BANDANGƆ na siɛklɛ ti mbala mbala U.N.E., Asiri atindó kɔdɔrɔ mɛ na lo-lengɔ gbia gba na ndo lɛ gigi. Sitɛ intɛrnɛtɛ ti British Museum * atɛnɛ ya, “Ni ndo lendó gbia na kɔdɔrɔ ti Shipre mɛ ka Ouest, na ndo Irand mɛ ka Est, wa na ya bulu mɛndɛ̃ ni ndo le ngandó gbia na ndo Ezipito.” Kɔdɔrɔ ti lo-lengɔ gbia (Capital) ni adundó Ninive. Ni dundó kota gbata ti ya gigi na ngoi niko. Wa kɔdɔrɔ nikondó na amɔnima mɛ ndo kamwisa azi, ni ngandó na jardin ti nzɔ̃ni nvɛ̃ni, nindó na ada ti nzɔ̃ni (ti luxe), ni ngandó na akota bibliotɛkɛ. Ambeti mɛndó atã ni ka tɛrɛ da (mur) ti gã ti Ninive, ando fa ya, Gbia Ashubanipal mabere ambɛge agbia mɛndɛ̃ ti Asiri ko, lo ndo ilindó tɛrɛ lo nvɛ̃ni ya, “gbia ti gigi.” Na ya lo-lengɔ gbia tɛ lo ko, azi ndo hũndó ya, ta zo kɔi na kokangɔ mungɔ Asiri ná Ninive ma.

Kanda ngoi mɛndó kɔdɔrɔ ti Asiri ati na ngunu gba ko, Sefania prɔfɛta tɛ Yehova tɛnɛndó ya: “[Yehova] na . . . gbɛ̃ngɔ Asiri, wa lo na lingɔ ya, Ninive angbã gɛgɛrɛ ta zo na dungɔ ka da ma mabere zwa [desert].” Prɔfeta Nahume atɛnɛ ngandó ya: “Ĩ gbɔ falanga, ĩ gbɔ wolo! . . . Ta zo kɔi adɛ kaya gbata ni ma, ya gbata angbã gɛgɛrɛ, aye zu mɛ ka da agbɛ̃! . . . Zo zu ko na hũngɔ mɔ ko, lo na kpɛngɔ mɔ, wa lo na tɛnɛngɔ ya, ‘Agbɛ̃ Ninive wɛ!’” (Sef. 2:13; Nah. 2:9, 10; 3:7) Na ngoi mɛndó azi ama prɔfɛsi ni ko, ngoi mɛndɛ̃ ala hũndandó tɛrɛ la na ndo ya: ‘Ni na lingɔ tɛrɛ lo nvɛni? Asiri mɛ kɔdɔrɔ ti ngunu, azi na mungɔ ni?’ Ta azi ndo yendó lo ni ma.

Abɛse ngaso ko, ye mɛndó azi ndo hũ ya, ta alengbi ti lingɔ tɛrɛ lo ma ko, alindó tɛrɛ lo! Na nda siɛklɛ ti mbala mbala U.N.E., Kɔdɔrɔ ti Babilɔnɛ ná ti Mɛdɛ amundó Asiri. Azi aziandó dungɔ ka Ninive, suka suka, bɛ azi alindó nvɛ̃ni na gbata niko! Buku kɔi ti Mize mɛ ndo du ka Etatas-unis mɛ ando ili ni ya, Metropolitan Museum of Art * atɛnɛ ya: “Na ya asiɛklɛ gba na pɛ ngoi tɛ Yezo (Moyen Âge) ko, azi adɔndó kɔdɔrɔ ni azia, wa sese vĩndó ndo kɔdɔrɔ niko. Azi ndo hĩngandó kpale ti Ninive bo na lége ti Ngbangɔ” Sosiete kɔi mɛ ndo gi hĩngangɔ akpale ti gã mɛ Ngbangɔ tɛnɛ tɛnɛ ni mɛ ando ili ni ya, Biblical Archaeology * atɛnɛ ya: Tee na ebandeli ti bulu ti 1800, “Ta zo kɔi ndo hĩngandó bere Ninive kota capitale ti kɔdɔrɔ ti Asiri ndó da biani ma.” Kanda na bulu ti 1845, Austen Henry Layard zo ti Archéologie abandandó gigingɔ aye ka gbɛ sese ti ndo mɛndó gbata ti Ninive da. Aye mɛndó lo lua ka gbɛ sese ni afa ya, Ninive dundó kɔdɔrɔ mɛ ti ndima nvɛ̃ni.

Se mɛndó prɔfesi ti ya Ngbangɔ mɛ aba Ninive ati na seni ko, ando to e, e ye na bɛ kɔi ya, aprɔfesi ti ya Ngbangɔ mɛ aba gbɛ̃ngɔ ti akpale ti politikɛ ti gigi mɛ na ngunu, na tingɔ nga na seni.​—Da. 2:44; Sum. 19:15, 19-21.