Mɔ ka mɔ di mbalasi na seni nvɛ̃ni animɛro ti Linɔngi ti Sinzili ti bulu mɛ? Ba se du ya, mɔ lengbi ti hɛ̃ngɔ gbinya ti ahũnda mɛ:

Zaki 5:11 atɛnɛ ya, Yehova na “bɛ ti vundu sĩ,” “bɛ lo nga nzɔ̃ni ma wo ma.” Ye mɛ ni lengbi ti tongɔ e ya, e ye lo ni nɛ?

E hĩnga ya, na ya bɛ ti vundu tɛ Yehova ko, lo ndo du dã ti kangɔ lɛlo na ndo siɔ kpale tɛ e. Zaki 5:11 ando to e, e ye ya, nzɔ̃ bɛ mɛ lo na ni na lo tɛ e, ando to lo ya lo za e. E landa se lɛlo tɛ lo.​—w21.01-LI, lok. 21.

Nda mɛndó Yehova kpã ebongiseli ti lo-lengɔ gbia nɛ?

Na lo mɛ ya, lo ndo ye azi. Ebongiseli niko ndo za azi ti ndasewa tɛ lo ya, ala du na siriri nga na mɔlɔngɔ. Azi zu ti ndasewa niko mɛ ndo li ye na mangbi na ebongiseli niko ko, ala ndo hĩnga zo mɛ na kumba ti mungɔ ekateli ti ndani, wa ala ndo li nga kpengbani ya, ala kpã ni na kwa.​—w21.02-LI, lok. 3.

Nda mɛ awakristo alengbi ti dungɔ na kpengba lɛ na ngoi mɛ ala ndo salela application ti tongɔ amɛsajɛ nɛ?

Se zo hũ nzɔ̃ni salelangɔ application niko, ayɔ ya, lo pɔna nzɔ̃ni azi mɛ na dungɔ akwa lo mɛ lo na tɛnɛngɔ tɛnɛ na ala. Na dungɔ kpengbani ti lingɔ ni, se zo du kaya grupɛ ti tɛnɛngɔ tɛnɛ mɛ abombi azi gba. (1 Tim. 5:13) Lo lengbi nga ti dungɔ na kpengba lɛ ya, ta lo ma bere ta lo panza atɛnɛ mɛ azanga mbilimbili ma. Ta lo lengbi nga ti salelangɔ ayata lo awakristo ti nɛngɔ ya, lo li na akpale tɛ lo ti buze ma.​—w21.03-LI, lok. 31.

Nda mɛndó Nzapa zi lége ya, Yezo hũ pɛnɔ wa lo kpi nga nɛ?

Ti uzu, agɔngɔndó Yezo ka ndo kɛkɛ ti pɛnɔ ti nɛngɔ ya, lo hã Ayuda na ya siɔ sulu mɛndó ala da. (Gal. 3:10, 13) Ti sɛ, Yehova hɛ̃ndó Yezo fɔrmasiɔ̃ ti hɛ̃ngɔ lo kumba ti kota nganga nzapa. Ti taa, mbilimbili tɛ Yezo tee kwá afandó ya, azi lengbi ti ngbãngɔ mbilimbili abɛse ala tengbi na tara mɛ kpengbani. (Yb. 1:9-11)​—w21.04-LI, nk. 16-17.

Se du ya, na ya kwa ti fangɔ tɛnɛ ta mɔ ndo tã azi kaya da tɛ la ma, ye mɛ mɔ lengbi ti lingɔ nɛ?

Mɔ lengbi ti tarangɔ singɔ kwa ti fangɔ tɛnɛ na ngoi mɛndɛ̃ mɛ mɔ lengbi ti tãngɔ ala kaya da tɛ la. Mɔ lengbi nga ti lingɔ kpengbani ya, mɔ fa tɛnɛ ka ndo mɛndɛ̃. Wa mɔ lengbi nga ti tarangɔ akɔdɛ mɛndɛ̃ ti fangɔ tɛnɛ mabere fangɔ tɛnɛ na lége ti tongɔ mbeti hɛ̃ azi.​—w21.05-LI, nk. 15-16.

Toma Polo yendó tɛnɛngɔ ya nɛ na ngoi mɛndó lo pa ya: “Na ndo tɛnɛ ko ti ndia ko, mbi ti tɛ mbi nga ma zo mɛ akpi wɛ” nɛ? (Gal. 2:19)

Ndia tɛ Moizɛ alindó ti nɛngɔ ya, zangangɔ lengbingɔ tɛ azi asi yangondo, wa ni fa ngandó aya Izraɛlɛ na lége tɛ Yezo. (Gal. 3:19, 24) Ni ndó la, ato Polo ya, lo ye lo tɛ Kristo. Na lo ni la, lo “kpi na lo ti ndia”; ta ndia di dɛndó na ngunu na ndo lo ma.​—w21.06-LI, lok. 31.

Se lɛlo ti gbengɔ bɛ mɛ Yehova zia hɛ̃ e nɛ?

Yehova gbe bɛ lo na ya akpale mɛ ahɛ̃ lo pɛnɔ gba: agbɛ̃ndó ili lo, atemɛlandó Lo-Gbia tɛ lo, ambɛge ayangambi tɛ lo atɔmbɔgɔ tɛrɛ lo, Zabulu ndo tɛnɛ nvɛ̃nɛ ngoi zu na lo tɛ lo nga na lo tɛ awa kwa tɛ lo, awa kwa tɛ lo ndo hũ pɛnɔ, kangbi mɛ ati na popo tɛ lo na awa kwa tɛ lo ti mbilimbili mɛ akpili, asiɔ zi ndo hɛ̃ a fɔ̃ la pɛnɔ, wa azi ndo gbɛ̃ aye mɛ lo li.​—w21.07, p. 9-12.

Na ya kpale mɛ wa la, Yozefɛ fandó se lɛlo ti gbengɔ bɛ wa?

Ayata lo alindó ye ti zangangɔ mbilimbili tɛrɛ lo. So pɛ ni, akalandó lo tɛrɛ lo wa agbɔ̃ ngandó lo, abi lo ka bɔlɔkɔ ti Ezipito lo li abulu gba.​—w21.08, p. 12.

Yengingɔ ti lɛ gigi ti yika yika mɛ Hagai 2:6-9, 20-22 atɛnɛ tɛnɛ ni nɛ?

Azi ti lɛ gigi ndo kɛ̃ nzɔ̃ pa ti Lo-lengɔ gbia, kanda mbilimbili ndo benda azi gba. Angbã yakere lɛ gigi zu na yengingɔ, ye mɛ na lingɔ ya, azi zu mɛ akɛ̃ tɛrɛ Yehova akpili.​—w21.09, p. 15-19.

Nda mɛ ta elengbi ti ziangɔ kwa tɛ e ti fangɔ tɛnɛ ma nɛ?

Yehova ndo hũ ge ge ge tɛ e, wa bɛ lo ndo de na lo tɛ e. Se ta e zia bere e nzɛ̃ ma ko, e na luangɔ dungɔ lɛ ngɛ̃́ ti kaka.​—w21.10, p. 25-26.

Ngasia la, Balevi shapitrɛ ti 19 alengbi ti zangɔ e ya, e kpã wangɔ tɛ Polo mɛ atɛnɛ ya: “Ale ĩ du nga asanto na ya du tɛ ĩ zu” na kwa nɛ? (1 Pet. 1:15)

Ngoi mɛndɛ̃ Petro dirindó ndo tɛnɛ mɛ kaya Balevi 19:2. Shapitrɛ ti 19 akambisa se mɛ elengbi ti kpãngɔ wangɔ mɛ kaya 1 Petro 1:15 na kwa na ya dungɔ lɛ ngɛ̃́ tɛ e ti bi kɔi kɔi.​—w21.12, p. 3-4.