1. Mano tiheni nnaphwanelahu wera wi nimuhakalalihe Muluku?

WII nikhale ni watanawenesha ni Muluku, hinnaphwanela wii nikhale ni watana ori wothene ni ekeresha yowoka. Nnaphwanela nikhale mu ekeresha yeparipari. Olelo mamilyawu a atchu velaponi yothene ari mu yeyo.

2. Mano Anamona a Yehova anaphwanyeya wowi nave anaphara muteko taani?

² Ntoko olocheliwaya khuluwi m’Bibliani, alipa othamalela eparipari ti “muloko m[u]tokotoko” woorwela mwa “maloko othene, ni mahimo ni atchu ni ilochelo.” (Yawupulula 7:9) Mu ilapo 235, mamilyawu a Anamona a Yehova ari oweiwa wakhaviherya akina ohuserya sa iphiro sa osivela sa Yehova ni myero sawe.

3. Mano taani yowo Anamona anamuthamalelaya nave ti mathamalelo taani yawo awo anasepaya?

³ Anamona annaroora wii ti Yehova pahiru yowo onaphwanelela othamaleliwa. Annakhocha wuramela sophwaniherya sa ikeresha. (1 Yohane 5:21) Awo hanaathamalela alipa okhwa mwa okhala ni makupa mmihapo seiyo inachichimiherya sororomela sowoka sa ikeresha ni “sohusiha sa masololo.” (1 Timoteo 4:1) Mwawiihihaa, annavelela ohakararya wenesha wa yawo akhweliwe, yalelihaka nlakano na Muluku nawii onarwa okhalavo ovinya wa alipa okhwa mu elapo ya paradaiso.—Yohane 5:28, 29; Saweriwa Tarummwa 24:15.

4. Mano arummwa a Muluku anemela vavi m’mwaha wa wiisachiherya?

⁴ Anamona hanono waatana ori wothene ni wiisachiherya, olowa ni okhwiri, tchiryene awo annasuwela wii itchu sene seiyo ti sa Musaserya. Hanaroromela wiisachiherya okhala yawikitchaaya—ororomela waya ori mwa Yehova.—Proverpio 18:10.

5. Mano ti mwawiihai Anamona a Yehova ‘ahinakhalaya a elapo yavathi’?

⁵ Yesu alonche wii ohuseryawe hiyii ‘ekhale a elapo yavathi.’ (Yohane 17:16, NM) Nave Yesu mwanene ahikhocha okhala ni makupa mu epolitika ya m’mahiku awe. (Yohane 6:15) Vamoha-mohatho, Anamona hanavolowa mu epolitika nari mu owanana-wana wa elapo ela. Nyenya annaliva mushokho nave annaiwelela malamulo a elapo yeyo awo anakhalayamo.—Yohane 15:19; aRoma 13:1, 7.

6. Mano malamulo taani yawo arummwa a Muluku anatcharaya volocha sa othela ni omwalana?

⁶ Mwa wiiwelela malamulo a epoma, Anamona annachichimiherya wii othela waya okhale worepihiwa. (Tito 3:1) Anniiwelela malamulo a Muluku nave va nthowa nenla annasepa waacheya. (1 Timoteo 3:2) Opwaha eyo, okhala wii arummwa a Muluku annapharihela muteko makhalelo a Biblia mukumini mwaya, awo yathelana hanamwalana purepure.

7. Mano Anamona anathonyerya mwawiihai osivelana waya?

⁷ Anamona akhalano osivela veri vaya. Osivela iwo, vamoha ni osivela waya wa wa Muluku, onnathukumanya vamoha mu omunna wa eparipari, nari eri a mahimo ni maloko manchipale. Vavaa ipahu inakhumelelaya nari mu ilukuluku sa othoiwa, Anamona annakhaviheryana mukina ni mukhwawe. Mummo anakhalelaya awo annathonyerya osivela.—Yohane 13:35.

8. Mano ti soonanara taani seiyo arummwa a Muluku anasepaya?

⁸ Arummwa a Yehova anniilipiherya okhala ekhaikhai murima. Annasepa wiya, wotha, ochapaheya, ohapaliwa ni merelo ohikhala ekhaikhai m’marochani. Mulopwana hanammana mwaariye. Akina, ehakumve okhala Anamona, yanerano itchu sene hiho, nyenya, ni okhaviheriwa ti Yehova, ahiya werano. “Mwárapihiwa” vamithoni va Muluku.—1 aKorinto 6:9-11.

9. Mano tiheni yeyo livru mukina olonchiiye sa ikeresha somunepani mu Afrika?

⁹ Ikeresha sinchipale inalocha wii sokhalano eparipari. Akhweya tuthonyeryaka miteko mitokotoko sochichimiherya olocha waya. Mu yotakiherya, volocha sa sawiitchaniwa ikeresha somunepani mu Afrika, livru mukina onii: “Ophara muteko wa awiisachiherya nari nahako wokhala ovoloiwaka mpuroni mwaya ni [makhuru ahihano a aKristu]. . . . Awo annachichimiherya wii annalochela sa muholo ni werano sotikiniha. Alipa-miririmu veri vaya annona sa malavi nave annataphulela soloha. Annapharihela muteko mahi, makhurwa aweela, echurwa, ivela ni sotchuwiha sa openusha ni ohiiha irecha.”

10, 11. Mano ntakhara heni sawiitchaniwa sotikiniha olelo ihiryaya eneneryo yawii ekeresha eyo ti ya Muluku?

¹⁰ Atchu a mu ikeresha sene seiyo aniiwa wii sotikiniha eneneryo yawii ekereshaya ti yorelihiwa ti Muluku. Nyenya sotikiniha iho hiinathonyerya eneneryo yawii ekeresha taani yeyo eri yawemereryiwa ti Yehova. Satana onnavaha ikuru akina a othamalela owoka, wii yerekeno ‘miteko yakuru.’ (2 aTesalonika 2:9, NM) Opwaha vavaa, Biblia aalochela khuluwi wii samahala sa werano sotikiniha makupa a Muluku, ntoko olochela, malumi ni miruku, “enarwa-ekhala etheru.”—1 aKorinto 13:8.

¹¹ Yesu ahiwaraliha wii: “Tahi yowo ólocharu wa Miyo, Apwiya, Apwiya, anarwa-avolowa mu Omwene wa Wirimu; nyenya awera owo yokhwela ya Atithaka a Wirimu. Anchipale enarwa-yi wa Miyo, nihiku nenlo, Apwiya, Apwiya, henálokoha masu mu nsina nanyu, ni mu nsina nanyu’tho ovíha minepa yonanara, ni wera mu nsina nanyu’tho saikuru sinchipale? Nave vavo kinarwa-kiwupusherya yawo, Nkinosuwelani nyuwo ilukuluku sothene: vinyani wa Miyo, nyuwo awera sohiléleya.”—Mateyu 7:21-23.

12. Mano taani yowo onii avolowe mu Omwene wa wirimu?

¹² Vanonto, mano taani yowo onii avolowe mu Omwene wa wirimu? Ti yawo anera yotchuna ya Yehova.

13. Mano muteko taani yowo Muluku onatchuniiye wii arummwa’we ephareke olelo, nave taani yawo anaphara mutekowo?

¹³ Mano yotchuna ya Muluku olelo wa arummwawe tiheni? Yesu aariye: “Nave mitchaka eyo ya Omwene enarwa-elaleyeryiwa velaponi yothene ya vathi vano, ekhale namona wa atchu a maloko othene.” (Mateyu 24:14) Ola muteko yowo Anamona a Yehova anapharaya ni mvai.

14. Mano Omwene wa Muluku tiheni nave taani yowo onii alamuleleke mu Omwene owo?

¹⁴ Mu ‘elapo yothene ya vathi vano,’ Anamona a Yehova annalalerya Omwene wa Muluku okhala epoma ya wirimu yeyo enahaala olamulela elapo yothene mu ekhaikhai. Annahusiha wii Yehova omuthanla Kristu Yesu okhala Mwene a Omweno’wo vamoha ni olamulela akhwawe 144.000 yawo yathanliwe veri va muloko wa atchu.—Danieli 7:14, 18; Yawupulula 14:1, 4.

15. Mano Omwene onahaala otolosha eheni?

¹⁵ Empharihelaka muteko Biblia, Anamona annaathonyerya atchu wii Omwene wa Muluku onahaala otolosha mukhalelo wothene wa Satana. Ekeresha yowoka enahaala omala vamoha ni mahusiheryo aya yawo anamunyemula Muluku ni omuchichimiha Musaserya! (Yawupulula 18:8) Ipomatho sa atchu seiyo inavanyihana ni Muluku inahaala omala!—Danieli 2:44.

16. Mano taani anahaala okhala atchu awe a Kristu Yesu nave anahaala okhalaka wowi?

¹⁶ Opwaha vavaa, Anamona a Yehova annasuweliha wii Kristu Yesu onahaala oruha sophuchula sotikiniha wa othene yawo anerano yeyo Muluku ontchuniiye. Awo anahaala okhala atchu awe velaponi yavathi. Biblia onnalakana: “Vawi anarwa-amvulusha óhasuwa owo anakhuweliye; ni óhoshiwa yowo ohinono ómukhaviherya. Anarwa-amuleva óhawa ni ekwasuni, avulusha okumi wa ikwasuni.”—Salmo 72:12, 13.

17. Mano taani ari yaworu pahi analalerya Omwene wa Muluku?

¹⁷ Hinavovo nikhuru nikina na atchu yawo anerano yotchuna ya Muluku elaleryaka mitchaka yaphama ya Omwene. Ti Anamona a Yehova pahiru yawo anasuweliha Omwene wa Muluku velaponi yothene.