Na ngoi mɛndó Yehova hɛ̃ azi nyɔ ya, “Ĩ li ya lɛ sese sĩ, wa ĩ kpã ni na gbɛ nda ĩ” ko, lo yendó tɛnɛngɔ ya, lɛ sese na tingɔ Paradizo. (Eb. 1:28) Azi mɛ na luangɔ dungɔ lɛ ngɛ̃́ ti bwai na bwai ge lɛ sese na luangɔ nga kumba niko. Kanda ta ala na lingɔ kwa ti nɛngɔ ya, yaka kɔi ti nzɔ̃ni amu lɛ sese ma, na lo mɛ ya, ta yaka ti Edene adɛ da ma. Na pɛ to ti Armagedona, ala na dungɔ na kwa gba ti lingɔ ti nɛngɔ ya, ala lɛkɛ ando mɛndɛ̃ ti lɛ sese mɛ agbɛ̃. Ni na yɔngɔ ya, ala li kwa kpengbani!

Ni li ya, e da bɛ e na kwa mɛndó aya Izraɛlɛ ali na pɛ diringɔ ka kɔdɔrɔ tɛ la na ngoi mɛndó ala si ka gbɛ ngba ti Babilonɛ. Ala ziandó kɔdɔrɔ tɛ la, wa ta zo kɔi di dɛ dundó kai ma ali abulu bere 70. Kanda Yisaya pandó ya, na lége ti lisalisi tɛ Yehova, ala na diringɔ lɛkɛngɔ ni. Prɔfesi ni pandó ya: “Lo na lingɔ ya, bɛ nyama [ti kɔdɔrɔ ni] ati nga ma Edene, wa kpɛngbɛlɛ mɛ ka bɛ nyama nga ma yaka tɛ Yehova.” (Yis. 51:3) Yehova zandó aya Izraɛlɛ ya, ala diri lɛkɛ kɔdɔrɔ tɛ la. Kwɛ kɔi, na lége ti lisalisi tɛ Yehova, azi mɛ na mungɔ lɛ sese na longangɔ lingɔ ya, ni ti Paradizo.  Bandangɔ ndɛ, mɔ lengbi ti lingɔ aye mɛndɛ̃ so fangɔ ya, mɔ na gwɛ̃ ti lingɔ kwa niko.

Kɔi ti aye mɛ mɔ lengbi ti lingɔ adu na lingɔ kpengbani ya, mɔ bata yada tɛ mɔ nga na aye tɛ mɔ ngoi zu vuruni nga na mɔlɔngɔ. Mɔ lengbi ti lingɔ ngaso abɛse azi mɛ mɔ na ala ĩ ndo du ndoni kɔi ta ala ndo li ni ma. Mɔ lengbi nga ti hɛ̃ngɔ ti mɔ na ya kwa ti lɛkɛngɔ nga na batangɔ da ti bombi ná da ti kota bombi ya, adu ngoi zu vuruni. Se du ya, mɔ du na ngunu ti lingɔ ni, mɔ lengbi ti hɛ̃ngɔ ti mɔ na ya kwa ti zangɔ ayata mɛ atengbi na kpengba kpale. Ni na fangɔ ya, mɔ ndo du dã ti zangɔ ayata kɔli ná ayata wali. Hũnda tɛrɛ mɔ na ndo mɛ, ‘Mbi lengbi ti mandangɔ lingɔ akwa mɛ na zangɔ mbi ya, mbi li ni se du ya, Yehova hɛ̃ mbi lége ti lingɔ kaya gigi ti fãnani?’

Bo na pɛ sarangɔ nyingambi ti wali tɛ Yaerusɛ ko, Yezo pandó ya, ahɛ̃ lo tɛ ti tɛngɔ. (Mar. 5:42, 43) Ta adundó nvɛ̃ni ye ti pɛnɔ ti hɛ̃ngɔ ye ti tɛngɔ hɛ̃ nyingambi niko ti bulu 12 ma. Kanda da bɛ mɔ na kwa mɛ na yɔngɔ ya, e li na ngoi mɛ banda Yezo na kokisangɔ kapa tɛ lo mɛ apa ya, “azi zu mɛ kaya du ti sɛndɛ na mangɔ legɔ̃ lo, wa ala na singɔ.” (Yn. 5:28, 29) Abɛse ta Ngbangɔ kambisa akpale zu ma ko, elengbi ti hũngɔ ya, azi mɛ gbanda na songo na dungɔ na gwɛ̃ ya, aza ani na atɛ ti tɛngɔ, ndo ti dungɔ na ni, nga na abɔngɔ ti yungɔ. Mɔ lengbi ti fangɔ bandangɔ ndɛ ya, mɔ dã ti lingɔ kwa niko? Ba ambanga ye mɛ mɔ lengbi ti lingɔ lo mɛ.

Na ngoi mɛ ando pa ya, wa bangɔ ndo kɛlɛ kɛlɛ na gangɔ so bangɔ bombi tɛ ĩ, mɔ ndo sepala ilingɔ lo kaya da tɛ mɔ ti nɛngɔ ya, ĩ tɛ ye ndoni kɔi? Na ngoi mɛ ando to ayata mɛ ndo li kwa ka bethel mabere awa sungɔ lége ti kotani kaya bombi tɛ ĩ bere na ngoi mɛ kwa tɛ wa bangɔ ndo lɛkɛ kɛlɛ ndo wɛ, mɔ lengbi ti zangɔ ala ya, ala lua ndo ti dungɔ na ni? Se du ya, kota bombi ti regional bere akota bombi mɛndɛ̃ ali tɛrɛ lo kaya kɔdɔrɔ mɛ mɔ da, mɔ lengbi ti lengɔ kwa uzu bere na pɛ kota bombi niko so yambangɔ ayata mɛ na gangɔ?

Na bangɔ tɛnɛ mɛ kaya Awa Pangɔ Kwa 24:15 ko, elengbi ti dungɔ na dangɔ bɛ ya, amiliɔ̃ tɛ azi mɛ akpili na songɔ gbanda kwá. Gba ka popo tɛ la na dungɔ azi mɛndó ta la lua lége ti hĩngangɔ Yehova ma. Kanda ala na luangɔ lége ti lingɔ ni na pɛ songɔ kwá tɛ la. a Na yɔngɔ ya, aha ala na tɛnɛ tɛ Yehova, ni la, awa kwa tɛ Yehova ti mbilimbili na hɛ̃ngɔ ti la na ya kwa niko. (Yis. 11:9) Nyita wali Charlotte, mɛndó ali kwa ti fangɔ tɛnɛ ka Europe, ka Sud Amerika, nga na Afrika ko, lo ndo kũ na bɛ lo ndozu nvɛ̃ni lá niko. Na dengɔ bɛ zu lo tɛnɛ ya: “Mbi ndo kũ na bɛ mbi ndozu ti hangɔ tɛnɛ na azi mɛ na songo kwá. Na ngoi mɛ mbi di kpale mɛ aba zo kɔi mɛndó na dungɔ lɛ ngɛ̃́ na ngoi ti gã ko, mbi ndo gbɔ̃ li mbi ngoi gba: ‘Se lo hĩngandó Yehova ko, ale dungɔ lɛ ngɛ̃́ tɛ lo adundó ndenge mɛndɛ̃.’ Mbi ndo kũ na bɛ mbi ndozu pangɔ tɛnɛ mɛ aba Yehova hɛ̃ azi mɛ na songɔ kwá nga na se mɛ ala na dungɔ na dungɔ lɛ ngɛ̃́ ti nzɔ̃ni nvɛ̃ni se ala vɔrɔ lo.”

Abɛse awa kwa tɛ Yehova ti mbilimbili mɛndó na dungɔ lɛ ngɛ̃́ uzu ti gangɔ tɛ Yezo ko, ala na dungɔ na aye gba ti mandangɔ. Binga li mɔ na ndo dengɔ bɛ nga na kota ndima mɛ e na dungɔ na ni ti kambisangɔ hɛ̃ Daniel se mɛ prɔfesi mɛndó lo su ati na seni kanda ta lo nvɛ̃ni lo gbɔ̃ndó ndani ma. (Da. 12:8) Wa elengbi ti tɛnɛngɔ ya nɛ na omɛ aba zangɔ Naomi ná Ruta ya ala hĩnga ya, kaya ndasewa tɛ la ndó la adu Masiya nɛ? E na dungɔ na dengɔ bɛ gba ti hangɔ azi ti ndo lɛ sese zu na tɛnɛ zangangɔ kaka nga na kpãngɔ kɛtɛ ndozu ti gigi olo!

Ngasia la mɔ lengbi ti fangɔ bandangɔ ndɛ ya, mɔ na gwɛ̃ kpengbani ti zangɔ azi mɛ na songɔ kwá nɛ? Lége kɔi mɛ mɔ lengbi ti lingɔ ni adu na lingɔ kpengbani ti tingɔ zo mɛ ahĩnga hangɔ tɛnɛ nzɔ̃ni nga na hɛ̃ngɔ tɛrɛ mɔ gba na ya kwa ti fangɔ tɛnɛ mɛ ndo li tɛrɛ ndɛ na ndo lɛ gigi zu. (Mat. 24:14) Abɛse du ya, tingɔ bange bere akpale mɛndɛ̃ ndo li ya, ta mɔ li kwa niko gba ma ko, mɔ lengbi ti fangɔ ya, mɔ na gwɛ̃ ti hangɔ azi mɛ gbanda na songɔ tɛnɛ na lingɔ zu mɛ mɔ lengbi ti lingɔ.

Adu ngbondoni ya, mɔ gbɔ̃ li mɔ na ndo hũnda mɛ, mɔ na gwɛ̃ kpengbani ti dungɔ ge lɛ sese? Mɔ na dengɔ bɛ ti lingɔ ya, lɛ sese ti Paradizo, yambangɔ azi mɛ na songɔ kwá nga na hangɔ ala na ye? Fa ya, mɔ dã ti mungɔ sese na hɛ̃ngɔ ti mɔ na ya kwa mɛ ndo li tɛrɛ lo ndɛ mɛ amangbi na omɛ na lingɔ tɛrɛ lo na ngoi mɛ mɔ na dungɔ kaya gigi ti fãnani!