Mɔ ka mɔ di mbalasi na seni nvɛ̃ni animɛro ti Linɔngi ti Sinzili ti bulu mɛ? Ba se du ya, mɔ lengbi ti hɛ̃ngɔ gbinya ti ahũnda mɛ:

Anzɔ̃ kpale mɛ e na luangɔ se du ya, e ndo mu ngoi ti tɛnɛngɔ tɛnɛ na Yehova, mangɔ lo nga na gbɔ̃ngɔ li e na ndo lo nɛ?

E na tingɔ na makoki ti mungɔ ekateli ti nzɔ̃ni, tingɔ azi mɛ ahĩnga hangɔ tɛnɛ nzɔ̃ni, e na dungɔ na loyengɔ ti kpengbani, wa e nga yengɔ Yehova gba.—w22.01, p. 30-31.

Se e manda kpãngɔ bɛ e na ndo Yehova ná linɔ tɛ lo bandangɔ ndɛ, ngasia la ni na zangɔ e nɛ?

Na olo la adu ngoi mɛ ayɔ ya, e manda kpãngɔ bɛ e na ndo se mɛ Yehova ndo li na kpale, se du ya, ta e ndo kɛ̃ awangɔ ná andia mɛ abiazi ndo hɛ̃ e ma. Na ngoi mɛ gbanda kota pɛnɔ na bandangɔ ko, na dungɔ woni ya, e tɔndɔ andia abɛse e na hũngɔ ya, ta ni lengbi ma.—w22.02, p. 4-6.

Angelo yendó tɛnɛngɔ hɛ̃ Zekaria ya nɛ na ngoi mɛndó lo pa hɛ̃ lo kpale mɛ aba “kpu ti nivo mɛ ka ti [Guvɛrnɛrɛ] Zorobabɛlɛ” nɛ? (Zek. 4:8-10)

Suma niko sandó ngunu bɛ azi tɛ Nzapa ya, ala hĩnga ya, abɛse ta tepelo mɛ ala ndo kĩ na dungɔ kwɛ kɔi na tepelo ti uzu ma ko, ala na onzingɔ kĩngɔ ni, wa ala nga na kĩngɔ ni na se mɛ bɛ Yehova ye.—w22.03, p. 16-17.

Ngasia la elengbi ti dungɔ “se lɛlo ti nzɔ̃ni na omɛ aba tɛnɛngɔ tɛnɛ” nɛ? (1 Tim. 4:12)

E na dungɔ se lɛlo ti nzɔ̃ni se du ya, e ndo tɛnɛ tɛnɛ na songo kaya kwa ti fangɔ tɛnɛ, e ndo ye abia na bɛ e zu ka bombi, e ndo hɛ̃ agbinya ngoi gba ka bombi, e ndo tɛnɛ mbilimbili, e ndo du na tɛnɛ mɛ ndo sa ngunu bɛ azi, wa ta e ndo tɛnɛ siɔ tɛnɛ ma.—w22.04, p. 6-9.

Na lo nɛ la, aye ti yika yika mɛ ka tɛrɛ asa ti kpɛ̃nɛ (bere lo-lengɔ gbia) siɔ mɛ atɛnɛ tɛnɛ tɛ la kaya Daniele shapitrɛ ti 7 adikɔ ni zu ka tɛrɛ siɔ sa mɛ atɛnɛ tɛnɛ tɛ lo kaya Suma 13:1, 2 nɛ?

Siɔ sa ti kpɛ̃nɛ mɛ atɛnɛ tɛnɛ tɛ lo kaya Suma shapitrɛ ti 13 ko, ta lo ndo fa bo lo-lengɔ gbia kɔi gɛgɛrɛ mabere Roma ma. Kanda ni ndo fa alo-lengɔ gbia zu ti ngunu mɛndó ale gbia na ndo azi.—w22.05, p. 9.

Lége kɔi mɛ elengbi ti fangɔ ya, e ndo kpã bɛ e na ndo fangɔ ngbanga tɛ Yehova nɛ?

Se zo kɔi agulu e, ali siɔ kpale tɛrɛ e bere ahɛ̃ e ngɔnzɔ ko, e li kpengbani ti hangɔ kaya bɛ e ngɔnzɔ ná mani zu e zi, wa e zia kpale ka bɛ ti Yehova. Lo na onzingɔ akpale zu mɛ siɔ kpale azi na ni.—w22.06, p. 10-11.

Ye mɛ ta bɛ nyita kɔli mɛ ndo li sambela na ngoi ti bombi alengbi ti lingɔ na ni ma nɛ?

Ta sambela adu ngoi ti hɛ̃ngɔ ayata ti ya bombi wangɔ bere tisangɔ ala ma. Ni la, ta tina ti tɛnɛngɔ tɛnɛ gba kaya sambela da ma, ayɔ ya, ni du ndunu ni. (Mat. 6:7)—w22.07, p. 24-25.

Ngasia la “awa lingɔ siɔ ye” na luangɔ “songo kwá ti fangɔ ngbanga” nɛ? (Yn. 5:29)

Ta na fangɔ ngbanga tɛ la na bangɔ aye ti gã mɛndó ala li ma. Na fangɔ ngbanga tɛ la, afa ya, na bangɔ kpale tɛ la na landangɔ seliye ná dɔngɔ nɔ tɛ la na pɛ songɔ kwá tɛ la.—w22.09, p. 18.

Na ngoi ti kota bombi mɛndó ali tɛrɛ lo na 09/1922, tɛnɛ ti sangɔ ngunu bɛ mɛndó nyita Rutherford tɛnɛ nɛ?

Na ngoi ti kota bombi mɛndó ali tɛrɛ lo ka Cedar Point, mɛ ka Ohio ti Etats-unis ko, lo pandó ya: “Ĩ ba, Gbia ndo le gbia! Wa ĩ awa fangɔ tɛnɛ tɛ lo. Na lo ni la, ĩ fa tɛnɛ, ĩ fa tɛnɛ, ĩ fa tɛnɛ mɛ aba Gbia ná Lo-lengɔ gbia tɛ lo!”—w22.10, p. 3-5.

Ngasia la Yisaya shapitrɛ ti 30 afa yangondo ndenge taa mɛ Yehova ndo za e ya, e gbe bɛ e na ya pɛnɔ nɛ?

Mbeti niko fa yangondo ya, lo ndo (1) ma sambela tɛ e, wa lo ndo hɛ̃ nga gbinya ni, (2) lo ndo dɔ e na nɔ, wa (3) lo ndo sulu e bandangɔ ndɛ nga na bi mɛ na gangɔ.—w22.11, p. 9.

Nda mɛ elengbi ti tɛnɛngɔ ya, Nzembo 37:10, 11, 29 atindó na seni na ngoi ti gã, wa ni nga na tingɔ na seni na bi mɛ na gangɔ nɛ?

Tɛnɛ tɛ Davidi ndo fa dungɔ lɛ ngɛ̃́ ti nzɔ̃ni mɛndó na ngoi ti Izraɛlɛ ti gã, mabere na ngoi ti lo-lengɔ gbia tɛ Salomo. Wa Yezo dindó tɛnɛ ti vɛrse 11 na ngoi mɛndó lo ndo tɛnɛ tɛnɛ ti Paradizo mɛ na gangɔ. (Mat. 5:5; Luka 23:43)—w22.12, p. 8-10, 14.