1. Uzu ti lo kpingɔ, tɛnɛ mɛndó Yezo tɛnɛ hɛ̃ kɔli kɔi mɛndó wa lingɔ siɔ ye mɛndó so gunda lo nɛ? (Luka 23:39-43)

 YEZO ná akɔli sɛ mɛ awa lingɔ siɔ kpale ndo ma pɛnɔ kpengbani na ngoi mɛ ala ndo kpi kwá yɛkɛyɛkɛ. (Luka 23:32, 33) Na lo mɛ ya, akɔli niko atɛnɛndó siɔ tɛnɛ hɛ̃ Yezo na ngoi mɛndó ala ka ndo kɛkɛ ko, afa yangɔndo ya, ta ala adu ava Yezo ma. (Mat. 27:44; Mar. 15:32) Kanda kɔi ka popo tɛ la agbinyandó bingangɔ li tɛ lo. Lo pando hɛ̃ Yezo ya: “Ngoi mɛ gbanda mɔ ga so lɛngɔ gbia na ndo azi ko, da bɛ mɔ na mbi.” Yezo gbinya hɛ̃ lo ya: “Mbi pa hɛ̃ mɔ ti bɛta tɛnɛ ndɛ ya, mɔ na dungɔ ndoni kɔi na mbi ka Paradizo.” (Di Luka 23:39-43.) Ta ye kɔi mɛ afa ya, wa lingɔ siɔ ye niko ayendó nzɔ̃ pa ti ‘Lo-lengɔ Gbia ti ndozu’ mɛndó Yezo pa na ngoi mɛndó lo ndo li kwa tɛ lo da ma. Wa ta Yezo tɛnɛndó bɛ fani kɔi hɛ̃ kɔli niko ya, lo na lingɔ kaya Lo-lengɔ Gbia mɛ ka ndozu ma. (Mat. 4:17) Yezo ndo tɛnɛndó tɛnɛ mɛ aba Paradizo mɛ na dungɔ ge lɛ sese na bi mɛ na gangɔ. Nda mɛ elengbi ti tɛnɛngɔ ngaso nɛ?

2. Ye mɛ ndo fa ya, zo mɛndó wa lingɔ siɔ ye, adundó zo ti yuda nɛ?

² Alengbi ti dungɔ ya, wa lingɔ siɔ ye mɛndó agbinya bɛ lo ko, lo du zo ti yuda. Lo tɛnɛndó hɛ̃ fɔ̃ lo mɛndɛ̃ ya: “Ta mɔ ndokpɛ Nzapa ma sia, pɛnɔ mɛ mɔ ndohũ nga la lo ndohũ.” (Luka 23:40) Ayuda ndo vɔrɔndó Nzapa kɔi, kanda azi ti gigi ndo vɔrɔndó anzapa gba. (Kob. 20:2, 3; 1 Kɔr. 8:5, 6) Se ta wa lingɔ siɔ ye niko adundó zo ti yuda ma ko, lo lengbindó ti pangɔ ya, “Ta mɔ ndokpɛ anzapa ma sia?” Hãngɔ ni zingɔ, ta atondó Yezo ka tɛ azi ti gigi ma, kanda Nzapa tondó lo hɛ̃ “azi ti Izraelɛ mɛ adu nga ma angasã ngbaga mɛ ayu ndo.” (Mat. 15:24) Nzapa pandó hɛ̃ aya Izraɛlɛ ya, lo na songɔ na azi mɛ akpili. Ngoi mɛndɛ̃, wa lingɔ siɔ ye mɛndó agbinya bɛ lo ka hĩngandó tɛnɛ niko, wa nga na se mɛ tɛnɛ tɛ lo ndo fa na ni, lo ndó na loyengɔ ya, Yehova  ye songɔ na Yezo ti nɛngɔ ya, lo le gbia kaya Lo-lengɔ Gbia tɛ Nzapa. Ta kitɛ da ma, wa lingɔ siɔ kpale niko ndo kpã ngandó bɛ lo ya, Nzapa na songɔ na ni kaya kwá.

3. Ngoi mɛndɛ̃, bingangɔ li mɛndó wa lingɔ siɔ ye na ni na ngoi mɛndó Yezo tɛnɛ tɛnɛ ti Paradizo nɛ? Kambisa. (Ebandeli 2:15)

³ Na lo mɛ ya, zo mɛ wa lingɔ siɔ ye mɛndó agbinya bɛ lo, adu zo ti yuda ko, lo lengbindó ti hĩngangɔ tɛnɛ mɛ aba Adamu ná Eva nga na Paradizo mɛndó Yehova li na lo tɛ la. Ni la, wa lingɔ siɔ ye niko lengbindó ti yengɔ ya, Paradizo mɛndó Yezo tɛnɛ tɛnɛ ni alengbi ti dungɔ yaka kɔi ti nzɔ̃ni mɛ ge lɛ sese.​—Di Ebandeli 2:15.

4. Tɛnɛ mɛndó Yezo tɛnɛ hɛ̃ wa lingɔ siɔ ye kɔi, alengbi ti tongɔ e ya, e gbɔ̃ li e na ndo nɛ?

⁴ Tɛnɛ mɛndó Yezo tɛnɛ hɛ̃ wa lingɔ siɔ ye alengbi ti tongɔ e, e binga li e na ndo se mɛ dungɔ lɛ ngɛ̃́ na dungɔ na ni kaya Paradizo. Ta kitɛ da ma, elengbi timandangɔ kpale gba mɛ aba Paradizo se e manda kpale mɛndɛ̃ ti lo-lengɔ gbia ti siriri tɛ Gbia Salomo. Hãngɔ ni zingɔ, elengbi ti kungɔ ya, zo mɛ aɔ Salomo, ndoni kɔi na azi mɛ na lengɔ gbia na lo, ala na lingɔ ya, lɛ sese ati Paradizo ti nzɔ̃ni. (Mat. 12:42) Ni fa yangondo ya, “angasa ngbaga mɛndɛ̃” alengbi ti kpãngɔ lɛ la na ndo kpale mɛ ala lengbi ti lingɔ ti nɛngɔ ya, ala du na dungɔ lɛ ngɛ̃́ ti kaka kaya Paradizo.​—Yn. 10:16.

5. Mɔ ndo da bɛ mɔ ya, dungɔ lɛ ngɛ̃́ na dungɔ ngasia kaya Paradizo nɛ?

⁵ Na ngoi mɛ mɔ ndo binga li mɔ na ndo Paradizo, mɔ ndo hũ ya, dungɔ lɛ ngɛ̃́ na dungɔ kai ngasia? Ngoi mɛndɛ̃ mɔ ndo da bɛ mɔ ya, ni na dungɔ yaka mɛ nzɔ̃ni nvɛ̃ni mabere yaka ti Edene mɛndó Yehova li. (Eb. 2:7-9) Mɔ lengbi ti dangɔ bɛ mɔ na prɔfesi tɛ Mika mɛ atɛnɛ ya, azi tɛ Nzapa na dungɔ “zo na zo ka gbɛ kɛkɛ tɛ lo ti vinyɔ nga ka gbɛ kɛkɛ tɛ lo ti figi.” (Mik. 4:3, 4) Bere mɔ da bɛ mɔ na avɛrse ti ya Ngbangɔ mɛ ndo tɛnɛ ya, atɛ ti tɛngɔ na dungɔ mawoma. (Nz. 72:16; Yis. 65:21, 22) Ni la mɔ lengbi ti hũngɔ tɛrɛ mɔ kaya ndo kɔi mɛ nzɔ̃ni, mɔ du sese wa tɛ ti tɛngɔ asĩ so ndo mɛsa ka gbɛlɛ mɔ, mɔ ndo wɔ mbó ti nzɔ̃ni mɛ na finya ti nzɔ̃ni mɛ alo kaya akɛkɛ ná fɛlɛlɛ asi. Omɛ ngbondoni zu, mɔ lengbi ti hũngɔ kaya bingangɔ li tɛ mɔ ndenge mɛ azi ti ndasewa tɛ mɔ ná akwa mɔ mɛndɛ̃ mɛ alo ti songɔ kwá ndo hé ngia, wa la na dengɔ bɛ ti lekisangɔ ngoi ndoni kɔi. Ta adu suma gɛgɛrɛ ma. Ta kitɛ da ma ya, kpale niko na lingɔ tɛrɛ lo ge lɛ sese biani. Abɛse ngaso ko, e na dungɔ na kwa ti nzɔ̃ni ti lingɔ ka Paradizo.

6. Ye mɛ e na lingɔ ka Paradizo nɛ? (Ba nga limɔ.)

⁶ Yehova lindó azi na likoki ti sepalangɔ na kwa mɛ ala ndo li. (Mos. 2:24) E na dungɔ na kwa gba ti lingɔ na ya Lo-lengɔ Gbia ti bulu koto tɛ Kristo. Azi mɛ na songɔ na ngoi ti kota  pɛnɔ nga na amiliɔ̃ tɛ azi mɛ na songo kwá ko, ala na dungɔ na gwɛ̃ ti bɔngɔ, tɛ ti tɛngɔ, nga na ndo ti dungɔ na ni. Ti nɛngɔ ya, kpale niko zu ali tɛrɛ lo ko, na yɔngɔ ya, e li kwa kpengbani, wa ni na dungɔ kwa ti dengɔ bɛ! Nga ma se mɛndó Adamu ná Eva alengbi ti lɛkɛngɔ yaka mɛndó ala ndo du da ko, e nga na luangɔ nzɔ̃ tangɔ ligɛrɛ ti lɛkɛngɔ lɛ sese ti nɛngɔ ya, ni ti Paradizo. Da bɛ mɔ na dengɔ bɛ mɛ e na mangɔ ti pangɔ nzɔ̃ pa hɛ̃ amiliɔ̃ tɛ azi mɛndó akpli mɛ ala na songɔ kwá mɛndó ta ala hĩnga kpale bɛ yakere na ndo Yehova ná dangɔ bɛ tɛ lo ma, nga na ngoi mɛ e na zangɔ azi ti mbilimbili mɛndó na dungɔ lɛ ngɛ̃́ uzu ti nɛngɔ ya, Yezo ga ge lɛ sese ya, ala manda akpale mɛ ali tɛrɛ lo na pɛ kwá tɛ la.

7. Kpale mɛ elengbi ti yengɔ lo ni nɛ, wa na lo nɛ?

⁷ Elengbi ti yengɔ na bɛ e kɔi ya, ngoi mɛ e na dungɔ ka Paradizo ko, e na dungɔ na siriri e nga na dungɔ na aye zu mɛ e na gwɛ̃ ni, wa kpale nga na ɔngɔ na mɔlɔngɔ. Na lo nɛ? Na lo mɛ ya, Yehova pia tɛnɛ hɛ̃ e se mɛ dungɔ lɛ ngɛ̃́ na dungɔ na ni kaya Lo-lengɔ gbia tɛ Nyi lo. Zia e ba na olo kpale mɛ aba lo-lengɔ gbia tɛ Gbia Salomo.

8. Ngasia la tɛnɛ mɛ kaya Nzembo 37:10, 11, 29 atindó na seni nɛ? (Ba nga “Hũnda tɛ awa dingɔ mbeti” mɛ so ya mbeti olo.)

⁸ Na lége ti nyingɔ tɛ Nzapa, Davidi sundó se mɛ dungɔ lɛ ngɛ̃́ na dungɔ na ni na ngoi mɛ gbia ti ndara nga ti mbilimbili na dungɔ ka ndo kiti tɛ lo ti gbia. (Di Nzembo 37:10, 11, 29.) Ngoi gba e ndo di hɛ̃ azi mɛndɛ̃ vɛrse ti Nzembo 37:11 na ngoi mɛ e ndo tɛnɛ hɛ̃ la tɛnɛ ti Paradizo mɛ na gangɔ. Ayɔ ya, e li ngaso na lo mɛ ya, Yezo dirindó ndo tɛnɛ niko na ya Tɛnɛ tɛ lo ka ndo ngomba, wa lo tɛnɛndó ya, ni na lingɔ tɛrɛ lo na bi mɛ na gangɔ. (Mat. 5:5) Kanda tɛnɛ tɛ Davidi fa ngandó se dungɔ lɛ ngɛ̃́ mɛ azi na dungɔ na ni kaya lo-lengɔ gbia tɛ Salomo. Ngoi mɛndó Salomo ndo le gbia ko, awa kwa tɛ Nzapa ndó na siriri, ala ngandó na aye ti mi gba kaya kɔdɔrɔ mɛ “asĩ na miliki nga na kpɔ̃ lavu.” Nzapa pandó ya: “Se ĩ ngbã lá kwɛ na tɔndɔngɔ ndia tɛ mbi ko, . . . , Mbi na kpãngɔ siriri so ya gigi, wa ĩ na langɔ langɔ zangangɔ kpɛngɔ mbɛtɔ ti ye kɔi.” (Le. 20:24; 26:3, 6) Akapa niko zu atindó na seni na ngoi mɛndó Salomo ndo le gbia. (1 Nt. 22:9; 29:26-28) Wa  Yehova tɛnɛ ngandó ya, ta asiɔ azi na “dungɔ da ma.” (Nz. 37:10) Ni la tɛnɛ ti Nzembo 37:10, 11, 29 atindó na seni na ngoi ti gã, wa ni nga na tingɔ na se na ngoi mɛ na gangɔ.

9. Tɛnɛ mɛndó gbia ti Sheba tɛnɛ na lo ti lo-lengɔ gbia tɛ Salomo nɛ?

⁹ Pandɛ ti siriri nga na aye ti mi mɛndó aya Izraɛlɛ na ni na ngoi mɛndó Salomo ndo le gbi a agwendó yɔrɔngɔ ni tee asi ka tɛ gbia ti wali Sheba. Lo lindó voyagɛ ti yɔngɔrɔni, lo gwendó ka Yerusalɛmɛ ti nɛngɔ ya, lo nvɛ̃ni lo hũ na lɛlo akpale mɛndó lo ndo ma pa ni. (1 Ki. 10:1) Na ngoi mɛndó lo ba lo-lengɔ gbia tɛ Salomo ko, lo tɛnɛndó ya: “Tɛnɛ mɛndó atɛnɛ hɛ̃ mbi ko, ta asi bɛ so punda ni ma. . . . Dengɔ bɛ na azi tɛ mɔ, dengɔ bɛ nga na awa kwa tɛ mɔ mɛ ndo du ndoni kɔi na mɔ ngoi zu, wa ala ndo ma tɛnɛ ti ndara tɛ mɔ!” (1 Ba. 10:6-8) Kanda kpale mɛndó ando ɔ na ya lo-lengɔ gbia tɛ Salomo ko, ni du bondó se lɛlo ti yakere ti aye mɛ Yehova na lingɔ na lo tɛ azi ka gbɛ Lo-lengɔ Gbia tɛ Nyi lo Yezo.

10. Ngasia la Yezo ɔ Salomo nɛ?

¹⁰ Yezo ɔ Salomo madãma na ya akpale zu. Salomo dundó zo ti zangangɔ lengbingɔ mɛndó ali asiɔ kpale gba, wa ni sindó na pɛnɔ hɛ̃ azi tɛ Nzapa. Kanda Yezo du gbia mɛ na tɛrɛ ti lengbingɔ mɛ ta lo lengbi ti lingɔ siɔ kpale ma. (Luka 1:32; Aeb. 4:14, 15) Yezo ngbãndó mbilimbili ka tɛ Nzapa abɛse Satana atarandó lo kpengbani. Kristo afandó ya, ta lo na lingɔ ye ti siɔni mɛ na lingɔ ya, siɔ kpale asi na azi ti mbilimbili mɛ lo na lengɔ gbia na ndo la ma. Ta mɔ hũ ya, lo du bɛta gbia ma?

11. Azi mɛ na zangɔ Yezo na ya Lo-lengɔ Gbia tɛ lo na?

¹¹ Yezo ná azi 144 000 mɛ na lengɔ gbia ndoni kɔi na lo, ala na lingɔ kwa ndoni kɔi ti nɛngɔ ya ala bata azi wa ala kokisa nga dangɔ bɛ tɛ Yehova na ndo lɛ sese. (Suma 14:1-3) Na ngoi mɛndo ala ge lɛ sese ko, ala gbendó bɛ la na ya tara nga na akpale ti pɛnɔ, ni la ala lengbi ti kpãngɔ tɛrɛ la na ndo tɛ azi mɛ ndo gbe bɛ la na ya tara nga na ya pɛnɔ ge lɛ sese. Kumba mɛ azi mɛ na lengɔ gbia ndoni kɔi na Yezo na dungɔ na ni nɛ?

12. Kwa mɛ Yehova hɛ̃ azi 144 000 nɛ?

¹² Yezo ná azi mɛ na lengɔ gbia ndoni kɔi na lo na dungɔ na kwa gba ti lingɔ ɔngɔ omɛndó Salomo na ni. Gbia Salomo ndó na kumba ti batangɔ amiɔ̃ tɛ azi bo na ya kɔdɔrɔ kɔi. Kanda Yezo ná azi mɛ na lengɔ gbia kaya Lo-lengɔ gbi tɛ Nzapa na batangɔ amiliarɛ tɛ azi mɛ na dungɔ na dugɔ lɛ ngɛ̃́ ge lɛ sese zu. Yehova hɛ̃ azi 144 000 ndima nvɛ̃ni!

13. Kwa ti ngbondoni mɛ azi mɛ na lengɔ gbia ndoni kɔi na Yezo na lingɔ nɛ?

¹³ Mabere Yezo, azi 144 000 na dungɔ agbia, ala nga na dungɔ anganga nzapa. (Suma 5:10) Na gbɛ ndia tɛ Mɔizɛ ko, kumba ti uzu tɛ anganga nzapa adundó ti zangɔ azi ya, ala du nzɔ̃ni na ya mi nga na ya nyingɔ. Ndia ni dundó “limɔ [bere yika yika] ti abɛta ye mɛ na gangɔ gesi.” (Aeb. 10:1) Na lo ni la, elengbi ti tɛnɛngɔ ya, azi mɛ na lengɔ gbia ndoni kɔi na Yezo ko, ala na hɛ̃ngɔ ti la na kwa niko ti kpengbani, zangɔ awa kwa tɛ Nzapa ya, ala du nzɔ̃ni na ya mi ná ya nyingɔ. Na olo ko, ta e hĩnga ndenge mɛ gbanda agbia nga anganga nzapa niko na tɛnɛngɔ tɛnɛ na azi mɛ na dungɔ ge lɛ sese ma. Abɛse ebongisili mɛ Yehova na mungɔ na dungɔ ngasia ko, elengbi ti yengɔ na bɛ e kɔi ya, kaya Paradizo mɛ na gangɔ ko, azi na luangɔ litambwisi mɛ alengbi.​—Suma 21:3, 4.

14. Mangbi mɛ ka popo tɛrɛ ‘angasã gbaga mɛndɛ̃’ ná ayata Kristo nɛ?

¹⁴ Yezo ilindó azi mɛ na lengɔ gbia ndoni kɔi na lo ya, “linɔ tɛ azi mɛ yakere.” (Luka 12:32) Hãngɔ ni zingɔ, lo di tɛnɛ tɛnɛ ti linɔ ti sɛ, lo ili  ala ya, “angasã gbaga mɛndɛ̃.” Linɔ niko zu abombi ali bo linɔ̃ kɔi. (Yn. 10:16) Bandangɔ ndɛ, alinɔ̃ niko zu sɛ ndo li kwa ndoni kɔi, wa ala na ngbãngɔ bo lá kwɛ lingɔ kwa ndoni kɔi abɛse na ngoi mɛ gbanda sese ati Paradizo. Ta kitɛ da ma ya, na ngoi niko gbanda ko, azi mɛ kaya ‘linɔ̃ tɛ azi mɛ yakere’ ala na dungɔ ka ndozu, wa ‘angasã gbaga mɛndɛ̃’ na dungɔ ge lɛ sese wa ala dungɔ na nzɔ̃ tangɔ li gɛrɛ ti luangɔ dungɔ lɛ ngɛ̃́ ti kaka ge lɛ sese. Kanda, ni na aye mɛ ‘angasã gbaga mɛndɛ̃’ alengbi ti lingɔ ti nɛngɔ ya, ala lua dungɔ lɛ ngɛ̃́ ka Paradizo.

15. (a) Ngasia la ‘angasã ngbaga mɛndɛ̃’ ndo li kwa na mangbi na ayata Kristo nɛ? (b) Ngasia la, mɔ lengbi ti landangɔ se lɛlo tɛ nyita mɛ ndo li kwa ka farmasi nɛ? (Ba limɔ.)

¹⁵ Wa lingɔ siɔ ye mɛnndó agbinya bɛ lo, akpindó uzu ti nɛngɔ ya, lo lua lége ti fangɔ ya, lo ndo hɛ̃ Yezo sia kɔli na lo ti aye mɛndó lo li na lo tɛ lo. Kanda tɛ ‘angasã ngbaga mɛndɛ̃’ ko, ala na nzɔ̃ tangɔ li gɛrɛ gba ti fangɔ se mɛ ala ndo ma na tɛrɛ ala na lo tɛ Yezo. Na ndakisa e ndo fa ya, e ndo ye lo na se mɛ e ndo li kpale tɛrɛ ayata mɛ ahĩni ala na kpɔ̃. Yezo tɛnɛndó ya, ni na fangɔ ngbanga tɛ angasã gbaga mɛndɛ̃ na bangɔ kpale mɛ ala na lingɔ tɛrɛ awakristo mɛ ahĩni la na kpɔ̃. (Mat. 25:31-40) Elengbi ti hɛ̃ngɔ ti e hɛ̃ ayata Kristo na ngoi mɛ e ndo pa nzɔ̃ pa hɛ̃ azi mɛndɛ̃ na ge ge ge zu, wa e ndo li nga ya, azi ati ava Yezo. (Mat. 28:18-20) Na lo ni la, ayɔ ya, e ndo salela na ndenge ti nzɔ̃ni aye mɛ ndo za e ti nɛngɔ ya, e manda Ngbangɔ na azi, na ndakisa, buku Du na dungɔ lɛ ngɛ̃́ bwai na bwai! Se du ya, ta mɔ ndo manda na zo kɔi Ngbangɔ ma ko, mɔ lengbi ti kpãngɔ mokanɔ̃ ti mandangɔ na azi gba Ngbangɔ se alengbi?

16. Ye mɛ elengbi ti lingɔ na olo ti nɛngɔ ya, e du kaya Lo-lengɔ Gbia tɛ Nzapa nɛ?

¹⁶ Ta elengbi ti kũngɔ bo ya, e si ka Paradizo wa di la, e ti azi mɛ Yehova ye ya ala du kai ma. Bandangɔ ndɛ elengbi ti lingɔ kpengbani ti nɛngɔ ya, e du mbilimbili na ya tɛnɛ nga na ya kwa tɛ e, wa e du nga na dungɔ lɛ ngɛ̃́ mɛ yapuni. Hãngɔ ni zingɔ, elengbi nga ti dungɔ mbilimbili ka tɛ Yehova, ka tɛ kɔ e bere ya e, nga ka tɛ ayata e awakristo. Se du ya, e ndo tɔndɔ Yehova ndɛ na ya gigi mɛ ti siɔni ko, ta na dungɔ pɛnɔ ti nɛngɔ ya, e tɔndɔ lo kaya Paradizo ma. Ale e li nga kpengbani ti tingɔ na makoki ná seliye  mɛ ndo fa ya, e ndo lɛkɛ tɛrɛ e ti dungɔ kai bwai na bwai. Ba bɛli tɛnɛ mɛ, “Mɔ dã ti ‘dungɔ ge lɛ sese’?”

17. Elengbi ti dungɔ na nzɛ̃ngɔ na lo ti siɔ kpale mɛndó e li gã? Kambisa.

¹⁷ Elengbi ti lingɔ kpengbani ya, ta e du na sɔngɔ bɛ gba na lo ti siɔ kpale mɛndó e li gã ma. Abɛse ngaso, ta elengbi ti mungɔ kwá tɛ Yezo ya, adu nzɔ̃ tangɔ ligɛrɛ ti nɛngɔ ya, e ndo ‘li siɔ kpale na sãna ma.’ (Aeb. 10:26-31) Kanda se e gbinya nvɛ̃ni bɛ e na lo ti siɔ kpale ti kotani mɛndó e li, e gi lisalisi tɛ Yehova, wa e gbinya nga seliye tɛ e ko, elengbi ti yengɔ nvɛ̃ni na bɛ e kɔi ya, lo kandó lɛ lo na ndo siɔ kpale tɛ e wɛ. (Yis. 55:7; Aw. 3:19) Ta bɛ mɔ li na tɛnɛ mɛndó Yezo tɛnɛ hɛ̃ azi ti Farisai ma. Lo pandó hɛ̃ la ya, “Ta mbi ga [na lo] tɛ anzɔ̃ azi ma, kanda mbi ga [na lo tɛ] awa lingɔ siɔ ye.” (Mat. 9:13) Hĩnga ya, kwá tɛ Yezo na ngunu ti vĩngɔ siɔ kpale tɛ e.

18. Tɛnɛ mɛ mɔ na yengɔ tɛnɛngɔ ná wa lingɔ siɔ ye mɛndó akpi ndoni kɔi na Yezo nɛ?

¹⁸ Binga li mɔ ya, mɔ ka Paradizo, wa mɔ ndo tɛnɛ tɛnɛ na wa lingɔ siɔni ye mɛndó atɛnɛ tɛnɛ na Yezo! Ta kitɛ da ma, ĩ zu sɛ ĩ lengbi ti hɛ̃ngɔ sia kɔli na lo ti kwá tɛ Yezo. Ngoi mɛndɛ̃ mɔ lengbi ti hũndangɔ lo ya, lo kambisa akpale gba mɛndó aɔ na ya ngoi ti ndani ti dungɔ lɛ ngɛ̃́ tɛ Yezo ge lɛ sese hɛ̃ mɔ, nga na se mɛndó lo ma na tɛrɛ lo na ngoi mɛndó Yezo hɛ̃ gbinya ti hũnda tɛ lo. Ngoi mɛndɛ̃ lo nga na hũndangɔ mɔ ti nɛngɔ ya, lo hĩnga bere dungɔ lɛ ngɛ̃́ ndó ngasia na ndangba bi ti gigi tɛ Satana. Na dungɔ gbanda kota ndima nvɛ̃ni, hangɔ tɛnɛ tɛ Nzapa na zo ti ngaso!—Ef. 4:22-24.

19. Nda mɛ ta dungɔ lɛ ngɛ̃́ tɛ e ka Paradizo na hɛ̃ngɔ nzɛ̃ngɔ bɛ fãni kɔi ma nɛ? (Ba limɔ ti koko mbeti.)

¹⁹ Ta dungɔ lɛ ngɛ̃́ mɛ ka Paradizo na hɛ̃ngɔ e gbanda nzɛ̃ngɔ bɛ fãni kɔi ma. E na dungɔ ngoi zu ndoni kɔi na azi ti nzɔ̃ni, nga na kwa ti nzɔ̃ni mɛ e na lingɔ. Omɛ aɔ zu, bi kɔi na kɔi e na dungɔ na likoki ti mandangɔ hĩngangɔ To e mɛ ka ndozu nzɔ̃ni, wa e nga na sepalangɔ na aye mɛ lo hɛ̃ e. Ta e na zangangɔ aye ti mandangɔ na lo tɛ lo ma, wa e nga na dungɔ na aye ti mandangɔ gba na ndo aye mɛndó lo li. Bulu zu mɛ gbanda e na dungɔ lɛ e ngɛ̃́, songo tɛ e na mbage tɛ lo nga na tingɔ gbanda gba. E hɛ̃ sia kɔli mawoma hɛ̃ Yehova ná Yezo na lo mɛ ya, ala kokapa hɛ̃ e ya, e na dungɔ na dungɔ lɛ ngɛ̃ ti bwai na bwai ka Paradizo!