1. Mano tiheni enahaala wereya wakhala wii hiyo ‘nomwachamela Muluku’?

YEHOVA onnasivela yawo anamurumela. Mwanamuthamala Yehova, owo onahaala worelihani hihano vava navetho muholo. Biblia onii: “Mwachameleni Muluku, nave anarwa-awachamelani nyuwo.”—Yakobo 4:8.

2. Mano nnii nachamele wa Muluku mwawiihai nave eyo enahaala ohapuwela mavekelo ahu mwawiihai?

² Wii nyuwo mmwachamele Muluku, munnaphwanela ohuserya ni opharihela muteko Masu awe. Vavaa nyuwo munavekelanyu mopharihana ni yotchuna ya Yehova, owo onnawiriyana mavekelo anyu nave onnakhula. Murummwa eKristu Yohane aarepa: “Nave wu ti onyesererya wiwo nriahuno mwa Yowo [Muluku], wi navekaru etchu ntoko ni okhwela wawe, ananíwa: nave nasuwela wi annaníwa ni etchu yeyo n’navekahu, ninnasuwela wi nokhalano iha nimvekilahu.”—1 Yohane 5:14, 15.

3-7. Mano nnii niphwanye mwawiihai miruku somuluku nave inahaala onikhaviherya mwawiihai?

³ Opwaha vavaa, mwamwachamela Muluku, owo onahaala wovahani miruku yawechiherya sawereya sa nihiku nnihiku. Biblia onii: “Nyenya mukina a nyuwo athoiwa miruku, aveke wa Muluku.”—Yakobo 1:5.

⁴ Mano miruku yomuluku enahaala wokhaviheryani mwawiihai? Vopacherya, enahaala wokhaviheryani osuwela itchu hiiho ihinamuhakalaliha Yehova. Nyuwo munanweryatho ohuserya nthowa nene itchu sene hiiho iryaya sotchekeya ni yeyo munahaalanyu wi mwere wii musepe werano. Osuwela wene weiwo onahaala owiikitchani mu sokachamiha hiiho inaathananiha atchu vothevene. Mu yotakiherya, wiwelela miruku sa Yehova volocha sa okhala aweela mmakhalelo onnakhaviherya arummwa a Muluku wii ehirupaleke ehitchunaka, ehiraveke irecha mukonihanani ni wii ehikhaleke mu othela wohihakalala ni womwareya.

⁵ Mano tiheni ekina yeyo miruku somuluku inahaalayatho wovahani? Munahaala okhalaka mwaphama mukumini. Inahaala wokhaviheryani opakaka sothanla saphama mmakhalelo, ntoko opharihela muteko ikhorowa sanyu. Sophiyeryavo sanyu inahaala okhala seiyo inakhumelela phama nave munarwa mukhocha seiyo ihinakhumelela mohimala.

⁶ Miruku somuluku inahaalatho wokhaviheryani mu watana wanyu ni akina. Nyuwo munahaala okhala ni okumi wa etchoko wohakalalasha. Munahaala okhala ni onthamwene wa okhala wokhala ni akina, navetho munahaala ochichimihiwaka, naritho ni yawene ahiri arummwa a Muluku.

⁷ Opwaha vavaa, miruku somuluku inahaala wokolola eyupuwelo anyu volocha sa okumi. Iho inahaala wokhaviheryani opwaha sokachamiha mukumini. Navetho munahaala okhala ni eyupuwelo yokilatheya volocha sa muholo. Eyupuwelo eyo yokilatheya, enahaala opakiha wii mukhale ni okumi waphama mmwiilini ni mmawupuwelelo.—Proverpio 14:30; Yesaya 48:17.

8. Wakhala wii munamurumela Muluku, mano tiheni muniryanyu muhoveke?

⁸ Wakhala wii munamurumela Muluku eeparipari, munahaala okhala otaphuwa mu wova wiiwo onathananiha yawo ahinamurumela. Okhala wii nyuwo mosuwela wii alipa okhwa hanono okumi mmahiyeni, hinwoovaka yawo akhwiye. Vororomela mu nlakano  nomuluku na ovinya wa alipa okhwa, himoovaka okhwa. Navetho, vosuwela wii Muluku ta ikuru sothene, himoovaka oloiwa ni okhwiri.—Yohane 8:32.

9-11. Mano taani onii akhale m’Paradaiso nave taani yowo onii ahikhalemo?

⁹ Wakhala wii nyuwo momwachamela Muluku, himoovaka sa muholo. Ntoko nonenlahu, Biblia ahilochela khuluwi sokachamiha sinchipale seiyo nnonaahu olelo velaponi yavathi. Yehova onnanlela wii itchu sene seiyo ti sa elukuluku ya vakhani; mohilekela, Omwene wa Muluku onahaala otatusha elapo ela okhala paradaiso.—Luka 21:10, 11, 31; 23:43.

¹⁰ Yaworu pahi anamwachamela Yehova ni omurumela tanahaala okhala m’Paradaiso. Biblia onii: “Vahanle vakhani nave ónanara enamala no: ahe, onarwa-wanyiheryasha epuro awe, nave herwa-ekhala. Nyenya awitchachala tiniriaya yakhele elapo ya vathi; nave enatheyano murechele wawacha.”—Salmo 37:10, 11.

¹¹ Yawo mwa wumiha murima anakhocha wiiwelela malamulo ekhaikhai a Muluku herwa ephwanyaru okumi. (2 aTesalonika 1:8, 9) Herwa ekhalawotho. Anahaala ophitanyiwa ni Satana ni masololo awe mu okhwa wohimala. (Yawupulula 20:10, 14) Nyenya yawo anaphiyerya va omusuwela Yehova ni omurumela anahaala okhala ni ohakalala otokotoko m’Paradaiso velaponi yavathi.

12. Mano tiheni yeyo Biblia onlochiiye sa muholo?

¹² Yehova okhapelela itchu sotikiniha wa yawo anamusivela! Nkonani yeyo Masu awe analochaya sa okumi m’Paradaiso velaponi yavathi:

• Waacha wa yolya: “Mwilaponi’mmo munarwa-mukhala’mo olya munchipale vasulu va miako.”—Salmo 72:16.

• Ipa saphama: “Nave enarwa eteka ipa ni okhalamo.”—Yesaya 65:21.

• Muteko wohakalaliha: “Othanliwaka enarwa ehakalala ni muteko wa matata aya. Herwa ephara muteko mahalene.”—Yesaya 65:22, 23.

• Hevarwa vakhala irecha: “Havo okhala onahaala olocha wii: ‘Kinamwiicheliwa.’”—Yesaya 33:24.

• Hevarwa vakhala sokachamiha sammwiilini: “Nave mu elukuluku eyo miitho a alipa ohoona anahaala ohuleya nave maru a alipa ohiiwa anahaala okhunuwa. Nave mu elukuluku eyo mulipa oorakala onahaala ochuphaka ntoko namukoma nave nlumi na mulipa ohilocha nnarwa nikhuwela mohakalala.”—Yesaya 35:5, 6.

• Hevarwa vakhala sawiichela, nari othanana, nari okhwa: “Nave [Muluku] anarwa-avuta mithori yothene ovíha’mo m’mithoni mwaya; nave hevarwa-vakhalatho okhwa; nave hevarwa-vakhalatho iyinlo, nari wunla, nari sawichela, ntakhara sopacherya iho sóvira.”—Yawupulula 21:4.

• Hevarwa vakhala ekhocho: “[Muluku] onnahíha ekhocho o makutchuwelo elapo ya vathi.”—Salmo 46:9.

• Okumi wohimala: “Ekhaikhai tiniriaya yakhele elapo ya vathi, yikhalelaru mummo okhala wokhala.”—Salmo 37:29.

13. Mano taani yoworu onii awerye otatusha elapo ela okhala paradaiso nave ntakhara heni?

¹³ Atchu herwa ewerya werano itchu sene seiyo, nyenya Yehova torino ikuru sawerano sothene olonchiiye wii onahaala werano. Hiyavo enii emuhiihe werano yeyo owo onatchuniiye. Biblia onii: “Ntakhara hanivovo nsu nimoha norwela wa Muluku nenlo n’ni nihikhale ni ikuru.”—Luka 1:37.

14. Mano ti mu ephiro taani yeyo nyuwo muniryanyu mphwanyerye ephiro ya wukumini wohimala?

¹⁴ Orwela mwa Anamona awe, Yehova onnaavaha atchu mmakupa othene ekari ya ‘ovolowa va mukhora wonimuwa’ ni wecha mu ephiro yeyo enaholela wukumini wohimala. Khalani veri va atchu oohakalala yawo anemererya wiitchaniwa wu. Khalani mu ekeresha yeparipari nave khalani ni mareliho a Yehova mwawiikhalelaru!—Mateyu 7:13, 14.