1. Volocha sa mathamalelo, mano yothanla taani yeyo atchu aryayano vamiithoni vaya olelo?

YESU aariye: “Yowo óhikhala vamoha ni Miyo anakhocha Miyo.” (Mateyu 12:30) Nri vamoha akhweya ni Yehova akhweya ni Satana. Atchu anchipale anupuwela wii anamurumela Muluku mu ephiro yawemereryeya, nyenya Biblia onalocha wii Satana ‘yowo onawoka elapo yothene.’ (Yawupulula 12:9) Mamilyawu a atchu anaroromela wii anamuthamala Muluku, nyenya tchiryene anamurumela Satana, Musaserya! Olelo atchu akhalano yothanla vamiithoni vaya: Omurumela Yehova, “Muluku ékhaikhai,” nari Satana, “atithinnya a wotha.”—Salmo 31:5; Yohane 8:44.

2. Mano tivi yeyo eri emoha ya iphiro seiyo Satana onaphariheliiye muteko wii aahihe atchu omuthamala Muluku?

² Othanla omurumela Yehova ti yothanla yamiruku, yothanla yeyo enaruha wemeryeryiwa ti Muluku. Nyenya Satana hanahakalala mutchu amurumelaka Muluku; owo onnaruha sokachamiha wa yawo anamurumela Muluku. Ephiro emoha onaphariheliiye muteko ti waroha nari ovaanyihanano, naritho waweriwa ni asiinthamwene aya nari amusi aya. Yesu aalopola wii: “Nave a va emusi awe a mutchu enarwa-ekhala amwichani awe.”—Mateyu 10:36.

3. Emusi anyu nari asiinthamwene anyu enovanyihaani nthowa na omuthamala Muluku, mano munahaala wihai?

³ Wakhala wii eyo yohereya wa nyuwo, mano munahaala wihai? Atchu anchipale annasuwela wii othamalela waya ti wotchekeya, nyenya enahovela ohiya. Anona wii onii okhale ohiroromeleya wimusini waya. Mano ennaiweya phama yeyo? Nyuwo musuwenle wii akina mu emusi anyu annapharihela muteko mireche  sawopiha, mano nyuwo himwii mwalopole wii mireche iho inahaala waruhela yoonanara? Mweparipari nyuwo himwii mphitaneno mu opharihela muteko mirecheiho, mano tahi hihaa?

4. Mano tiheni yeyo Yoswa alenliiye aIsrayeli volocha sa othamalela mu elukuluku awe?

⁴ Yoswa ahatetheryela aIsrayeli wii ehiye merelo ni ikano sakeresha sotchekeya sa makholo awe. Owo aariye: “Vanonto, moveni Yehova ni omurumela mokhwanela ni mu eparipari, nave mvihevo miluku yeyo makholo anyu akhwiye yarumenlaya ekhopela ekina ya Muhiche ni o Aigupto, nave murumeleni Yehova.” (Yosuwa 24:14) Yoswa aari ororomeleya wa Muluku nave Yehova ahimureliha. Hiyo nakhala ororomeleya wa Yehova, owo onahaala onrelihatho.—2 Samuele 22:26.

5. Mano ntakhara heni nnaphwanelahu wiitaphula mu itchu sawiisachiheryano?

⁵ Wiitaphula wekeresha yowoka ontaphulelatho wii nnaphwanela onyanya itchu sothene sawiisachiheryano wakhala wii nokhalano, ntoko iphiri, ikhulula, anele ni ikhulula sawiisachiheryano ni ikina sawihihaa. Ori wotchuneya werano hihaa, vawii hihaa onthonyerya wii ninnamuroromela tchiri Yehova.

6. Mano aKristu opacherya yenre eheni ni alivru a sawiisachiheryano?

⁶ Pwatchani yeyo akina a aKristu opacherya yenraya vavaa yathanlilaya okhala mu ekeresha yeparipari. Biblia onii: “Nave anchipale a yawo yéra sawisachiherya yáthukumanya alivro aya, eweyela va mithoni va othene.”—Saweriwa Tarummwa 19:19.

7. Mano tiheni nnahalahu wii nere wakhala wii masololo annanihosha?

⁷ Akina a yawo anapacherya omurumela Yehova yeraka yari akhwiri, anahako nari awiisachiherya tuweryeyavo ohoshiwaka ti masololo. Wakhala wii ela yohereya wa nyuwo, vekelani molipiha wa Yehova, mpharihelaka muteko nsina nawe. Yehova onahaala wokhaviheryani.—Proverpio 18:10; Yakobo 4:7.

8. Mano akristu anona mwawiihai sophwaniherya seiyo inaphariheliwa muteko m’mathamalelo owoka?

⁸ Atchu yawo anatchuna omurumela Yehova hanaphwanela okhalano nari opharihela muteko sophwaniherya sa mathamalelo owoka. Akristu eparipari ‘annechécha mwa nroromelo tahi mwa woneya.’ (2 aKorinto 5:7) Annachichimiha nlamulo na Muluku nenlo nnahiiha opharihela muteko yophwaniherya eri yothene m’mathamalelo.—Eksodo 20:4, 5.

9. Wii nikhale a miruku mano malakiheryo taani yawo Biblia onanivahiye?

⁹ Biblia onii: “Yowo onecha ni atchu amiruku onahaala okhala a miruku.” (Proverpio 13:20) Natchunaka okhala a miruku, nnaphwanela wechaka, nari watanaka ni Anamona a Yehova. Awo tari mu ephiro yeyo enaholela wukumini.—Mateyu 7:14.

10. Mano Anamona a Yehova anahaala wokhaviheryani hai omurumela Muluku?

¹⁰ Anamona annapwatcha atchu tchiryene. Muteko aya tiwawakhaviherya atchu a mirima yaphama wii yiwesheshe eparipari ya Biblia yeyo enaholela wukumini wohimala. Awo annawerya wokhaviheryani mwa omuhuserya Biblia ni nyuwo, mohiliveliwa. Anahaala wakhula makoho anyu nave anahaala wothonyeryani opharihela wanyu muteko yosuweliha ya Biblia mukumini mwanyu.—Yohane 17:3.

11. Mano munahaala okhaviheryiwa mwawiihai mmithukumanoni yekristu?

¹¹ Mmithukumano mwaya, yeyo vanchipalesha ineriwa mu Empa ya Omwene, nyuwo munahaala ohuserya sawachereryeya sa iphiro sa Yehova. Munahaala olipihiwa mu yochichimiheryanyu ya okhala mu ekeresha yeparipari. Munahaala ohusihiwatho ephiro yawakhaviheryano akina ohuserya eparipari ya Biblia.—aHebri 10:24, 25.

12. Mano nivekelo nnahaala wokhaviheryani mwawiihai omurumela Muluku?

¹² Vavaa muniryanyu mpwahiheryeke ohuserya yotchuna ni yokhwela ya Yehova, mohikhwa minikwa othamala wanyu ntakhara sa iphiro sawe sa osivela onahaala wachereryeya. Oritho wotchuneya wachererya otchuna wawerano yeyo enamuhakalaliha yowo ni osepa  yeyo ehinamuhakalaliha yowo. Mupuweleke wii nyuwo munanwerya omwachamela Yehova mu nivekelo ni omveka wii okhaviheryeni werano yeyo eri yaphama ni osepa yeyo eri yoonanara.—1 aKorinto 6:9, 10; aFilipi 4:6.

13. Mano muni muwerye ohakalaliha murima wa Yehova mwawiihai?

¹³ Voovira wa elukuluku, mwiinuwaka omunepani, mohikhwa minikwa munahaala wona otchuneya wawii mukhale Namona a Yehova awiivelela ni opatisiwa. Okhala mphitannene ni arummwa a Yehova, munahaala ohakalaliha murima’we. (Proverpio 27:11) Munahaala okhala veri va alipa ohakalala wa yawo Muluku alonchiiye wii: “Kinarwa-kítchála mwa yawo, nave kinarwa-kechécha mwa yawo; nave kinarwa-kikhala Muluku aya, nave yawo enarwa-ekhala atchu aka.”—2 aKorinto 6:16.