Anna ni Arokora Ookhweleya:

Nuupuwelaka sa muculi nsana na neethanu napiili E. E. K., mulipa miririmu Esekiyeli aahikhalano yawoona yootikhiniha. Owo aahoona maseko matokweene, ekaaro ya wirimu, yeecihiwaka ni Mutokweene a elapo yoothene. Echu yootikinihaxa vooloca sa maseko waari mukhalelo yeecaaya. Yaanaverunya ntoko waarya wa etari, vaavaa yarukunuwaaya yaanawerya weerano eheemenle!​—Ezek. 1:4, 9, 12, 14, 16-27.

Yawoona eyo ennanuupuxerya wi marehereryo a Yehova a wirimu anneeca elukuluku yoothene. Hanka vooloca sa elapo yavathi? Mu eyaakha ya muteko evirale, yohooniherya wi Yehova onnaahoolela achu awe ooreheryeya veelaponi mmukhalelo wootikhiniha!

O Estatu Unitu wenno, emusi ya Peteli eri yooweiwa othaama o Brooklyn eyaaka o nipuro ntokweene nivyaani na elapo yoothene na Anamoona a Yehova o Warwick, Nova York, hiiha ntoko mapuro makina a Ipeteli ni mmuteko woolaleerya. Mapetelita a ifiliyale orukurerya elapo anakhala ooweiwa ni muteko wa oteka, orehererya, opweseheryiwa naari othaamela mapuro mavyaani. Hanka nyuwaano? Naamwi muhiri ooweiwa ni othaama, himwaano minikwa wi munnakhala ooweiwa mmikhalelo mikina.

Nikhuuru Noolamulela ninnatannyeya murima ni oceenyeryeya osuwela wi achu a Muluku orukurerya elapo ari ooweiwa etitelelaka weeca ni marehereryo a Yehova. Ancipale annathaama eyaaka okhaviherya weiwo oriwo othowa otokweene. Akina anathaamela mu makupa mavyaani, weiwo onalociwawo elocelo yookhopela. Akina anneererya mikhalelo mivyaani sa olaleerya seiyo ahikhovelenlaaya. Akina annaphara muteko woolaleerya mmikhalelo mikina. Nave Akristu oothene oororomeleya, ophitaanyerya awuuluvala ni areca, ari ororomeleya mu ochimaka mu ephiro ya okumi—etitelelaka weeca mmuteko wa Yehova ni ekhaviheryaka wooniherya wi Satana mulipa a wootha!​—1 Kor. 9:24.

Muroromele wi munepa wa wiiveleela munooniheryaanyu onnooniwa ni Yehova. (Ahe. 6:10) Wiiveleela wanyu ennanuupuweliha sa Aparahamu ni Sara. Vaavaa areiyeno iyaakha 70 Aparahamu aahithaama epooma ya Ur nave aya o Kanani ni emusi awe, weiwo owo aahaaleiye okhalaka mmixakalani ophiyerya miyakha mincipale mu ekumi awe yoothene. Chiryene owo ni mwaariye yaahooniherya munepa wa wiiveleela!​—Map. 11:31; Saw. 7:2, 3.

Apwanne munnooniherya munepa yoowo wawiiveleela? Oothene yeenyu munavilela moororomeleya  mu ilukuluku seiya sookacamiha muneera yeeyo Yesu aalonceiye wi neere. Owo aaloca: “Haweni, mwahusihe atxhu othene, mwapatisaka wa nsina na Atithi, na Mwana ni na Munepa Wawela.”—Mat. 28:19.

Masu awi “haweni” anooniherya wi nnaphwanela weeca, weeravo echu mmuteko wa Yehova. Ti woohakalaliha woona mukhalelo okhwaaniheryiwaaya ni oomuchara amvai a Kristu variyari va eyaakha evinre! Ti wookhweya osuwela wi ntata noowerya na Yehova nooreeliha muteko wa olaleerya michaka saphaama sa Omwene wa maloko oothene.​—Mar. 13:10.

Ancipale annawiriyana michaka. Waaca wa alaleeryi eyaakha evinre yaari 8.340.847 ni soohuserya sa Piipiliya opwaha 10.115.264 mweeri ti mweeri. Mweeparipari, ekaaro ya wirimu enneeca, nave nyuwaanotho munneeca! Mutitelele mmuteko anyu waphaama mu elukuluku yeela ehanle, Yehova ahaakumve owala nsele na nivuluso.

Chiryene ti yoophwanelela yoorepa ahu ya eyaakha ya 2017 enaloca eriki “Waroromeleke Apwiya ni wereke saphama”! (Sal. 37:3) Wakhala wi moohiiwelela masu yaala, mpakaka echu yaphaama moorweela wa opaka muteko wa Yehova, nyuwaano munnooniherya wi munnamuroromela. Khwoo mahiku oothene munaphwanela wuupuwela wi hamuri mukhatiinyu. Masu a Yesu anahaala okhwaanela: “Miyo kini kinakhala ni nyuwano mahiku othene ophiyerya ophiyerya nihiku nomaliha elapo.”​—Mat. 28:20.

Muroromele wi Yehova onahaala otitelela oreeliha muteko anyu woororomeleya. Moohipwacha okhaviherya wanyu waari wavakhaani naari wawaaca echu eri yoochuneyaxa wa Yehova ori owetha wanyu ni ovaha ni mathowa aphaama. Soovaha soothene sinnatannya murima awe nave onnahakalala ooniheryaka wi onneemererya. (2 Kor. 9:6, 7) Mwawiihiiha mutitelele omwaacamela Tiithi anyu oosivela moorweela wa ovekela moohihiyererya, ohuserya Masu a Muluku, oya mmithukumano Seekristu, ni owetha mmuteko woolaleerya.

Elukuluku yeela “ehanle vakhani” Musaserya ohiyeriweiye, onnapharihela mikhalelo soothene onaweryeiye wi anihuwelihe mu ephiro ahu ya okhala oororomeleya wa Yehova. (Wup. 12:12) Mukhale vakhiviru va Yehova nave Musaserya onahaala wooceya mu weeha wawe woothene. (Sal. 16:8) Khwoo musuwele wi ninnoosivelaani vancipale nave ninnathamalela okhaviherya wanyu soochuna sa Omwene wa Apwiya mmahiku yaala ookuchula.

Anninyu,

Nikhuuru Noolamulela na Anamoona a Yehova