1. Na ngoi mɛ abi zo kɔi ti ndasewa gigi, azi mɛndɛ̃ ndo ma tɛrɛ la ngasia?

ZO KƆI mɛ mɔ ndo ye lo gba azia vɔrɔngɔ Yehova? Ni du ye mɛ ando hɛ̃ sɔngɔ bɛ gba! Nyita wali Hilda atɛnɛ ya: “Mbi na kɔ mbi e lindó bulu 41 kaya libala, na gesi lo kpindó, mbi hũndó ya, ni la du ye ti pɛnɔ nvɛ̃ni mɛ mbi tengbi na ni. * Kanda na ngoi mɛndó abi nyi mbi ti kɔli gigi, lo zia nga ya lo ná ayangambi tɛ lo ko, ni di dundó kota pɛnɔ nvɛ̃ni na lo tɛ mbi.”

2-3. Na bangɔ Nzembo 78:40, 41, Yehova ndo ma tɛrɛ lo ngasia na ngoi mɛ awa kwa tɛ lo ndo zia vɔrɔngɔ lo nɛ?

² Binga li mɔ na ndo pɛnɔ mɛndó Yehova ma ka bɛ na ngoi mɛndó aangelo mɛndɛ̃ mɛ kaya ndasewa tɛ lo akɛ̃ tɛrɛ lo! (Yd. 6) Wa da nga bɛ mɔ na ndenge mɛndó Yehova ma pɛnɔ ka bɛ lo na ngoi mɛndó aya Izraɛlɛ mɛ lo ndo ye la gba, atɔmbɔgɔ tɛrɛ lo fãni gba. (Di Nzembo 78:40, 41.) Hĩnga ya, To e ti songo mɛ ka ndozu ndo ma nga pɛnɔ gba na ngoi mɛ zo kɔi mɛ mɔ ndo ye lo azia vɔrɔngɔ lo. Lo hĩnga pɛnɔ tɛ mɔ, lo na zangɔ mɔ, lo nga na wambangɔ bɛ mɔ.

³ Na ya tɛnɛ mɛ ndɛ e na mandangɔ, e na tɛnɛngɔ tɛnɛ na ndo aye mɛ elengbi ti lingɔ ti nɛngɔ ya, Yehova za e na ngoi mɛ zo kɔi mɛ e ndo ye lo gba azia vɔrɔngɔ lo. E nga na bangɔ se mɛ elengbi ti zangɔ azi ti ya bombi mɛ atengbi na pɛnɔ ti ngaso. Kanda ti uzu, zia e ba dangɔ bɛ ti siɔni mɛ ayɔ ya, e kɛ̃ ni.

4. Awa dũngɔ ayangambi gba ndo ma tɛrɛ la ngasia na ngoi mɛ ayangambi tɛ la ndo zia vɔrɔngɔ Yehova nɛ?

⁴ Ngoi mɛ nyi la ti kɔli bere ti wali azia vɔrɔngɔ Yehova ko, awa dũngɔ lo ndo hũnda tɛrɛ la na ndo, na ndo ye mɛ ale ala li ti nɛngɔ ya, lo ngbã ge ya mbilimbili. Na pɛ bingɔ nyi lo gigi, nyita  Luka atɛnɛ ya: “Mbi ndo hɛ̃ndó tɛrɛ mbi fotɛ. Mbi ndo hũ ngandó asuma. Ngoi mɛndɛ̃ mbi ndo to ngandó to na ya nzɛ̃ngɔ.” Nyita wali Élizabeth, mɛ atengbi ngandó na kpale ti ngaso ko, ta lo ndo ziandó hũndangɔ tɛrɛ lo ya: “Mbi ndó siɔ ta? Mbi ndo tɛnɛ ngandó ya, ta mbi lindó ye mɛ alengbi ti nɛngɔ ya, mbi ha na nyi mbi mbilimbili ma.”

5. Ngoi mɛ zo kɔi ndo zia vɔrɔngɔ Yehova, ando du fotɛ tɛ na?

⁵ Ta bɛ mɔ li na ni ma ya, Yehova hɛ̃ zo na zo lége ti pɔnangɔ ye mɛ lo ye lingɔ. Ni fa ya, elengbi ti pɔnangɔ tɔndɔngɔ lo bere ta e tɔndɔ lo ma. Apalanga mɛndɛ̃, ta ala luandó ato ná ata mɛ azia hɛ̃ la se lɛlo ti nzɔ̃ni na omɛ aba vɔrɔngɔ Nzapa ma. Abɛse ngaso ko, ala nvɛ̃ni mundó ekateli ti vɔrɔngɔ Yehova, wa ala nga na dungɔ lɛ ngɛ̃́ ti dengɔ bɛ na ya kwa tɛ lo. Ambɛge ni aluandó ato ná ata mɛndó ala li zu mɛ alengbi ti nɛngɔ ya, ala ha na ayati la andia ti ya Ngbangɔ, kanda na ngoi mɛndó ala ti akangba ko, ala dɔndó vɔrɔngɔ Yehova azia. Biani, zo na zo la na pɔnangɔ vɔrɔngɔ Yehova bere ta vɔrɔngɔ lo ma. (Yos. 24:15) Na lo ni la, awa dũngɔ ayangambi, ĩ zia hɛ̃ngɔ tɛrɛ ĩ fotɛ na ngoi mɛ ayati ĩ azia vɔrɔngɔ Yehova!

6. Palanga lengbi ti mangɔ tɛrɛ lo ngasia na ngoi mɛ to lo bere ta lo azia vɔrɔngɔ Yehova nɛ?

⁶ Ngoi mɛndɛ̃, to bere ta ndo zia mbilimbili, wa lo dɔ nga azi ti ndasewa tɛ lo, lo zia. (Nz. 27:10) Ni lengbi ti dungɔ siɔni nvɛ̃ni na lo tɛ ayangambi mɛ ala ndo hũ awa dũngɔ ala mabere se lɛlo ti nzɔ̃ni mɛ ala lengbi ti landangɔ. Esther mɛndó abi to lo gigi atɛnɛ ya: “Mbi ndo tondó to gba, na lo mɛ ya, mbi hĩnga ya, ta to mbi ati bondó yɔngɔrɔ ni na mbilimbili ma. Lo nvɛ̃ni la, lo pɔna ziangɔ vɔrɔngɔ Yehova. Mbi ndo ye to mbi gba. Na ngoi mɛndó abi lo gigi ko, bɛ mbi ndo sɔndó ngoi zu na lo tɛ lo. Mbi ti ngandó na ngã na lo tɛ lo.”

7. Yehova ndo ma tɛrɛ lo ngasia na lo tɛ ayangambi mɛ awa dũngɔ la azia vɔrɔngɔ lo nɛ?

⁷ Ayangambi, se kɔi ka popo tɛ awa dũngɔ ĩ azia vɔrɔngɔ Yehova ko, e ayata ĩ, e ndo ma nga pɛnɔ gba na lo tɛ ĩ! Wa ĩ hĩnga ya, Yehova hĩnga pɛnɔ tɛ ĩ nzɔ̃ni. Lo ndo ye ĩ, lo ndo ma nga dengɔ bɛ gba na lo ti mbilimbili tɛ ĩ, e ayata ĩ e ndo ma nga ngaso na lo tɛ ĩ. Ĩ hĩnga ya, ta ĩ la ĩ du agbia ti ekateli tɛ awa dungɔ ĩ ma. Mabere se ko e lo ti mandangɔ na ni, Yehova ndo zia zo na zo ya, lo pɔna. Wa zo kɔi na kɔi ko la, ahɛ̃ tɛrɛ lo hɛ̃ Yehova wa lo mu nga batisimɔ ko, lo “nvɛ̃ni la na yɔngɔ kumba tɛ lo, NWT.”​—Gal. 6:5.

8. Na ngoi mɛ mɔ ndo kũ ya, zo ti ndasewa tɛ mɔ mɛ azia vɔrɔngɔ Yehova adiri, ye mɛ mɔ lengbi ti lingɔ nɛ? (Ba Ãkadre “ Diri ka tɛ Yehova.”)

⁸ Se zo mɛ mɔ ndo ye lo gba azia vɔrɔngɔ Yehova ko, ta adu siɔni dungɔ na dangɔ bɛ ya, bi kɔi gbanda, lo na diringɔ vɔrɔngɔ Yehova ma. Na ngoi mɛ mɔ ndo kũ ya lo diri, ye mɛ mɔ lengbi ti lingɔ nɛ? Li zu mɛ mɔ lengbi ti lingɔ ti nɛngɔ ya, mɔ bata loyengɔ tɛ mɔ kpengba ni. Se mɔ li ngaso ko, mɔ na dungɔ nzɔ̃ lɛlo na ndombali azi ti ndasewa tɛ mɔ, ngoi mɛndɛ̃ nga na lo tɛ zo mɛ azia vɔrɔngɔ Yehova. Ni na hɛ̃ngɔ mɔ ngunu ya, mɔ nwɔ pɛnɔ tɛ mɔ. Zia e ba ambanga aye mɛndɛ̃ mɛ mɔ lengbi ti lingɔ ti nɛngɔ ya, loyengɔ tɛ mɔ angbã kpengbani.

9. Ye mɛ mɔ lengbi ti lingɔ ti nɛngɔ ya, loyengɔ tɛ mɔ angbã kpengbani nɛ? (Ba Ãkadre “ Avɛrse mɛ alengbi ti sangɔ ngunu bɛ mɔ, se zo ti ndasewa tɛ mɔ azia vɔrɔngɔ Yehova.”)

⁹ Li aye zu mɛ mɔ lengbi ti lingɔ ti nɛngɔ ya, loyengɔ tɛ mɔ angbã kpengbani. Adu nvɛ̃ni ngbondoni ya, mɔ ngbã lá kwɛ lingɔ ya loyengɔ tɛ mɔ ná tɛ azi ti ndasewa tɛ mɔ angbã kpengba ni. Mɔ lengbi ti lingɔ ni ngasia? Ngbã lá kwɛ dingɔ Ngbangɔ, bingangɔ li mɔ na ndo tɛnɛ ni nga na gwengɔ bombi tɛ awa kristo ti nɛngɔ ya, mɔ lua ngunu mɛ alo ka tɛ Yehova. Joanna, mɛndó to lo ná nyita lo ti wali azia mbilimbili atɛnɛ ya: “Mbi ndo lua nvɛ̃ni siriri ti bɛ na ngoi mɛ mbi ndo di tɛnɛ ti dungɔ lɛ ngɛ̃́ tɛ azi mɛ Ngbangɔ tɛnɛ tɛnɛ tɛ la, mabere Abigail, Esther, Yobo, Yozɛfɛ, ná Yezo. Se lɛlo tɛ la ndo sa ngunu bɛ mbi, ni ndo za nga mbi ya, mbi du na dangɔ bɛ ti nzɔ̃ni. Abia tɛ e ti fãnani ndo sanga ngunu bɛ mbi.”

10. Na bangɔ Nzembo 32:6-8 ye mɛ elengbi ti lingɔ ti nɛngɔ ya, e gbe bɛ e na ndo pɛnɔ tɛ e nɛ?

¹⁰ Tɛnɛ sɔngɔ bɛ tɛ mɔ zu hɛ̃ Yehova. Na ngoi mɛ sɔngɔ bɛ aɔ ndo mɔ ko, li sambela hɛ̃ lo ngoi zu. Vɔrɔ tɛrɛ mɔ hɛ̃ Nzapa tɛ e ti songo ya, lo za mɔ, mɔ ba kpale ni nga ma se mɛ lo ndo ba na ni, wa hũnda lo ya, “lo li ya, mɔ ti kpengbani, lo ha nga mɔ na lége mɛ mɔ lengbi ti gwengɔ na ni.” (Di Nzembo 32:6-8.) Biani, ngoi mɛndɛ̃ alengbi ti dungɔ pɛnɔ kambisangɔ hɛ̃ Yehova se mɛ mɔ ndo ma na tɛrɛ mɔ. Kanda hĩnga ya, lo hĩnga nvɛ̃ni pɛnɔ tɛ mɔ. Lo ye mɔ mawoma, wa lo yɔ nga ka ti mɔ ya, mɔ zi bɛ mɔ hɛ̃ ni.​—Kob. 34:6; Nz. 62:7, 8.

11. Na bangɔ Aebreo 12:11, nda mɛ ayɔ ya, e kpã bɛ e ka tɛ Yehova na ngoi mɛ lo hɛ̃ zo tumbu nɛ? (Ba Ãkadre “ Bingɔ zo gigi​—Ando fa songo tɛ Yehova na mbage tɛ e.”)

¹¹ Hɛ̃ ti mɔ na ekateli mɛ abiazi amu. Bingɔ zo gigi adu ebongiseli mɛ alo ka tɛ Yehova. Ngoi mɛ lo ndo lonzi zo mɛ ali siɔ kpale ko, lo  ndo li ni ngoi zu na songo. Lo ndo li ni na lo ti nzɔ̃ kpale tɛ zo mɛ ali siɔ kpale nga na lo ti nzɔ̃ kpale tɛ azi mɛndɛ̃. (Di Aebreo 12:11.) Ngoi mɛndɛ̃ alengbi ti dungɔ ya, azi mɛndɛ̃ ndo tɛnɛ siɔni na ndenge mɛ abiazi ali na kpale kɔi ngaso, kanda azi niko ndo ɔndɛ na sãna ambaga siɔ kpale mɛ zo niko li. Biani, ta e hĩnga akpale zu ma. Adu ye ti ndara yengɔ ya, abiazi ali zu mɛ ala lengbi ti lingɔ ti nɛngɔ ya, ala kpã andia ti ya Ngbangɔ na kwa, wa ala li nga kpengbani ti fangɔ ngbanga “na lo tɛ Yehova.”​—2 Nt. 19:6.

12. Ye mɛ nyita kɔli kɔi ná ya lo ahũ na ngoi mɛndó ala hɛ̃ ti la na ekateli ti tumbu mɛ nyingambi tɛ la lua nɛ?

¹² Se abi zo mɛ mɔ ndo ye lo gigi ko, mɔ lengbi ti zangɔ lo ya, lo diri ka tɛ Yehova, na hɛ̃ngɔ ti mɔ na ndo ekateli mɛ abiazi mu. Élisabeth mɛ fale e tɛnɛ tɛnɛ tɛ lo uzu, mɛndó abi nyi lo ti kɔli mɛ ati kangba gigi ko, atɛnɛ ya: “Adundó ye ti pɛnɔ kɛ̃ngɔ dũngɔ na mangbi na nyingambi tɛ e, kanda na ngoi mɛndó lo diri ge ya bombi ko, nyi e tɛnɛndó ya, bingɔ lo gigi adundó ekateli ti nzɔ̃ni. Lo di tɛnɛ ngandó ya, lo luandó awangɔ gba ti ngbondoni. Mbi lua ngandó wangɔ ya, tumbu tɛ Yehova ndo du bo lá kwɛ mbilimbili.” Kɔ lo Marc tɛnɛ nga ya: “Na gesi, nyingambi tɛ e atɛnɛndó hɛ̃ mbi ya, se ni dirindó ka tɛ Yehova ko, kpale ni gba alondó ka tɛ e, na lo mɛ ya, e fandó mangbi na lo. Mbi na dengɔ bɛ na lo mɛ ya, Yehova zandó e ti nɛngɔ ya, e tɔndɔ lo.”

13. Ye mɛ alengbi ti zangɔ mɔ ya, mɔ nwɔ sɔngɔ bɛ tɛ mɔ nɛ?

¹³ Kambisa songɔ bɛ tɛ mɔ hɛ̃ nyita mɛ mɔ ndo kpã bɛ mɔ ka tɛ lo. Du ndoni kɔi na ayata mɛ kpengbani na ya nyingɔ mɛ ala lengbi ti zangɔ mɔ ya, mɔ du na dangɔ bɛ ti nzɔ̃ni. (Mas. 12:25; 17:17) Joanna, mɛ fale e tɛnɛ tɛnɛ tɛ lo uzu, atɛnɛ ya: “Ka gbɛ bɛ mbi, mbi ndo hũndó ya, mbi ngbã mbi kɔi na bɛ mbi. Kanda kambisangɔ sɔngɔ bɛ tɛ mbi hɛ̃ ayata mɛ mbi ndo kpã bɛ mbi kɛ tɛ la, azandó mbi mawoma.” Wa ye mɛ mɔ lengbi ti lingɔ se ayata mɛndɛ̃ atɛnɛ tɛnɛ mɛ akpã pɛnɔ ndo pɛnɔ tɛ mɔ nɛ?

14. Nda mɛ ayɔ ya ‘e ngbã lá kwɛ gbengɔ bɛ e, e ka nga lɛ e na ndo siɔ ye’ mɛ ala li tɛrɛ e nɛ?

¹⁴ Du na yɔngɔrɔ bɛ na ndo ayata. Ti biani, ta elengbi ti kũngɔ ya, azi zu atɛnɛ bo tɛnɛ ti nzɔ̃ni hɛ̃ e ma. (Zk. 3:2) E zu, e du azi ti zangangɔ lengbingɔ, se ta azi mɛndɛ̃ ahĩnga tɛnɛ mɛ ala tɛnɛ hɛ̃ mɔ ma bere ala tɛnɛ tɛnɛ mɛ ahɛ̃ mɔ pɛnɔ zangangɔ ya ala hĩnga ni ko, ta mɔ kamwa ma. Da bɛ mɔ na wangɔ mɛ tɛ Toma Polo: “Se afɔ̃ ĩ ali ĩ siɔni ko, ĩ gbe bɛ ĩ, ĩ ka lɛ ĩ ndo siɔ ye mɛ ali tɛrɛ ĩ.” (Kɔl. 3:13) Nyita wali kɔi mɛ abi nyi lo ti kɔli gigi atɛnɛ ya: “Yehova zandó mbi ti nɛngɔ ya, mbi ka lɛ mbi ndo siɔ kpale tɛ ayata mɛndó ala ye lingɔ ye ti nzɔ̃ni tɛrɛ mbi, kanda ala lindó ni na ndenge ti zangangɔ lengbingɔ.” Zia e ba se mɛ ayata ti ya bombi alengbi ti zangɔ azi ti ndasewa mɛ angbã mbilimbili na mbage tɛ Yehova.

15. Ye mɛ elengbi ti lingɔ ti nɛngɔ ya, e za azi ti ndasewa mɛ abi zo ti ndasewa tɛ la gigi nɛ?

¹⁵ Fa songɔ ná nzɔ̃ bɛ na mbage tɛ azi mɛ abi zo ti ndasewa tɛ la gigi. Nyita wali kɔi mɛ ili lo  la Miriam atɛnɛ ya, na pɛ bingɔ nyi ta mbi ti kɔli gigi ko, “Mbi tindó na mbɛtɔ ti tɛnɛ mɛ ayata mɛndɛ̃ na tɛnɛngɔ. Kanda ayata mɛndɛ̃ a mandó vundu mɛ mbi na ni wa ta ala tɛnɛ ngandó tɛnɛ ti siɔni na lo tɛ nyita mbi ma. Na lo tɛ la ko, ta mbi hũndó ya, mbi ngbã mbi kɔi na ya pɛnɔ tɛ mbi ma.” Nyita wali mɛndɛ̃ tɛnɛ ya: “Ngoi mɛndó abi nyingambi tɛ e ti wali gigi ko, ayata agandó ti wambangɔ bɛ e. Ambɛge ni tɛnɛndó yangondo ya, ta ani hĩngandó tɛnɛ mɛ ani lengbi tɛnɛngɔ ma. E na la e tondó to ndoni kɔi, ambɛge ni ato ngandó mbeti hɛ̃ mbi so sangɔ ngunu bɛ mbi. Ye mɛndó ala li, alindó ya, mbi ma ya tɛrɛ mbi nzɔ̃ni!”

16. Ngasia la azi ti ya bombi alengbi ti ngbãngɔ lá kwɛ wambangɔ nga zangɔ azi mɛ abi zo ti ndasewa tɛ la gigi nɛ?

¹⁶ Ngbã lá kwɛ zangɔ azi ti ndasewa mɛ angbã mbilimbili. Na olo mɛ la, ala na gwɛ̃ ya mɔ fa songo na ala, wa mɔ sa nga ngunu bɛ la. (Aeb. 10:24, 25) Na mbanga ngoi, azi ti ndasewa tɛ zo mɛ abi lo gigi ndo hũ ya, ta ayata mɛndɛ̃ ti ya bombi di ndo ye singɔ ka tɛ la bere tɛnɛngɔ tɛnɛ na la ma, mabere abi nga ala gigi. Ta e zi lége ya, ye ti ngaso ali tɛrɛ lo ma! Ale e ndo hɛ̃ sia kɔli, e sa nga ngunu gba na bɛ apalanga ko la awa dũngɔ la azia vɔrɔngɔ Yehova. Maria, mɛndó abi kɔli gigi wa lo zia ngandó ndasewa tɛ lo atɛnɛ ya: “Ambɛge ayata ndo gandó ka yada tɛ mbi, ala ndo tɔndó ye ti tɛngɔ hɛ̃ mbi, ndo zangandó mbi na lingɔ sambela ti ndasewa. Ala mandó pɛnɔ mɛ mbi na ni, ala to ngandó to ndoni kɔi na mbi. Ala tindó kongba tɛ mbi na ngoi mɛndó azi mɛndɛ̃ atɛnɛ nvɛ̃nɛ na ili mbi. Ala sandó ngunu bɛ mbi nvɛ̃ni!”​—Rom. 12:13, 15.

17. Ye mɛ abiazi lengbi ti lingɔ ti nɛngɔ ya, ala wamba bɛ azi mɛ na pɛnɔ nɛ?

¹⁷ Abiazi, ĩ salela libaku zu mɛ ĩ na ni so sangɔ ngunu bɛ azi ti ndasewa mɛ angbã mbilimbili. Kumba ti wambangɔ bɛ azi mɛ zo tɛ la azia vɔrɔngɔ Yehova, adu uzu kumba tɛ ĩ. (1 Tɛs. 5:14) Ĩ mu ebongiseli ti sangɔ ngunu bɛ la uzu ti bombi bere na pɛ bombi. Ĩ ndo ĩ gwe ĩ ba la wa ndo ĩ li nga sambela ndoni kɔi la. Ĩ ndo ĩ si kwa ti fangɔ tɛnɛ ndoni kɔi na ala. Ĩ ili la ya, ala ga ĩ na la ĩ li sambela ti ndasewa ndoni kɔi. Abiazi mɛ kpengbani na ya nyingɔ alengbi ti fangɔ  na angasã gbaga tɛ Yehova mɛ ndo hũ pɛnɔ bɛ ti vundu, songo nga na kpãngɔ lɛ la na ndo ala.​—1 Tɛs. 2:7,8.

18. Na bangɔ 2 Petro 3:9, ye mɛ Yehova ye ya, azi mɛ azia vɔrɔngɔ lo ali nɛ?

¹⁸ Ta Yehova ye ya, “zo kɔi [akpi kwá, NWT] ma. Kanda lo ye tɛ lo ya, azi zu agbinya bɛ la.” (Di 2 Petro 3:9.) Abɛse du ya, zo li siɔ kpale ti kotani ko, dungɔ lɛ ngɛ̃́ tɛ lo bo ngbondoni ka lɛ Nzapa. Da bɛ mɔ na ye ti ngbondoni mɛ Yehova hɛ̃ ti nɛngɔ ya, lo tɔ̃ na dungɔ lɛ ngɛ̃́ tɛ azi ti siɔ kpale​—dungɔ lɛ ngɛ̃́ tɛ ngbongi Nyi lo. Na songo zu, Yehova ndo gi zangɔ azi mɛ azia vɔrɔngɔ lo ya, ala diri ka tɛ ni. Lo na dangɔ bɛ ya, ala na diringɔ ka tɛ ni nga ma se tɛ nyingambi ti kili kili mɛndó Yezo hɛ̃ ndakisa tɛ lo. (Lk. 15:11-32) Azi gba mɛndó azia mbilimbili ko, ala dirindó fãni mɛndɛ̃ ka tɛ To la ti ndozu mɛ wa songo. Wa ayata la ti ya bombi ayamba ngandó ala na dengɔ bɛ zu. Elizabeth, mɛ fa le e tɛnɛ tɛnɛ tɛ lo uzu ko, lo mandó dengɔ bɛ gba na ndenge mɛndó nyi lo diri kaya bombi. Na ngoi mɛ lo da bɛ lo na ngoi ni kondó ti pɛnɔ ko, lo tɛnɛ ya: “Mbi ndo hɛ̃ sia kɔli hɛ̃ ayata kɔli ná ayata wali zu mɛndó ala sa ngunu bɛ e ya, e bata nzɔ̃ dangɔ bɛ tɛ e.”

19. Nda mɛ ayɔ ya, e kpã bɛ e ka tɛ Yehova ngoi zu nɛ?

¹⁹ Elengbi ti kpãngɔ bɛ e ngoi zu ka tɛ Yehova. Ta lo ndo yɔ ka ti e ya, e li ye mɛ na hɛ̃ngɔ e pɛnɔ ma. Lo du To ti songo nga ti vundu mɛ lo ndo ye azi zu ko la ndo ye lo, wa ala ndo li nga kwa hɛ̃ lo. Hĩnga ya, ta lo na ziangɔ mɔ na ya ngoi ti pɛnɔ ma. (Aeb. 13:5, 6) Mark mɛ fa le e tɛnɛ tɛnɛ tɛ lo uzu atɛnɛ ya, “Ta Yehova ndo zia e bɛ fãni kɔi ma. Ta lo ndo du yɔngɔrɔ ni na e na ngoi mɛ e na kpengba kpale ma.” Yehova na ngbãngɔ lá kwɛ ti hɛ̃ngɔ mɔ “ngunu mɛ aɔ angunu zu, NWT.” (2 Kɔr. 4:7) Biani, mɔ lengbi ti ngbãngɔ mbilimbili, wa mɔ bata nga nzɔ̃ dangɔ bɛ tɛ mɔ, se zo kɔi mɛ mɔ ndo ye lo gba azia vɔrɔngɔ Yehova.