Maria Magadalena adundó na?
Gbinya ti ya Ngbangɔ
Maria Magadalena adundó kɔi tɛ ava Yezo ti mbilimbili. Alengbindó ti dungɔ ya ila ti Magadalena alo na ili gbata ti Magadala (bere Magadane), nindó dã na ngu ti Galilea. Ngoi mɛndɛ̃ Maria ndo dundó kai.
Maria Magadalena du wali kɔi mɛndó ndo dɔ nɔ̃ ndoni kɔi na Yezo na ava lo, mɛ ala ndo zandó la na aye ti mi mɛ ala na gwɛ̃ ni. (Luka 8:1-3) Lo ndó da na ngoi mɛndó aho Yezo, wa lo ngandó ka popo tɛ azi ti kɔzoni mɛndó hũ Yezo na ngoi mɛ lo so.—Marko 15:40; Yoanɛ 20:11-18.
Maria Magadalena dundó wali ti ngbabo?
Ta Ngbangɔ tɛnɛ ya Maria Magadalena dundó wali ti ngbabo ma. Ngbangɔ tɛnɛ tɛnɛ ti dungɔ lɛ ngɛ̃́ tɛ lo ti gã ya Yezo hãna ndó asiɔ nyingɔ kaya tɛrɛ lo mbalambala.—Luka 8:2.
Nda mɛ azi gba ndo tɛnɛ ya lo dundó wali ndumba uzu ti nɛngɔ ya lo ti kɔi tɛ ava Yezo nɛ? Abulu gba na pɛ kwa tɛ Maria Magadalena azi gba ndo tɛnɛndó ya lo du wali ndumba mɛ ta ahĩnga ili lo ma mɛndó akpo gɛrɛ Yezo na ngulɛ ti lɛ lo nga na kwa li lo. (Luka 7:36-38) Kanda ta Ngbangɔ ye tɛnɛ niko ma.
Maria Magadalena dundó “toma ka tɛ atoma” mɛndɛ̃?
Ipo. Azi ti Katolikɛ ndo ili Maria ya “Sãto Maria Magadalena” bere “toma ka tɛ atoma” na lo mɛ ya lo ndó ka popo tɛ azi ti uzu mɛndó tɛnɛ hɛ̃ atoma ya Yezo so. (Yoanɛ 20:18) Kanda ta ni la li ya aili lo ya toma ma. Ta ndo kɔi kaya Ngbangɔ mɛ tɛnɛ ya lo du toma da ma.—Luka 6:12-16.
A onzindó sungɔ Ngbangɔ dã na nda siɛklɛ ti uzu ti N.E. Kanda na siɛklɛ ti 6 ndo la agbia ti sambela ti Katolikɛ tɛnɛ ya, ale aili Maria Magadalena ya sãto ti hɛ̃ngɔ lo ndima gba. Ambɛti mɛndɛ̃ mɛndó asu na siɛklɛ ti sɛ na ti taa atɛnɛndó ya atoma tɛ Yezo mɛndɛ̃ ndo lindó sobɛlɛ hɛ̃ Maria Magadalena, kanda ta mbɛti niko ka popo ti abɛta liste ti mbɛti ti ya Ngbangɔ ma. Ta anvɛ̃nɛ ti ngaso kaya Ngbangɔ ma.
Maria Magadalena dundó ya Yezo Kristo?
Ipo. Ngbangɔ tɛnɛ yangondo ya Yezo ndo mɔdo. a
a Ba tɛnɛ mɛ “Yesu abalaki? Azalaki na bandeko?”
