Ipɔ. Ngbangɔ tɛnɛ ya elengbi ti lingɔ sambela hɛ̃ Nzapa bo na ili Yezo. Yezo tɛnɛndó hɛ̃ ava lo ya: “Ale ĩ ndo li sambela ngaso mɛ: To e mɛ ka Yayu, Ili mɔ du bɛ santo ma ke.” (Matie 6:9, haut fleuve) Ta Yezo tɛnɛndó bɛ fãni kɔi hɛ̃ ava lo ya ala li sambela hɛ̃ asãto bere aangelo na se lɛ lingɔ sambela hɛ̃ Nzapa ma.

 Yezo di tɛnɛndó hɛ̃ ava lo ya: “Mbi du lége, mbi du bɛta tɛnɛ, mbi du nga dungɔ lɛ ngɛ̃́. Ta zo kɔi lengbi ti gwengɔ ka tɛ To mbi zangangɔ ya lo ɔ ti ndo mbi ma.” (Yoanɛ 14:6, Bible na lingala ya lelo oyo) Bo Yezo kɔi la a hɛ̃ lo kumba ti lɛngɔ kongba tɛ e ka tɛ Nzapa.​—Aebreo 7:25.

Adu siɔni lingɔ sambela hɛ̃ Nzapa nga na asãto?

 Nzapa tɛnɛndó kaya kɔi ti andia sui kɔi tɛ Moizɛ ya: “Mbi Yawe, Nzapa tɛ mɔ, mbi du Nzapa ti sɔbɛlɛ.” (Kobima 20:5, Bible na lingala ya lelo oyo) Lo ndo fa ya lo du Nzapa ti “sɔbɛlɛ” ngasia? Biblia—Libongoli ya Mokili ya Sika a gbinyangbi tɛnɛ mɛ sɔbɛlɛ na “Nzapa mɛ ndo ye ya avɔrɔ bo lo kɔi.” Nzapa yɔ ge ti e ya e vɔrɔ ni, wa e li nga sambela bo hɛ̃ ni kɔi.​—Yisaya 48:11.

 Nzapa ndo ma siɔni na ngoi mɛ e ndo li sambela hɛ̃ zo mɛndɛ̃, abɛse du asãto bere aangelo mɛ ka ndozu. Na ngoi mɛndó toma Yoanɛ ye vɔrɔngɔ angelo kɔi ko, angelo niko gbanzindó lo na tɛnɛngɔ hɛ̃ lo ya: “Ta mɔ li ngaso ma! Mbi wa kwa nga ma mɔ, mbi nga wa kwa nga ma ayata mɔ mɛndɛ̃ mɛ ndo fa tɛnɛ tɛ Yezo. Vɔrɔ bo Nzapa.”​—Suma 19:10, Bible na lingala ya lelo oyo.