Moonelo ahu ni saweera vooloca sa makhwelo onathipeleya mu mahusiheryo a Mpiipiliya, ophitaanyerya masu anacharela:

•   Ti yooyariwano othanana ntakhara okhwa wa muchu naamusivelaahu. Oohuserya a Yesu yaahinla nthowa na okhwa muchu yaamusivelaaya. (Yohani 11:33-​35, 38; Saweriwa T’arummwa 8:2; 9:​39) Mwawiihiiha, hannoona makhwelo okhala elukuluku ya othata. (Eklesiyaste 3:​1, 4; 7:​1-4) Moohiyana, nnoona okhala ekari ya wooniherya niphwanya, naari wi, wooniherya osivela ni waahakararya akina.​—Aroma 12:15.

•   Akhwile hanasuwelaru. Moohipwacha sookhovelela sahu naari ochu nnarwaahuwo, ninnasepa sookhovelela ni saweera sihirino mathipelo a mu soorempwa sinaloca wi achu ookhwa annasuwela nave ananwerya waavolowela ale ari akumi. (Eklesiyaste 9:​5, 6, 10) Sookhovelela iho inaphitaanyerya soororomela ntoko nnaphwanela waakokhorela ni ochapela nihiku na okhwa waya, waapakela mikucho, olocano, waaveka echu alipa ookhwa ni owiinela anaamukhweli. Ninnasepa sookhovelela soothene seiya ni saweera, niiwelelaka nlamulo na Mpiipiliya: “Mmwalane ni, . . . muhiphareru echu yoothanyeya.”​—2 Korinto 6:​17.

•   Yookhalavo ewehereryo ya alipa ookhwa. Piipiliya onahusiha wi onarwa-okhala ovinya’tho nave wi omwaahiyu horwa okhalawo tho okhwa. (Saweriwa T’arummwa 24:15, Nlakano Nahihano; Wupulula 21:4) Ewehereryo yeela ennanikhaviherya osepa okhala oothananaxa, hiiha ntoko yaakhavihenryaaya Akristu oopacerya.​—1 Tesalónika 4:​13.

•   Piipiliya onnaaceenyerya okhala awiiyeviha. (Masiposipo 11:2) Ninnaroromela wi makhwelo henaphwanela okhala elukuluku ya “okareela muhakhu” wooniherya muteko naari ovuwa wa muchu. (1 Yohani 2:​16) Hannapaka marehereryo a makhwelo oowalamelasa, anapakiwa wi yaahakalalihe achu. Navetho hannathuma ikaxau soowalamexa naari owara ikuwo soowalamelaxa wi naatikhinihe achu ari va makhwelo.

•   Hanneererya waakhinyeererya akina weemererya soororomela sahu vooloca sa makhwelo. Mmukhalelo yoola, ninnachariha nlakiheryo nla: “Hiihaa, mmoha ni mmoha a hiyo onarwa iiperekha wa Muluku alokoha yeeyo enreiye.” (Aroma 14:12) Nyenya, wakhala wi noovahiwa ekari, ninneererya othariha soororomela sahu “ni witchachala ni wova.”​—1 Pedro 3:​15, NN.

 Mpuro: Wakhala wi emusi enalakelela opaka marehereryo a ovitha muruchu awo ananwerya opakiwa mpuro vyakala woophwanelela. Ntoko yootakiherya, onanwerya okhala o Empa ya Omwene, mu esaala ya nookhwe, owaani, mmapuro onakhapeleliwamo miruchu naari omahiye.

 Mukhalelo wa weerano: Onnapakiwa mwaha wi ehakararyiwe anaamukhwele ni asinthamwene etharihaka yeeyo Piipiliya onaloceiye vooloca sa okhwa ni ewehereryo ya ovinya mookhwani. (Yohani 11:25; Aroma 5:​12; 2 Pedro 3:​13) Vakina vaya mpuwa mwa mwaha sinnalociwa mikhalelo saphaama sa mulipa ookhwa, navetho sinnavuwihiwa ichu saphaama vooloca sa nroromelo nawe nnahaalaahu otakiherya.—2 Samuwele 1:​17-​27.

 Ncipo nnathipeleya mu Soorempwa ninniipiwa. (Kolosi 3:​16) Wuukuchulani ninnapakiwa nivekelo wi naahakarerye oothene.​—Filipi 4:​6, 7.

 Oliva naari ovekiwa ikhorowa: Hiyaano hannaveka ikhorowa wa nthowa na muteko woothene ophariwe, ophitaanyerya ovitha muruchu. Navetho hannaveka ikhorowa mmithukumano mwahu.​—Mateu 10:8.

 Taani onaphwanela okhalavo: Achu ahiri Anamoona a Yehova annaakheliwa phaama wi ewiriyane mwaha wa vamakhwelo oneeriwa mu Empa ya Omwene. Moolikana ni Mithukumano sahu, miteko sa ovitha muruchu ti wa achu oothene.

 Namoona a Yehova ori oothene onalakelela mwaneene, mwawiiwanana ni eleela ya murima evyakihiwe ni Piipiliya. (1 Timóteo 1:​19) Nyenya, hannaphwanyeya va marehereryo vyakala a ovitha muruchu ohiniiwanana ni Piipiliya.​—2 Korinto 6:​14-​17.