NA NGOI ti gã, ando kandó nwã hɛ̃ ava wali na ngoi mɛndó ndasewa tɛ kɔli ná wali mɛ aye lingɔ libala, aye tɛnɛ ti libala ni. Nwã mɛ ando kandó ko, ando dundó aye ti ngbondoni mabere asa bere falanga. Ngoi mɛndɛ̃, ando li ngandó kwa na se lɛ kangɔ nwã, mabere sɛ mɛndó Yakobo li kwa hɛ̃ to Rachel na pɛ bulu mbalambala ti nɛngɔ ya, lo du na Rachel. (Eb. 29:17, 18, 20) Nda mɛndó ando ka nwã na pɛko wali nɛ?

Wa kambisangɔ nda tɛnɛ ti ya Ngbangɔ mɛ ili lo la Carol Meyers atɛnɛ ya: “Ando kandó nwã na se lɛ kwa mɛndó nyi wali ndo li ka ndasewa tɛ la, mɛ ta lo na lingɔ fãni mɛndɛ̃ ma na ngoi mɛ ta lo na dungɔ da ma. Mabere kwa [ti yaka] mɛ ayɔ ya lo li hɛ̃ ndasewa tɛ lo.” Kangɔ nwã alengbi ngandó ti lingɔ ya, ndasewa ni zu sɛ ati na mangbi ti kpengbani na légé ti libala mɛ atongbi ala. Mangbi ni nga na lingɔ ya andasewa ni zu sɛ adu na zangbingɔ ka popo tɛrɛ la na ngoi ti pɛnɔ. Kangɔ nwã ndo fandó ya, nyi wali, ati ya zo, wa ta kumba ti kãngɔ lo ná ti batangɔ lo adi dɛ tɛ to lo ma, kanda ati tɛ kɔli mɛ na dungɔ na lo.

Ta kangɔ nwã na pɛko wali ando fandó ya, wali du ye mɛ alengbi ti vɔ̃ngɔ lo bere kangɔ lo ma. Buku kɔi Les institutions de l’Ancien Testament atɛnɛ ya: “Ka tɛ aya Izraɛlɛ, ndia ti kangɔ nwã na pɛko wali bere hɛ̃ngɔ aye mɛndɛ̃ mɛ alengbi na kangɔ nwã na pɛko wali ndo lindó ma bere vɔ̃ngɔ ye. Kanda ta [kangɔ nwã] adu vɔ̃ngɔ wali ma, ni du ye mɛ ahɛ̃ ndasewa tɛ wali na lo ti libala mɛ lo ga lo li.”

Ndɛ lo mɛ ko, kaya akɔdɔrɔ mɛndɛ̃ azi dɛ tɔndɔ kutimɛ ti kangɔ nwã na pɛko wali. Na ngoi mɛ awa dũngɔ ayangambi mɛ awakristo ndɔ yɔ nwã ti pɛko nyi la ko, ayɔ ya, “ta ala du awa kakulu lo ma,” na yɔngɔ aye mɛ aɔ nyɔ kpɔ̃ ni. (Fil. 4:5; 1 Kɔr. 10:32, 33) Lingɔ ngaso na fangɔ ya, ta ala du azi mɛ na “gwɛ̃ faranga,” bere awa kota bɛ ma. (2 Tim. 3:2) Se ta awa dũngɔ ayangambi mɛ awakristo ayɔ aye mɛ aɔ nyɔ̃ kpɔ̃ni ma ko, ni na lingɔ ya, ta kɔli mɛ aye dungɔ na nyi la, adiri na bi ti libala gesi bo na lo ti gingɔ nwã ti kangɔ pɛko nyi la ma. Se ala li ngaso ko, ta na yɔngɔ nga ya, kɔli mɛ aye dungɔ na wali azia kwa tɛ lo ti wa sungɔ lége na lo ti gingɔ aye mɛ aɔ nyɔ̃ kpɔ̃ni mɛ ayɔ ka ti lo so kangɔ na pɛko ya lo ma.

Kaya akɔdɔrɔ mɛndɛ̃, leta la ndo kpã falanga ti talɛ mwa. Se adu ngaso ko, ayɔ ya awa dũngɔ ayangambi mɛ awakristo atɔndɔ ndia niko. Na lo nɛ? Na lo mɛ ya, Tɛnɛ tɛ Nzapa pa hɛ̃ awakristo ya, ala “bi tɛrɛ [la] hɛ̃ gbia tɛ leta” wa ala tɔndɔnga ndia mɛ ta ni ko nyɔ̃ ndia tɛ Nzapa ma.​—Rom. 13:1; Aw. 5:29.