1-2. (a) Na bangɔ Masese 16:31, ngasia la, elengbi ti bangɔ ayata e ti mbilimbili mɛ ati abange nɛ? (b) Ahũnda mɛ e na hɛ̃ngɔ gbinya ni ndɛ so ya tɛnɛ mɛ nɛ?

KAYA Arkansas parkɛ kɔi ti kotani mɛ ka États-Unis ko, akpã adiama mɛ ta a lɛkɛ tɛrɛ ni ma so yangondo, atãnga ni nga ka bɛ sese. Ni la azi gba mɛ ndo gwe ka parkɛ ni ndo hũ adiama ni, kanda ta la ndo hĩnga ya ni du tɛnɛ kɔi ti ngbondoni ma, ta ala ndo kipe nga ni ma.

² Ni nga ngaso na lo tɛ ayata e mɛ ati abange, ala mabere adiama niko, ala na valɛrɛ gba. Tɛnɛ tɛ Nzapa ndo haka swe ko ka li la mabere kpɔtɔ ti ndima. (Di Masese 16:31; 20:29) Kanda ngoi mɛndɛ̃ alengbi dungɔ woni ya, ta e hũ ala na valɛrɛ ma. Se apalanga hĩnga valɛrɛ mɛ abange na ni ko, ala na luangɔ na mbage tɛ la anzɔ̃ kpale gba mɛ aɔ bozwi ti mi. Na ya tɛnɛ mɛ ndɛ e na mandangɔ, e na hɛ̃ngɔ gbinya na ndo ahũnda taa: Nda mɛ Yehova ndo hũ awa kwa tɛ lo ti mbilimbili mɛ ati abange ya, ala du ngbondoni ka lɛ lo nɛ? Nda mɛ ayata kɔli ná ayata wali mɛ ati abange adu ngbondoni ge ya linɔ tɛ Yehova nɛ? Aye mɛ elengbi ti lingɔ ti nɛngɔ ya, e lua anzɔ̃ kpale gba na lo ti experiãsɛ mɛ ala na ni nɛ?

3. Na bangɔ Nzembo 92:12-15, nda mɛ abange mɛ mbilimbili adu ngbondoni ka lɛ Yehova nɛ?

³ Abange ti mbilimbili adu ngbondoni ka lɛ Yehova Nzapa. Lo hĩnga ala nzɔ̃ni, wa lo ndo hɛ̃ nga la ndima na lo ti seliye tɛ la ti nzɔ̃ni. Lo ndo ma dengɔ bɛ na ngoi mɛ abange ndo hɛ̃ apalanga ndara mɛ ala lua na ya kwa tɛ lo. (Yb. 12:12; Mas. 1:1-4) Seliye tɛ la ti gbengɔ bɛ adu ngbondoni ka lɛ Yehova. (Mal. 3:16)  Ta la zangandó tengbingɔ na kpengba kpale na ya dungɔ lɛ ngɛ̃́ tɛ la ma, kanda ta loyengɔ tɛ la na mbage tɛ Yehova a nzɛ̃ndó ma. Nzɔ̃ dangɔ bɛ tɛ la na ndo bi mɛ na gangɔ ati kpengbani aɔ se mɛndó ala na ni na ngoi mɛndó ala banda mandangɔ mbilimbili fãnani. Yehova ndo ye ala na lo mɛ ya, ala ngbã bo lá kwɛ pangɔ ili lo hɛ̃ azi “abɛse ala ti abange.”​—Di Nzembo 92:12-15.

4. Ye mɛ alengbi ti sangɔ ngunu bɛ ayata kɔli ná ayata wali mɛ ati abange nɛ?

⁴ Se du ya mɔ ti bange ko, hĩnga ya Yehova ndo da bɛ lo na kwa mɛndó mɔ li hɛ̃ lo. (Aeb. 6:10) Mɔ hɛ̃ndó tɛrɛ mɔ na ge ge ge zu na ya kwa ti fangɔ tɛnɛ, lo ndo da bɛ lo na ni, wa ni ndo hɛ̃ lo dengɔ bɛ gba. Mɔ gbendó bɛ mɔ na ya akpengba kpale​—ambanga kpale mɛndɛ̃ afandó bɛ mɔ na kã​—mɔ tɔndɔndó wa mɔ kambisa ngandó andia ti ya Ngbangɔ hɛ̃ azi, mɔ lindó akumba gba. Mɔ hɛ̃ ngandó azi mɛndɛ̃ fɔrmasiɔ̃. Mɔ li nga zu mɛ mɔ lengbi ti lingɔ ti salelangɔ akpale zu mɛ agbinyangbi ge ya linɔ tɛ Yehova. Mɔ sa ngandó ngunu bɛ azi mɛndɛ̃ mɛndó ahɛ̃ tɛrɛ la na ya kwa ti ngoi zu. Yehova Nzapa ndo ye mɔ mawoma na lo mɛ ya, mɔ ngbã mbilimbili na mbage tɛ lo. Lo tɛnɛ ya, “ta ni na ziangɔ azi tɛ ni ti mbilimbili ma!” (Nz. 37:28) Lo ko kapa hɛ̃ mɔ ya: “Tee ka kwa li mɔ ati swe, mbi na ngbãngɔ bo lá kwɛ yɔngɔ mɔ.” (Yis. 46:4) Ni la, ta mɔ da bɛ mɔ ya, na lo mɛ ya mɔ ti bange ko, ta mɔ na kwa ti lingɔ kaya linɔ tɛ Yehova ma. Mɔ du ngbondoni nvɛ̃ni!

5. Aye ti ngbondoni mɛ ta bɛ ayata mɛ ati abange alengbi ti lingɔ na ni ma nɛ?

⁵ Ayata kɔli ná ayata wali mɛ ati abange, ala na aye gba mɛ ala lengbi ti lingɔ. Ta la dɛ na ngunu nga ma se ti uzu ma, kanda experiasɛ mɛ ala lua na ya dungɔ lɛ ngɛ̃́ tɛ la, adu ngbondoni sĩ. Yehova lengbi ti ngbãngɔ bo lá kwɛ salelangɔ ala na lége ndɛ̃ ndɛ̃ ndɛ̃, nga ma se mɛ se lɛlo tɛ azi mɛndó ali kwa hɛ̃ Nzapa na ngoi ti gã nga na ti ngoi tɛ e mɛ ndɛ e manda afa na ni.

6-7. Hɛ̃ lɛlo ti ya Ngbangɔ mɛ afa se mɛ azi mɛ ati abange aluandó anzɔ̃ sulu na lo ti kwa ti mbilimbili mɛ ala li hɛ̃ Yehova.

⁶ Ngbangɔ na andakisa ti nzɔ̃ni tɛ azi ti mbilimbili mɛ ala le kwa hɛ̃ Yehova tee mɛ ala ti abange. E mu ndakisa tɛ Moizɛ, ngoi mɛndó  Yehova pɔna lo ya lo ti prɔfeta wa lo kamba nga aya Izraɛlɛ ko, lo ndó na bulu 80. Wa prɔfeta Daniɛlɛ lo gbã bondó mungɔ tɛnɛ ka nyɔ Yehova tɛnɛngɔ hɛ̃ azi, ngoi mɛndɛ̃ lo ndó na bulu ɔngɔ 90. Ngoi mɛndɛ̃ Toma Yoanɛ ngandó na bulu ɔngɔ 90 na ngoi mɛndó lo su Buku ti Suma na lége Nyingɔ vurú tɛ Nzapa.

⁷ Ambanga azi mɛndɛ̃ ti mbilimbili gba mɛ ta atɛnɛ tɛnɛ tɛ la ma, bere ta ala hĩngangbi gba ma da, wa ta azi lengbi ngandó ti kpãngɔ lɛ la ndo la ma. Kanda Yehova hũndó ala, lo hɛ̃ ngandó la mbana gɛrɛ. E mu lɛlo kɔi, ta Ngbangɔ tɛnɛ tɛnɛ gba na ndo Simeona mɛndó “bɛta zo, lo ndotɔndɔ ndo Nzapa sĩ” ma, kanda, Yehova hĩngandó mbilimbili tɛ lo, lo hɛ̃ ngandó lo nzɔ̃ tangɔ ligɛlɛ ti hũngɔ Yezo na ngoi mɛ lo dɛ bebe, nga na hɛ̃ngɔ prɔfesi mɛ aba nyingambi niko ná ta lo. (Luka 2:22, 25-35) Binga nga li mɔ na ndo tɛnɛ tɛ prɔfeta ti wali Anna. Lo ndó na bulu 84 lo ngandó wɛ mwa, kanda “lo ndonɔ ndo lá kwɛ lá kwɛ kaya kota da Nzapa.” Yehova hɛ̃ ngandó lo mbana gɛrɛ na ndenge mɛ lo lua ngandó nzɔ̃ tangɔ ligɛlɛ ti hũngɔ Yezo na ngoi mɛ lo dɛ bebe. Simeona ná Anna adundó ngbondoni ka lɛ Yehova.​—Luka 2:36-38.

8-9. Ye mɛ nyita wali kɔi li na ya linɔ tɛ Yehova na ngoi mɛndó lo ti we mwã nɛ?

⁸ Ndɛ nga na ngoi tɛ e ko, ayata kɔli ná ayata wali gba mɛ ati abange, ala du se lɛlo nzɔ̃ni na lo tɛ apalanga. E tɛnɛ tɛnɛ tɛ nyita wali Loïs Didur. Lo ndó na bulu 21 na ngoi mɛ lo banda lingɔ kwa ti wa sungɔ lége ti kotani ka Canada. So pɛni lo du na kɔli, wa lo ná kɔ lo John alindó kwa pɛ bulu gba na ya kwa ti bangɔ ndo kɛlɛ kɛlɛ. Na gesi, ala lindó kwa ka Bethel ti Canada ɔngɔ bulu 20. Ngoi mɛndó Loïs ti na bulu 58 ko, lo na John luandó kumba ti gwengɔ lingɔ kwa ka Ukraine. Ye mɛndó ala lengbi ti lingɔ nɛ? Ala tɛnɛndó ya, ani ti akangba ta ani lengbi ti gwengɔ lengɔ kwa ka kɔdɔrɔ mɛndɛ̃ ma? Ala yendó kumba ni, wa John li ngandó kwa ka Kɔmite ti Filialɛ ti kɔdɔrɔ niko. Bulu 7 so pɛni John kpĩndó, kanda Loïs mundó ekateli ti ngbãngɔ bo lingɔ kwa ka Ukraine. Ndɛ lo mɛ ko, lo na bulu 81, Loïs ngbã bo kɔi tɛ ayata mɛ ndo li kwa ka Bethel ti Ukraine. Lo ngbã nga lá kwɛ kpengbani na ya kwa tɛ Yehova, wa lo nga ngbondoni kaya ndasewa ti Bethel

⁹ Nga ma tɛ Loïs, ngoi mɛndɛ̃, ta azi ndo kpã lɛ la na ndo ayata wali mɛ na olo ala ti awe mwa ma, kanda ta na lo mɛ ya ala du awe mwa la ta ala di dɛ na tina ma. Yehova ndo hɛ̃ ndima gba hɛ̃ ayata wali niko mɛndó ahɛ̃ ti la hɛ̃ a kɔ la na pɛ abulu gba, wa ala ndo ngbã nga lá kwɛ lingɔ kwa hɛ̃ lo na ge ge ge. (1 Tim. 5:3) Ala du azi mɛ ndo sa ngunu bɛ apalanga.

10. Nzɔ̃ ndakisa mɛ Tony zia hɛ̃ e nɛ?

¹⁰ Abange ti mbilimbili mɛ kaya da tɛ abange, ala nga ngbondoni. Na ndakisa, nyita kɔli kɔi mɛ ili lo la Tony, lo mundó batisimɔ ka Pennsylvania mɛ ka États-Unis na Nzɛ ti Mwambe, na bulu ti 1942, lo ndó na bulu 20. Na lo  mɛ ya lo kɛ̃ndó lingɔ kwa ti soda ko, abindó lo ka bɔlɔkɔ wa lo lindó kai bulu 2 na ndambu. Lo ná ya lo Hilda, ala kãndó ayangambi sɛ kaya mbilimbili. Aɔ abulu gba, Tony lindó kwa mɛ ndɛ e ndo ili ni ya, wa bangɔ ndo kwa tɛ abiazi ti ya bombi kaya abombi ndɛ̃ ndɛ̃ ndɛ̃ taa, lo li ngandó kwa mabere wa bangɔ ndo kɛlɛ kɛlɛ. Lo lua ngandó kumba ti tambwisangɔ bombi nga na mandangɔ na azi Ngbangɔ ka da bɔlɔkɔ. Lo na olo na bulu 98, ta Tony zia lingɔ kwa tɛ Yehova ma. Lo ndo li zu mɛ lo lengbi ti lingɔ na ya kwa tɛ Yehova, wa lo ndo li kwa hɛ̃ Yehova ndoni kɔi na ayata kɔli ná ayata wali ti ya bombi tɛ lo!

11. Ngasia la elengbi ti fangɔ ya, e ndo kpã likebi tɛ e na ndo abange ko ndo du ka da tɛ abange nɛ?

¹¹ Ngasia la, elengbi ti fangɔ na ayata kɔli ná ayata wali mɛ ati abange mɛ ndo du ka da tɛ abange ya, ala du ngbondoni nɛ? Se alengbi, abiazi alengbi ti zangɔ ala ya, ala landa bombi bere, ala hɛ̃ ti la na kpale mɛ aba bombi. Elengbi nga ti fangɔ ya, e ndo kpã lɛ e na ndo la na lége ti gwengɔ bangɔ ala bere tɛnɛngɔ tɛnɛ na la na lége ti video. E ye kpãngɔ likebi tɛ e nvɛ̃ni na ndo abange mɛ ngoi mɛndɛ̃ ala ndo du kaya da tɛ abange mɛ ni du yɔngɔrɔ ni na bombi tɛ ala. Se ta e kpã likebi tɛ e na ndo la ma ko, bɛ e na lingɔ na la. Ngoi mɛndɛ̃ ambage ni ka popo tɛrɛ la, ta ala ndo ye kambisangɔ tɛnɛ mɛ aba la ma, bere ala ndo hũ nga ni siɔni. Kanda ala na sangɔ ngunu bɛ e nvɛ̃ni gba, se e mu ngoi ti hũndangɔ ala na ndo wa e ma ala kambisa tɛnɛ mɛ aba dengɔ bɛ mɛ ala lua na ya kwa tɛ Yehova.

12. Nzɔ̃ kpale mɛ elengbi ti luangɔ ka tɛ ayata kɔli ná ayata wali ti ya bombi mɛ ati abange nɛ?

¹² Se e hĩnga abange ti ya bombi tɛ e nzɔ̃ni ko, ngoi mɛndɛ̃, e na kamwangɔ na hĩngangɔ ya, ala du se lɛlo ti nzɔ̃ni mɛ aba dungɔ na loyengɔ. Nyita wali kɔi mɛ ili lo la Harriette lo lindó kwa hɛ̃ Yehova na mbilimbili na ya abulu gba kaya bombi tɛ la mɛ ka New Jersey mɛ ka États-Unis. Bi kɔindó ko, lo dirindó ka tɛ nyi lo ti wali. Ayata ti ya bombi ti fãnani mɛ lo gwe ka da, amundó ngoi gba ti nɛngɔ ya ani hĩngangbi na lo, wa ala hũndó ya, lo du ngbondoni nvɛ̃ni. Lo sandó ngunu bɛ la, lo kpɔndó pandɛ ti akpale mɛ lo tengbi na ni na ya kwa ti fangɔ tɛnɛ na ya bulu ti 1920 mɛndó lo hĩnga mbilimbili. Na ya bulu niko ko, ngoi mɛndó lo ndo gwe kwa ti fangɔ tɛnɛ ko, lo ndo gwe na kɛ ngu tɛ lo ti kpongɔ na yanga lo, ti nɛngɔ ya ngoi mɛndɛ̃ se agbɔ̃ ni ko, aza ni. Ni du biani, na 1933 lo lindó bɔlɔkɔ fãni sɛ. Na ya ngoi ni ko zu ko, kɔ lo mɛ ta lo Tɛmwɛ tɛ Yehova ma mɛndó ndo za lo, lo ndó la ndo bata ayangambi tɛ la taa mɛ apalanga. Ti biani ko, ayata e mɛ ati abange mɛ adu anzɔ̃ lɛlo ti mbilimbili mabere se tɛ Harriette, ayɔ ya e ndo hɛ̃ la ndima!

13. Aye mɛ ndo li ya, ayata kɔli ná ayata wali mɛ ati abange adu ngbondoni nvɛ̃ni ge ya linɔ tɛ Yehova nɛ?

¹³ Ayata e ti kɔli ná ti wali mɛ ati abange ala du ngbondoni nvɛ̃ni ka lɛ Yehova nga na linɔ tɛ lo. Ala hũndó ndenge mɛ Yehova sulu na linɔ tɛ lo na ya akpale ndɛ̃ ndɛ̃ ndɛ̃ nga na anzɔ̃ sulu mɛ ala nvɛ̃ni lua. Wa ala lua nga awangɔ ti ngbondoni na ndo yungɔ ndo tɛ ala nvɛ̃ni. Ni la, e hũ ala mabere “ndo ti ndara tɛ e,” wa e manda nga akpale ka tɛ la. (Mas. 18:4) Se e mu ngoi gba ti nɛngɔ ya, e du ndoni kɔi na ala ko, loyengɔ tɛ e na tingɔ kpengbani, wa e nga na mandangɔ akpale gba ka tɛ la!

14. Ye mɛ Kolimbola Mibeko 32:7 asa ngunu bɛ e ya, e li nɛ?

¹⁴ Mu ngoi ti tɛnɛngɔ tɛnɛ na ayata kɔli ná ayata wali mɛ ati abange. (Di Kolimbola Mibeko 32:7.) Ti bɛta kpale ko, ngoi mɛndɛ̃ ta la dɛ hũ ndo nzɔ̃ni ma, ta la dɛ nɔ̃ nga nɔ̃ na seni ma bere ta ala dɛ na ngunu ti tɛnɛngɔ tɛnɛ gba  ma, kanda ala bo lá kwɛ kpengbani na ya nyingɔ, ala nga na “ila ti nzɔ̃ni” ka tɛ Yehova. (Mos. 7:1) Da bɛ mɔ na nda mɛ Yehova ndo hɛ̃ la ndima. Ngbã nga lá kwɛ ti hɛ̃ngɔ ala ndima. Du mabere Elisha. Lo babandó dungɔ dã na Eliya na bi ti ndani mɛndó ala du ndoni kɔi. Elisha tɛnɛndó hɛ̃ Eliya fãni taa ya: “Ta mbi na ziangɔ mɔ ma.”​—2 Ba. 2:2, 4, 6.

15. Ahũnda mɛ elengbi ti hũndangɔ na ayata mɛ ati abange nɛ?

¹⁵ Fa na ayata mɛ ati abange ya, mɔ ndo kpã likebi tɛ mɔ nvɛ̃ni na ndo ala na hũndangɔ ala na ndo na ndenge ti nzɔ̃ni. (Mas. 1:5; 20:5; 1 Tim. 5:1, 2) Hũnda la na ndo mɛ: “Ngoi mɛndó mɔ dɛ palanga, ye mɛndó ato mɔ, mɔ ye ya, mɔ na ya mbilimbili nɛ?” “Ye mɛndó mɔ li ti nɛngɔ ya, mɔ du dã na Yehova nɛ?” “Na ndenge mɛ mɔ hũ na ni, aye mɛ zo li ti nɛngɔ ya, lo ngbã lá kwɛ lingɔ kwa hɛ̃ Yehova na dengɔ bɛ nɛ?” (1 Tim. 6:6-8) Wa na ngoi mɛ lo ndo kpɔ pandɛ ti dungɔ lɛ ngɛ̃́ tɛ lo ko, ma lo na likebi zu.

16. Nzɔ̃ kpale mɛ tɛnɛngɔ tɛnɛ ka popo tɛ zo mɛ bange ná palanga alengbi ti hɛ̃ngɔ ala zu sɛ nɛ?

¹⁶ Ngoi mɛ palanga ná bange ndo tɛnɛ tɛnɛ ka popo tɛrɛ la ko, ala ndo sangbi ngunu bɛ la. (Rom. 1:12) Mɔ na hũngɔ ya, Yehova ndo bata awa kwa tɛ lo ti mbilimbili, wa bange nga na hũngɔ ya, ando hɛ̃ ni ndima. Lo nga na sepalangɔ kambisangɔ anzɔ̃ sulu mɛ lo lua na ya kwa tɛ Yehova.

17. Nda mɛ elengbi ti tɛnɛngɔ ya, nzɔ̃ tɛrɛ tɛ ayata e mɛ ati abange ndo ti bo nzɔ̃ni bulu na bulu nɛ?

¹⁷ Se bulu tɛ zo ndo ti gba ko, nzɔ̃ tɛrɛ tɛ lo so wɛ yɛkɛ yɛkɛ, kanda azi ko ndo ngbã mbilimbili ka tɛ Yehova ko, ala di ndo ti na nzɔ̃ tɛrɛ ka lɛ lo bulu na bulu. (1 Tɛs. 1:2, 3) Nda mɛ e tɛnɛ ngaso nɛ? Na lo mɛ ya, na ya abulu mɛ ala li, ala ziandó ya, Nyingɔ tɛ Nzapa abongisa ala, adɔ nga ala na nɔ̃. Se e manda hĩngangɔ ayata kɔli ná ayata wali mɛ abange, e hɛ̃ nga la ndima, wa e manda nga akpale ka tɛ la ko, e na hĩngangɔ nda mɛ ala du ngbondoni sĩ!

18. Tɛnɛ mɛ e na mandangɔ na pɔsɔ ti gesi nɛ?

¹⁸ Ta bombi alengbi bo ti maingɔ na lo mɛ ya, apalanga ndo hɛ̃ abange ndima ma, kanda alengbi ti maingɔ se du ya, abange ndo hɛ̃ nga apalanga ndima. Na pɔsɔ ti gesi, e na tɛnɛngɔ tɛnɛ na ndo se mɛ abange alengbi ti fangɔ ya, ala ndo hɛ̃ apalanga ndima ge ya bombi.