Ĩĩ. Nzapa ndo za awakwa tɛ lo mɛ na ngã. Se du ya wakwa tɛ Nzapa kɔi gã ngã ko, Ngbangɔ pa ya: “Yehova nvɛ̃ni na zangɔ lo ka ndo mbɛto ti ngã.” (Nzembo 41:3) Se mɔ du na ngã kɔi mɛ ali abulu gba ko, alo taa olo mɛ alengbi ti zangɔ mɔ:

1.   Li sambela hɛ̃ Nzapa ya lo hɛ̃ mɔ ngunu ya mɔ gbe bɛ mɔ. Mɔ na luangɔ “bɛ pii [mɛ] aɔ kɔdɛ tɛ azi,” ni lengbi ti zungɔ na pɛnɔ tɛ mɔ wa a hɛ̃ nga mɔ ngunu.​—Filipɛ 4:6, 7.

2.   Du na bingangɔ li ti nzɔ̃ni. Ngbangɔ pa ya: “Bɛ mɛ na dengɔ bɛ adu yɔrɔ mɛ nzɔ̃ni, kanda bɛ mɛ a nzɛ̃ ndo onzi ngunu tɛ zo.” (Masese 17:22, Biblia na lingala ya lelo oyo) Ndo to sasa tɛrɛ azi, ni lengbi ti zungɔ na vundu tɛ mɔ wa a hɛ̃ nga mɔ ngunu.

3.   Du na dangɔ bɛ ti nzɔ̃ni na ndo bí mɛ na gangɔ. Dungɔ na nzɔ̃ dangɔ bɛ alengbi ti zangɔ mɔ ya mɔ du na dengɔ bɛ abɛse mɔ na ngã mɛ ali abulu gba. (Roma 12:12) Ngbangɔ pa ya na bí mɛ na gangɔ “ta zo kɔi mɛ na dungɔ ka kɔdɔrɔ niko na tɛnɛngɔ ya: “Tɛrɛ mbi ndo sɔ” ma.’” (Yisaya 33:24) Na ngoi niko gbanda ko, Nzapa na onzingɔ angã zu mɛ ali abulu gba mɛ ta amonganga ndo koka onzingɔ ni ma. Na ndakisa Ngbangɔ tɛnɛ ya abange na diringɔ tingɔ apalanga, ni tɛnɛ ya: “Mi tɛrɛ lo diri ti fãnani ɔngɔ ti palanga; lo na diringɔ dungɔ na ngunu mɛndó lo na ni na ngoi mɛndó lo dɛ palanga.”​—Yobo 33:25.

 Ta bɛ mɔ li na tɛnɛ olo ma: Abɛse du ya e Atɛmwɛ tɛ Yehova e ndo ye ya Yehova ndo za e ko, e ndo gi nga salangɔ tɛrɛ e ka tɛ amonganga se e du na ngã mɛ ali abulu gba. (Marko 2:17) Abɛse ngaso ko, ta e ndo to azi na ngunu ya ala ye yɔrɔ kɔi ngaso mɛ ma, na lo ya e hĩnga ya zo na zo la lengbi ti pɔnangɔ se ti salangɔ tɛrɛ mɛ bɛ lo ye.