MWAHA 1
Mano Tiyawi Ikeresha Sothene Sinnahusiha Eparipari?
1. Mano ikeresha taani ikina hiiho inaphariheliwa muteko mu Afrika?
VAKHIVIRU-KHIVIRU mutchu ori othene mu Afrika onnemererya wii ori wotchuneya omuthamala Muluku. Nyenya wokhalavo ohemereryana volocha sa meerelo a omuthamalela. Akhalavo yawo anavekela m’musikitini, akina anaya va mapuro aweela a ikano nave vavaa akina anayaaya okereshani. Nyenya wahaala okhala wootchekeya wupuwelela wii orivo pahiru ikeresha raruru mu Afrika. Amaka yawo-yawo wookhalavo malamulo ni sororomela sohiyana. Ikeresha sa ikano sinnahiyana vanchipale mapuro ni mapuro makina. Wookhalavo ovuhana otokwene veri va ikeresha seiho inaisera seKristu. Opwahererya va iha itokwene, sookhalavo ikeresha sootaphuwa mu Afrika othene.
Ekeresha Yeyo Nnapharihelahu Muteko Ennaphwanela Wiithipela mu Eparipari
2. (a) Mano tiheni mwawulana enampakiha mutchu okhala mu ekeresha yamori? (b) Mano tiheni ehinemeryeriha wii ekeresha nryahumo ennamuhakalaliha Muluku?
2 Mano nthowa taani oryaya wawii atchu anthamalela merelo athanlilaaya? Atchu anchipale anatchara ekeresha ya makholo aya. Navetho, saweereya sakhalai sorekamela inakhumelela mu ekeresha yeyo awo anakhalayamo olelo. Livru The Africans—A Triple Heritage (Atchu a mu Afrika—Mikelampa Miraru) onii: “Ekeresha yEmaka yohulaana onaya etcheku ya mirupi wa elapo ya Sahara nthowa na woocheiha, . . . eKristu yahulaana onakhuma etcheku ya mirupi wa elapo ya Sahara va nthowa nene nenlo. Wakhala wii Ekeresha yEmaka ya onaya etcheku ya mirupi wa Sahara yahulaana nthowa na nlema, eKristu ya onakhuma etcheku ya mirupi wa Sahara yuulanne nthowa na kaputchi a moro.” Ohiyavo eyo, vakhiviru-khiviru othene hiyo ninnaroromela wii ekeresha yeyo nnakhalahumo ennamuhakalaliha Muluku. Nyenya ekeresha henakhala yaphama mekhayaru nthowa nawii makholo ahu anakhala mummo, nari nthowa nawii ikuru sikina seelecho sahiwiyaatherya makholo ahu akhwiye.
3-5. Mano ti niphwanaphwaniho taani nenlo nnanikhaviherya osuwela wii kahi ikeresha sothene inahusiha eparipari?
3 Ikeresha sothene sinnachichimiherya okhala iveleelaka yoholela yolipa ya omurumeela Muluku, nyenya iho hisaanono muupuwelo olikana. Sinnahusiha itchu sinchipale sohiyana volocha sawii Muluku taani nave tiheni yeyo owo onaweheryeriiye wa hiyo. Nkupuwelani ela: Nloche wii nyuwo moophwanya muteko wa kompanyiya etokwene. Nihiku noopacherya na muteko, nyuwo moosuwela wii ooholela havovo, oveka wiitchuwa. Mwawiihihaa, nyuwo munaveka wa anamuteko araru wii yoleeleni muteko yowo munahaalanyu opharaka. Namuteko opacherya onoolelani wii ooholela ontchuna wii nyuwo mwiirikinvela. Anawili onoolelani wii nyuwo munaphwanela opintaraka empa. Aneraru onoorumani nyuwo wii nveleeleke ikarata.
4 Yootcharelavo, nyuwo munaaveka anamuteko wii yoleeleni mummo ooholela okhalenliiye. Opacherya onlocha wii owo toorekama, mwaammiravo oonanara murima. Anaawiili onii owo tookhuveya, awuuluvala nave amahala. Aneraru onoolelani wii ooholelowo kahi mulopwana—nave ayi muthiyana. Moochichimiheryeya, nyuwo munnaphiyerya woona wii anamuteko othene araru ala hanlocha eparipari. Wakhala wii nyuwo munnatchuna okhala va muteko anyu wahihano owo, mohanyiherya munahaala otchuna osuwela arimwii ooholelowo ari mulopwana nari muthiyana nave owo ontchuna eheni wii nyuwo mwereke.
5 Enereya emohamohatho ni ekeresha. Ni mawuupuwelo manchipale ohiyana volocha sa wii Muluku taani nave eheni owo ontchuniiye wa hiyo, ninnapwanela ochichimiherya wii mukhalelo ahu wa omuthamalela okhale waweemeryeryeya ni eparipari. Nyenya mano nnii niwerye hai ohuserya eparipari volocha sa Muluku?
