Nyɔngɔ ngɛ alengbi na yengɔ lo bere kongɔ kapa yangondo na gbɛlɛ azi zu ti lingɔ ye kɔi na kpãngɔ Nzapa nga ma Tɛmwɛ ti kpale ni. Ngoi mɛndɛ̃ alengbi ti dungɔ na nyɔ bere na mbeti.

Azi mɛndɛ̃ alengbi ti dangɔ bɛ la ya, nyɔngɔ ngɛ adu siɔni na lo mɛ ya, Yezo pandó ya: “Ta ĩ nyɔ ngɛ bɛ gbɔ ma . . . Kanda ale ‘Ĩi’ tɛ ĩ angbã bo ĩi, ‘Ipɔ,’ tɛ ĩ angbã bo ipɔ, ta sanga ma aye zu mɛ na gangɔ na gesi ko, adu aye mɛ alo ka tɛ siɔ zo.” (Mat. 5:33-37, NWT) Kanda Yezo hĩngandó ya, Ndia tɛ Moizɛ azindó lége hɛ̃ aya Izraɛlɛ ya, ala ndo nyɔ ngɛ na ndo akpale mɛndɛ̃, wa awa kwa tɛ Nzapa ti mbilimbili mɛndɛ̃ anyɔ ngandó ngɛ. (Eb. 14:22, 23; Kob. 22:10, 11) Lo hĩnga ngandó ya, Yehova nvɛ̃ni anyɔ ngandó ngɛ na ya ngoi mɛndɛ̃. (Aeb. 6:13-17) Na lo ni la, ta Yezo gbanzindó nyɔngɔ ngɛ ma. Kanda lo yendó tɛnɛngɔ ya, ale ta e ndo nyɔ ngɛ na lo ti aye mɛ azanga tina ma. Na ngoi ko la e ndo nyɔ ngɛ ko, ale e li aye mɛ e ko kapa ti lingɔ ni.

Ye mɛ mɔ lengbi ti lingɔ se du ya, ayɔ ka ti mɔ ya, mɔ nyɔ ngɛ nɛ? Ti uzu, ye na bɛ mɔ kɔi ya, mɔ na lingɔ aye mɛ mɔ ko kapa ni. Se ta mɔ ye lo ni na bɛ mɔ kɔi ma ko, na dungɔ nzɔ̃ni ya, ta mɔ nyɔ ngɛ ma. Tɛnɛ tɛ Nzapa ko kɛkɛ lɛ e ya: “Adu nzɔ̃ni ya, ta mɔ ko kapa ma, na se lɛ kongɔ kapa wa ta mɔ kokisa ni ma.” (Mos. 5:5) Ti sɛ, gbɔ̃ li mɔ na ndo andia ti ya Ngbangɔ mɛ aba nyɔngɔ ngɛ, wa li aye na bangɔ ndenge mɛ Ngbangɔ wa na bingangɔ li tɛ mɔ. Ambanga andia ti ya Ngbangɔ mɛ elengbi ti kpãngɔ lɛ e ndo ni nɛ?

Angɛ mɛndɛ̃ ndo du na mangbi na gwɛ̃ tɛ Nzapa. Na ndakisa, kɔli ná wali mɛ Atɛmwɛ tɛ Yehova ndo kongbi kapa ka popo tɛ la na ngoi ti libala tɛ la. Kapa niko adu nga mabere nyɔngɔ ngɛ. Na gbɛlɛ Nzapa nga na gbɛlɛ azi, kɔli ndo kokapa ti yengɔ ya lo, sepalangɔ na lo, nga na tɔndɔngɔ lo “ngoi zu mɛ ala na dungɔ na dungɔ lɛ ngɛ̃́ ge lɛ sese,” wali ndo ko nga kapa ti ngaso hɛ̃ kɔ lo (Ngoi mɛndɛ̃, ta azi mɛndɛ̃ mɛ aye dungbingɔ ndo salela bo tɛnɛ mɛ ma, kanda ala ndo ko bo kapa ka gbɛlɛ Nzapa.) Bandangɔ so ndo ko, ando pa hɛ̃ la ya, ala ti kɔli ná wali mɛ adungbi, wa ala na dungɔ azi mɛ adungbi na ya dungɔ lɛ ngɛ̃́ tɛ la zu. (Eb. 2:24; 1 Kɔr. 7:39) Kongɔ kapa ti ngaso adu nzɔ̃ni, wa ni nga na mangbi na gwɛ̃ tɛ Nzapa.

Ta angɛ mɛndɛ̃ amangbi na gwɛ̃ tɛ Nzapa ma. Na ndakisa, ta awakristo ti mbilimbili alengbi ti nyɔngɔ ngɛ ti gbɔ̃ngɔ tawa tiringɔ na to na lo ti kɔdɔrɔ tɛ la ma. Ta ala lengbi nga ti nyɔngɔ ngɛ so bɛlɛngɔ na loyengɔ mɛ ala na ni na lo tɛ Nzapa ma. Se ala li ngaso ko, ala na kɔngɔ nyɔ ndia tɛ Nzapa. Ta awakristo alengbi ti ‘yɔrɔngɔ tɛrɛ la na ya kpale ti gigi’ ma, na lo ni la, ta ala ndo yɔrɔ tɛrɛ la na ya atɛnɛ nga na akpale ti to ti kɔdɔrɔ ma.​—Yn. 15:19; Yis. 2:4; Zk. 1:27.

 Nyɔngɔ angɛ mɛndɛ̃ aba bingangɔ li tɛ zo na zo. Ngoi mɛndɛ̃, uzu ti nyɔngɔ ngɛ kɔi ngaso ko, ayɔ ya, e gbɔ̃ li e nzɔ̃ni na ndo tɛnɛ mɛndó Yezo tɛnɛ ya, “Ĩ diri na ye tɛ Kaisala hɛ̃ Kaisala, tɛ Nzapa hɛ̃ Nzapa, NWT.”​—Lk. 20:25.

E mu ya, nyita kɔi aye gbinyangbingɔ kɔdɔrɔ mɛndó adu na lo (Nationalité) bere lo ye luangɔ ambeti mɛ na hɛ̃ngɔ lége ya, lo du kaya kɔdɔrɔ kɔi ngaso (passeport) kanda ayɔ ka ti lo ya, lo nyɔ ngɛ ti tɔndɔngɔ andia ti kɔdɔrɔ niko. Se du ya, nyɔngɔ ngɛ ti ngaso na lingɔ ya, lo li aye mɛ na kɔngɔ nyɔ ndia tɛ Nzapa ko, lo lengbi ti kɛ̃ngɔ nyɔngɔ ni na landangɔ bingangɔ li tɛ lo mɛ ni na mangbi na atɛnɛ ti ya Ngbangɔ. Ngoi mɛndɛ̃ agbia ti guvɛrnɛma alengbi ti hɛ̃ngɔ lo lége ya, lo gbinyangbi atɛnɛ mɛndɛ̃ ti ya ngɛ niko ti nɛngɔ ya, amangbi na bingangɔ li tɛ lo.

Nyɔngɔ angɛ ti ngaso mɛ zo nvɛ̃ni la agbinyangbi atɛnɛ ni, alengbi ngoi mɛndɛ̃ ti dungɔ na mangbi na tɛnɛ mɛ kaya Roma 13:1, mɛ atɛnɛ ya: “Ale zo zu abi tɛrɛ lo hɛ̃ agbia tɛ leta.” Na lo ni la, wakristo kɔi lengbi ti hũngɔ ka tɛ lo ya, ta adu siɔni ti nyɔngɔ ngɛ na lo ti ye mɛ Nzapa nvɛ̃ni la ayɔ ka ti e ya e li ni ma.

Adu nga ngbondoni ya, e landa bingangɔ li tɛ e mɛ ateyama na Ngbangɔ na ngoi mɛ e ye nyɔngɔ ngɛ mɛ na yɔngɔ ya, e li ye kɔi na ngoi mɛ e ndo nyɔ ngɛ ni. Na ngoi ti gã, azi ti Roma ná azi ti Sikitia ndo nyɔndó ngɛ na ndo zãma zabe tɛ ala. Na lingɔ ngaso ala ndo mundó nzapa kɔi ti tiringɔ to mabere tɛmwɛ tɛ ala. Azi ti Grɛkɛ ndo yandó ti ala ndozu na ngoi mɛndó ala ndo nyɔ ngɛ. Na lingɔ ngaso ala ndo yendó ya, nzapa kɔi mɛ na ngunu gba ndo ma, ndo hũ nga aye zu mɛ ala ndo li ge lɛ sese, wa lo nga la azi na diringɔ na nyɔ la ka tɛ lo.

Ti bɛta tɛnɛ ko, ta awa kwa tɛ Yehova alengbi ti nyɔngɔ ngɛ na kpãngɔ ti la na ndo ye mabere drapo bere aye mɛndɛ̃ zu mɛ na mangbi na asambela ti nvɛ̃nɛ ma. Wa se du ya, ayɔ ka ti wakristo ka gbɛlɛ agbia ka da ngbanga ya, lo kpã ti lo na ndo Ngbangɔ wa lo nyɔ ngɛ ti tɛnɛngɔ mbilimbili mɛ? Na ya kpale ti ngaso ko, lo lengbi ti lingɔ ni, na lo mɛ ya, Ngbangɔ tɛnɛ tɛnɛ tɛ awa kwa tɛ Yehova ti mbilimbili mɛndó ala nyɔ ngɛ na gbɔ̃ngɔ ye kɔi so ti la. (Eb. 24:2, 3, 9; 47:29-31) Adu ngbondoni ya, ta bɛ e li na ni ma ya, na ngoi ko la e ndo nyɔ ngɛ ko, e ndo li ni na gbɛlɛ Nzapa ya, e na tɛnɛngɔ mbilimbili. Na lo ni la, ayɔ ya, mɔ du dã ti hɛ̃ngɔ na mbilimbili zu agbinya ti ahũnda zu mɛ na hũndangɔ na mɔ.

Na lo mɛ ya, mangbi tɛ e na Yehova adu ngbondoni ko, adu nzɔ̃ni ya, e li sambela wa e gbɔ̃ li e nzɔ̃ni uzu ti e nyɔngɔ ngɛ kɔi ngaso, ti nɛngɔ ya, ta ni ɔngbi na bingangɔ li tɛ e nga na andia ti ya Ngbangɔ ma. Se mɔ mu ekateli ti nyɔngɔ ngɛ ko, ye na bɛ mɔ kɔi ya, mɔ na tɔndɔngɔ ni.​—1 Pet. 2:12.