Nsina na Muluku nnarempwa ni ileetera xexe sa Eheepri יהוה, nave ninnaphwanyeya opwaha ikwaha 7.000 mu nlakano nakhalai. Nave Tradução do Novo Mundo onnapharihela ileetera seiha xexe isuweliwe ntoko Tetrakrama, ni masu awi “Yehova.” Nsina nla ninnaphwanyeya Mpiipiliyani ovinyerya khalai. Naamwi anamarepa epharihelaka mmakupa makina a Piipiliya wiichana wa ncicimiho ntoko “Aikuru Soothene,” “Awirimurimu,” naari “Apwiya,” Tetrakrama nsina na Muluku mwaneene.

Yehova Muluku mukhateiye aahaahoolela anamarepa a Piipiliya wi epharihele nsina nawe. Ntoko yootakiherya, owo aamuhoolela mulipa a miririmu Yoweli orepa masu ala: “Yoole oni iichane nsina na Yehova onahaala ovuluxiwa.” (Yoweli 2:32, Tradução do Novo Mundo) Nave Muluku aamweeriha namarepa a Salumu orepa: “Wi esuwele wi Nyenyuru, nsina nanyu mwa Yehova, Mwa Awirimurimu velaponi yothene ya vathi.” (Salumu 83:18, Nlakano Nahihano) Mweeparipari, nsina na Muluku ninnaphwanyeya ikwaha 700 mu liivuru a Salumu pahiru—liivuru a macipo yiipiwa ni achu a Muluku. Nave ntakhara heeni nsina na Muluku nooviihiwamo mu Apiipiliya ancipale? Ntakhara heeni Tradução do Novo Mundo onaphariheleiye nsina “Yehova”? Nave nsina na Muluku nawi Yehova, nnataphulela eheeni?

Ntakhara heeni nsina na Muluku nooviihiwamo mu Apiipiliya ancipale? Aakhalavo mathowa mancipale. Akina anuupuwela wi tahi woochuneya opharihela nsina wi emuromole Muluku a Ikuru soothene. Akina avoloweliwe ni muhapo wa Ayuta wa osepa opharihela nsina na Muluku, akhweya yoovaka weerela opwaalu. Nave tho akina anuupuwela wi woona wi haavo osuwenle phaameene miichanelo a nsina na Muluku, tiyaphaama opharihela wiichana wa ncicimiho, ntoko “Apwiya” naari “Muluku.” Moonelo ola wa achu hiwaano mathipelo, moone ntakhara heeni nnalocaahu hiiha:

• Yaale anoona wi tahi woochuneya wiichana nsina na Muluku, annakhooca wi soorepa sakhalai, ophitaanyerya yaale yaakinhe,  yaanapharihela nsina na Muluku, Yehova. Ntoko elociwaaya osulu, Muluku aheeriha wi nsina nawe niphwanyeyeke Mmasu awe opwaha ikwaha 7.000. Moohikhwa minikwa, owo onachuna wi nsuwele nsina nawe nave nnapharihela.

• Alipa ootaphulela yaawo aviihalemo nsina na Muluku Mpiipiliyani mwaya etakiheryaka muhapo wa Ayuta, ahiiwoka. Naamwi Ayuta yahikhwelaka oromola nsina na Muluku, awo hiyaaviihalemo mu Apiipiliya aya. Iroolo sakhalai saaphwanyiwe o Qumran, waacamela o Mar Morto, ninnaphwanyeyamo nsina na Muluku mu ikwaha sincipale. Alipa ootaphulela akina aavitha nsina nenla na Muluku eraceelihaka ni wiichana wa ncicimiho ntoko “APWIYA” erepaka ni ileetera itokweene. Nlelo nikoho nookhala, Tiheeni yaaweerinhe wi alipa ootaphulela yaala ekhala otaphuwa oviihamo nsina na Muluku mu Apiipiliya, naamwi esuwelaka wi nsina nlo ninnaphwanyeya mu ikwaha sincipale mu soorepa sakhalai? Apwanne awo anoona wi taani aavanhe owerya wi epake matorokelo yaala? Pahiru asuwenle meekhaaya.

• Yaale analoca wi nsina na Muluku hinnaphwanela ophariheliwa nthowa na ohisuwela phaama mukhalelo wa wiichana, annapharihela tho nsina Yesu. Nyenya tho, oohuserya a nsana noopacerya mukhalelo yiichanaaya nsina Yesu ti woohiyana vancipale ni mukhalelo nniichanaahu olelo. Wa Akristu yaari Ayuta, akhweya nsina Yesu yiichana mmukhalelo ola Ye·shuʹa‛.[8] Nave masu awi “Kristu” yiichana Ma·shi’ach, naari “Messiah.” Nave Akristu yaloca Ekiriki yiichana mmukhalelo ola I·e·sous’ Khri·stos’, Akristu yaloca Elatino yiichana Ie’sus Chri’stus. Moorweela wa ohoolela wa Muluku, mukhalelo anamarepa a Piipiliya a Ekiriki yaarempaaya nsina nawe, ennooniherya wi Akristu a nsana noopacerya yaacharinhe mukhalelo wa wiichana waari wookhoveleliwa ni wawunlaana mu elocelo aya. Moolikana, Nikhuuru na Omutaphulela Piipiliya Tradução do Novo Mundo naahoona tho wi ti yaweemereryeya orepa nsina na Muluku mmukhalelo ola “Yehova,” naamwi esuwelaka wi heniiwanana phaameene ni mukhalelo nsina na Muluku naromoliwaaya mu Eheepri yakhalai.

Ntakhara heeni Tradução do Novo Mundo onnapharihela nsina nawi “Jeová” mu Elomwe “Yehova”? Mu Elomwe, ileetera xexe sa Tetrakrama (יהוה) sinalikana ni ileetera iha YHWH, nave ti soovila waalakhanya. Ntoko yaaryaaya yookhoveleleya wa anamarepa akhalai a Eheepri, marepelo yaala a Tetrakrama hiyaakhalano ileetera siniichaniwa ivokale. Vavaa achu yalocaaya Eheepri ela nihiku nnihiku, alipa awaalakhanya yaanaavya ivokale soophwanelela.

Ivinrevo miyakha mincipale Soorepa sa Eheepri sikwaaxiwe, alipa oohuserya a Ayuta yaahoona mukhalelo mukina wa waalakhanya masu, naari ineneeryo, yooniheryaka ivokaali soophwanela opharihela variyari va waalakhanya Eheepri. Mu elukuluku yeeyo, Ayuta ancipale  yaapacenryaaya okhalano moonelo wooheseya wi yaari yoonanara oromola nsina na Muluku moovuwa, mwawiihiiha yaaraceeliha ni miichanelo a ncicimiho. Hiiha, enakhala ntoko wi variyari va otaphulela waya, wakhala wi aamphwanya Tetrakrama, awo yaanahelevo ivokale. Nyenya, soorepa sa ivokaali hasinakhaviherya wi muchu asuwele mukhalelo niichaniwaaya nsina nlo woopaceryani mu elocelo ya Eheepri. Akina anuupuwela wi nsina nlo niichaniwa “Yahweh,” eniiha akina erino moonelo woohiyana. Eroolo ya Mar Morto yookhalano makupa a liivuru a Onamukutxho mu elocelo ya Ekiriki, nave nsina na Muluku nrempwe mmukhalelo ola: Iao. Ohiya yeeyoru, mu elocelo ya Ekiriki yoopacerya, marepeliwo a nsina nla yaari oohiyana ntoko: Iae, I·a·be’, ni I·a·ou·e’. Mwawiihiiha, haavo mathowa a waakaaha. Hiyaano hansuwenle mukhalelo achu a Muluku yiichanaaya khalai mu elocelo ya Eheepri. (Maphatxuwelo 13:4; Mukwaha 3:15, nwt) Echu nnasuwelaahu ti yawi Muluku aanapharihela nsina nawe vaavaa aloceiye ni achu awe, nave tho wi awo yaanaloca ni yoowo eromolaka nsina nawe, ni yaanaaleela akina mootaphuwa.—Mukwaha 6:2; 1 Mamwene 8:23; Salumu 99:9, NN.

Vano, ntakhara heeni Tradução do Novo Mundo onnapharihela nsina nawi “Jeová” mu Elomwe “Yehova”? Nthowa nawi miichanelo ala aasuweliwa ovinyerya khalai mu ilocelo sincipale.

Ntoko yootakiherya, mu Piipiliya a Elomwe Nlakano Nahihano, opakiwe ni National Bible Society of Scotland mu eyaakha ya 1930 ninnaphwanyeyamo nsina na Muluku ikwaha sincipale mu Liivuru a Salumu, nave mu Piipiliya ola, nsina na Muluku nrempwale mmukhalelo ola “Yehova.”

Yootakiherya ekina ennaphwanyeya mu ilocelo sikina. Mu elocelo ya Enklesi, nsina na Muluku ninnaphwanyeya ekwaha yoopacerya mu Piipiliya opakiwe mu eyaakha ya 1530, mu Piipiliya iichaniwa Pentateuco aataphuleliwe ni William Tyndale. Owo aapharihenle mukhalelo ola wa orepa “Iehouah”. Moovira wa elukuluku, mukhalelo wa orepa Enklesi waatorokeya, nave tho marepeliwo a nsina na Muluku yaatorokeya. Ntoko yootakiherya, mu 1612, namarepa awiichaniwa Henry Ainsworth aapharihela marepeliwo ala “Iehovah” mu liivuru a Salumu. Nave ohoolo  waya, mu 1639, vaavaa mukhalelo wa orepa waatorokiwaaya, yaaphariheliwa marepeliwo ala “Jehovah.” Mu 1901, alipa ootaphulela amurempe Piipiliya awiichaniwa American Standard Version yaapharihela tho marepeliwo awi “Jehovah” marepeliwo anaphwanyeya mu soorepa sa Eheepri.

Mulipa ootholathola a Piipiliya awiichaniwa Joseph Bryant Rotherham, aaloca mathowa amweerinhe opharihela nsina nawi “Jehovah” ohiya “Yahweh” mu liivuru awe Studies in the Psalms (Omuhuserya Salumu), aapakiwe mu eyaakha ya 1911, owo aaloca wi achuna orepa “nsina mmukhalelo wookhweya (nave waahaala okhala waweemereryeya) wa alipa awaalakhanya ancipale.” Mu 1930 mulipa ootholathola mukina awiichaniwa A. F. Kirkpatrick aaloca masu oolikana vooloca sa opharihela marepeliwo “Jehovah.” Owo aahi: “Marepeliwo awi Yahveh naari Yahaveh takhalai; nyenya JEHOVAH taniiwanana ni elocelo ya mutano ya Enklesi, nave echu eri yoochuneyaxa tahi mukhalelo wa oromola, nyenya osuwela wi nla Nsina Noorempwano, ohiya miichanelo a ncicimiho ntoko ‘Apwiya.’

Nsina nawi Yehova nnataphulela eheeni? Nsina nawi Yehova, mu elocelo ya Eheepri, nnarweela mmasu anataphulela ‘okhala; wooniherya okhala,’ nave alipa oomutholathola Piipiliya ancipale anneemererya wi marepeliwo ala anniiwanana ni yootaphulela ya masu a Eheepri. Mwawiihiiha, Nikhuuru na Omutaphulela Piipiliya Tradução do Novo Mundo noophiyerya makuchuwelo wi nsina na Muluku nnataphulela wi “Owo Onneeriha wi Ekhale.” Moonelo wa alipa oomutholathola Piipiliya ti woohiyana, vanthowa na yeeyo hannaphwanela waakaaha. Nyenya masu ala anniiwanana phaama ni murici wa Mpatuxa a ichu soothene ni mulipa a waakhwaniherya yoochuna awe. Owo teerinhe wi soopatuxiwa sawooneya ni ankeelo sikhalevo, nave tho onnatitelela weeriha wi yoochuna awe ekhwaanele.