Hũnda tɛ awa dingɔ mbɛti

Atɛmwɛ tɛ Yehova ndo ye ya amonganga sara ani na lége ti aye ti yakere yakere mɛ ndo du kaya mɛnɛ̃?

Gbinya mɛndó ahɛ̃ kaya Linɔngi ti Sinzili ti 15 Nzɛ ti Mana 2000.

Gbinya ti kɔzoni du ya ta atɛmwɛ tɛ Yehova ndo ye ya adiri na mɛnɛ̃ tɛrɛ la ma. E ndo ye na bɛ e kɔi ya ta elengbi ti gbinyangbingɔ ndia tɛ Nzapa mɛ ba mɛnɛ̃ ti nɛngɔ ya alanda dangɔ bɛ tɛ azi mɛ ndo gbinyangbi ma. Kanda ahũnda mɛndɛ̃ dɛ na lo mɛ ya amonganga lengbi ti kangbingɔ aye ti ngbondoni siɔ mɛ ndo bombi ti mɛnɛ̃ wa ala lengbi nga ti kangbingɔ aye ti yakere yakere siɔ ti mɛnɛ̃. Ti nɛngɔ ya wakristo ye bere lo kɛ̃ yɔrɔ mɛ ali na aye niko ko, ta ayɔ bo ya lo kpã lɛ lo na ndo siɔ lo bere nzɔ̃ lo mɛ ni lengbi ti hɛ̃ngɔ lo ma. Ayɔ ya lo gi uzu hĩngangɔ tɛnɛ mɛ Ngbangɔ tɛnɛ, wa lo gi nga hĩngangɔ bere ekateli mɛ lo na mungɔ alengbi ti gbɛ̃ngɔ mangbi tɛ lo na Nzapa mɛ Nvɛ̃ Ngunu Zu.

Ta du pɛnɔ hĩngangɔ aye mɛ du ngbondoni ma. Ti nɛngɔ ya mɔ hĩnga nda mɛ e tɛnɛ ngaso ko, zia e ba apandɛ ti ya Ngbangɔ, alo mɛndó ɔ nga na lo mɛ ba sarangɔ tɛrɛ na lége tɛ amonganga.

Yehova Nzapa tɛnɛndó hɛ̃ Noa mɛ kotara e zu ya ayɔ ya lo hũ mɛnɛ̃ ya ni du ye kɔi mɛ ngbondoni nvɛ̃ni. (Ebandeli 9:3, 4) Na pɛ abulu gba, ndia mɛndó Nzapa hɛ̃ ndasewa ti Izraɛlɛ atɛnɛndó yangondo ya mɛnɛ̃ adu sãto, ni la Nzapa tɛnɛndó ya: “Se du ya zo ti Izraɛlɛ bere wa gangɔ mɛ ga du popo tɛrɛ la tɛ mɛnɛ̃ ko, . . . mbi na kɛ̃ngɔ tɔrɔ tɛrɛ zo niko.” Se zo ti Izraɛlɛ kɛ̃ tɔndɔngɔ ndia niko ko, lo lengbi nga ti gbɛ̃ngɔ azi mɛndɛ̃, ni la Nzapa di tɛnɛ ngandó ya: “Mbi na hãngɔ lo ka popo tɛ azi tɛ lo zingɔ.” (Balevi 17:10) Na bombi mɛndó ali tɛrɛ lo na ya siɛklɛ gba ka Yeruzalɛmɛ ko, atoma na abiazi amundó ekateli ya ‘ta e tɛ bere e nyɔ mɛnɛ̃ ma.’ Elengbi nga ti tɔndɔngɔ ndia niko nga ma se mɛ e ndo tɔndɔ na ndia mɛ ba lingɔ pite, tingɔ kɔmbɛ nga na vɔrɔngɔ ngbilondo.​—Awa Pangɔ Kwa 15:28, 29.

“Kɛ̃ngɔ,” alengbi na nɛ na ngoi niko ndó nɛ? Ta awakristo ndo tɛndó mɛnɛ̃ ma abɛse du ti fini bere omɛ atɔ ni tɔngɔ, ala ndo kɛ̃ ngandó tɛngɔ sa mɛ kpi na mɛnɛ̃ ya tɛrɛ lo, ni ye tɛnɛngɔ ya sa mɛ ta afa lɛ gɔ̃ ni ma. Ala lengbi ngandó ti kɛ̃ngɔ tɛ mɛ atɔ ni na mɛnɛ̃, nga ma bere boudin. Se zo tɛ mɛnɛ̃ na ndenge ti ngaso ko, lo ko nyɔ ndia tɛ Nzapa.​—1 Samwele 14:32, 33.

Na ngoi ti gã, ta bingangɔ li tɛ azi gba ndo giandó la na ndo lo mɛ ba tɛngɔ nga na nyɔ̃ngɔ mɛnɛ̃ ma, nga ma se mɛ elengbi ti hũngɔ na ni na ya tɛnɛ mɛndó Tertullien su (londó na dungɔ lɛ ngɛ̃́ na siɛklɛ ti sɛ nga ti taa ti N.E.). Ti nɛngɔ ya lo hɛ̃ gbia na ndenge mɛndó akala na lo tɛrɛ awakristo na ndo lo mɛ ba tɛngɔ nga na nyɔngɔ mɛnɛ̃ ko, Tertullien dikɔndó ndasewa tɛ azi mɛ ala ndo nyɔngbindó mɛnɛ̃ nga ma mbele ti mangbi mɛndó ala ndo li. Lo di tɛnɛ ngandó ya “Na ngoi mɛndó azi ti Roma ndo lɛ wele ka ndo mɛ ala ndo lɛ na wele ko, azi mɛndɛ̃ ndo dundó na zugbu ti nyɔngɔ mɛnɛ̃ tɛrɛ zo mɛ ala ho lo na wá . . . nga ma bere yɔrɔ ti pupuka.”

Lo niko dundó siɔni na lo tɛ awakristo (abɛse du ya azi mɛndɛ̃ ti Roma ndo lindó ni nga ma yɔrɔ ti sarangɔ na tɛrɛ la). Tertullien sundó ya “Ta e ndo sa bɛ mɛnɛ̃ tɛrɛ sa kaya tɛ tɛ e ti tɛngɔ ma. Azi ti Roma ndo hɛ̃ndó tɛ ti tɛngɔ mɛ na mɛnɛ̃ hɛ̃ abɛta awakristo ti tarangɔ mbilimbili tɛ la. Tertullien di tɛnɛndó ya: “Na olo mbi hũnda hĩ ya, hĩ hũ ngasia se du ya ĩ ndó ye ya [ta awakristo] ndo ye tɛngɔ mɛnɛ̃ tɛ asa bɛ yakere ma ko, ĩ da bɛ ĩ ya ala lengbi ti dungɔ na zugbu ti mɛnɛ̃ tɛ zo?”

Ndɛ lo mɛ ko, ta azi gba ndo tɔndɔ ndia tɛ Nvɛ̃ Ngunu Zu na ngoi mɛ monganga ndo yɔ ka ti la ya adiri na mɛnɛ̃ tɛrɛ la ma. Atɛmwɛ tɛ Yehova ndo sepala na dungɔ lɛ ngɛ̃́, kanda ayɔ ya e tɔndɔ ndia tɛ Yehova mɛ ba mɛnɛ̃. Ni ye tɛnɛngɔ ya nɛ na bangɔ kɔdɛ mɛ amonganga ndo salela ndɛ nɛ?

Na ngoi mɛndó kpale ti diringɔ na mɛnɛ̃ tɛrɛ azi ati gba na pɛ to ti sɛ ti lɛ gigi zu, Atɛmwɛ tɛ Yehova hũndó lo niko ya ta amangbi na ndia tɛ Nzapa ma, wa e ndo ye nga ya se mɛ ni da tee ndɛ la. Kanda na ya abulu gba mɛ lo ti ɔngɔ, amonganga ti na kɔdɛ gba, wa ala gbinyangbi nga se tɛ la ti lingɔ na kwa. Ndɛ lo mɛ ko, ti nɛngɔ ya adiri na mɛnɛ̃ tɛrɛ zo ko, ta amonganga ndo salela bo mɛnɛ̃ nvɛ̃ni ma, kanda alengbi ti salelangɔ kɔi ti aye ti ngbondoni mɛ ndo du kaya mɛnɛ̃ mabere: (1) globules rouges; (2) globules blancs; (3) plaquette; (4) plasma (serum) ni zu ndo du bo ngu. Na lo tɛ azi mɛndɛ̃ mɛ tɛrɛ la ndo sɔ amonganga lengbi ti sungɔ hɛ̃ la bo globules rouges, globules blancs, plaquette bere plasma. Se ti diringɔ na kɔi ti aye mɛ ndo du kaya mɛnɛ̃, ni ndo hɛ̃ lége ya mɛnɛ̃ mɛ abenda kaya tɛrɛ zo kɔi ko, alengbi ti salelangɔ ni ti nɛngɔ ya adiri na ni ya tɛrɛ azi gba. Ka lɛ Atɛmwɛ tɛ Yehova diringɔ na mɛnɛ̃ tɛrɛ bere kɔi ti aye siɔ ti ngbondoni mɛ ndo du kaya mɛnɛ̃ adu kongɔ nyɔ ndia tɛ Nzapa. Na lo mɛ ya ala ndo tɔndɔ tɛnɛ mɛ Ngbangɔ tɛnɛ na omɛ ba mɛnɛ̃ ko, ni ndo bata la ya ta ala ti na ya kpengba lo bere a lua ngã ti vala na sida mɛ zo lengbi ti luangɔ ni na lége ti mɛnɛ̃ ma.

Kanda na pɛ bendangɔ aye siɔ ti ngbondoni mɛ ndo du kaya mɛnɛ̃ ko, amonganga lengbi nga ti bendangɔ aye mɛndɛ̃ ti yakere yakere mɛ ndo du kaya aye niko kɔi kɔi, ni lengbi ti tongɔ e ya e hũnda tɛrɛ e na ndo na ndo aye niko mɛ ndo du kaya mɛnɛ̃. Ando salela ni ngasia, wa ye mɛ ayɔ ya wakristo hĩnga ni uzu ti nɛngɔ ya lo ye bere lo kɛ̃ se ti sarangɔ tɛrɛ niko nɛ?

Mɛnɛ̃ na aye ndɛ̃ ndɛ̃ ndɛ̃ kaya ni. E mu selɛlo ti plasma, ni ndo du na 90% ti ngu, nga na aye ndɛ̃ ndɛ̃ ndɛ̃ nga mabere hormones, Sels inorganiques, enzymes, nutriments, mineraux nga na sukele. Plasma ndo du nga na aproteinɛ mabere albumine, ni ndo li ya mɛnɛ̃ bombi tɛrɛ lo ndoni kɔi wa ni nga na a antikɔrɛ mɛ ndo tiri to na angã. Amonganga ndo mu aproteinɛ gba mɛ ndo du kaya plasma ti nɛngɔ ya ani sara na azi. Na ndakisa ando hɛ̃ndó hɛ̃ ayangambi mɛ na SS mɛ mɛnɛ̃ tɛrɛ la ndo wɛ iɔ iɔ proteinɛ mɛ ndo ili ni ya factuer VIII. Se du ya zo lengbi ti luangɔ ngã mɛndɛ̃ ko, amonganga lengbi ti sungɔ hɛ̃ lo gamma globuline mɛ a mu kaya plasma ti mɛnɛ̃ tɛ zo mɛ antikɔrɛ tɛ lo lengbi ti tiri to na angã. Amonganga ndo salela nga aproteinɛ mɛndɛ̃ mɛ ndo du kaya plasma, kanda nga ma se mɛ e lo ti tɛnɛngɔ na ni ko, ni ndo fa se mɛ alengbi ti bendangɔ aye mɛndɛ̃ mɛ kaya plasma ti mɛnɛ̃. a

Awakristo mɛndɛ̃ ndo kɛ̃ aye zu mɛ ndo lo kaya mɛnɛ̃ (abɛse du nga aye mɛ alengbi ti batangɔ ala na pɛ ndunu ngoi ya ta ala gã ngã ma). Lingɔ ngaso ndo fa ya ala gbɔ̃ nda ndia tɛ Nzapa mɛ aba ‘kɛ̃ngɔ mɛnɛ̃.’ Ala ndo hĩnga nga ya, ndia mɛndó Nzapa hɛ̃ azi ti Izraɛlɛ ya se mɛnɛ̃ lo kaya tɛrɛ ye kɔi mɛ na dungɔ lɛ ngɛ̃́ si ko ayɔ ya ‘asa ni tise.’ (Mibeko 12:22-24) Nda mɛ lo niko du ngbondoni so nɛ? Ando benda mɛnɛ̃ tɛrɛ zo akpãni kaya masini ti nɛngɔ ya asi na gamma globulines, albumine nga na mbanga aye mɛndɛ̃ mɛ ndo du kaya mɛnɛ̃. Awakristo mɛndɛ̃ ndo kɛ̃ ayɔrɔ niko, nga ma se mɛ ala ndo kɛ̃ diringɔ na mɛnɛ̃ tɛrɛ la bere aye siɔ ti ngbondoni ti mɛnɛ̃. Ayɔ ya atɔndɔ ekateli mɛ ala mu na mbilimbili nga na bingangɔ li ti nzɔ̃ni.

Wakristo mɛndɛ̃ lengbi ti mungɔ ekateli mɛ a ɔngbi na omɛ. Ala ndo kɛ̃ nga ya adiri na mɛnɛ̃ bere globules rouges, globules blancs, plaquette bere plasma tɛrɛ ani ma. Ala ndo ye ya amonganga sara ani na aye ti yakere yakere mɛ ndo du kaya kɔi ti aye siɔ ti ngbondoni ti mɛnɛ̃. Abɛse ngaso ko, ala ndo du na dangɔ bɛ mɛ akɛsɛnɛ. Wakristo mɛndɛ̃ lengbi ti yengɔ ya asara ni na gamma globuline, kanda lo lengbi ti kɛ̃ngɔ yɔrɔ mɛ ali na ye ti yakere yakere mɛ lo kaya globules rouges bere globules blancs. Naya aye zu mɛ e lo ti tɛnɛngɔ tɛnɛ na ndoni, ye mɛ lengbi ti tongɔ wakristo kɔi kɔi ya lo ye yɔrɔ mɛ ali ni na aye ti yakere yakere ti mɛnɛ̃ nɛ?

“Hũnda tɛ awa dingɔ mbɛti” mɛ kaya Linɔngi ti Sinzili ti 1 Nzɛ ti Mana 1990, atɛnɛ ya proteinɛ ti plasma ti mɛnɛ̃ tɛ wali mɛ na ngɔ ndo gwe kaya tɛrɛ nyingambi mɛ kaya lo abɛse du ya ta mɛnɛ̃ tɛrɛ la ndo tɛngbi ma. Ni ndo li ya ta nyingambi alekisa hɛ̃ nyi lo immunoglobulines mɛ ndo li ya a hɛ̃ nyingambi ye ti ngbondoni mɛ alengbi ti batangɔ lo na angã mɛndɛ̃. Ngoi mɛ globules rouges tɛ nyingambi mɛ dɛ kaya ta lo kpi ko, aye mɛ ndo hɛ̃ oxygene ndo si kaya tɛrɛ lo. Atãnga aye ti ngbondoni niko ndo ti bilirubine ni ndo ɔ da hɔ wa ni ti bí asi ka tɛrɛ ta nyingambi. Awakristo mɛndɛ̃ lengbi ti tɛnɛngɔ ya, nga ma se mɛ aye ti yakere yakere mɛ ndo du kaya tɛrɛ ta ngɔ alengbi ti gwengɔ kaya tɛrɛ nyingambi mɛ kaya lo ko, se mɛ nga ala lengbi ti yengɔ ya asara la na aye ti yakere yakere mɛ ndo du kaya plasma, globules rouges bere globules blancs la.

Na lo mɛ ya zo na zo lengbi ti mungɔ ekateli mɛ a ɔngbi na tɛ azi mɛndɛ̃ na bangɔ dangɔ bɛ nga na bingangɔ li tɛ lo, ni ye tɛnɛngɔ ya ta lo niko du ngbondoni nvɛ̃ni ma? Ipɔ, ni du ngbondoni nvɛ̃ni. Kanda ayɔ ya e hĩnga ye kɔi ti ngbondoni mɛ azanga mindɔndɔ. Alo mɛ e lo ti tɛnɛngɔ tɛnɛ na ndoni afa ya, ta Atɛmwɛ tɛ Yehova ndo ye ya adiri na mɛnɛ̃ bere aye ti ngbondoni siɔ ti mɛnɛ̃ tɛrɛ la ma. Ngbangɔ hɛ̃ awakristo ndia ya ‘ta ala tɛ sa mɛ aho, alu na angbilondo ma, ta ala tɛ bere ala nyɔ mɛnɛ tɛrɛ sa ma, ta ala tɛ sa mɛ andosã gɔ̃ ni sãngɔ, wa aho ma, ta ala li asiɔ ye ti kamɛnɛ ma.’ (Awa Pangɔ Kwa 15:29) Wa na omɛ aba aye ti yakere yakere mɛ ndo du kaya aye ti ngbondoni ti mɛnɛ̃ ko, wakristo kɔi kɔi alengbi ti mungɔ ekateli na pɛ gbɔ̃ngɔ li lo nzɔ̃ni nvɛ̃ni.

Azi gba ndo ye yɔrɔ zu mɛ alengbi ti sarangɔ la iɔ, abɛse du yɔrɔ mɛ ala hĩnga nzɔ̃ni ya ni lengbi ti singɔ na siɔ lo. Adu biani ya yɔrɔ mɛ ali na mɛnɛ̃ ndo si na kpengba lo gba. Ayɔ ya wakristo mɛ mbilimbili gi hĩngangɔ yɔrɔ nzɔ̃ni wa lo dunga na kpengba lɛ, kanda ta ayɔ ya lo ngbã bo na gingɔ sarangɔ tɛrɛ lo ma. Atɛmwɛ tɛ Yehova ndo sepala na ge ge ge mɛ amonganga ndo li ti sarangɔ azi na yɔrɔ ti nzɔ̃ni, ala ndo ginga hĩngangɔ nzɔ̃ lo bere siɔ lo mɛ yɔrɔ mɛ ala ye mungɔ alengbi ti singɔ na ni, na omɛ ba yɔrɔ mɛ ali ni na mɛnɛ̃ ko, ala ndo kpã lɛ la na ndo tɛnɛ mɛ Nzapa tɛnɛ, wa ala ndo gi nga batangɔ mangbi ti nzɔ̃ni na zo mɛ wa hɛ̃ngɔ la dungɔ lɛ ngɛ̃́.​—Nzembo 36:9.

Ni du nvɛ̃ni nzɔ̃ sulu na lo tɛ wakristo mɛ ndo kpã bɛ lo na ndo Nzapa mabere wa sungɔ bia mɛndó tɛnɛ ya: “Yehova Nzapa du lá nga vara, lo ndo fa nzɔ̃ bɛ wa lo ndo li nga ya zo lua ndima; ta Yehova ndo gbanzi bɛ fãni kɔi ye ti nzɔ̃ni na zo mɛ ndo nɔ nɔ na mbilimbili lá kwɛ ma. Ee Yehova . . . , dengɔ bɛ na zo ko la ndo kpã bɛ lo ndo mɔ”!​—Nzembo 84:11, 12.

[Tɛnɛ ti gbɛnda pajɛ]

 [Da ti pajɛ 31]

AHŨNDA MƐ MƆ LENGBI TI HŨNDANGƆ NA AMONGANGA

Se du ya aga su mɔ bere asara mɔ na yɔrɔ mɛ ali ni na mɛnɛ̃ ko, hũnda la ya:

Amonganga na alifɔlɔme mɛ ga sara mbi ahĩnga nzɔ̃ni ya mbi tɛmwɛ tɛ Yehova wa ta mbi na yengɔ ya adiri na mɛnɛ̃ bere aye ti ngbondoni ti mɛnɛ̃ tɛrɛ mbi ma?

Se du ya ayɔrɔ mɛ asu hɛ̃ mɔ ali ni na plasma, gloubules rouges, globules blancs bere plaquette ti mɛnɛ̃ ko, hũnda la ya:

Ali yɔrɔ ni na aye siɔ ti ngbondoni ti mɛnɛ̃? Se du ngaso mɔ lengbi ti kambisangɔ hɛ̃ mbi se mɛ ali na ni?

Yɔrɔ mɛ a ga hɛ̃ mbi, ni na aye mɛ lo kaya mɛnɛ̃ ka da gba?

Se bingangɔ li tɛ mbi zi lége hɛ̃ mbi ya mbi mu yɔrɔ niko, siɔ lo mɛ ni lengbi ti singɔ na ni nɛ?

Se du ya bingangɔ li tɛ mbi gbanzi mbi na mungɔ yɔrɔ niko, yɔrɔ mɛndɛ̃ mɛ ĩ lengbi ti hɛ̃ngɔ mbi nɛ?

Se du ya mbi gbɔ̃ li mbi ndo lo niko nzɔ̃ni, mbi lengbi ti kambisangɔ ni na ngoi mɛ wa?