Mɔ lengbi ti lingɔ sambela ngasia—Ayɔ bo ya mɔ tɛnɛ ya, “To e mɛ ka yayu?”
Gbinya ti ya Ngbangɔ
Tɛnɛngɔ ya “To e mɛ ka yayu” ndo fa se ti nzɔ̃ni mɛ elengbi ti lingɔ na sambela nga na tɛnɛ mɛ elengbi ti tɛnɛngɔ na ya sambela ni. Yezo handó na awa kalasi tɛ lo na ngoi mɛndó ala hũnda lo ya: “Gbia ha e na [se ti lingɔ] sambela.” (Luka 11:1) Kanda ta kɔtɛ sambela mɛ Nzapa ndo ye la To e mɛ ka yayu ma. a Ni la du ndó sambela ti ndakisa mɛndó Yezo ha ya Nzapa ndo ma.
Na ya tɛnɛ mɛ e na luangɔ gbinya ti ahũnda mɛ
Sambela ti To e mɛ ka yayu alengbi na nɛ?
Elengbi ti tãngɔ sambela ti To e mɛ ka yayu kaya mbɛti ti Matie 6:9-13, agbinyangbi ni na ndenge mɛ akɛsɛnɛ kaya Ngbangɔ mɛndɛ̃. Eba aselɛlo ni sɛ.
Fana Ngbangɔ: “To e mɛ ka yayu, azi atɔndɔ bɛ ili mɔ mɛ santo ma ke. [zia ya Lo-lɛngɔ Gbia tɛ mɔ ga]. Azi ali bɛ ye ge tise na se bɛ mɔ, nga ma se mɛ andoli na ni ka yayu ma ke. Hɛ̃ e lá olo mɛ tɛ mɛ alengbi ti sĩngɔ ya e. Ka lɛ mɔ ndo siɔ ye tɛ e, nga ma se mɛ e ndoka na lɛ e ndo siɔ ye mɛ azi ndoli tɛrɛ e. Ta mɔ ye ya Satana atara bɛ e ma, wa hã e ka gbɛ ti lo mɔ zi.”
Ngbangɔ ti Yeruzalɛmɛ: “To e mɛ ka yayu, azi atɔndɔ bɛ ili mɔ mɛ santo ma ke. Li ya Lo-lɛngɔ Gbia tɛ mɔ ga. Li ya gwɛ̃ tɛ mɔ li ge tise nga ma se mɛ ndo li ka ndozu. Hɛ̃ e tɛ tɛ e ti ndɛ ti bi kɔi kɔi. Futa nyɔngɔ tɛ e nga ma se mɛ e ndo futa nga na tɛ afɔ̃ e. Ta mɔ li ya etengbi na tara ma, kanda hã e kaya siɔ lo mɔ zi.” b
Nda sambela ti To e mɛ ka yayu du nɛ?
Alo mɛndó Yezo ha amangbindó na tɛnɛ mɛ kaya Ngbangɔ, elengbi ti dungɔ na dangɔ bɛ ya ambanga avɛrse ti ya Ngbangɔ atɛnɛ tɛnɛ mɛ ba sambela ti To e mɛ ka yayu.
“To e mɛ ka yayu”
Ayɔ ya e ili Nzapa ya “To e mɛ ka yayu” na lo mɛ ya lo la li e wa lo nga la hɛ̃ e dungɔ lɛ ngɛ̃́.—Yisaya 64:8.
“Zia ya azi atɔndɔ bɛ ili mɔ ma ke”
Ayɔ ya e tɔndɔ ili Yehova Nzapa na lo mɛ ya ni du vuruni bere santo. Zo ndo fa ya lo ndo tɔndɔ ili Nzapa mɛ santo na ngoi mɛ lo ndo tɛnɛ tɛnɛ ti seliye tɛ lo nga na gwɛ̃ tɛ lo hɛ̃ azi mɛndɛ̃.—Nzembo 83:18; Yisaya 6:3.
“Zia ya Lo-lɛngɔ Gbia tɛ mɔ ga”
Lo-lɛngɔ Gbia tɛ Nzapa adu lo-lɛngɔ gbia ti ndozu mɛ Gbia ni la Yezo. Yezo handó na e ya e li sambela ya Lo-lɛngɔ Gbia niko ga nga ge tise.—Danyele 2:44; Suma 11:15.
“Azi ali bɛ ye ge tise na se bɛ mɔ, nga ma se mɛ andoli na ni ka yayu ma ke”
Ka ndozu ta siɔ lo na kwá da ma, dangɔ bɛ tɛ Nzapa na lo tɛ azi du ya ala du na dungɔ lɛ ngɛ̃́ ti siriri bwai na bwai wa ta ala du nga na mbɛtɔ ti ye kɔi ma.—Nzembo 37:11, 29.
“Hɛ̃ e lá olo mɛ tɛ mɛ alengbi ti sĩngɔ ya e”
Na ngoi tɛ Yezo mapa dundó tɛ ti bi kɔi kɔi. Ayɔ ya ta bɛ e li na ni ma ya Wa lingɔ e la ndo hɛ̃ e aye zu ti nɛngɔ ya e du na du ngɔ lɛ ngɛ̃́.—Awa Pangɔ Kwa 17:24, 25.
“Futa nyɔngɔ tɛ e nga ma se mɛ e ndo futa nga na tɛ afɔ̃ e”
Tɛnɛ mɛ “nyɔngɔ” agbinyangbi ni na tɛnɛ mɛndɛ̃ ya siɔ kpale. (Luka 11:4) Azi zu mɛ ndo li siɔ kpale ndo du na gwɛ̃ ya aka lɛ na ndo siɔ kpale tɛ ani. Se e du na gwɛ̃ ya Nzapa ka lɛ lo ndo siɔ kpale tɛ e ko, ayɔ ya e du nga dã ti kangɔ lɛ e na ndo siɔ kpale mɛ azi mɛndɛ̃ ndo li tɛrɛ e.—Matie 6:14, 15.
“Ta mɔ ye ya Satana atara bɛ e ma, wa hã e ka gbɛ ti lo mɔ zi”
Ta Yehova Nzapa ndo tara bɛ e ti nɛngɔ ya e li siɔ kpale ma. (Zaki 1:13) Kanda wa tarangɔ bɛ e la du “siɔ zo,” Satana Zabulu—Ando ili nga lo ya “wa tarangɔ bɛ.” (1 Yoanɛ 5:19; Matie 4:1-4) E ndo yɔ ka ti Yehova ya lo za e ya ngoi mɛ etengbi na tara ko, ta e kɛ̃ tɔndɔngɔ lo ma.
Ayɔ bo ya, mɔ diri ndo tɛnɛ mɛ “To e mɛ ka yayu” na ngoi mɛ mɔ ndo li sambela?
Sambela ti “To e mɛ ka yayu” adu sambela ti ndakisa mɛndó Yezo ha. Ta ayɔ ya e diri ndo tɛnɛ kɔi kɔi ti sambela ni ma. Na pɛ hangɔ sambela niko Yezo kondó kɛkɛ lɛ ava lo ya: “Na ngoi mɛ ĩ ndo li sambela ko, ta ĩ diri ndo tɛnɛ kɔi fani gba ma” (Matie 6:7 NWT). Na ngoi mɛndó Yezo ha sambela ti ndakisa ko, ta lo ndo tɛnɛndó tɛnɛ ni ngoi zu ma kanda lo ndo li ngandó sambela mɛndɛ̃.—Luka 11:2-4.
Se ti nzɔ̃ni ti lingɔ na sambela adu kambisangɔ na mbilimbili zu dangɔ bɛ tɛ mɔ hɛ̃ Nzapa.—Nzembo 62:8.
E li sambela ngasia?
Sambela ti “To e mɛ ka yayu” adu sambela ti ndakisa mɛ ayɔ ya e li ti nɛngɔ ya Nzapa ma e. Ba se mɛ ni mangbi na avɛrse ti ya Ngbangɔ mɛndɛ̃ mɛ atɛnɛ tɛnɛ ti sambela.
Li bo sambela hɛ̃ Nzapa
Vɛrsɛ: “Ta bɛ ĩ angbã ngbũ na lo ye kɔi ma, kanda na ya alo zu mɛ asi na ĩ ko, ĩ hũnda Nzapa ya, lo hɛ̃ ĩ ye mɛ ĩ na gwɛ̃ ni, ko ĩ hũnda lo na ya sambela tɛ ĩ, ĩ hũnda nga lo na hɛ̃ngɔ lo siakɔli.”—Filipɛ 4:6.
Aye tɛnɛngɔ ya: Elengbi ti lingɔ bo sambela hɛ̃ Nzapa, kanda ta elengbi ti lingɔ sambela hɛ̃ Yezo, Maria, bere asanto ma. Na bandangɔ na tɛnɛ mɛ, “To e mɛ ka yayu,” sambela niko ti ndakisa ndo ha na e ya elengbi bo ti lingɔ sambela hɛ̃ Yehova Nzapa.
Li sambela na lo ti ye mɛ amangbi na gwɛ̃ tɛ Nzapa
Vɛrsɛ: “Se e yɔ ye mɛ bɛ lo aye ko, lo na mangɔ e.”—1 Yoanɛ 5:14.
Aye tɛnɛngɔ ya: Elengbi ti lingɔ sambela na lo ti aye zu mɛ amangbi na gwɛ̃ tɛ Nzapa. Yezo fandó ya gwɛ̃ tɛ Nzapa du ngbondo ni na ngoi mɛndó lo tɛnɛ kaya sambela ti To e mɛ ka yayu ya “zia ya Lo-lɛngɔ Gbia tɛ mɔ ga.” Na lége ti mandangɔ Ngbangɔ la zo lengbi ti hĩngangɔ gwɛ̃ tɛ Nzapa na ndo azi nga na sese.
Li sambela na lo ti aye mɛ mɔ na gwɛ̃ ni
Vɛrsɛ: “Bi kumba tɛ mɔ ti nɛnɛ ni hɛ̃ Yehova, wa lo na zangɔ mɔ.”—Nzembo 55:22.
Aye tɛnɛngɔ ya: Nzapa ndo kpã lɛ lo na ndo gwɛ̃ tɛ e. Nga ma se mɛndó Yezo diri ndo tɛnɛ ti gwɛ̃ tɛ zo fãni gba kaya sambela ti To e mɛ ka yayu ko, elengbi nga ti lingɔ sambela hɛ̃ Nzapa ya lo kokisa gwɛ̃ tɛ e ti bi kɔi kɔi, lo za e na ngoi mɛ e ye mungɔ ekateli ti ngbondo ni, na ngoi mɛ etengbi na kpengba lo wa lo ka nga lɛ lo na ndo siɔ kpale tɛ e. c
a Na ndakisa Yezo na ava lo li ngandó sambela mɛndɛ̃, kanda ta ala dirindó ndo tɛnɛ ni kɔi kɔi nga ma sambela ti ndakisa ma.—Luka 23:34; Filipɛ 1:9.
b Kaya Ngbangɔ mɛndɛ̃ nga ma ti Français courant bere Sainte Bible J.-F sambela ti “To e mɛ ka yayu” asuka na tɛnɛ mɛ: “Bo mɔ kɔi la mɔ lengbi ti lɛngɔ Gbia, dungɔ na ngunu, ndima nga bwai na bwai. Amen.” se mɛ akɔ na nda tɛnɛ ti sambela niko ndo fa ya Nzapa na ndima gba. Kanda kaya Ngbangɔ mɛ, The Jerome Biblical Commentary: “ . . . ta ni kaya [amaniskri] mɛ ahĩnga ni nzɔ̃ni ma.”
c Azi ko la na gwɛ̃ ya Nzapa ka lɛ lo na ndo siɔ kpale tɛ ani ko, ala ndo ye lo ti siɔ kpale tɛ la wa ala ndo li nga sambela na lo ni. Kanda Yehova yɔ ka ti azi zu ya: “Ĩ ga wa e lɛkɛ lo na popo tɛ e.” (Yisaya 1:18) Ta Yehova ndo kɛ̃ kangɔ lɛ lo na ndo siɔ kpale tɛ zo mɛ agbinya bɛ lo ma.
