1. Aye gba mɛ e ndo li ko, ando lo wa?

 ABƐSE du ya, e mu batisimɔ fãnani bere ali ndɛ abulu gba ko, e zu na gwɛ̃ ti dungɔ na seliye mɛ bɛ Yehova ndo ye. Ti nɛngɔ ya e li ni ko, ayɔ ya, e ba se ti bingangɔ li tɛ e. Na lo nɛ? Na lo mɛ ya, aye gba mɛ e ndo li ko, ando lo kaya bingangɔ li tɛ e. Se du ya, e ndo binga li e ngoi zu na ndo aye ti mi ko, e na tɛnɛngɔ bere lingɔ aye ti siɔni. (Ef. 4:17-19) Kanda se du ya, e ndo binga li e na ndo aye ti nzɔ̃ni ko, e na tɛnɛngɔ atɛnɛ, e nga na lingɔ aye gba na se mɛ ahɛ̃ To e Yehova dengɔ bɛ.​—Gal. 5:16.

2. Aye mɛ e na mandangɔ so ya tɛnɛ mɛ nɛ?

² Mabere se mɛ e manda na ni na pɔsɔ mɛ biri ɔ ko, ta elengbi ti gbanzingɔ abingangɔ li tɛ e ti siɔni zu ma. Kanda elengbi ti kɛ̃ngɔ kpãngɔ bingangɔ li ti siɔni niko na kwa. Uzu ti nɛngɔ ya, e mu batisimɔ ko, ayɔ ya, e zia tɛnɛngɔ atɛnɛ nga na lingɔ aye mɛ Yehova ndo kɛ̃. Ni la adu ye ti uzu nga ye ti ngbondoni mɛ ayɔ ya, e li ni ti nɛngɔ ya, e zia ngbina du tɛ e. Ti nɛngɔ ya, e hɛ̃ Yehova dengɔ bɛ nvɛ̃ni ko, na yɔngɔ nga ya, e tɔndɔ ndia mɛ: “Ĩ mu du ti fãnani.” (Kɔl. 3:10) Na ya tɛnɛ mɛ, e na hɛ̃ngɔ agbinya ti ahũnda mɛ: “Du ti fãnani” alengbi na nɛ? Ngasia la, elengbi ti mungɔ du ti fãnani wa e bata nga ni nɛ?

3. Na bangɔ Galatia 5:22, 23, du ti “fãnani” alengbi na nɛ, wa ngasia la, zo lengbi ti mungɔ ni nɛ?

³ “Du ti fãnani” adu se ti bingangɔ li ná lingɔ aye mɛ amangbi na seliye tɛ Yehova. Zo ndo mu du ti fãnani na ngoi mɛ lo ndo dũ ale ti nyingɔ, afa ya, lo ndo zia ya, Nyingɔ vurú aza lo na ya bingangɔ li tɛ lo, se mɛ lo ndo ma na tɛrɛ lo, nga na ya kwa tɛ lo. (Di Galatia 5:22, 23.) Na ndakisa, lo ndo ye Yehova nga na  azi tɛ lo. (Mat. 22:36-39) Lo ndo bata dengɔ bɛ tɛ lo abɛse na ngoi mɛ lo tengbi na kpengba kpale. (Zk. 1:2-4) Lo ndo kpã siriri. (Mat. 5:9) Lo na yɔngɔrɔ bɛ nga na nzɔ̃ bɛ na mbage tɛ azi mɛndɛ̃. (Kɔl. 3:13) Lo ndo ye aye ti nzɔ̃ni, wa lo ndo li nga ni. (Lk. 6:35) Lo ndo fa na lége ti kwa tɛ lo ya, lo na loyengɔ ti kpengbani na mbage tɛ To lo ti ndozu. (Zk. 2:18) Lo ndo gbe bɛ lo na ngoi mɛ agi lo na tɛnɛ nga na ngoi mɛ lo tengbi na tara.​—1 Kɔr. 9:25, 27; Tit. 3:2.

4. Ti nɛngɔ ya, e mu du ti fãnani, ayɔ bo ya e ngbã na tingɔ na aseliye mɛ atɛnɛ tɛnɛ ni kaya Galatia 5:22, 23? Kambisa.

⁴ Ti nɛngɔ ya, e mu du ti fãnani ko, ayɔ ya, e ti na seliye zu mɛ atɛnɛ tɛnɛ ni kaya Galatia 5:22, 23 nga kaya avɛrse mɛndɛ̃ ti ya Ngbangɔ. * Nga ma se mɛ ta elengbi ti yungɔ eteni ti bɔngɔ kɔi, wa e dɔ mɛndɛ̃ e zia ma ko, kwɛ kɔi, ta zo lengbi ti lingɔ kpengbani ti tingɔ na seliye kɔi wa lo dɔ mɛndɛ̃ lo zia ma. Kutu, aseliye niko gba ndo du bo lɛni kɔi. Na ndakisa, se mɔ ye nvɛ̃ni afɔ̃ mɔ ko, mɔ nga na dungɔ na yɔngɔrɔ bɛ nga na wo bɛ na mbage tɛ la. Wa se mɔ ye nvɛ̃ni nzɔ̃ kpale ko, mɔ na fangɔ seliye ti zungɔ na tɛrɛ nga na fɔ̃ngɔ bɛ.

5. Dungɔ na “dangɔ bɛ tɛ Yezo Kristo,” alengbi na nɛ, wa nda mɛ ayɔ ya, e manda dungɔ lɛ ngɛ̃́ tɛ Yezo nɛ? (1 Kɔrinto 2:16)

⁵ Di 1 Kɔrinto 2:16. Ti nɛngɔ ya, e mu du ti fãnani ko, ayɔ ya, e du na “dangɔ bɛ tɛ Yezo Kristo.” Na tɛnɛ mɛndɛ̃, ayɔ ya, e manda se ti bingangɔ li tɛ Yezo, wa e landa nga se lɛlo tɛ lo. Yezo ndo fandó le ti nyingɔ tɛ Nzapa na ndenge ti lengbingɔ. Mabere tala tala ti nzɔ̃ni nvɛ̃ni ko, lo ndo fa seliye tɛ Yehova na seni. (Aeb. 1:3) Se du ya, ngoi zu e ndo binga li e ma se tɛ Yezo ko, e na lingɔ aye nga mabere lo, wa e nga na tingɔ na aseliye tɛ lo​—Fil. 2:5.

6. Na ngoi mɛ e ndo li kpengbani ti mungɔ du ti fãnani, ye mɛ ta bɛ e lengbi ti lingɔ na ni ma nɛ?

⁶ Elengbi nvɛ̃ni ti landangɔ se lɛlo tɛ Yezo? Ngoi mɛndɛ̃ mɔ lengbi ti tɛnɛngɔ ya: ‘Yezo du zo ti lengbingɔ. Ta mbi lengbi ti lingɔ aye zu na seni ma se tɛ lo ma!’ Se du ya, mɔ ndo ma tɛrɛ mɔ ngaso ko, da bɛ mɔ na kpale mɛ. Ti uzu, ali ndó mɔ ya, mɔ du na seliye nga ma tɛ Yehova ná Yezo. Ni la, mɔ lengbi ti pɔnangɔ landangɔ seliye tɛ la, wa mɔ lengbi nga ti lingɔ aye ma se tɛ la abɛse ta na se ti lengbingɔ ma. (Eb. 1:26) Ti sɛ, Nyingɔ vurú tɛ Nzapa na ngunu mɛ aɔ  ngunu ti aye zu. Ni lengbi ti zangɔ mɔ ya, mɔ li aye mɛ ta mɔ lengbi ti lingɔ ni mɔ kɔi na bɛ mɔ ma. Ti taa, ta Yehova ndo yɔ ya, mɔ fa le ti nyingɔ na se ti lengbingɔ na olo ma. Kutu, To e ti songo na hɛ̃ngɔ azi mɛ na nzɔ̃ dangɔ bɛ ti luangɔ dungɔ lɛ ngɛ̃́ ti kaka ge lɛ sese bulu 1 000 ti nɛngɔ ya, ala ti na tɛrɛ ti lengbingɔ. (Sum. 20:1-3) Aye mɛ Yehova ndo yɔ ka ti e ya e li na olo adu ya, e li zu mɛ elengbi ti lingɔ, wa e kpã nga bɛ e na ndo lo ya, lo na zangɔ e.

7. Aye mɛ e na mandangɔ na olo nɛ?

⁷ Na ya kpale mɛ wa la elengbi ti landangɔ Yezo wa? E na mandangɔ na ndunu ni aseliye siɔ ti le ti nyingɔ tɛ Nzapa. E na bangɔ wangɔ mɛ elengbi ti luangɔ na se mɛndó Yezo li na aseliye niko kɔi kɔi. Wa e nga na bangɔ ambɛge hũnda mɛ alengbi ti zangɔ e ya, e hĩnga se ti nzɔ̃ni mɛ elengbi ti mungɔ na du ti fãnani.

8. Ngasia la, Yezo fandó songo nɛ?

⁸ Fa ya, mɔ ndo ye Yehova na lége ti yengɔ azi. Na lo mɛ ya, Yezo ndo ye Yehova mawoma ko, lo lindó na seni aye mɛndó To lo yɔ ya, lo li, wa lo ka ngandó tɛrɛ lo na lo tɛ e. (Yn. 14:31; 15:13) Yezo fandó ya, lo ndo ye azi gba na ndenge mɛndó lo lekisa dungɔ lɛ ngɛ̃́ tɛ lo ge lɛ sese. Bi kɔi kɔi lo ndo ye, lo ndo du ngandó na vundu tɛ azi abɛse na ngoi mɛ azi mɛndɛ̃ ndo kɛ̃ndó tɛrɛ lo. Lége kɔi mɛndó lo fa ya, lo ndo ye azi adu na hangɔ ala na tɛnɛ mɛ aba Lo-lengɔ Gbia tɛ Nzapa. (Lk. 4:43, 44) Yezo fa ngandó songo na lo tɛ Nzapa nga na lo tɛ azi na ndenge mɛndó lo ye hũngɔ pɛnɔ nga na kpingɔ kwá na yamba ti azi ti mi mɛ awa lingɔ siɔ kpale. Lo zi lége hɛ̃ zo zu ya, lo lua dungɔ lɛ ngɛ̃́ ti kaka.

9. Ngasia la, elengbi ti landangɔ se lɛlo tɛ Yezo na omɛ aba fangɔ songo na azi mɛndɛ̃ nɛ?

⁹ Wangɔ mɛ elengbi ti luangɔ. E hɛ̃ndó tɛrɛ e hɛ̃ Yehova wa e mu ngandó batisimɔ na lo mɛ ya, e ndo ye To e ti ndozu. Ma se tɛ Yezo, elengbi ti fangɔ songo tɛ e na lo tɛ Yehova na se mɛ e ndo li na kpale tɛrɛ afɔ̃ e. Toma Yoanɛ sundó ya: “Se ta zo aye ayata lo awa Kristo mɛ lo ndohũ la ma ko, lo na yengɔ Nzapa mɛ ta lo dɛ lo hũ lo ma nga sia?” (1 Yn. 4:20) Elengbi ti hũndangɔ tɛrɛ na ndo mɛ: ‘Mbi ndo du na songo ti kpengbani na mbage tɛ azi mɛndɛ̃? Mbi ndo ma vundu tɛ azi mɛndɛ̃ abɛse ala li ye mɛ ahɛ̃ mbi ngɔnzɔ? Songo ndo to mbi ya, mbi salela ngoi ná aye tɛ mbi ti mi ti nɛngɔ ya, mbi za na azi mɛndɛ̃ ahĩnga Yehova? Mbi ndo li ni abɛse na ngoi mɛ ta azi gba ndo sepala na ge ge ge mɛ mbi ndo li ma, bere ala ndo kɛ̃ ni? Mbi lengbi ti gbinyangbingɔ akpale ti ya dungɔ lɛ ngɛ̃́ tɛ mbi ti nɛngɔ ya, mbi lekisa ngoi gba na ya kwa ti lingɔ ya, azi ati ava Yezo?’​—Ef. 5:15, 16.

10. Yezo ndo kpãndó siriri ngasia?

¹⁰ Du zo mɛ ndo kpã siriri. Yezo dundó zo mɛ ndo kpã siriri. Na ngoi mɛndó azi ndo li siɔ kpale tɛrɛ lo ko, ta lo ndo dirindó na siɔ kpale ma. Kanda ta lo ngbã bo so ndo ko ma, lo ndo li ngandó zu ti kpãngɔ siriri, wa lo sa ngandó ngunu na bɛ azi mɛndɛ̃ ya, ala onzi tɛnɛ na popo tɛrɛ la. Na ndakisa, lo tɛnɛndó hɛ̃ la ya, ale ala kpã siriri ka popo tɛrɛ la ná ayata la, se ala ye ya, Yehova ye sambela tɛ ala. (Mat. 5:9, 23, 24) Wa lo lonzi ngandó Atoma tɛ lo fãni gba ya, ala zia pangɔ pa ka popo tɛrɛ la ti gingɔ hĩngangɔ zo mɛ aɔ afɔ̃ lo.​—Lk. 9:46-48; 22:24-27.

11. Ngasia la, elengbi ti dungɔ azi mɛ ndo kpã siriri nɛ?

¹¹ Wangɔ mɛ elengbi ti luangɔ. Dungɔ zo mɛ ndo kpã siriri, ayɔ ya, e li aye gba, ta angbã bo na kɛ̃ngɔ pangɔ pa ma. Ayɔ ya, e li kpengbani e kpã siriri ka popo tɛrɛ e ná azi mɛndɛ̃, wa e sa nga ngunu bɛ ayata kɔli na ayata wali ya, ala onzi tɛnɛ ka popo tɛrɛ la. (Fil. 4:2, 3; Zk. 3:17, 18) Elengbi ti hũndangɔ tɛrɛ e na ndo mɛ: ‘Aye  mɛ mbi ndo ye lingɔ ti nɛngɔ ya, mbi kpã siriri na popo tɛ mbi ná azi mɛndɛ̃ nɛ? Ngoi mɛ nyita kɔli bere nyita wali ali ye mɛ ahɛ̃ mbi ngɔnzɔ, mbi ndo bata ngɔnzɔ tɛ lo kaya mbi? Mbi ndo kũ bo ya, azi mɛndɛ̃ ali kpengbani ti nɛngɔ ya, e kpã siriri ka popo tɛrɛ e, bere mbi ndo du kɔzo zo ti lingɔ kpengbani ya, mbi kpã siriri ka popo tɛ mbi ná azi mɛndɛ̃ abɛse ala la, ali siɔ kpale tɛ mbi? Se du ya, alengbi, mbi ndo sa ngunu bɛ azi ya, ala zia pangɔ pa, wa ala kpã nga siriri ka popo tɛrɛ la ná afɔ̃ la?’

12. Ngasia la, Yezo fandó ya, lo na nzɔ̃ bɛ nɛ?

¹² Du na nzɔ̃ bɛ na mbage tɛ azi mɛndɛ̃. Yezo ndó na nzɔ̃ bɛ. (Mat. 11:28-30) Lo fandó ni na lége ti dungɔ na wo bɛ nga na bingangɔ li ti nzɔ̃ni abɛse na ya akpengba kpale mɛndó lo ndo tengbi na ni. Na ndakisa, na ngoi mɛndó wali kɔi mɛ zo ti Fenisia ayɔ ka ti lo ya, lo sara nyi lo ko, lo tɛnɛndó tɛnɛ hɛ̃ lo na nzɔ̃ bɛ. Na ebandeli, ta lo lindó ye mɛ wali ko yɔ ka ti lo ma, kanda na ngoi mɛndó wali niko fa loyengɔ ti kpengbani ko, Yezo sarandó nyi lo. (Mat. 15:22-28) Abɛse du ya, Yezo ndó na nzɔ̃ bɛ ko, ta lo ndo lindó kpale na ba lingɔ ma, lo ndo lindó aye na nda ni. Nzɔ̃ bɛ tɛ lo ndo tondó lo ngoi mɛndɛ̃ ya, lo tɛnɛ tɛnɛ yangondo hɛ̃ azi mɛ lo ndo ye ala. Na ndakisa, ngoi mɛndó Petro tara gbanzingɔ lo na lingɔ se bɛ Yehova ko, Yezo lonzindó lo so gbɛlɛ ava lo mɛndɛ̃. (Mar. 8:32, 33) Ta lo tɛnɛndó ni ti nɛngɔ ya, lo gbɛ̃ ndima tɛ Petro ma, kanda lo wandó lo, wa lo ko nga kɛkɛ lɛ ava lo mɛndɛ̃ ya, ala keba na yakɛ. Ta kitɛ da ma ya, Petro mandó kamɛnɛ, kanda lo luandó wangɔ na ya lonzingɔ mɛndó Yezo lonzi na lo.

13. Ngassia la, elengbi ti dungɔ nvɛ̃ni na nzɔ̃ bɛ nɛ?

¹³ Wangɔ mɛ elengbi ti luangɔ. Dungɔ na nzɔ̃ bɛ nvɛ̃ni na ndo azi mɛ mɔ ndo ye la, ngoi mɛndɛ̃ ando yɔ ya, mɔ tɛnɛ tɛnɛ hɛ̃ la yangondo. Se mɔ li ni ko, ma se tɛ Yezo, ayɔ ya, wangɔ tɛ mɔ alo kaya ya Ngbangɔ. Du na songo. Du na dangɔ bɛ ya, azi ko la ndo ye Yehova, ala ndo ye nga mɔ ko, ala na yengɔ mangɔ wangɔ tɛ mɔ, wa ala nga na lingɔ aye na mangbi na wangɔ tɛ mɔ ti songo. Hũnda tɛrɛ mɔ na ndo mɛ: ‘Se du ya, mbi hũ zo kɔi mɛ mbi ndo ye lo gba, ali ye kɔi mɛ siɔni, mbi ndo du na ngunu ti tɛnɛngɔ tɛnɛ hɛ̃ lo? Se du ya, ayɔ ya, mbi hɛ̃ lo wangɔ, mbi ndo hɛ̃ ni na ndenge ti siɔni bere na songo? Ye mɛ ndo to mbi ya, mbi hɛ̃ wangɔ nɛ? Mbi ndo hɛ̃ wangɔ ni na lo mɛ ya, zo niko li ye mɛ ahɛ̃ mbi ngɔnzɔ, bere na lo mɛ ya, mbi ye zangɔ lo?’

14. Ngasia la, Yezo fandó ya, lo na gwɛ̃ ti lingɔ nzɔ̃ kpale nɛ?

¹⁴ Li kpengbani mɔ ti na gwɛ̃ ti lingɔ nzɔ̃ ye. Ta Yezo ngbã bondó na hĩngangɔ aye mɛ ando du nzɔ̃ni ma, kanda lo ndo li ngandó ni. Yezo ndo ye To lo, na lo ni la, ngoi zu lo ndo lindó aye ti nzɔ̃ni, lo hĩnga ngandó ya, lingɔ ngaso adu nzɔ̃ni. Dungɔ na gwɛ̃ kpengbani ti lingɔ nzɔ̃ ye, ando to zo ya, lo li nzɔ̃ kpale na lo tɛ azi mɛndɛ̃. Ta yɔ ya, e ngbã bo na hĩngangɔ aye ti nzɔ̃ni ma, ale e li aye ti nzɔ̃ni, nga na dangɔ bɛ ti nzɔ̃ni. Ngoi mɛndɛ̃ e zu elengbi ti hũndangɔ tɛrɛ e na ndo mɛ, ‘Zo lengbi ti lingɔ aye ti nzɔ̃ni se du ya, lo na dangɔ bɛ ti siɔni?’ Ĩi zo lengbi ti lingɔ ni. Na ndakisa, Yezo tɛnɛndó tɛnɛ tɛ azi mɛ ndo hɛ̃ ye tɛ la hɛ̃ awa yɛlɛ, kanda ala ndo lindó ya, azi gba ahĩnga ni ti nɛngɔ ya, ahɛ̃ la gonda. Abɛse du ya, ala lindó nzɔ̃ kpale ko, ta nindó na valɛrɛ ka lɛ Yehova ma.​—Mat. 6:1-4.

15. Ngasia la, elengbi ti fangɔ ya, e du nvɛ̃ni anzɔ̃ zi nɛ?

¹⁵ Wangɔ mɛ elengbi ti luangɔ. Elengbi ti dungɔ nvɛ̃ni anzɔ̃ azi, se e li aye ti nzɔ̃ni zangangɔ gingɔ nzɔ̃ kpale tɛ e nvɛ̃ni. Elengbi ti hũndangɔ tɛrɛ e na ndo mɛ: ‘Mbi ndo ngbã bo na hĩngangɔ aye ti nzɔ̃ni mɛ mbi lengbi ti lingɔ, bere mbi ndo li ni? Ye mɛ ndo to mbi ya, mbi li aye ti nzɔ̃ni nɛ?’

16. Ye mɛ elengbi ti lingɔ bi zu nɛ, wa na lo nɛ?

¹⁶ Ale ta e du na dangɔ bɛ ya, kwa ti mungɔ du ti fãnani ndo ngbã bo na mungɔ batisimɔ ma. Ayɔ ya, e bata fãna du tɛ e ma se ko la e ndo bata na “fãna bɔngɔ tɛ e” ti nɛngɔ ya, adu lá kwɛ nzɔ̃ni. Se ti nzɔ̃ni mɛ elengbi ti lingɔ na ni adu na lingɔ kpengbani ya, e fa le ti nyingɔ bi zu. Na lo nɛ? Na lo mɛ ya, Yehova du Nzapa mɛ lo ndo li kwa, wa nyingɔ tɛ lo adu ngunu mɛ lo ndo li na ye. (Eb. 1:2) Ni la, aseliye ti le ti nyingɔ tɛ lo kɔi kɔi alengbi ti tongɔ e ya, e li kwa kɔi ngaso. Na ndakisa, Yakobo mɛ kɔi tɛ ava Yezo asundó ya: “Se ta [zo] li nzɔ̃ ye ma ko, loyengɔ tɛ lo adu gɛgɛrɛ.” (Zk. 2:26) Elengbi ti salelangɔ ndia niko na lo ti ambɛge le ti nyingɔ mɛndɛ̃. Ngoi zu ko la, e ndo fa le ti nyingɔ ko, e ndo fa ya, nyingɔ niko ndo le kwa kaya tɛrɛ e.

17. Ngasia la, elengbi ti lingɔ kpale na ngoi mɛ e zanga fangɔ le ti nyingɔ nɛ?

¹⁷ Abɛse wakristo mɛ amu batisimɔ ali ndɛ abulu gba ko, ngoi mɛndɛ̃ lo lengbi nga ti zangangɔ fangɔ le ti nyingɔ. Kanda ye mɛ adu ngbondoni adu ya, e li kpengbani e du na seliye niko. E ba ndakisa mɛ. Se kamba ti bɔngɔ tɛ mɔ mɛ mɔ ndo ye ni gba agara ko, mɔ na bingɔ ni bo mbala kɔi? Ĩpɔ, mɔ na tarangɔ ya, mɔ di mɔ fũ ni se alengbi. Wa mɔ nga na dungɔ na kpengba lɛ na ndo bɔngɔ niko ti nɛngɔ ya, ta adiri agara ma. Kwɛ kɔi se du ya, na ya ngoi kɔi mɔ zanga fangɔ nzɔ̃ bɛ, yɔngɔrɔ bɛ, bere ta mɔ li nzɔ̃ kpale tɛrɛ zo kɔi ma ko, ta mɔ nzɛ̃ ma. Se mɔ yɔ na bɛ mɔ kɔi ka ti nyita mɔ mɛ mɔ li lo siɔni ya, lo ka lɛ lo na ndo siɔ kpale tɛ mɔ ko, ni na lingɔ ya, ĩ diri ĩ lɛkɛ mangbi tɛ ĩ. Ni la, mu ekateli ti lingɔ nzɔ̃ kpale na bi mɛ na gangɔ.

18. Ye mɛ elengbi ti yengɔ lo ni na bɛ e kɔi nɛ?

¹⁸ E na dengɔ bɛ na ndenge mɛ Yezo ziandó hɛ̃ e nzɔ̃ lɛlo! Se du ya, e ndo li kpengbani e landa se ti bingangɔ li tɛ lo ko, ni na dungɔ woni ya, e li ye nga ma se tɛ lo. Wa se e li aye mabere se tɛ Yezo ko, na dungɔ woni ya, e mu du ti fãnani. Na ya tɛnɛ mɛ, e manda bo se ti ale ti nyingɔ tɛ Nzapa siɔ gɛgɛrɛ. Nda mɛ ta mɔ lengbi ti mungɔ ngoi ti nɛngɔ ya, mɔ manda na ambɛge seliye niko, wa mɔ binga nga li mɔ na ndo se mɛ mɔ lengbi ti fangɔ na ni ma nɛ? Buku ya bolukiluki mpo na Batatoli ya Yehova alengbi ti zangɔ mɔ. Ba bɛli tɛnɛ “Bomoi ya bokristo” gwe ka “Mbuma ya elimo.” Mɔ lengbi ti yengɔ na bɛ mɔ kɔi ya, se mɔ li kpengbani ti mungɔ du ti fãnani ko, Yehova na zangɔ mɔ, wa ta mɔ nga na hãngɔ ni zingɔ ma.