1. Nda mɛndó Yezo yɔ kati Yehova ya, lo bata ava ni nɛ?

 NA BI, uzu ti nɛngɔ ya, Yezo kpi ko, lo lindó sambela hɛ̃ To lo ti ndozu na lo ti ye mɛ ngbondoni. Lo yɔndó ka ti To lo ya, lo bata ava ni. (Yn. 17:15, 20) Ta kitɛ da ma ya, Yehova ndo ba awa kwa tɛ lo ngoi zu​—lo ndo kpã lɛlo na ndo ala​—lo ndo bata nga la. Kanda, Yezo hĩngandó ya, ava ni na tengbingɔ na botemeli mɛ ndo lo ka tɛ Satana. Yezo hĩnga ngandó ya, ala na dungɔ na gwɛ̃ ti lisalisi tɛ Yehova ti nɛngɔ ya, ala nwɔ̃ na botemeli tɛ Zabulu.

2. Na bangɔ Nzembo 33:18-20, nda mɛ ta elengbi ti dungɔ na mbɛtɔ na lo ti kpengba kpale mɛ e ndo tengbi na ni ma nɛ?

² Ndɛ lo mɛ ko, gigi mɛ tɛ Satana ndo kpã katɛ awakristo ti mbilimbili ndozu. E ndo tengbi na akpengba kpale ndɛ̃ ndɛ̃ ndɛ̃ mɛ alengbi ti nzɛ̃ngɔ na e, wa ni ndo kpã nga mbilimbili tɛ e na mbage tɛ Yehova na ya tara. Kanda, nga ma se mɛ e na hũngɔ na ni so ya tɛnɛ mɛ, ta elengbi ti kpɛngɔ ye kɔi ma. Yehova ndo bata e​—lo ndo hũ kpengba kpale mɛ e ndo tengbi na ni, wa lo nga dã ti zangɔ e ya, e nwɔ̃ kpengba kpale ni. Zia e ba ase lɛlo sɛ ti ya Ngbangɔ mɛ ndo fa se mɛ Yehova “ndo bata azi mɛ ndo tɔndɔ lo.”​—Di Nzembo 33:18-20.

3. Ngoi mɛ wa la, elengbi ti hũngɔ ya, e ngbã e kɔi na bɛ e wa?

³ Abɛse e ná ayata kɔli ná ayata wali ge ya bombi ko, ngoi mɛndɛ̃ elengbi ti hũngɔ ya, e ngbã e kɔi na bɛ e. Na ndakisa, apalanga lengbi ti hũngɔ ya, ngoi mɛ ala ndo kambisa loyengɔ tɛ la ndo hɛ̃ afɔ̃ la ti kalasi, bere na ngoi mɛ ala gwe kaya bombi ti fãnani ko, ala ndo hũ ya, ani ndo li ni, ani kɔi. Gba so popo tɛrɛ e alengbi ti mangɔ vundu bere tiringɔ to na seliye ti siɔni tɛ ala, bere elengbi ti hũngɔ ya, e nvɛ̃ni elengbi ti nwɔngɔ kpengba kpale tɛ e, e kɔi. Elengbi ti dungɔ na bingangɔ bɛ ti kambisangɔ se mɛ e ndo ma na tɛrɛ e hɛ̃ azi mɛndɛ̃, na lo mɛ ya, e ndo kpɛ ya, ta la na kpãngɔ tɛrɛ la  na ndo tɛ e ma. Wa ngoi mɛndɛ̃, elengbi ti hũndangɔ tɛrɛ e na ndo ya, bere zo kɔi alengbi ti kpãngɔ likebi tɛ lo na ndo e. Se e hũ ya, e ngbã e kɔi na lo ti nɛ ko, ni na lingɔ ya, ta e di kpã bɛ e na ndo azi mɛndɛ̃ ma, wa ni nga na lingɔ ya, e ti na sɔngɔ bɛ gba. Kanda ta Yehova ye ya, e ma tɛrɛ e ngaso ma. Nda mɛ e tɛnɛ ngaso nɛ?

4. Nda mɛndó Prɔfeta Eliya tɛnɛ ya: “Mbi ngbã na bɛ mbi nɛ”?

⁴ Na ndakisa, e ba ye mɛndó asi na Prɔfeta Eliya. Yezabele tɛnɛndó ya, ni na hongɔ lo, ni la, lo kpɛndó na pɛ bi 40 ti nɛngɔ ya, ta Yezabele ho lo ma. (1 Ba. 19:1-9) Lo lindó kaya du lo kɔi, wa lo tɛnɛndó hɛ̃ Yehova ya: “Mbi bo kɔi la, mbi ngbã [Prɔfeta].” (1 Ba. 19:10) Aprɔfeta mɛndɛ̃ ndó so ya kɔdɔrɔ niko, Obadia batandó Aprɔfeta 100 ti nɛngɔ ya, ta Yezabele kpɔ la ma. (1 Ba 18:7, 13) Nda mɛ Eliya hũndó ya, ni ngbã ni kɔi na bɛ ni nɛ? Lo hũndó ya, aprɔfeta mɛndó Obadia bata ala ko, ala kpilindó zu? Ngoi mɛndɛ̃ lo hũndó ya, ni ngbã na bɛ ni na lo mɛ ya, ta aprɔfeta mɛndɛ̃ ati pɛko ni ti nɛngɔ ya, ani li kwa hɛ̃ Yehova na pɛ nwɔ̃ngɔ aprɔfeta tɛ Baala ka ndo ngomba ti Karamele ma? Bere lo ndo mandó tɛrɛ lo ngaso na lo mɛ ya, lo hĩngandó ya, awa kula tɛ lo ndo gindó lo ya ani ho lo, bere ta zo kɔi ndo kpãndó likebi na ndo lo ma? Ta tɛnɛ niko akambisa akpale zu mɛndó ali tɛrɛ lo ti fangɔ se mɛndó Eliya ma na tɛrɛ lo ma. Kanda kpale mɛ e hĩnga adu ya, Yehova hĩnga nda mɛ Eliya ndo hũndó ya, ni ngbã na bɛ ni, wa lo hĩnga ngandó ye mɛ lo lengbi ti lingɔ ti nɛngɔ ya, lo za na Eliya.

5. Ngasia la, Yehova zundó na bɛ Eliya ya, ta lo ngbã na bɛ lo, lo kɔi ma nɛ?

⁵ Yehova zandó Eliya na ndenge gba. Lo sandó ngunu bɛ Eliya ya, lo tɛnɛ tɛnɛ mɛ kaya lo. Lo hũndandó Eliya fãni sɛ ngaso: “Ye mɛ mɔ ndo li so ndo olo nɛ?” (1 Ba. 19:9, 13) Ngoi mɛndó Eliya ndo kambisa hɛ̃ Yehova se mɛ lo ndo ma na tɛrɛ lo ko, Yehova ndo mandó lo ngoi zu. Yehova hɛ̃ndó Eliya gbinya na ndenge mɛndó lo tɛnɛ hɛ̃ lo ya, ni na dungɔ ndoni kɔi na lo, wa ni nga na ngunu gba. Kutu, lo zundó na bɛ Eliya ya, ni ngandó na awa kwa tɛ ni ti mbilimbili gba ka Yizraɛlɛ. (1 Ba. 19:11, 12, 18) Ta kitɛ da ma ya, bɛ Eliya zundó na pɛ kambisangɔ hɛ̃ Yehova se mɛndó lo ndo ma na tɛrɛ lo, nga na se mɛndó Yehova hɛ̃ lo gbinya. Yehova hɛ̃ndó Eliya akumba ti ngbondoni gba. Lo tɛnɛndó hɛ̃ lo ya, lo hĩni Hazaele na kpɔ̃ ti nɛngɔ ya, lo ti gbia ti Siri, lo hĩni  nga Yehu na kpɔ̃ ti nɛngɔ ya, lo ti gbia ti Yizraɛlɛ, lo hĩni nga Elisha na kpɔ̃ ti nɛngɔ ya, lo ti Prɔfeta. (1 Ba. 19:15, 16) Ngoi mɛndó Yehova hɛ̃ Eliya kumba ti ngaso ko, lo yendó zangɔ lo ya, lo du na bingangɔ li ti nzɔ̃ni. Ni la, Yehova hɛ̃ndó lo Elisha kwa ti nzɔ̃ni nvɛ̃ni. Ngasia la, Yehova lengbi ti zangɔ mɔ na ngoi mɛ mɔ ndo hũ ya, mɔ ngbã na bɛ mɔ nɛ?

6. Ye mɛ mɔ lengbi ti lingɔ sambela na lo ni na ngoi mɔ hũ ya, mɔ ngbã mɔ kɔi nɛ? (Nzembo 62:8)

⁶ Yehova yɔ ka ti mɔ ya, mɔ li sambela hɛ̃ lo. Lo ndo hũ kpale mɛ mɔ ndo tengbi na ni, wa lo ndo zu nga na bɛ mɔ ya, lo na mangɔ sambela zu mɛ mɔ ndo li hɛ̃ lo. (1 Tɛs. 5:17) Lo ndo sepala mangɔ awa kwa tɛ lo. (Mas. 15:8) Ye mɛ mɔ lengbi ti lingɔ sambela na lo ni na ngoi mɛ mɔ hũ ya, mɔ ngbã mɔ kɔi nɛ? Kambisa tɛnɛ mɛ ka bɛ mɔ hɛ̃ Yehova, nga ma se mɛndó Eliya li na ni. (Di Nzembo 62:8.) Kambisa hɛ̃ lo sɔngɔ bɛ tɛ mɔ, nga na se mɛ mɔ ndo ma na tɛrɛ mɔ. Hũnda Yehova ya, lo za mɔ, mɔ hĩnga ye mɛ mɔ lengbi ti lingɔ na ngoi mɛ mɔ hũ ya, mɔ ngbã mɔ kɔi na bɛ mɔ. Na ndakisa, se mɔ hũ ya, mɔ ngbã mɔ kɔi, wa mɔ ndo du na mbɛtɔ na ngoi mɛ mɔ ndo pa nzɔ̃ pa ka kelasi ko, yɔ ka ti Yehova ya, lo hɛ̃ mɔ ngunu mɛ alengbi ti zangɔ mɔ ya, mɔ ngbã lá kwɛ pangɔ nzɔ̃ pa. Mɔ lengbi nga ti hũndangɔ lo ya, lo hɛ̃ mɔ ndara ti nɛngɔ ya, mɔ pa loyengɔ tɛ mɔ na ndenge ti nzɔ̃ni. (Lk. 21:14, 15) Se du ya, mɔ ti na bingangɔ li ti siɔni, bere mɔ nzɛ̃ ko, yɔ ka ti Yehova ya, lo za mɔ, mɔ kambisa tɛnɛ ni hɛ̃ nyita kɔi mɛ lo kpengbani na ya nyingɔ. Mɔ lengbi nga ti yɔngɔ ka ti Yehova ya, lo za nyita niko ti nɛngɔ ya, lo ma na likebi zu, tɛnɛ mɛ mɔ ye kambisangɔ, ti nɛngɔ ya, lo kpã tɛrɛ lo na ndo tɛ mɔ. Kambisa tɛnɛ mɛ ka bɛ mɔ zu hɛ̃ Yehova, ba se mɛ lo ndo hɛ̃ gbinya na sambela tɛ mɔ, wa ye nga wangɔ tɛ azi mɛndɛ̃, ni la na lingɔ ya, ta mɔ hũ ya, mɔ ngba mɔ kɔi na bɛ mɔ ma.

7. Wangɔ mɛ mɔ lua na se lɛlo tɛ Mauricio nɛ?

⁷ Yehova hɛ̃ e zu kwa kɔi ti ngbondoni ya, e li ni. Mɔ lengbi ti yengɔ na bɛ mɔ kɔi ya, lo ndo hũ, wa lo ndo sepela nga na ge ge ge zu ko la, e ndo li ti nɛngɔ ya, e kokisa kumba tɛ e kaya bombi nga na ya kwa ti fangɔ tɛnɛ. (Nz. 110:3) Ngasia la, mɔ lengbi ti hɛ̃ngɔ tɛrɛ mɔ gba na ya kwa ni na ngoi mɛ mɔ ndo hũ ya, mɔ ngbã na bɛ mɔ kɔi nɛ? E ba se lɛ lo tɛ palanga ti kɔli kɔi mɛ ili lo la Mauricio. * Ngoi yakere na pɛ mungɔ batisimɔ tɛ Mauricio ko, kwa lo kɔi ti kpɔ̃ bɛ lo abandandó ziangɔ mbilimbili yɛkɛ yɛkɛ, Mauricio tɛnɛndó ya, “Ngoi mɛndó mbi hũ lo zia vɔrɔngɔ Yehova ko, ta mbi di dɛndó na nzɔ̃ dangɔ bɛ ma,” Mauricio tɛnɛ ya. “Mbi hũnda tɛrɛ mbi na ndo ya, bere mbi na kokisangɔ kapa mɛndó mbi ko hɛ̃ Yehova ti vɔrɔngɔ lo, wa mbi ngbã nga so ya ndasewa tɛ lo. Mbi hũndó ya, mbi ngbã mbi kɔi, ta zo mɛ na kpãngɔ tɛrɛ lo na ndo tɛ mbi da ma.” Ye mɛndó za Mauricio ti nɛngɔ ya, lo nwɔ sɔngɔ bɛ niko nɛ? Lo tɛnɛ ya, “Mbi bandandó hɛ̃ngɔ tɛrɛ mbi gba na ya kwa ti fangɔ tɛnɛ. Ni lindó ya, mbi zia kanisangɔ kpale tɛ mbi nvɛ̃ni, wa mbi hã siɔ dangɔ bɛ mɛndó mbi na ni. Mbi mandó dengɔ  bɛ, wa ta mbi di hũndó ya, mbi ngbã mbi kɔi na bɛ mbi na ngoi mɛndó mbi ndo fa tɛnɛ ndoni kɔi ná ayata ma.” Ti biani, abɛse ta elengbi ti fangɔ tɛnɛ ndoni kɔi na ayata yangondo ma ko, e ndo sangbi ngunu bɛ e, na ngoi mɛ e ndo fa tɛnɛ ndoni kɔi na la, na lége ti sungɔ ambeti, nga na telefɔnɛ. Ye mɛndɛ̃ mɛ azandó Mauricio nɛ? Lo tɛnɛ ya: “Mbi bandandó lingɔ akumba gba kaya bombi. Mbi bandandó lingɔ kpengbani ti nɛngɔ ya, mbi lɛkɛ adevuarɛ tɛ mbi nzɔ̃ni ti nɛngɔ ya, mbi li ka bombi. Akumba niko azandó mbi, mbi hũ ya, Yehova ná ayata ndo hũ mbi na tina gba ka lɛ la.”

8. Ye mɛ tara ti kpengbani mɛ e ndo tengbi na ni alengbi ti lingɔ na e nɛ?

⁸ E ndo tengbi na tara mawoma na ngoi ti ndani mɛ. (2 Tim. 3:1) Kanda tara mɛndɛ̃ ndo buta e butangɔ, wa ndenge ti tara ni ndo kamwisa e. Ngoi mɛndɛ̃ e ndo tengbi na kpale mɛ aba falanga, alengbi ti luangɔ e na ngã kɔi mɛ kpengbani, zo tɛ e mɛ e ndo ye lo gba alengbi nga ti kpingɔ. Na ya ngoi ti ngaso ko, elengbi ti luangɔ nzɛ̃ngɔ bere bɛ e lengbi nga ti sɔngɔ gba, se du ya, e ndo tengbi na tara ni ndoni ndoni. Abɛse ngaso ko, ta bɛ e li na ni ma ya, Yehova ndo hĩnga kpale zu mɛ e ndo tengbi na ni, wa na lége ti lisalisi tɛ lo ko, e na dungɔ na dangɔ bɛ ya, e na gbengɔ bɛ e na ya tara ni.

9. Kambisa kpengba kpale mɛndó Yobo tengbi na ni.

⁹ E ba se mɛndó Yehova za na Yobo mɛ zo ti mbilibmili. Bo na ya nyi ngoi yakere ko, lo tengbi ndó na akpale ti pɛnɔ mawoma. Bi kɔi ndó ko, atɛnɛ hɛ̃ Yobo ya, akpɔ asa tɛ lo, awa kwa tɛ lo, nga na ayati lo mɛ lo ndo ye la mawoma. (Yobo 1:13-19) So pɛni, na ngoi mɛndó lo ndo gbe bɛ lo na ya kpengba kpale niko ko, tɛrɛ lo bandandó sɔngɔ kpengbani. (Yobo 2:7) Ngoi mɛndó pɛnɔ aɔ ndo Yobo ko, lo tɛnɛndó ya: “Mbi kɛ̃, ta mbi na gwɛ̃ ti dungɔ lɛ ngɛ̃́ ma.”​—Yobo 7:16.

10. Ye mɛ Yehova li ti nɛngɔ ya, Yobo gbe bɛ lo na ya tara mɛndó lo tengbi na na ni nɛ? (Ba limɔ ti koko mbeti.)

¹⁰ Yehova ndo kpãndó likebi tɛ lo na ndo Yobo. Na lo mɛ ya, Yehova ndo yendó Yobo mawoma ko, lo hɛ̃ndó lo ye mɛndó lo na gwɛ̃ ni ti nɛngɔ ya, lo nwɔ̃ na kpengba kpale mɛndó lo tengbi na ni, wa lo ngbãngandó mbilimbili. Yehova tɛnɛndó tɛnɛ na Yobo, wa lo dandó bɛ Yobo na ndara tɛ lo mɛ ta ni na suka ma, nga na ndenge mɛ lo ndo kpã likebi tɛ lo na ndo aye mɛ lo lɛ kɛ. Yehova salela nyi kɔli kɔi mɛ mbilimbili mɛ ili lo la, Elihu ti nɛngɔ ya, lo sa ngunu bɛ Yobo, lo wamba nga bɛ lo. Elihu azundó na bɛ Yobo ya, Yehova ndo hɛ̃ ngoi zu awa kwa tɛ lo mɛ na seliye ti gbengɔ bɛ mbana gɛrɛ. Kanda Yehova hɛ̃ndó Yobo wangɔ na songo nvɛ̃ni na lége tɛ Elihu. Elihu zandó Yobo ya, lo zia kpãngɔ bɛ lo bo na ndo kpale tɛ lo nvɛ̃ni, kanda na ndo mangbi tɛ lo ná Yehova mɛ wa lingɔ aye zu. (Yobo 37:14) Yehova hɛ̃ndó Yobo kwa kɔi, lo lengbindó ti lingɔ sambela na ndo ayata lo taa mɛndó ali siɔ kpale tɛrɛ lo. (Yobo 42:8-10) Ngasia la, Yehova ndo za e na ngoi mɛ e ndo tengbi na tara ti kpengbani nɛ?

11. Ngasia la, Ngbangɔ lengbi ti zangɔ e na ngoi mɛ e ndo tengbi na pɛnɔ nɛ?

¹¹ Ta Yehova ndo tɛnɛ tɛnɛ mbala kɔi na e nga ma se mɛndó lo tɛnɛ tɛnɛ na Yobo ma, kanda lo ndo tɛnɛ tɛnɛ na e na lége ti Ngbangɔ tɛnɛ tɛ lo. (Roma 15:4) Lo ndo wamba bɛ e na ndenge mɛ lo hɛ̃ e nzɔ̃ dangɔ bɛ na bi mɛ na gangɔ. Ba ambanga tɛnɛ ti ya Ngbangɔ mɛ alengbi ti hɛ̃ngɔ mɔ ngunu na ngoi mɛ mɔ ndo tengbi na kpengba kpale. Kaya Ngbangɔ, Yehova tɛnɛ ya, ta ye kɔi bere kpengba kpale kɔi alengbi ti “kangbingɔ songo tɛ mbi ná Nzapa ma.” (Roma 8:38, 39) Lo di tɛnɛ hɛ̃ e ya, “lo dã na azi zu ko la ndo ili lo” na ya sambela. (Nz. 145:18) Yehova tɛnɛ hɛ̃ e ya, se e kpã bɛ e na ndo lo ko, elengbi ti gbengɔ bɛ e na ndo akpengba kpale abɛse ni du ngasia, wa e bata nga dengɔ bɛ tɛ e na ya pɛnɔ mɛ e ndo tengbi na ni. (1 Kɔr. 10:13; Zk. 1:2, 12) Ngbangɔ ndo tɛnɛ nga hɛ̃ e ya, pɛnɔ tɛ e du ti ngoi yakere,  se e haka ni na mbanɔ mɛ lo na hɛ̃ngɔ e ti bwai. (2 Kɔr. 4:16-18) Yehova hɛ̃ e nzɔ̃ dangɔ bɛ ti mbilimbili ya, lo na kpɔngɔ azi zu ko la ndo si na pɛnɔ​—afa ya, Satana ná azi zu ko la, ndo landa seliye tɛ lo, ndo li nga ye ti siɔni. (Nz. 37:10) Mɔ gbɔ̃ ambanga avɛrse mɛ ndo sa ngunu bɛ ka li mɔ, mɛ alengbi ti zangɔ mɔ ya, mɔ gbe bɛ mɔ na ya pɛnɔ mɛ mɔ na tengbingɔ na ni na bi mɛ na gangɔ?

12. Ti nɛngɔ ya, e lua nzɔ̃ kpale na ya Tɛnɛ tɛ Yehova ko, lo ye ya, e le nɛ?

¹² Yehova ye ya, e mu ngoi ti dingɔ nga ti mandangɔ Ngbangɔ, wa e gbɔ̃ nga li e na ndo kpale mɛ e lo ti dingɔ. Se e kpã kpale mɛ e ndo manda na kwa kaya dungɔ lɛ ngɛ̃́ tɛ e ko, lo yengɔ tɛ e na tingɔ kpengbani, wa e nga na dɔngɔ dã na To e ti ndozu. Ni ndo hɛ̃ e ngunu ti nɛngɔ ya, e gbe bɛ e na ndo pɛnɔ mɛ e ndo tengbi na ni. Yehova ndo hɛ̃ nga azi mɛ ndo kpã bɛ la na ndo Tɛnɛ tɛ lo nyingɔ vuru. Wa nyingɔ ni lengbi ti hɛ̃ngɔ e “[kpengba] nguru” ti nɛngɔ ya, e gbe bɛ e na ndo pɛnɔ ni.​—2 Kɔr. 4:7-10.

13. Ngasia la, tɛ ti nyingɔ mɛ mbɛ ti “mbilimbili nga ti kɔdɛ” ndo hɛ̃ e ando za e ti nɛngɔ ya, e gbe bɛ e na ya tara mɛ e ndo tengbi na ni nɛ?

¹³ Na lége tɛ Yehova ko, “mbɛ ti mbilimbili nga ti kɔdɛ” ndo si na ambeti ndɛ̃ ndɛ ndɛ̃, avideo, abia mɛ alengbi ti zangɔ e ya, lo yengɔ tɛ e ati kpengbani, wa ta e lalangɔ na ya nyingɔ ma. (Mat. 24:45) E na gwɛ̃ ti salelangangɔ na ndenge ti nzɔ̃ni atɛ ti nyingɔ zu mɛ Yehova ndo hɛ̃ e na ngoi mɛ alengbi. Nyita wali kɔi mɛ ndo du ka États-Unis ahɛ̃ndó sia kɔli mawoma na lo ti tɛ ti nyingɔ mɛ lo ndo lua. Lo tɛnɛ ya: “mbilimbili tɛ mbi atindó na ya tara ndoni ndoni na pɛ bulu 40 mɛndó mbi lekisa ni na ya kwa tɛ Yehova.” Lo tengbindó na tara mɛ kpengbani​—Na ndakisa, sofɛlɛ mɛndó ayɔ̃ samba gbɔ lo atɛrɛndó tara lo na kamiɔ, wa tara lo kpĩndó, awa dũngɔ nyingambi ko akpili ngandó na lo ti ngã kɔi mɛ siɔni, wa alua ngandó lo na ngã ti kanser fãni sɛ. Ye mɛndó aza lo ti nɛngɔ ya, lo gbe bɛ lo nɛ? Lo tɛnɛ ya: “Yehova ndo zandó mbi ngoi zu. Tɛ ti nyingɔ mɛ lo ndo hɛ̃ na lége tɛ mbɛ ti mbilimbili nga ti kɔdɛ ko, ni zandó mbi ya, mbi gbe bɛ mbi. Ni la, mbi lengbi ti tɛnɛngɔ tɛnɛ nga ma se mɛndó Yobo tɛnɛ ya: ‘Tee mɛ mbi na kpĩngɔ ko, ta mbi na ziangɔ mbilimbili tɛ mbi ma!’”​—Yobo 27:5.

14. Na bangɔ 1 Tɛsalonikɛ 4:9 ngasia la, Yehova ndo salela ayata e awakristo ti nɛngɔ ya, ala za e na ngoi ti pɛnɔ nɛ?

¹⁴ Yehova ndo ha na azi tɛ lo ya, ala yengbi, wa ala ndo sangbi ngunu ka popo tɛrɛ la na ngoi mɛ ala ndo tengbi na kpengba kpale. (2 Kɔr. 1:3, 4; di 1 Tɛsalonikɛ 4:9.) Ti nɛngɔ ya, e landa seliye tɛ Elihu ko, ayata kɔli ná ayata wali ndo du na gwɛ̃ kpengbani ti zangɔ e ya, e ngbã mbilimbili na ngoi mɛ e ndo tengbi na kpale ti pɛnɔ. (Aw. 14:22)  Na ndakisa, e ba se mɛ ayata ti ya bombi mɛ Diane ka da asandó ngunu bɛ lo ti nɛngɔ ya, lo du dã na Yehova na ngoi mɛndó tɛrɛ kɔ lo ndo sɔ kpengbani. Lo tɛnɛndó ya: “Adundó pɛnɔ nvɛ̃ni. Kanda e hũndó songo tɛ Yehova, e hũnga kɔti ti lo na ndo e na ya nzɛ ni kondó e tengbi na pɛnɔ. Ayata ti ya bombi azandó e mawoma. Ala ndo gandó ba e, ala ndo ili ndó e na telefɔnɛ, ala ndo hɛ̃ nga ndó e aye mɛ e na gwɛ̃ ni ti nɛngɔ ya aza e, e gbe bɛ e na pɛnɔ mɛ e ndo tengbi na ni. Hũngɔ ya, ta mbi hĩngandó kpɛngɔ na kamiɔ̃ ma ko, ayata ndo lindó zu ti hĩngangɔ bere mbi na likoki ti gwengɔ bombi, nga na singɔ kwa ti fangɔ tɛnɛ.” Ando hɛ̃mbi dengɔ bɛ gba na ndenge mɛ e ge ya ndasewa ti nyingɔ mɛ azi ni ndo yengbi mawoma!

15. Nda mɛ e ye ya, elengbi ti nwɔ̃ngɔ kpengba kpale mɛ e ndo tengbi na ni nɛ?

¹⁵ E zu e ndo tengbi na ambanga tara. Kanda nga ma se mɛ e manda na ni ko, ta e na onzingɔ pɛnɔ ni na bɛ e ma. Mabere to mɛ ndo ye ayati lo ko, Yehova ndo bata e ngoi zu. Lo dã na e, lo ndo ma to to tɛ e na ngoi mɛ e ndo ili lo ya, lo za e, wa lo ndo du nga dã ti zangɔ e. (Yis. 43:2) E hĩnga ya, elengbi ti nwɔ̃ngɔ kpengba kpale mɛ e ndo tengbi na ni, na lo mɛ ya, Yehova ndo hɛ̃ e aye zu mɛ e na gwɛ̃ ni ti nɛngɔ ya, e gbe bɛ e. Lo hɛ̃ e sambela, Ngbangɔ, atɛ ti nyingɔ mawoma, nga na ayata kɔli ná ayata wali ti songo mɛ ala ndo za e na ngoi mɛ e tengbi na kpengba kpale.

16. Ye mɛ elengbi ti lingɔ ti nɛngɔ ya, e ngbã ka gbɛti Yehova ti nɛngɔ ya, lo bata e na songo zu nɛ?

¹⁶ E ndo ma dengɔ bɛ gba na ndenge mɛ e na To e kɔi ti ndozu mɛ ndo bata e! “Bɛ e ndo ye lo mawoma.” (Nz. 33:21) Elengbi ti fangɔ na Yehova ya, e ndo hɛ̃ sia kɔli mawoma na ndenge mɛ Lo ndo bata e na songo zu na ngoi mɛ e ndo lua nzɔ̃ kpale na bibongiseli zu mɛ lo mu ti zangɔ e. E la elengbi ti lingɔ kpengbani ti nɛngɔ ya, e ngbã so gbɛ ti Yehova ti nɛngɔ ya, lo bata e. Na tɛnɛ mɛndɛ̃, se e ngbã bo lá kwɛ lingɔ zu mɛ elengbi ti lingɔ ti nɛngɔ ya, e tɔndɔ Yehova, wa e li akpale mɛ lo ndo hũ ni ka lɛlo nzɔ̃ni ko, lo na batangɔ e bwai na bwai!​—1 Pet. 3:12.