1. Uzu ti nɛngɔ ya, mɔ banda mandangɔ Ngbangɔ, mɔ ndó na dungɔ lɛ ngɛ̃́ mɛ ngasia?

 UZU ti nɛngɔ ya, mɔ banda mandangɔ Ngbangɔ na Atɛmwɛ tɛ Yehova, mɔ ndó na dungɔ lɛ ngɛ̃́ mɛ ngasia? Azi gba so popo tɛrɛ e ndo ma pɛnɔ ka bɛ la na ngoi mɛ ala ndo da bɛ la na dungɔ lɛ ngɛ̃́ tɛ la ti gã. Dungɔ lɛ ngɛ̃́ ná aseliye tɛ e ndo landandó akpale ti ngoi olo, e ndo landandó aye mɛ gigi olo ndo hũ ya, adu nzɔ̃ni nga siɔni. Se adu ngaso ko, “ta [e] ndó na nzɔ̃ dangɔ bɛ ma, ta [e] ngandó na Nzapa so ya gigi ma.” (Ef. 2:12, NWT) Kanda na ngoi mɛndó e banda mandangɔ Ngbangɔ ko, e gbinyangbindó se du tɛ e!

2. Ye mɛndó mandangɔ Ngbangɔ aza mɔ ya, mɔ hĩnga nɛ?

² Na ngoi mɛndó mɔ banda mandangɔ Ngbangɔ ko, mɔ gandó mɔ hĩnga ya, mɔ na To kɔi ka ndozu mɛ lo ndo ye mɔ mawoma. Mɔ gbɔ̃ndó ndani ya, se mɔ ye hɛ̃ngɔ Yehova dengɔ bɛ, wa mɔ ti nga kɔi tɛ azi ti ndasewa tɛ awa vɔrɔngɔ lo ko, ayɔ ya, mɔ gbinyangbi akpale ti ya dungɔ lɛ ngɛ̃́ tɛ mɔ, se tɛ mɔ ti bangɔ na akpale nga na bingangɔ li tɛ mɔ. Mɔ manda ngandó lingɔ aye mɛ Yehova ndo ye, nga na kɛ̃ngɔ aye mɛ Yehova ndo kɛ̃.​—Ef. 5:3-5.

3. Na bangɔ Kɔlɔsɛ 3:9, 10, ye mɛ Yehova ye ya, e li nɛ, wa aye mɛ ndɛ e na mandangɔ nɛ?

³ Na lo mɛ ya, lo du Wa lingɔ e, lo nga To e ti ndozu ko, Yehova la lengbi ti fangɔ seliye mɛ zo kɔi kɔi ti ndasewa tɛ lo alengbi ti dungɔ na ni. Wa lo ye ya, uzu ti nɛngɔ ya, e mu batisimɔ ko, e li kpengbani e “zia . . . ngbina du tɛ [e], na ngbina seliye tɛ [e].” * (Di Kɔlɔsɛ 3:9, 10.) Tɛnɛ mɛ ndɛ e na mandangɔ na zangɔ azi mɛ aye mungɔ batisimɔ ya, ala hɛ̃ gbinya ti ahũnda mɛ taa: Ti (1) Dungɔ na “ngbina du” alengbi na nɛ? Ti sɛ (2) Nda mɛ Yehova  yɔ ka ti e ya, e li kpengbani e zia ngbina du tɛ e nɛ? Wa ti (3) Ngasia la elengbi ti lingɔ ni nɛ? Tɛnɛ mɛ na zangɔ nga azi mɛ amu batisimɔ wɛ ya, ala du na kpengba lɛ ya, ta ala di li ye na landangɔ se du tɛ ala ti gã ma.

4. Zo mɛ na “ngbina du” ndo li ye ngasia?

⁴ Zo kola ndo du na “ngbina du” ko, ngoi gba, bingangɔ li tɛ lo nga na aye mɛ lo ndo li, ando du ti mi. Lo lengbi ti dungɔ zo mɛ ndo gi bo nzɔ̃ kpale tɛ lo nvɛ̃ni, zo mɛ ndo ma ngɔnzɔ iɔ iɔ, zo mɛ ta lo ndo hĩnga nzɔ̃ kpale mɛ ali tɛrɛ lo ma, nga wa yakɛ. Ngoi mɛndɛ̃ lo lengbi ti sepalangɔ na bangɔ pɔrnografi, afilmɛ ti bí nga na ti mobulu. Ta kitɛ da ma, lo na aseliye mɛndɛ̃ ti nzɔ̃ni, wa lo lengbi nga ti mangɔ vundu na lo ti siɔ ye mɛ lo li, bere siɔ tɛnɛ mɛ lo tɛnɛ. Kanda ta lo na gwɛ̃ nvɛ̃ni ti gbinyangbingɔ bingangɔ li ná aseliye tɛ lo ma.​—Gal. 5:19-21; 2 Tim. 3:2-5.

5. Elengbi ti ziangɔ nvɛ̃ni angbina du tɛ e zu? Kambisa (Awa Pangɔ Kwa 3:19)

⁵ Na lo mɛ ya, e du azi ti zangangɔ lengbingɔ ko, ta zo kɔi so popo tɛ e mɛ alengbi ti hãngɔ bingangɔ li ná gwɛ̃ ti siɔni zu ka bɛ lo zingɔ da ma. Ngoi mɛndɛ̃ elengbi ti tɛnɛngɔ tɛnɛ bere lingɔ aye mɛ na hɛ̃ngɔ e sɔngɔ bɛ na gesi. (Yir. 17:9; Zk. 3:2) Kanda se e zia ngbina du tɛ e ko, ta bingangɔ li tɛ e nga na se mɛ e ndo li na akpale na dungɔ ti mi ma. Ta e na dungɔ na dungɔ lɛ ngɛ̃́ mɛndó e na ni uzu ma.​—Yis. 55:7; Di Awa Pangɔ Kwa 3:19.

6. Nda mɛ Yehova yɔ ka ti e ya, e zia siɔ dangɔ bɛ nga na dɔngɔ nɔ ti siɔni mɛ ando fa ngbina du tɛ e nɛ?

⁶ Yehova yɔ ka ti e ya, e zia siɔ dangɔ bɛ nga na dɔngɔ nɔ ti siɔni na lo mɛ ya, lo ndo ye e gba, wa lo ye nga ya, e du na dungɔ lɛ ngɛ̃́ ti nzɔ̃ni. (Yis. 48:17, 18) Lo hĩnga ya, azi zu ko la, ta ala ndo kɛ̃ agwɛ̃ ti siɔni ma ko, ala ndo hɛ̃ tɛrɛ la nvɛ̃ni pɛnɔ, wa ala ndo hɛ̃ nga azi mɛndɛ̃ mɛ so gunda ala pɛnɔ. Ngoi ko la, e ndo hɛ̃ tɛrɛ e nvɛ̃ni pɛnɔ, e ndo hɛ̃ nga azi mɛndɛ̃ pɛnɔ ko, lo ndo ma nga pɛnɔ nvɛ̃ni.

7. Na bangɔ Roma 12:1, 2, ye mɛ zo kɔi kɔi so popo tɛ e alengbi ti pɔnangɔ nɛ?

⁷ Ambanga afɔ̃ e ná azi ti ndasewa tɛ e, alengbi ti héngɔ e na ngoi mɛ e banda lingɔ kpengbani ti gbinyangbingɔ ambanga akpale ti ya dungɔ lɛ ngɛ̃́ tɛ e. (1 Pet. 4:3, 4) Ngoi mɛndɛ̃ ala lengbi ti tɛnɛngɔ hɛ̃ e ya, e nvɛ̃ni la elengbi ti lingɔ aye zu mɛ bɛ e ye, kanda ta azi mɛndɛ̃  la alengbi ti pangɔ hɛ̃ e aye mɛ elengbi ti lingɔ ma. Kanda se zo kɛ̃ tɔndɔngɔ andia tɛ Yehova ko, ta afa ya, lo ndo li nvɛ̃ni aye na se mɛ bɛ lo ye ma. Ti biani ko, lo ndo zi lége ya, gigi tɛ Satana adɔ lo na nɔ. (Di Roma 12:1, 2.) Ayɔ ya, zo kɔi kɔi apɔna: Bere lo na ngbãngɔ bo na ngbina du tɛ lo mɛ siɔ kpale ná gigi olo tɛ Satana la ndo dɔ ni na nɔ, bere lo na ziangɔ ya, Yehova gbinyangbi dungɔ lɛ ngɛ̃́ tɛ lo ti nɛngɔ ya, lo ti na bɛta du bandangɔ ndɛ.​—Yis. 64:8.

8. Ye mɛ alengbi ti zangɔ e ya, e zia bingangɔ li nga na aseliye ti siɔni nɛ?

⁸ Yehova hĩnga ya, ti nɛngɔ ya, zo zia bingangɔ li nga na aseliye ti siɔni ko, ando yɔ ngoi nga na ge ge ge. (Nz. 103:13, 14) Kanda na lége ti Tɛnɛ tɛ lo, Nyingɔ vurú tɛ lo nga na linɔ tɛ lo ko, Yehova ndo hɛ̃ e ndara, ngunu nga na aye mɛ alengbi ti zangɔ e ya, e gbinyangbi se du tɛ e. Ta kitɛ da ma, mɔ ndo hũ ya, Yehova ndo za mɔ. Zia e ba na olo ambanga aye mɛndɛ̃ mɛ mɔ lengbi ti lingɔ ti nɛngɔ ya, mɔ zia ngbina du tɛ mɔ, wa mɔ li nga aye mɛ alengbi ti hɛ̃ngɔ mɔ lége ya, mɔ mu batisimɔ.

9. Ye mɛ Tɛnɛ tɛ Nzapa lengbi ti zangɔ mɔ ya, mɔ li nɛ?

⁹ Ba se du tɛ mɔ nzɔ̃ni nvɛ̃ni na lége ti Ngbangɔ. Tɛnɛ tɛ Nzapa ndo du nga ma tala tala. Ni lengbi ti zangɔ mɔ ya, mɔ ba na seni nvɛ̃ni, se tɛ mɔ ti bingangɔ li, se mɛ mɔ ndo tɛnɛ tɛnɛ nga na se mɛ mɔ ndo li na kpale. (Zk. 1:22-25) Nyita mɛ ndo manda na mɔ Ngbangɔ nga na ayata mɛndɛ̃ mɛ kpengbani na ya nyingɔ alengbi ti zangɔ mɔ ya, mɔ li ni. Na ndakisa, ala lengbi ti zangɔ mɔ na lége ti Ngbangɔ ya, mɔ hĩnga aye mɛ mɔ ndo li ni nzɔ̃ni, nga na aye mɛ mɔ na nzɛ̃ngɔ ti lingɔ ni. Na lége ti ambeti mɛ ndo kambisa nda atɛnɛ ti ya Ngbangɔ ko, ala lengbi ti zangɔ mɔ ya, mɔ lua awangɔ ti nzɔ̃ni mɛ ando fa se ti nwɔngɔ na aseliye ti siɔni. Wa Yehova ndo du dã ti zangɔ mɔ ngoi zu. Lo hĩnga se ti nzɔ̃ni ti zangɔ mɔ na lo mɛ ya, lo hĩnga nzɔ̃ni aye mɛ ka bɛ mɔ. (Mas. 14:10; 15:11) Na lo ni la, ndo li sambela hɛ̃ lo, wa ndo manda nga Tɛnɛ tɛ lo bi zu.

10. Wangɔ mɛ mɔ lua na ndo se lɛlo tɛ Elie nɛ?

¹⁰ Ye na bɛ mɔ kɔi ya, andia tɛ Yehova adu nzɔ̃ni nvɛ̃ni. Aye zu mɛ Yehova ndo yɔ ya, e li ni ko, ni ndo du na ndombali nzɔ̃ kpale tɛ e nvɛ̃ni. Zo ko la ndo tɔndɔ andia tɛ lo ko, lo ndo hɛ̃ tɛrɛ lo nvɛ̃ni ndima, lo na dungɔ na dungɔ lɛ ngɛ̃́ mɛ na tina, wa lo nga na dungɔ na dengɔ bɛ na ya dungɔ lɛ ngɛ̃́ tɛ lo. (Nz. 19:7-11) Kanda azi ko la ndo kɛ̃ tɔndɔngɔ andia tɛ Yehova ko, ala ndo lua apɛnɔ mɛ ando lo na ndo lingɔ aye na landangɔ gwɛ̃ ti mi. Ba tɛnɛ mɛ kɔli kɔi mɛ ili lo la Elie atɛnɛ na omɛ aba kɛ̃ngɔ tɔndɔngɔ andia tɛ Nzapa. Awa dũngɔ lo akãndó lo na landangɔ andia tɛ Yehova. Kanda na ngoi mɛndó lo ti palanga ko, lo pɔnandó dungɔ ndoni kɔi na akwa ti siɔni. Lo bandandó nyɔngɔ drɔgɛ, lingɔ pite nga na nzĩngɔ nzĩ. Elie nvɛ̃ni tɛnɛ ya, ni tindó zo mɛ ndo ma ngɔnzɔ kpengbani, nga zo ti mobulu. Lo pa ya, “Ti tɛnɛngɔ bɛta tɛnɛ ko, mbi lindó aye zu mɛ ando ha na awakristo ya, ta ala li ni ma.” Kanda ta bɛ Elie alindó na aye mɛndó lo manda na ngoi mɛndó lo dɛ nyingambi ma. Lo di lo bandandó mandangɔ Ngbangɔ fãni mɛndɛ̃. Lo lindó kpengbani ti nɛngɔ ya, lo zia seliye tɛ lo ti siɔni, wa na bulu ti 2000 lo mundó batisimɔ. Ngasia la tɔndɔngɔ ndia tɛ Yehova ahɛ̃ndó lo nzɔ̃ kpale nɛ? Elie tɛnɛ ya: “Na olo mɛ ko, mbi ti na siriri ti bɛ nga na bingangɔ li ti vuruni.” * Nga ma se mɛ se lɛlo tɛ lo afa na ni, azi kola ndo kɛ̃ tɔndɔngɔ ndia tɛ Yehova ko, ala ndo hɛ̃ tɛrɛ la nvɛ̃ni pɛnɔ. Abɛse ngaso ko, Yehova ndo du dã ti zangɔ ala ya, ala gbinyangbi se du tɛ ala.

11. Aye mɛ bɛ Yehova kɛ̃ ni nɛ?

 ¹¹ Manda kɛ̃ngɔ aye mɛ Yehova ndo kɛ̃. (Nz. 97:10) Ngbangɔ ndo ha ya, Yehova kɛ̃ “lɛ mɛ ndo ba ndo na yakɛ, mɛnga mɛ ndo tɛnɛ nvɛ̃nɛ, nga na ti mɛ ndo sa mɛnɛ tɛ azi mɛ ta ala li ye kɔi ma.” (Mas. 6:16, 17) Bɛ Yehova kɛ̃ nga “azi ti mobulu nga na azi mɛ ndo handa afɔ̃ la.” (Nz. 5:6) Bɛ Yehova sĩ na seliye niko mawoma, na lo ni la, lo kpɔndó azi na ngoi tɛ Noa na lo mɛ ya, ala lindó ya, lɛ gigi sĩ na akpale ti mobulu. (Eb. 6:13) E mu se lɛlo mɛndɛ̃. Na lége tɛ Prɔfeta Malaki, Yehova pandó ya, bɛ lo kɛ̃ azi ko la ndo li kpale na poloso ti nɛngɔ ya, ala ho libala na awoti la bere akɔla mɛ ta ala li ye kɔi ma. Lo ndo kɛ̃ sambela tɛ ala, wa lo nga na sambisangɔ ala na lo ni.​—Mal. 2:13-16; Aeb. 13:4.

12. Kɛ̃ngɔ aye ti siɔni alengbi na nɛ?

¹² Gwɛ̃ tɛ Yehova du ya, e “kɛ̃ ye ti siɔni.” (Rom. 12:9) Tɛnɛ mɛ “kɛ̃ngɔ” ando fa gwɛ̃ ti kpengbani mɛ zo ndo du na ni ti kɛ̃ngɔ tɛrɛ ye kɔi ngaso na bɛ lo kɔi, ti bɛ lo sĩngɔ na ye tee ka gwɛ̃ ye niko awɛ ya lo. Binga li mɔ na ndo se mɛ mɔ na mangɔ na tɛrɛ mɔ se ayɔ ka ti mɔ ya, mɔ tɛ ye kɔi mɛ azɔ̃. Se mɔ da bo bɛ mɔ na ye niko ko, alengbi ti hɛ̃ngɔ mɔ gwɛ̃ ya, mɔ dé. Kwɛ kɔi, dungɔ bo na dangɔ bɛ ti lingɔ aye mɛ Yehova ndo hũ ya, adu siɔni alengbi nga ti tongɔ e ya e ma tɛrɛ e ngaso, ale e kɛ̃ ni mbala kɔi.

13. Nda mɛ adu ngbondoni ya, e bata bingangɔ li tɛ e nɛ?

¹³ Bata bingangɔ li tɛ mɔ. Bingangɔ li tɛ e ndo to e ya, e li aye ti nzɔ̃ni bere aye ti siɔni. Na lo ni la, Yezo pandó hɛ̃ e ya, e kɛ̃ dangɔ bɛ zu mɛ alengbi ti tongɔ e ya, e li siɔ kpale mɛ kotani. (Mat. 5:21, 22, 28, 29) E ye hɛ̃ngɔ To e ti ndozu dengɔ bɛ. Na lo ni la, adu ngbondoni ya, e kɛ̃ mbala kɔi dangɔ bɛ ti siɔni mɛ aga kaya bɛ e!

14. Aye mɛ tɛnɛ tɛ e ndo fa na lo tɛ e nɛ, wa ahũnda mɛ elengbi ti hũndangɔ na tɛrɛ e nɛ?

¹⁴ Keba na atɛnɛ mɛ mɔ ndo tɛnɛ. Yezo pandó ya: “Tɛnɛ mɛ ndolo ka nyɔ zo ndosi ko, andolo ka ya bɛ lo.” (Mat. 15:18) Ti biani, atɛnɛ mɛ e ndo tɛnɛ ando fa aye mɛ ka gbɛ bɛ e. Na lo ni la, hũnda tɛrɛ mɔ na ando mɛ: ‘Mbi ndo kɛ̃ pangɔ nvɛ̃nɛ abɛse du ya, tɛnɛngɔ bɛta tɛnɛ alengbi ti hɛ̃ngɔ mbi pɛnɔ? Na lo mɛ ya, mbi du kɔli bere wali mɛ ali libala, ta mbi ndo li pandara bere masia tɛrɛ zo mɛndɛ̃ ma? Mbi ndo kɛ̃ tɛnɛngɔ atɛnɛ ti kamɛnɛ? Mbi ndo hɛ̃ gbinya ti nzɔ̃ni se adu ya, zo kɔi hɛ̃ mbi ngɔnzɔ?’ Gbɔ̃ngɔ li mɔ na seni nvɛ̃ni na ndo ahũnda niko alengbi ti zangɔ mɔ. Elengbi ti hakangɔ tɛnɛ tɛ e na bɔngɔ mɛ afũ ni fũngɔ. Bɔngɔ mɛ lɛ kamba ni agara bere asuru ko, ta zo lengbi ti yungɔ ni ma.  Kwɛ kɔi, asiɔ tɛnɛ ndo li ya, ngbina du tɛ mɔ angbã bo so tɛrɛ mɔ. Kanda se mɔ li kpengbani mɔ hã nvɛ̃nɛ, gulungɔ azi, asiɔ tɛnɛ nga na atɛnɛ ti bí ka nyɔ mɔ ko, na dungɔ woni ya, mɔ hã ngbina du ka tɛrɛ mɔ, mɔ zi.

15. Gɔngɔngɔ ngbina du tɛ e ka ndo kɛkɛ ti pɛnɔ alengbi na nɛ?

¹⁵ Du dã ti lingɔ aye mɛ adu ngbondoni. Toma Polo hɛ̃ndó ndakisa kɔi ti ngbondoni ti nɛngɔ ya, aza e, e hĩnga nda mɛ adu ngbondoni ya, e gbinyangbi se du tɛ e. Lo sundó ya, ale e ‘gɔngɔ ngbina du tɛ e ka ndo kɛkɛ ti pɛnɔ.’ (Rom. 6:6, NWT) Tɛnɛ ni ye fangɔ ya, ale e landa se lɛlo tɛ Yezo. Nga ma se ko la Yezo yendó kpingɔ ka ndo kɛkɛ ti pɛnɔ ti nɛngɔ ya, ni hɛ̃ Yehova dengɔ bɛ ko, ayɔ ya, e zia nga aseliye ná dɔngɔ nɔ tɛ e ti siɔni mɛ bɛ Yehova ndo kɛ̃. Se du ya e li ni ko, e na tingɔ na bingangɔ li ti vuruni nga na dangɔ bɛ ti luangɔ dungɔ lɛ ngɛ̃́ ti kaka. (Yn. 17:3; 1 Pet. 3:21) Ta bɛ mɔ li na ni ma ya, ta Yehova na gbinyangbingɔ andia tɛ lo ti nɛngɔ ya, amangbi na gwɛ̃ tɛ e ma. Kanda e la ayɔ ya, e gbinyangbi se du tɛ e ti nɛngɔ ya, amangbi na andia tɛ lo.​—Yis. 1:16-18; 55:9.

16. Nda mɛ ayɔ ya, mɔ ngbã lá kwɛ tiringɔ to na agwɛ̃ tɛ mɔ ti mi nɛ?

¹⁶ Ngbã lá kwɛ tiringɔ to na agwɛ̃ ti siɔni. Abɛse na pɛ mungɔ batisimɔ tɛ mɔ ko, ayɔ ya, mɔ ngbã lá kwɛ tiringɔ to na agwɛ̃ tɛ mɔ ti mi. Binga li mɔ na ndo kpale mɛndó asi na Maurício. Na ngoi mɛndó lo dɛ palanga ko, lo ndo bombindó tɛrɛ lo na afɔ̃ lo akɔli. Lá kɔi, lo tengbindó na Atɛmwɛ tɛ Yehova, wa lo bandandó mandangɔ Ngbangɔ. Na pɛ gbinyangbingɔ akpale ti ya dungɔ lɛ ngɛ̃́ tɛ lo ko, lo mundó batisimɔ na bulu ti 2002. Abɛse du ya, lo ndo li kwa hɛ̃ Yehova aɔ ndɛ abulu gba ko, lo tɛnɛ ya, ngoi mɛndɛ̃ ni ndo tiri to na agwɛ̃ tɛ ni ti siɔni. Kanda ta lo nzɛ̃ ma, Maurício tɛnɛ ya: “Na lo mɛ ya, mbi mu ekateli ti kɛ̃ngɔ zingɔ lége hɛ̃ agwɛ̃ tɛ mbi ti siɔni ko, mbi lengbi ti hɛ̃ngɔ Yehova dengɔ bɛ, wa hĩngangɔ ni ndo hɛ̃ mbi ngunu.” *

17. Ngasia la se lɛlo tɛ Nabiha, asa ngunu bɛ mɔ nɛ?

¹⁷ Li sambela hɛ̃ Yehova ya, lo za mɔ, mɔ kpã bɛ mɔ na ndo ngunu ti Nyingɔ vurú tɛ lo, kanda ta na ndo ngunu tɛ mɔ nvɛ̃ni ma. (Gal. 5:22; Fil. 4:6) Ayɔ ya, e du na ekateli ti ziangɔ ngbina du tɛ e ti bwai, wa ta e diri ndoni fãni mɛndɛ̃ ma. E ba kpale mɛndó asi na nyi wali kɔi mɛ ili la Nabiha. To lo asundolandó lo na ngoi mɛndó lo dɛ na bulu mana gɛgɛrɛ. Lo tɛnɛ ya, “Ni  hɛ̃ndó mbi vundu gba.” Na ngoi mɛndó lo ti kangba ko, Nabiha tindó zo mɛ ndo le ngɔnzɔ kpengbani nga zo mɛ ndo li kakulu lo tɛrɛ afɔ̃ lo. Lo bandandó kangɔ adrɔgɛ, na lo ni la agbɔ̃ndó lo, wa lo ningandó ka bɔlɔkɔ na pɛ abulu. Atɛmwɛ tɛ Yehova mɛndó ndo gwe ti fangɔ tɛnɛ ka da bɔlɔkɔ, abandandó mandangɔ na lo Ngbangɔ. Ni tondó Nabiha ya, lo mu ekateli ti ngbondoni ti gbinyangbingɔ dungɔ lɛ ngɛ̃́ tɛ lo. Lo tɛnɛ ya, “Adundó woni ti nɛngɔ ya, mbi zia ambanga aseliye tɛ mbi mɛndɛ̃ ti siɔni. Kanda ziangɔ nyɔngɔ manga ko, ta adundó wele ma.” Nabiha tirindó to na gwɛ̃ ti nyɔngɔ manga bulu kɔi na ndambu, uzu ti nɛngɔ ya, lo nwɔ gwɛ̃ niko. Lo nwɔndó ni ngasia? Lo tɛnɛ ya, “Ɔngɔ aye zu, adundó lingɔ sambela hɛ̃ Yehova ngoi zu la, aza mbi ya, mbi zia nyɔngɔ manga.” Lo kɔ nda tɛnɛ tɛ lo na pangɔ ya: “Se mbi longandó gbinyangbingɔ se du tɛ mbi ti nɛngɔ ya, mbi hɛ̃ Yehova dengɔ bɛ ko, mbi hĩnga ya, azi mɛndɛ̃ alengbi nga ti lingɔ ngaso!” *

18. Na bangɔ 1 Kɔrinto 6:9-11, ye mɛ awa kwa tɛ Nzapa gba ndo longa lingɔ ni nɛ?

¹⁸ Na siɛklɛ ti uzu, ambanga akɔli ná awali mɛndó Yehova pɔna ala ya, ala le gbia ndoni kɔi na Yezo ko, uzu, ala ndó na dungɔ lɛ ngɛ̃́ ti siɔni nvɛ̃ni. Na ndakisa, azi mɛndɛ̃ adundó awa tingɔ kɔmbɛ, azi mɛ ndo bombi tɛrɛ la na afɔ̃ la akɔli bere afɔ̃ la awali, nga na awa nzĩngɔ nzĩ. Kanda Nyingɔ vurú tɛ Yehova zandó ala ti nɛngɔ ya, ala gbinyangbi se du tɛ ala. (Di 1 Kɔrinto 6:9-11.) Kwɛ kɔi, ndɛ lo mɛ ko, Ngbangɔ ndo za amiliɔ̃ tɛ azi ti nɛngɔ ya, ala gbinyangbi akpale ti ya dungɔ lɛ ngɛ̃́ tɛ ala. * Ala ndo zia aseliye ti siɔni nvɛ̃ni mɛndó ala mɛsɛnɛ na ni gã. Se lɛlo tɛ ala ndo fa ya, mɔ lengbi nga ti gbinyangbingɔ akpale ti ya dungɔ lɛ ngɛ̃́ tɛ mɔ, wa mɔ li nga aye mɛ na hɛ̃ngɔ mɔ lége ya, mɔ mu batisimɔ.

19. Aye mɛ e na mandangɔ na pɔsɔ ti gesi nɛ?

¹⁹ Kanda ti nɛngɔ ya, zo mu batisimɔ ko, ayɔ ya, lo li kpengbani lo zia ngbina du tɛ lo, wa lo li nga kpengbani lo mu du ti fãnani. Na pɔsɔ ti gesi e na bangɔ se mɛ elengbi ti lingɔ ni, nga na se mɛ azi mɛndɛ̃ alengbi ti zangɔ e.