1. Aye ti nzɔ̃ni mɛ apalanga gba ali nɛ?

 ABULU zu, apalanga gba ndo mu batisimɔ. Mɔ nga ka popo tɛ apalanga niko? Se adu ngaso ko, ayata ti ya bombi ndo ma dengɔ bɛ gba na lo tɛ mɔ, wa bɛ Yehova ndo de nga gba na lo tɛ mɔ! (Mas. 27:11) Binga li mɔ na ndo ge ge ge mɛ mɔ li ti nɛngɔ ya, mɔ mu batisimɔ. Na ndakisa, mɔ manda Ngbangɔ na ge ge ge nvɛ̃ni, ngoi mɛndɛ̃ na pɛ abulu gba. Mandangɔ aye ni aza mɔ ya, mɔ ye ya, Ngbangɔ du Tɛnɛ tɛ Nzapa. Ye mɛ aɔ zu, mɔ bandandó yengɔ nvɛ̃ni buku niko mɛ santo. Songɔ tɛ mɔ na mbage tɛ Yehova abandó maingɔ, ni la, mɔ hɛ̃ndó tɛrɛ mɔ hɛ̃ lo na lége ti batisimɔ, wa mɔ ti kɔi tɛ awa kwa tɛ lo. Mɔ mundó ekateli ti nzɔ̃ni nvɛ̃ni!

2. Aye mɛ ndɛ e na mandangɔ nɛ?

 ² Ta kitɛ da ma ya, uzu ti mɔ mungɔ batisimɔ ko, mɔ tengbindó na akpengba kpale gba mɛ atara loyengɔ tɛ mɔ. Kanda ngoi zu mɛ mɔ na maingɔ so tingɔ kangba ko, mɔ na tengbingɔ na tara mɛndɛ̃. Satana na lingɔ zu ya, ni gbɛ̃ songo mɛ mɔ na ni na lo tɛ Yehova, wa mɔ zia vɔrɔngɔ Lo. (Ef. 4:14) Ale ta mɔ zi lége ya, ni li tɛrɛ lo ma. Ye mɛ na zangɔ mɔ ya, mɔ ngbã mbilimbili ka tɛ Yehova, wa mɔ tɔndɔ nga kapa mɛndó mɔ ko hɛ̃ lo nɛ? Ayɔ ya, mɔ ngbã lá kwɛ ‘maingɔ’ ti nɛngɔ ya, mɔ ti wakristo mɛ kpengbani na ya nyingɔ. (Aeb. 6:1) Ngasia la mɔ lengbi ti lingɔ ni nɛ? Ni la du ye mɛ ndɛ e na mandangɔ.

3. Ye mɛ ayɔ ya, awakristo zu ali na pɛ batisimɔ tɛ la nɛ?

³ Na pɛ batisimɔ, ayɔ ya, e zu e landa wangɔ mɛndó Polo hɛ̃  ayata ti Efɛzɛ. Lo sandó ngunu bɛ la ya, ala ti awakristo mɛ “akpengba” na ya nyingɔ. (Ef. 4:13) Afa ya, ale ala ‘ngbã lá kwɛ maingɔ’ na ya nyingɔ. Elengbi ti gbɔ̃ngɔ nda tɛnɛ tɛ Polo nzɔ̃ni se e haka maingɔ na ya nyingɔ na maingɔ tɛ nyingambi. Awa dũngɔ ayangambi ndo ye, wa ala ndo sepala nga na nyingambi mɛ ala dũ lo fãnani. Kanda ta lo na ngbãngɔ nyingambi bwai na bwai ma. Na yɔngɔ ya, lo mai wa lo zia lingɔ aye mɛ “ayafɔ̃ ndo li.” (1 Kɔr. 13:11) Ni nga kwɛ kɔi na lo tɛ awakristo. Na pɛ batisimɔ, ayɔ ya, e ngbã lá kwɛ maingɔ na ya nyingɔ. Zia e ba na olo aye mɛ alengbi ti zangɔ e ya, e li ni.

4. Na bangɔ mbeti ti Filipɛ 1:9 seliye mɛ na zangɔ mɔ ya, mɔ mai na ya nyingɔ nɛ? Kambisa.

⁴ Li ya, songo tɛ mɔ na mbage tɛ Yehova ati kpengbani. Ta kitɛ da ma, mɔ ndo ye Yehova, kanda ayɔ ya, songo ni amai ati kpengbani nvɛ̃ni. Ngasia? Kaya mbeti ti Filipɛ 1:9, Toma Polo tɛnɛ tɛnɛ ti lége kɔi mɛ mɔ lengbi ti lingɔ ni. (Di.) Polo lindó sambela ya, azi ti Filipɛ “ndo yengbi aɔ ti uzu, [bere songo tɛ ala ati gba].” Na lo ni la, ale songo tɛ e na lo tɛ Yehova ati gba nvɛ̃ni. E na lingɔ ni se e ti na “hĩngangɔ ndo ti mbilimbili nga na ndara.” Se e manda akpale gba mɛ aba Yehova ko, e na yengɔ lo gba, e nga na yengɔ aseliye tɛ lo nga na se mɛ lo ndo li na akpale. E na tingɔ na gwɛ̃ kpengbani ti hɛ̃ngɔ lo dengɔ bɛ, wa ta e na yengɔ lingɔ aye mɛ na hɛ̃ngɔ lo vundu ma. E ndo li kpengbani ti hĩngangɔ dangɔ bɛ tɛ lo nga na se mɛ elengbi ti lingɔ aye na mangbi na dangɔ bɛ ni.

5-6. Ngasia la, songo tɛ e na mbage tɛ Yehova alengbi ti tingɔ kpengbani nɛ? Kambisa.

⁵ Yezo landandó aseliye tɛ Yehova na ndenge ti lengbingɔ, na lo ni la, se e hĩnga Yezo nzɔ̃ni ko, e na yengɔ Yehova gba. (Aeb. 1:3) Lége kɔi mɛ elengbi ti hĩngangɔ Yezo nzɔ̃ni adu na gbɔ̃ngɔ nda atɛnɛ mɛ kaya Évangile siɔ. Se du ya, ta mɔ mɛsɛnɛ na dingɔ Ngbangɔ bi zu ma ko, nda mɛ ta mɔ lengbi ti kpãngɔ prɔgramɛ ti lingɔ ni bandangɔ ndɛ ma nɛ? Na ngoi mɛ mɔ ndo di akpale mɛ aba Yezo ko, kpã lɛ mɔ na ndo aseliye tɛ lo. Azi ndo sepalandó dungɔ ndoni kɔi na lo; na ndakisa, na songo zu lo ndo yɔndó ayangambi. (Mar. 10:13-16) Ta lo ndo lindó kakulu lo tɛrɛ ava lo ma; na lo ni la, ala ndo kambisandó hɛ̃ lo sɔngɔ bɛ tɛ la. (Mat. 16:22) Na lingɔ ngaso, Yezo landandó se lɛlo tɛ To lo. Yehova ndo ye ya, azi adɔ̃ da na ni. Elengbi ti dɔngɔ dã na lo na lége ti sambela. Na ngoi mɛ e ndo li sambela ko, elengbi ti zingɔ bɛ e hɛ̃ lo. E ndo ye na bɛ e kɔi ya, ta Yehova na fangɔ ngbanga bingɔ ndo e ma. Lo ndo ye e, wa lo ndo kpã nga lɛ lo na ndo e.​—1 Pet. 5:7.

⁶ Yezo ndo mandó vundu tɛ azi. Toma Matai sundó ya: “Lo ĩ hũ azi butu butu ko, vundu tɛ la agbɔ̃ lo sĩ, ta sanga ma, ala nzɛ̃ ndo, ko mi agbɔ̃ nga la, nga ma se tɛ angasã ngbaga mɛ ta wa batangɔ la da ma.” (Mat. 9:36) Wa Yehova ndo ma tɛrɛ lo na lo tɛ azi ngasia? Yezo pandó ya: “To ĩ mɛ ka yayu ko, se mɛ nga ta lo ndoye ya, bɛ nyingambi kɔi na popo tɛ ayangambi olo agere ma la.” (Mat. 18:14) Tɛnɛ niko ndo hɛ̃ e dengɔ bɛ na lo mɛ ya, ni ndo fa ya, Yehova ndo ye e mawoma! Se e hĩnga Yezo nzɔ̃ni ko, songo tɛ e na mbage tɛ Yehova na tingɔ kpengbani.

7. Ngasia la lekisangɔ ngoi ndoni kɔi na ayata mɛ kpengbani na ya nyingɔ alengbi ti zangɔ mɔ nɛ?

⁷ Se du ya, mɔ ndo lekisa ngoi ndoni kɔi na ayata mɛndɛ̃ ti ya bombi tɛ ĩ mɛ ala kpengbani ya nyingɔ, wa mɔ gi nga lége ti hĩngangɔ la nzɔ̃ni ko, mɔ na lingɔ ya, songo tɛ mɔ ti kpengbani, wa mɔ ti nga wakristo mɛ kpengbani na ya nyingɔ. Ba ndenge mɛ ala ndo du na dengɔ bɛ. Ta ala ndo ma vundu bɛ yakere na ndenge mɛndó ala mu ekateli ti lingɔ kwa hɛ̃ Yehova ma. Hũnda la ya, ala kambisa hɛ̃ mɔ  ambanga akpale mɛndó ala tengbi na ni na ya kwa tɛ Yehova. Se mɔ ye mungɔ ekateli mɛ ngbondoni ko, hũnda wangɔ ka tɛ la. Ta bɛ mɔ li na ni ma ya, “kpale ndo longa na ngoi mɛ awa hɛ̃ngɔ wangɔ da gba.”​—Mas. 11:14.

8. Aye mɛ mɔ lengbi ti lingɔ se du ya, mɔ ti na kitɛ na lo ti aye mɛ Ngbangɔ ndo ha nɛ?

⁸ Nwɔ kitɛ mɛ mɔ na ni kaya bɛ mɔ. Nga ma se mɛ fale e tɛnɛ na ni kaya  paragrafɛ ti 2, Satana na lingɔ zu ya, ta mɔ mai na nyingɔ ma, wa ta mangbi tɛ mɔ na Yehova ati kpengbani ma. Lége kɔi mɛ lo lengbi ti lingɔ na ni adu na tɔngɔ mɔ ya, mɔ ti na kitɛ na lo ti ambanga aye mɛ mɔ manda kaya Ngbangɔ. Na ndakisa azi mɛndɛ̃ na tongɔ mɔ ya, mɔ ye ya, aye zu mɛ ge lɛ gigi asi na bɛ lo ta Nzapa la li ni ma. Ngoi mɛndɛ̃, na ngoi mɛndó mɔ dɛ palanga ko, ta mɔ ndo kpãndó lɛ mɔ gba na ndo tɛnɛ ti evolisiɔ̃ ma, kanda na olo mɔ ti kangba wɛ ko, ando ha ĩ na kpale ni ka kalasi. Tɛnɛ mɛ awa hangɔ mɔ na kalasi ndo tɛnɛ na omɛ ba evolisiɔ̃ alengbi ti singɔ mabere adu bɛta tɛnɛ mɛ zo lengbi ti yengɔ ni. Kanda ngoi mɛndɛ̃, ta la dɛ gindó lége ti hĩngangɔ aye mɛ ndo fa ya, Wa lingɔ aye zu da ma. Da bɛ mɔ na wangɔ mɛ kaya Masese 18:17: “Zo ti uzu ko la ndo samba kpale ko, ando li mabere lo la ndo pa mbilimbili, tee ka kwa lo na gangɔ hũndangɔ lo ya, lo fa mbilimbili ti tɛnɛ tɛ lo.” Na se lɛ yengɔ bo tɛnɛ mɛ aha na mɔ ka kalasi ko, ba na seni tɛnɛ ti mbilimbili mɛ kaya Ngbangɔ, tɛnɛ tɛ Nzapa. Gi gi atɛnɛ kaya ambeti tɛ e mɛ ndo kambisa nda tɛnɛ ti ya Ngbangɔ. Hũnda ayata mɛndó ndo ye tɛnɛ ti evolisiɔ gã. Hũnda la ya, ala kambisa hɛ̃ mɔ ye mɛndó ato la na gesi ya, ala ye ya, Wa lingɔ aye zu da. Tɛnɛngɔ tɛnɛ na la na zangɔ mɔ ya, mɔ hĩnga aye mɛ ndo fa ya, wa lingɔ aye zu da.

9. Wangɔ mɛ mɔ lua na ndo se lɛlo tɛ Melissa nɛ?

⁹ Nyita wali Melissa luandó anzɔ̃ kpale gba na ngoi mɛndó lo li bolukiluki na ndo akpale mɛ aba aye mɛ Nzapa li. * Lo pa ya: “Ka kalasi, ando kambisandó tɛnɛ ti evolisiɔ̃ na ndenge mɛ azi lengbi ti dangɔ bɛ la ya, adu mbilimbili. Na ebandeli ta mbi yendó lingɔ bolukiluki ma, mbi ndo kpɛndó ya, mbi na hĩngangɔ ya, tɛnɛ ti evolisiɔ̃ adu biani. Na gesi, mbi dandó bɛ mbi ya, ta Yehova ye ya, e vɔrɔ lo na ndo ngbongbo zangangɔ hĩngangɔ aye mɛ ndo to e ya, e ye lo tɛ lo ma. Ni la mbi bandandó lingɔ bolukiluki. Mbi dindó buku Y a-t-il un Créateur  qui se soucie de vous? Nga na nyi buku La vie a-t-elle été créée? Nga na Cinq questions à se poser sur l’origine de la vie. Ni dundó aye mɛ mbi ndo gi hĩngangɔ. Mbi da bɛ mbi ya, ni la adu ye mɛndó ayɔ ya, mbi li ni uzu.”

10-11. Ye mɛ lengbi ti zangɔ mɔ ya, mɔ ngbã mbilimbili nga na bingangɔ li ti vuruni nɛ? (1 Tɛsalonikɛ 4:3, 4)

¹⁰ Kɛ̃ dɔngɔ nɔ ti siɔni. Na ngoi mɛ mɔ dɛ palanga ko, gwɛ̃ ti bombingɔ tɛrɛ tɛ kɔli ná wali alengbi ti dungɔ kpengbani, wa azi mɛndɛ̃ alengbi ti tongɔ mɔ na ngunu ya, mɔ li pite. Satana ye ya, mɔ li aye ti ngaso. Ye mɛ lengbi ti zangɔ mɔ ya, mɔ du vuruni na ya bingangɔ li tɛ mɔ nɛ? (Di 1 Tɛsalonikɛ 4:3, 4.) Na ya sambela tɛ mɔ, kambisa sɔngɔ bɛ tɛ mɔ hɛ̃ Yehova. Kambisa hɛ̃ lo se mɛ mɔ ndo ma tɛrɛ mɔ, wa yɔ ka ti lo ya, lo hɛ̃ mɔ ngunu. (Mat. 6:13) Ta bɛ mɔ li na ni ma ya, Yehova na gwɛ̃ kpengbani ti zangɔ mɔ, ta ti sambisangɔ mɔ ma. (Nz. 103:13, 14) Ngbangɔ lengbi nga ti zangɔ mɔ. Melissa mɛ fale e tɛnɛ tɛnɛ tɛ lo uzu alindó kpengbani ti nɛngɔ ya, lo kɛ̃ dangɔ bɛ ti bí. Lo pa ya: “Dingɔ Ngbangɔ bi zu azandó mbi ya, mbi ngbã lá kwɛ tiringɔ to na gwɛ̃ tɛ mbi ti siɔni, wa mbi nwɔ nga ni. Ni ndo zandó mbi ya, mbi hĩnga ya, mbi du zo tɛ Yehova, wa mbi ye nga vɔrɔngɔ lo na ya dungɔ lɛ ngɛ̃́ tɛ mbi zu.”​—Nz. 119:9.

¹¹ Ta mɔ gi lége ti ozingɔ kpengba kpale tɛ mɔ, mɔ kɔi ma. Kambisa kpengba kpale mɛ mɔ ndo tengbi na ni hɛ̃ awa dũngɔ mɔ. Ta ando du ngoi zu woni kambisangɔ hɛ̃ azi mɛndɛ̃ kpale mɛ aba mɔ ma, kanda adu ngbondoni ya, mɔ li ni. Melissa tɛnɛ ya: “Mbi lindó sambela ti nɛngɔ ya, mbi lua ngunu, wa mbi kambisandó tɛnɛ zu mbi hɛ̃ tata tɛ mbi. Na gesi mbi mandó tɛrɛ mbi nzɔ̃ni nvɛ̃ni. Mbi hĩnga ya, mbi hɛ̃ndó Yehova dengɔ bɛ.”

12. Ye mɛ na zangɔ mɔ ya, mɔ mu ekateli ti nzɔ̃ni nɛ?

¹² Zia ya, awangɔ ti ya Ngbangɔ adɔ mɔ na nɔ. Na ngoi mɛ mɔ ndo mai ko, awa dũngɔ mɔ na hɛ̃ngɔ mɔ lége yɛkɛ yɛkɛ ti mungɔ ekateli mɔ nvɛ̃ni na bɛ mɔ. Abɛse ngaso ko, ta mɔ dɛ mɔ hĩnga akpale gba ti ya dungɔ lɛ ngɛ̃́ ma. Ngasia la mɔ lengbi kpɛngɔ lingɔ aye mɛ na gbɛ̃ngɔ mangbi tɛ mɔ na Yehova nɛ? (Mas. 22:3) Nyita wali mɛ ili lo la Kari akambisa aye mɛndó aza lo ya, lo mu ekateli ti nzɔ̃ni. Lo gbɔ̃ndó ndani ya, ta awakristo mɛ kpengbani na ya nyingɔ na gwɛ̃ ti andia na lo ti akpale zu ti ya dungɔ lɛ ngɛ̃́ ma. Lo pa ya: “Ayɔ ya, mbi gbɔ̃ nda wangɔ ti ya Ngbangɔ na se lɛ landangɔ ndia kɔi.” Na ngoi mɛ mɔ ndo di Ngbangɔ ko, hũnda tɛrɛ mɔ na ndo mɛ: ‘Aye mɛ mbi manda na lo tɛ Yehova nɛ? Wangɔ mɛ alengbi ti zangɔ mbi ya, mbi lɛkɛ seliye tɛ mbi nɛ? Anzɔ̃ kpale mɛ mbi lengbi ti luangɔ se mbi kpã wangɔ mɛ na kwa nɛ?’ (Nz. 19:7; Yis. 48:17, 18) Na dingɔ nga na gbɔ̃ngɔ li mɔ na ndo awangɔ ti ya Ngbangɔ ko, na dungɔ woni ya, mɔ ndo mu ekateli mɛ na hɛ̃ngɔ Yehova dengɔ bɛ. Se mɔ ngbã lá kwɛ maingɔ ko, mɔ na hũngɔ ya, ta ayɔ ya, ahɛ̃ mɔ andia na ndo akpale zu uzu ti nɛngɔ ya, mɔ mu ekateli ti nzɔ̃ni ma, na lo mɛ ya, mɔ na hĩngangɔ dangɔ bɛ tɛ Yehova nga na se mɛ lo ndo ba na kpale mɛ mɔ tengbi na ni.

13. Ngasia la akwa ti nzɔ̃ni alengbi ti zangɔ mɔ nɛ? (Masese 13:20)

¹³ Pɔna akwa mɛ ndo ye Yehova. Nga ma se mɛ fale e tɛnɛ na ni kaya paragrafɛ ti mbalambala ko, akwa mɔ alengbi ti zangɔ mɔ ya, mɔ mai na ya nyingɔ. (Di Masese 13:20.) Dengɔ bɛ tɛ nyita wali Sara wɛndó, kanda ye kɔi azandó lo ya, lo diri lo lua dengɔ bɛ fãni mɛndɛ̃. Lo tɛnɛ ya: “Mbi luandó abɛta akwa na ngoi mɛ alengbi nvɛ̃ni. Mbi ná nyita wali kɔi mɛ palanga e ndo mandandó Linɔngi ti Sinzili ndoni kɔi pɔsɔ zu. Kwa mbi mɛndɛ̃ zandó mbi ti nɛngɔ ya, mbi banda hɛ̃ngɔ gbinya ka bombi. Na lo ti lisalisi tɛ la ko, mbi bandandó hɛ̃ngɔ tɛrɛ mbi na dingɔ Ngbangɔ nga lingɔ sambela gba.  Mangbi tɛ mbi na Yehova abandandó tingɔ kpengbani wa mbi dirindó mbi lua dengɔ bɛ tɛ mbi.”

14. Ngasia la Julien luandó akwa ti nzɔ̃ni nɛ?

¹⁴ Ngasia la, mɔ lengbi ti pɔnangɔ akwa mɛ na zangɔ mɔ ya, mɔ mai nɛ? Julien, mɛ ndo li kwa na olo mabere biazo ti ya bombi atɛnɛ ya: “Na ngoi mɛndó mbi dɛ palanga ko, mbi luandó akwa ti nzɔ̃ni na ngoi mɛndó mbi ná ala e ndo li kwa ti fangɔ tɛnɛ ndoni kɔi. Ala dundó azi ti ge ge ge, ala zandó mbi ya, mbi hũ dengɔ bɛ mɛ kwa ti fangɔ tɛnɛ ndo hɛ̃. Mbi kpãndó mɔkanɔ ti lingɔ kwa ti ngoi zu. Mbi gandó mbi hĩnga ya, ta mbi ndó na akwa ti nzɔ̃ni ma, na lo mɛ ya, mbi ndo gindó dungɔ bo na akwa mɛ mbi ná ala na bulu kɔi. Na gesi, mbi luandó akwa ti nzɔ̃ni nvɛ̃ni ka Bethel. Se lɛlo tɛ ala azandó mbi ya, mbi ndo mu ekateli ti nzɔ̃ni na omɛ aba awele mɛ mbi ndo li, wa alindó ya, mbi dɔ dã na Yehova.”

15. Wangɔ mɛ Polo hɛ̃ Timɔte na omɛ aba dungɔ na akwa nɛ? (2 Timɔte 2:20-22)

¹⁵ Ye mɛ mɔ lengbi ti lingɔ se mɔ hũ ya, zo kɔi ti ya bombi adu siɔ kwa na lo tɛ mɔ nɛ? Polo hĩngandó ya, azi mɛndɛ̃ mɛ kaya bombi ti Kɔrinto ko, ta ala ndó na dɔngɔ nɔ ti nzɔ̃ni ma, na lo ni la, lo pandó hɛ̃ Timɔte ya, lo du na kpengba lɛ na lo tɛ la. (Di 2 Timɔte 2:20-22.) Mangbi tɛ e ná Yehova la adu ngbondoni. Na lo ni la, ta elengbi ti zingɔ lége ya, zo kɔi agbɛ̃ mangbi tɛ e ná lo ma, na lo mɛ ya e li kpengbani ti nɛngɔ ya, e ti na mangbi ti ngaso.​—Nz. 26:4.

16. Mikanɔ mɛ mɔ lengbi ti kpãngɔ nɛ?

¹⁶ Kpã mikanɔ mɛ na hɛ̃ngɔ mɔ anzɔ̃ kpale. Pɔna mɔkanɔ mɛ na zangɔ mɔ ya, mɔ ti na loyengɔ ti kpengbani nga wakristo mɛ kpengbani na ya nyingɔ. (Ef. 3:16) Na ndakisa, mɔ lengbi ti kpãngɔ mɔkanɔ ti dingɔ Ngbangɔ bi zu. (Nz. 1:2, 3) Bere mɔ lengbi ti lɛkɛngɔ se tɛ mɔ ti lingɔ sambela bere lingɔ sambela fãni mɛndɛ̃ gba. Ngoi mɛndɛ̃ mɔ lengbi ti bangɔ fãni mɛndɛ̃ awele mɛ mɔ ndo li nga na ngoi mɛ mɔ ndo lekisa na lengɔ wele ni. (Ef. 5:15, 16) Yehova na mangɔ dengɔ bɛ gba na ngoi mɛ lo hũ ya, mɔ ndo li kpengbani ti nɛngɔ ya, mɔ mai na ya nyingɔ.

17. Anzɔ̃ kpale mɛ mɔ na luangɔ se mɔ za azi mɛndɛ̃ nɛ?

¹⁷ Mɔ lengbi ti tingɔ wakristo mɛ kpengbani  na ya nyingɔ se mɔ ndo za azi mɛndɛ̃. Yezo pandó ya: “Bɛ wa hɛ̃ngɔ ye ndo de aɔ tɛ wa luangɔ ye.” (Aw. 20:35) Mɔ na luangɔ dengɔ bɛ gba se mɔ ndo salela ngoi ná ngunu tɛ mɔ so zangɔ azi mɛndɛ̃. Na ndakisa, mɔ lengbi ti kpãngɔ mɔkanɔ ti zangɔ azi mɛ ati abange ná azi mɛ awa ngbengule bere awa ziba ti ya bombi tɛ mɔ. Na ndakisa, mɔ lengbi ti zangɔ ala na vɔ̃ngɔ aye ka ngele hɛ̃ la, bere na hɛ̃ngɔ ala awangɔ ti nɛngɔ ya, ala salela aaparɛi na ndenge ti nzɔ̃ni. Se mɔ du nyita kɔli ko, kpã mɔkanɔ ti tingɔ wa zangɔ na kwa, na lingɔ ngaso mɔ na zangɔ ayata kɔli ná ayata wali gba. (Fil. 2:4) Hãngɔ ni zingɔ, mɔ na fangɔ songo na azi mɛ ta la ndo vɔrɔ Yehova ma na pangɔ nzɔ̃ pa ti Lo-lengɔ Gbia hɛ̃ la. (Mat. 9:36, 37) Se du ya alengbi ko, kpã mɔkanɔ ti lingɔ kwa hɛ̃ Yehova na ya kwa ti ngoi zu.

18. Ngasia la lingɔ kwa ti ngoi zu alengbi ti zangɔ mɔ ya, mɔ mai na ya nyingɔ nɛ?

¹⁸ Kwa ti ngoi zu na hɛ̃ngɔ mɔ lége ti nɛngɔ ya, mɔ mai na ya nyingɔ, wa mɔ dɔ dã na Yehova. Se mɔ li kwa tɛ wa sungɔ lége ti ngoi zu ko, ni lengbi ti hɛ̃ngɔ mɔ lége ti lingɔ Kalasi tɛ awa pangɔ nzɔ̃ pa ti Lo-lengɔ Gbia, lingɔ kwa ka Bethel bere kwa ti kĩngɔ ada ti Lo-lengɔ Gbia. Wa sungɔ lége kɔi mɛ palanga mɛ ili lo la Kaitlyn atɛnɛ ya: “Singɔ kwa ti fangɔ tɛnɛ ndoni kɔi na ayata mɛ kpengbani na ya nyingɔ la adu ye ti ngbondoni mɛndó aza mbi ya, mbi mai iɔ na ya nyingɔ na pɛ batisimɔ tɛ mbi. Se lɛlo tɛ ala azandó mbi ya, mbi banda dingɔ Ngbangɔ gba wa mbi ti zo mɛ ahĩnga hangɔ tɛnɛ nzɔ̃ni.”

19. Anzɔ̃ kpale mɛ mɔ na luangɔ se mɔ ngbã lá kwɛ maingɔ na ya nyingɔ nɛ?

¹⁹ Se mɔ ngbã lá kwɛ maingɔ na ya nyingɔ ko, mɔ na luangɔ anzɔ̃ sulu gba. Ta mɔ na salelangɔ ngunu tɛ mɔ so lingɔ aye mɛ ta na tina ma. (1 Yoanɛ 2:17) Ta mɔ na tengbingɔ na pɛnɔ mɛ ndo lo na ndo mungɔ ekateli ti siɔni ma. Mɔ na dungɔ na bɛta dungɔ lɛ ngɛ̃́ mɛ na dengɔ bɛ. (Mas. 16:3) Se lɛlo tɛ mɔ ti nzɔ̃ni na sangɔ ngunu bɛ ayata mɔ awakristo mɛ apalanga abɛse nga ala mɛ ati akangba. (1 Tim. 4:12) Wa omɛ aɔ zu, mɔ na luangɔ dengɔ bɛ mɛ ndo lo na ndo hɛ̃ngɔ Yehova gonda nga na dungɔ na mangbi ti nzɔ̃ni nga ti kpengbani na lo.​—Mas. 23:15, 16.