MULUKU AIKURU SOTHENE ti Mwanene a maphachuwelo. Okumi ahu onaroromela wa yowo hihano navetho muholo. Owo okhalano ikuru sa oreeliha ni olaka. Okhalano ikuru soovaha okumi ni oviihavo okumi. Nakhalano wemeryeryiwa ni owo, onahaala okhala waphama wa hiyo; naahikhalano wemeryeryiwa ni owo, onahaala okhala woonanara wa hiyo. Ti wotchuneya mwawiihai wi othamalela wahu okhale waweemeryeryeya ni yowo!

Atchu annathamala mu iphiro sinchipale. Wakhala wii ekeresha eri ntoko ephiro, mano ori wawi iphiro sothene sa ikeresha iri saweemeryeryeya ni Muluku? Hoye, hiiri saweemeryeryeya. Yesu, mulipa a miririmu a Muluku, ahithonyerya wii irivo iphiro piliru. Owo aariye: “Mukhora ori m[u]tokotoko, ni ephiro yoyano wutholowani ti yokothóla; nave ari anchipale yawo enavolowa’mo. Vawi mukhora ori wonimuwa, ni yoyevasha ephiro eyo yoyano wukumini, nave óphwanya yeyo ari awalakhanyeya.”—Mateyu 7:13, 14.

Irivo pahiru mishove mili sa ikeresha: emoha enaholela wukumini ni ekina enaholela wutholowani. Yotchuna ya ebrochura ela ti yawi yokhaviheryeni ophwanya ephiro yeyo enaholela wukumini wohimala.