awa mangɔ lo alengbi ti gbɔ̃ngɔ ndani iɔ, ndakisa tɛ zo mɛ ndo ba lɛ lo ka lɛ tala tala. Wangɔ mɛndó lo ye hɛ̃ngɔ nɛ? Adu zangangɔ kɔdɛ na lo tɛ zo mɛ aba lɛ lo ka lɛ tala tala, wa lo hũ ndo mɛ ayɔ ya lo lɛkɛ, kanda lo kɛ̃ tɛ lo lɛkɛngɔ ni. Adu nga zangangɔ kɔdɛ se zo di Ngbangɔ wa lo hũ ye mɛ ayɔ ya, lo gbinyangbi na ya du tɛ lo, wa lo kɛ̃ nga lingɔ ni.

18. Aye taa mɛ ayɔ ya ta bɛ e li na ni ma, na ngoi mɛ e ye hɛ̃ngɔ ndakisa nɛ?

¹⁸ Se mɔ ye hɛ̃ngɔ ndakisa kɔi ko, ayɔ ya mɔ landa se lɛ lo tɛ Yakobo na akpale olo taa: Ti (1) hɛ̃ ndakisa mɛ amangbi na tɛnɛ mɛ mɔ ndo ha ti nɛngɔ ya, ni si na wangɔ yangondo. Ti  (2) hɛ̃ ndakisa mɛ azi mɛ ndo ma mɔ alengbi ti gbɔ̃ngɔ ndani iɔ. Ti (3) kambisa wangɔ mɛ azi lengbi ti luangɔ na ndo ndakisa niko yangondo. Se ta mɔ hĩnga ndakisa mɛ mɔ lengbi ti hɛ̃ngɔ ma ko, ba indɛxɛ tɛ Atɛmwɛ̃ tɛ Yehova. Na bɛli tɛnɛ mɛ atɛnɛ ya “andakisa,” mɔ na hũngɔ andakisa bulubulu mɛ mɔ lengbi ti salelangɔ ni. Wa ta bɛ mɔ ali ni ma ya, ndakisa adu ma bere mikro, se ko la mikro ndo li ya légɔ̃ asi nzɔ̃ni ko, ndakisa ndo li nga ya, wangɔ ti tɛnɛ mɛ mɔ ndo ha asi nzɔ̃ni. Na lo ni la, li zu ya mɔ hɛ̃ ndakisa na lo ti akpale mɛ ngbondoni. Adu biani ya, ta e ndo gi tingɔ azi mɛ ahĩnga hangɔ tɛnɛ nzɔ̃ni ti nɛngɔ ya, e benda likebi tɛ azi na ndo e ma, kanda adu ti zangɔ azi ya, ala li ka ndasewa tɛ Yehova ti dengɔ bɛ.

19. Ngasia la elengbi ti fangɔ ya e ndo sepala na ndasewa tɛ e ti nyingɔ nɛ?

¹⁹ Ta e lua nzɔ̃ tangɔ li gɛrɛ ti dungɔ na to gbia e mɛ na tɛrɛ ti lengbingɔ ma bere se mɛndó Yakobo na ni ma, kanda e na nzɔ̃ tangɔ li gɛrɛ ti lingɔ kwa hɛ̃ Yehova ndoni kɔi na ndasewa tɛ ayata kɔli na ayata wali. E ndo fa songo na ala na dungɔ ndoni kɔi na ala, na mandangɔ akpale ka tɛ la, nga na lingɔ kwa ti fangɔ tɛnɛ na mbilimbili zu ndoni kɔi na ala. Se e li kpengbani e landa se lɛlo tɛ Yakobo na ya akpale ti ya du tɛ e nga na ya se tɛ e ti hangɔ tɛnɛ ko, ni na hɛ̃ngɔ Yehova gonda wa e nga na zangɔ azi mɛ na seliye ti nzɔ̃ni ya, ala dɔ dã na to e ti songo mɛ ka ndozu.