Ĩi, Ngbangɔ tɛnɛ yangondo ya Nzapa da. Ni sa ngunu bɛ e ya e ye lo tɛ Nzapa, ta e ye bo atɛnɛ zu mɛ asambela ndo ha ma, kanda ale e “salela makoki tɛ e ti bingangɔ li” nga na “ndara.” (Roma 12:1; 1 Yoanɛ 5:20) Ba atɛnɛ mɛ Ngbangɔ hɛ̃:

•   Se mɛndó ali na aye zu na seni nga na se mɛ ali na aye zu mɛ na dungɔ lɛ ngɛ̃́ ndo fa ya Wa lingɔ aye zu da. Ngbangɔ tɛnɛ ya: “Ti biani, zo la ndowa da, kanda Nzapa la ali aye zu.” (Aebreo 3:4) Tɛnɛ mɛ adu biani, ta sanga ma azi gba ti kɔdɛ ndo ye ya ni du bɛta tɛnɛ. a

•   E azi e ndo du na gwɛ̃ ti hĩngangɔ nda mɛ e na dungɔ lɛ ngɛ̃́ nga na ye mɛ ndo si na e na pɛ kwá, e ndo ngbã lá kwɛ gingɔ ya e hĩnga ni abɛse du ya e ndo kokisa gwɛ̃ tɛ e ti mi. Ni la Ngbangɔ ndo ili ni ya “yɛlɛ ti nyingɔ,” ni ndo yɔ nga hĩngangɔ Nzapa nga na vɔrɔngɔ lo. (Matie 5:3; Suma 4:11) Gwɛ̃ ti hĩngangɔ aye niko zu ndo fa ya Nzapa da. Ni ndo fa nga ya Wa lingɔ aye niko zu du wa songo wa gwɛ̃ tɛ lo du ya e onzi yɛlɛ tɛ e ti nyingɔ​—Matie 4:4.

•   Aprɔfɛsi ti ya Ngbangɔ mɛndó asu ni abulu gba uzu atɛnɛndó tɛnɛ na seni, wa ati ngandó na seni na ya alo zu. Se mɛndó aprɔfɛsi niko zu ti na seni abɛse na ndo alo ti yakere yakere ko, afa ya zo mɛ ɔ azi zu na ngunu da.​—2 Petro 1:21.

•   Azi mɛndó su Ngbangɔ ahĩngandó lo gba mɛ ba siãsi ɔngɔ azi ti ngoi tɛ la. Na ndakisa azi gba ti ngoi ti gã ndo dandó bɛ la ya, sese dɔ lo ndo koko sa kɔi mabere doli, mbɛngɛ, bere ngɔmbɛ kɔi mɛ kotani. Kanda Ngbangɔ tɛnɛ ya “lo kpã sese na lɛ yanga yenge.” (Yobo 26:7) Ngbangɔ kambisa nga se mɛ sese da, atɛnɛ ya ni du “gelebende,” nga mabere “pala.” (Yisaya 40:22) Azi gba ndo hũ ya awa sungɔ Ngbangɔ ahĩngandó atɛnɛ niko zu na lo mɛ ya Nzapa ndó la fa na la.

•   Ngbangɔ hɛ̃ gbinya ti ahũnda ti ngbondo ni mɛ azi ndo hũnda na tɛrɛ la mɛ se ta zo lua gbinya ni ma ko, lo lengbi ti dangɔ bɛ lo ya ta Nzapa da ma. Na ndakisa: Se du ya Nzapa du songo wa lo nga na ngunu zu, nda mɛ apɛnɔ nga na asiɔ lo asĩ ge lɛ gigi so nɛ? Nda mɛ asambela ndo to azi ya ala li siɔ kpale na se lɛ tongɔ la ya ala li nzɔ̃ kpale nɛ?​—Tito 1:16.